សំណាញ់​គ្រួសារ​និង​បក្សពួក​និយម​ក្នុង​ជួរ​បក្ស​សង្គ្រោះ​ជាតិ

មន្ត្រី​ជាន់​ខ្ពស់​របស់​រដ្ឋាភិបាល និង​ក្រុម​អ្នក​វិភាគ​ខ្លះ​បាន​ផ្ដល់​អនុសាសន៍​ដល់​ក្រុម​បក្ស​សង្គ្រោះ​ជាតិ​ថ្មី ដែល​ទើប​នឹង​ច្របាច់​បញ្ចូល​គ្នា​រវាង​បក្ស​ប្រឆាំង​ពីរ ថា​គួរ​ចាប់​ផ្ដើម​កាច់​ចង្កូត​នាវា​បក្ស​នេះ ប្រកប​ដោយ​ភាព​ស្អាតស្អំ ចេញ​ឲ្យ​ឆ្ងាយ​ពី​អ្វី​ដែល​គេ​ហៅ​ថា គ្រួសារ​និយម និង បក្សពួក​និយម។
ដោយ តាំង សារ៉ាដា
2012-12-09
អ៊ីម៉ែល
មតិ
ចែករំលែក
បោះពុម្ព
  • បោះពុម្ព
  • ចែករំលែក
  • មតិ
  • អ៊ីម៉ែល

ទោះ​បី​ជា​យ៉ាង​ណា​ក៏ដោយ ក្រុម​មន្ត្រី​បក្ស​ប្រឆាំង​និយាយ​ថា អ្វី​ដែល​ជា​ការ​សំខាន់​ជាង​គេ​នៅ​ពេល​ចំពោះ​មុខ​នេះ គឺ​ការ​រួបរួម​អ្នក​ប្រជាធិបតេយ្យ។

នៅ​ពេល​នេះ​មន្ត្រី​នៃ​គណបក្ស​កាន់​អំណាច​ដែល​ជា​គណបក្ស​តែង​រង​ការ​រិះគន់​ពី​មហាជន ថា​ដឹកនាំ​ប្រទេស​ដោយ​ការ​ចង​សំណាញ់​អំណាច​តាម​រយៈ​សាច់សាលោហិត និង​បក្សពួក​និយម​នោះ បាន​បក​រិះគន់​ក្រុម​បក្ស​សង្គ្រោះ​ជាតិ​ថា កំពុង​រៀបចំ​ថ្នាក់​ដឹកនាំ​គណបក្ស​របស់​ខ្លួន​ប្រកប​ដោយ​សាច់ញាតិ និង​បក្ស​ពួក​និយម។

អ្នក​នាំ​ពាក្យ​នៃ​ទីស្ដីការ​គណៈរដ្ឋមន្ត្រី លោក ផៃ ស៊ីផាន ​ដែល​ធ្លាប់​ផ្លាស់ប្ដូរ​ពី​គណបក្ស​មួយ​ទៅ​គណបក្ស​មួយ បាន​ផ្ដល់​អនុសាសន៍​ដល់​ថ្នាក់ដឹកនាំ​បក្ស​សង្គ្រោះ​ជាតិ​ថ្មី​ថា គួរ​ចាប់​បង្កើត​យន្តការ​សំបូរ​បែប​មួយ​ក្នុង​ការ​ផ្ដល់​ឱកាស​ដល់​សមាជិក​ផ្សេងៗ​របស់​ខ្លួន​ឲ្យ​បាន​ចូលរួម​ក្នុង​ក្រុម​ដែល​ធ្វើ​សេចក្ដី​សម្រេច​នៃ​ថ្នាក់ដឹកនាំ​កំពូល​របស់​បក្ស។

ការ​ថ្លែង​របស់​លោក ផៃ ស៊ីផាន ធ្វើ​ឡើង​នៅ​អំឡុង​ដែល​បក្ស​សង្គ្រោះ​ជាតិ ចាប់​បង្កើត​គណៈកម្មាធិការ​អចិន្ត្រៃយ៍​របស់​ខ្លួន​ចំនួន ១៦​រូប ដោយ​មាន​សមាជិក ៨​រូប​មក​ពី​ខាង​បក្ស សម រង្ស៊ី និង ៨​រូប​ផ្សេង​ទៀត​ពី​ខាង​បក្ស​សិទ្ធិ​មនុស្ស។

