អ្នកនិពន្ធខ្មែរចេញផ្សាយសៀវភៅថ្មីស្ដីពី អ្នកម្ដាយនិងកូនអង្គការ
h070512ts2.mp3
សៀវភៅនេះ គឺជាស្នាដៃនិពន្ធលើកទីពីរហើយ ក្រោយពីលោក ឆាយ សុផល បានចេញផ្សាយសៀវភៅស្នាដៃលើកដំបូង កាលពីខែមករា ឆ្នាំ២០១២ កន្លងទៅនេះ មានឈ្មោះថា ហ៊ុន សែន/នយោបាយ និង អំណាច ក្នុងប្រវត្តិសាស្ត្រខ្មែរជាង ៤០ឆ្នាំ។
សៀវភៅថ្មីដែលចេញផ្សាយនៅថ្ងៃទី៥ ខែកក្កដា ឆ្នាំ២០១២ បានសរសេរលាតត្រដាងអំពីការរំលោភសិទ្ធិកុមារយ៉ាងធ្ងន់ធ្ងរ នៅក្នុងរបបខ្មែរក្រហម ដោយសារអង្គការខ្មែរក្រហមនោះបានប្រើប្រាស់កុមារអាយុជាង ១០ឆ្នាំ ដើម្បីតាមដានសកម្មភាពរបស់ក្រុមគ្រួសារ និងឪពុកម្តាយខ្លួនឯង។
កុមារទាំងនោះចាំបាច់ត្រូវរាយការណ៍ជូនអង្គការ ហើយក្រោយមក កងឈ្លបរបស់អង្គការ បានយកឪពុកម្តាយរបស់កុមារនោះ យកទៅកម្ទេចចោល ឬសម្លាប់ចោល។
សៀវភៅនេះ ត្រូវបានជួយឧបត្ថម្ភថវិកាបោះពុម្ព ដោយរដ្ឋមន្ត្រីក្រសួងព័ត៌មាន និងជាអ្នកនាំពាក្យរបស់រដ្ឋាភិបាល លោក ខៀវ កាញ៉ារិទ្ធិ។ ខ្លឹមសារក្នុងសៀវភៅនេះ ក៏ត្រូវបានពិនិត្យដោយប្រធានមជ្ឈមណ្ឌលស្រាវជ្រាវ របបខ្មែរក្រហម លោក ឆាង យុគ មុនការចេញផ្សាយនេះ។
អ្នកនិពន្ធសៀវភៅនេះ បានបោះពុម្ពលើកដំបូងចំនួន ១ម៉ឺនក្បាល ក្នុងនោះមានជាភាសាខ្មែរចំនួន ៥ពាន់ក្បាល និងជាភាសាអង់គ្លេសចំនួន ៥ពាន់ក្បាលទៀត ដើម្បីចែកជូននៅតាមបណ្ណាល័យជាតិ និងបណ្ណាល័យ នៅតាមសាកលវិទ្យាល័យ និងមហាវិទ្យាល័យ។ ក្រៅពីនេះ គេដាក់លក់នៅតាមទីផ្សារនានា។
និពន្ធនាយកនៃកាសែត ខេមបូឌា ញូវ លោក ឆាយ សុផល បានមានប្រសាសន៍នៅក្នុងសន្និសីទកាសែត នៅក្លឹបអ្នកកាសែតកម្ពុជា នៅថ្ងៃទី៥ ខែកក្កដា ឆ្នាំ២០១២ ថា សៀវភៅមានលក្ខណៈពិសេសជាងសៀវភៅដទៃទៀត ដោយសារតែសៀវភៅនេះ បានលាតត្រដាងជាសាច់រឿងរបស់កុមារម្នាក់ នៅស្រុកត្រាំកក់ ខេត្តតាកែវ ដែលបានស្មោះត្រង់ជាមួយអង្គការខ្មែរក្រហម ហើយបានរាយការណ៍ឲ្យខ្មែរក្រហម កម្ទេចឪពុកម្តាយខ្លួនឯង។