សមាជិក​ចំនួន ៨​រូប​ពី​ខាង​គណបក្ស សម រង្ស៊ី មាន​លោក សម រង្ស៊ី លោក យឹម សុវណ្ណ និង​ភរិយា គឺ​អ្នកស្រី កែ សុវណ្ណរតន៍ លោក អេង ឆៃអ៊ាង និង​លោក គួយ ប៊ុនរឿន ដែល​ជា​បង​ថ្លៃ​ប្អូន​ថ្លៃ​នឹង​គ្នា លោក សុន ឆ័យ អ្នកស្រី មូរ សុខហួរ និង​លោក ម៉ែន សុថាវរិន្ទ្រ ដែល​ជា​មនុស្ស​ស្និទ្ធស្នាល​នឹង​អ្នកស្រី ជូឡុង សូមូរ៉ា ភរិយា​របស់​លោក សម រង្ស៊ី។

ចំណែក​សមាជិក ៨​រូប​ផ្សេង​ទៀត​ពី​ខាង​បក្ស​សិទ្ធិ​មនុស្ស​វិញ មាន​លោក កឹម សុខា លោក ម៉ៅ មុនីវណ្ណ លោក ប៉ុល ហំម លោក អ៊ូ ចាន់រិទ្ធិ និង អ៊ូ ចាន់រ័ត្ន បង​ប្អូន​បង្កើត​នឹង​គ្នា លោក សាម ស៊ុនឌឿន លោក យ៉ែម បុញ្ញឫទ្ធិ និង​លោក តុប វាន់ចាន់។

លោក ផៃ ស៊ីផាន មាន​ប្រសាសន៍​ថា ការ​ដាក់​សែស្រឡាយ ឬ​បក្ស​ពួក​ច្រើន​ក្នុង​ថ្នាក់​ដឹក​កំពូល​របស់​គណបក្ស​ដូច្នេះ អាច​នាំ​ឲ្យ​មាន​ទំនាស់​ផលប្រយោជន៍​ដ៏​ធំ​ទៅ​ថ្ងៃ​មុខ។

ទោះ​បី​ជា​យ៉ាង​ណា​ក៏ដោយ មន្ត្រី​គណបក្ស​ប្រឆាំង​បាន​បក​ស្រាយ​ថា ការ​ជ្រើសរើស​សមាជិក​សំរាប់​គណៈកម្មាធិការ​អចិន្ត្រៃយ៍​នៃ​គណបក្ស​សង្គ្រោះ​ជាតិ​ថ្មី​នេះ គឺ​ធ្វើ​ឡើង​ដោយ​ការ​ប្រុងប្រយ័ត្ន​ទៅ​តាម​សមត្ថភាព និង​ការ​ទទួល​ខុស​ត្រូវ​ខ្ពស់ គួបផ្សំ​នឹង​បទពិសោធន៍​ខ្ពស់​នៃ​សមាជិក​នីមួយៗ។

លោក សុន ឆ័យ បន្ត​ថា អ្វី​ដែល​ជា​ការ​ចាំបាច់​ចំពោះ​មុខ​សំរាប់​គណបក្ស​ថ្មី​នេះ គឺ​ការ​ចាត់​តាំង​តួនាទី​សំខាន់ៗ​សំរាប់​សមាជិក​បក្ស​សង្គ្រោះ​ជាតិ។

ក្រុម​អ្នក​ឃ្លាំមើល​ខ្លះ​និយាយ​ថា គ្រួសារ​និយម ឬ​បក្ស​ពួក​និយម មិន​ថា នៅ​ក្នុង​ជួរ​រដ្ឋាភិបាល បក្ស​ប្រឆាំង សង្គម​ស៊ីវិល ឬ​សមាគម​នោះ​ទេ សុទ្ធតែ​អាច​ផ្ដល់​លទ្ធភាព​គ្រប់គ្រាន់ គ្រប់​ពេល និង​គ្រប់​បែប​យ៉ាង ក្នុង​ការ​ធ្វើ​ឲ្យ​មាន​អំពើ​ពុករលួយ ការ​រំលោភ​អំណាច​ជា​លក្ខណៈ​ប្រព័ន្ធ និង​ទំនាស់​ផល​ប្រយោជន៍​មិន​ចេះ​ចប់។

អ្នក​វិភាគ​ឯករាជ្យ​លោក​បណ្ឌិត ឡៅ ម៉ុងហៃ មាន​ប្រសាសន៍​ថា ដើម្បី​កសាង​ប្រជាធិបតេយ្យ​នៅ​ក្នុង​ប្រទេស​ទៅ​បាន លុះ​ក្រុម​អ្នក​នយោបាយ​ត្រូវ​ជៀសវាង​ជា​អតិបរមា​នូវ​ការ​ប្រកាន់​គ្រួសារ​និយម។