លោក ឆាយ សុផល៖ «នៅក្នុងរបបនោះ គឺគេបណ្ដុះគំនិតឲ្យយើងស្អប់ឪពុកម្តាយ គេបានបង្ហាញយើងថា ឪពុកម្តាយគ្រាន់តែអ្នកបង្កើតយើងទេ ឯឪពុកម្តាយពិតប្រាកដ គឺជាអង្គការ។ អង្គការ គឺជាអ្នកបំភ្លឺផ្លូវ ផ្តល់អនាគត ចិញ្ចឹមបីបាច់ថែរក្សា របស់យើងហើយ។ ប្រសិនណាឪពុកម្តាយហ៊ានធ្វើខុស យើងអាចរាយការណ៍ជូនអង្គការ ខាងកងរបស់ខ្ញុំហ្នឹង គឺខ្ញុំនៅចាំឈ្មោះអត់បាន គាត់បានរាយការណ៍ គ្រាន់តែឪពុកម្តាយរបស់គាត់ហ្នឹង លួចចេកមួយស្ទង ឃើញគាត់ទៅរាយការណ៍ប្រាប់អង្គការ ឈ្លបរបស់អង្គការ គឺបានយកគាត់ទៅកម្ទេច។ ភាសាកម្ទេច គឺយកទៅសម្លាប់»។
អ្នកនាំពាក្យសាលាក្តីខ្មែរក្រហម លោក នេត្រ ភ័ក្រ្តា បានមានប្រសាសន៍ថា សាច់រឿងនៅក្នុងសៀវភៅនេះ គឺជាភស្តុតាងថ្មីមួយទៀត៖ «មានសៀវភៅខ្លះសរសេរ ហើយយើងបានស្តាប់ឭនូវការរ៉ាយរ៉ាប់តាមមាត់ដោយផ្ទាល់។ ប៉ុន្តែឥឡូវនេះ គឺយើងឃើញចងក្រងជាសៀវភៅ គឺជាការល្អ ហើយយើងគិតថា ការចងក្រងនេះ គឺនឹងផ្តល់ជាព័ត៌មានសម្រាប់អ្នកជំនាន់ក្រោយ ដើម្បីសិក្សាស្វែងយល់អំពីរឿងរ៉ាវដែលបានកើតឡើងនៅក្នុងរបបខ្មែរក្រហម»។
ដោយឡែក ចាប់តាំងពីឆ្នាំ២០០១ កន្លងមក សៀវភៅដែលជាស្នាដៃនិពន្ធដោយ លោក សម រង្ស៊ី ប្រធានគណបក្ស សម រង្ស៊ី ត្រូវបានក្រសួងមហាផ្ទៃ បានហាមឃាត់មិនឲ្យចេញផ្សាយ ឬចែកចាយនោះឡើយ។
សៀវភៅនោះមានឈ្មោះថា ឫសចាក់ក្នុងថ្ម ដែលមានអត្ថន័យរិះគន់ ការដឹកនាំរបស់លោកនាយករដ្ឋមន្ត្រី ហ៊ុន សែន និងមន្ត្រីជាន់ខ្ពស់រដ្ឋាភិបាលមួយចំនួនទៀត និងបានរិះគន់អំពើពុករលួយ ដែលកំពុងកើតមានក្នុងសង្គមបច្ចុប្បន្ន៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
ខ្មែរលើ
ខ្ញុំសូមគាំទ្រ អ្នកអានអនាមិក សូមចេញនូវចំណងជើងជាភាសាអង់គ្លេសនៃសៀវភៅរបស់លោក សម រង្សីផង ។
Jul 09, 2012 12:08 PM
-
ស្ដាប់ផ្ទាល់
(ព្រឹក ៥:៣០-៦:៣០ ល្ងាច ៧:៣០-៨:៣០) - សំឡេង
ភាសា