ទោះ​បី​ជា​យ៉ាង​ណា​ក៏ដោយ លោក ម៉ៅ មុនីវណ្ណ សមាជិក​គណៈកម្មាធិការ​អចិន្ត្រៃយ៍​នៃ​គណបក្ស​សង្គ្រោះ​ជាតិ​មក​ពី​គណបក្ស​សិទ្ធិ​មនុស្ស ថ្លែង​ថា អ្វី​ដែល​សំខាន់​បំផុត​សំរាប់​សភាពការណ៍​ចំពោះ​មុខ​មុន​ការ​បោះ​ឆ្នោត​ឆ្នាំ​២០១៣ ខាង​មុខ​នេះ គឺ​ក្រុម​អ្នក​ប្រជាធិបតេយ្យ​ត្រូវ​តែ​រួម​គ្នា​ដើម្បី​ប្រជែង​ជាមួយ​បក្ស​កាន់​អំណាច​ដ៏​យូរ​ឆ្នាំ​នោះ។

លោក មៅ មុនីវណ្ណ បន្ត​ថា សមាសភាព​សមាជិក​គណបក្ស​សង្គ្រោះ​ជាតិ​ថ្មី​នេះ នឹង​បន្ថែម​ពី​ចំនួន ១៦​រូប រហូត​ដល់ ១៩​រូប ទៅ​តាម​ការ​ចែង​ក្នុង​បទបញ្ជា​ផ្ទៃក្នុង​របស់​បក្ស៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

មតិ (10)
  • បោះពុម្ព
  • ចែករំលែក
  • អ៊ីម៉ែល

Democratic man

ពី Phnom Penh

មានតែអ្នកដឹងនាំប្រទេសស្គាល់ដំណែងហើយ ហើយគិតថាខ្លួនឯងដឹកនាំប្រទេសយូរពេក ត្រូវលាឈប់ពីដំណែងនោះ ប្រគល់ឲ្យអ្នកមានសមត្ថភាពជំនាន់ក្រោយដឹកនាំម្តង នោះទើបជាអ្នកសេ្នហាជាតិពិតប្រាកដ ដូចអតីតកប្រធានាធិបតីហរដ្ឋអាមេរិកអញ្ចឹង!

Dec 11, 2012 04:32 AM

អ្នក​អាន​អនាមិក

គ្មានគណបក្សណា មិនមានសំណាញ់គ្រួសារ និងបក្សពួកនិយមនោះទេ!!

Dec 10, 2012 09:09 AM

va

ពី DC

how about in side HUN SEN govment?

Dec 09, 2012 08:13 PM

ចាន់ រតនា

ពី ខេត្តពោធិសាត់

បើគ្រួសារខ្មែរណាដែលធ្វើការបំរើជាតិ និងប្រជាជនរបស់ខ្លួន ខ្ញុំនឹងបោះឆ្នោតឲ្យគ្រួសារនោះ ។ ផ្ទុយទៅវិញគ្រួសារបងប្អូនរបស់បក្សប្រជាជន កំពុងលក់ជាតិយ៉ាងអនាធិបតី ។ តើមានរឿងអីគួរឲ្យសង្ស័យនោះ? កាលពីទសវត្សរឆ្នាំ ១៩៦០ ក្រុមរាជវង្សជាអ្នកខ្លាំងក្លាបំផុតក្នុងការជួយជ្រោមជ្រែងពួកយៀកកុង ពេលនោះមានម្ចាស់ក្សត្រីមួយអង្គ បានសំរេចព្រះទ័យដើរទិញអង្ករនិងត្រីងៀតយកទៅលក់ឲ្យពួកយៀកកុងនឹងគេដែរ ។ តើមានខ្មែរប៉ុន្មាននាក់ដឹងរឿងនេះ?

Dec 09, 2012 07:36 PM

អ្នក​អាន​អនាមិក

ចង់បង្រ្កាបអំពើរពុករលួយ និង គ្រួសារបក្សពួកនិយម! គឺមានតែរបបផ្តាច់ការគម្មុយនិស្តតែប៉ុណ្ណោះដែលគួអោយទុកចិត្តបាន! ក្រៅពីនោះកុំសង្ឃឹមអោយសោះ គឺ១តំប និង ៤ទេ ! បើទោះជាមានការរិតបន្តឹងច្បាប់ដល់កំរិតណាក៍ដោយ ។

Dec 09, 2012 04:22 PM

មើល​មតិ​ទាំង​អស់.