ក្នុងសេចក្តីថ្លែងការណ៍៣ទំព័រចុះថ្ងៃទី១៦ តុលា ឆ្នាំ២០០៩នេះ មជ្ឈមណ្ឌលសិទ្ធិមនុស្សកម្ពុជាបានលើកឡើងនូវចំណុចព្រួយបារម្ភនៃច្បាប់ព្រហ្មទណ្ឌថ្មី ពីព្រោះថា ច្បាប់នេះបានកំណត់ឲ្យមានការដាក់ទោសជាបទឧក្រិដ្ឋកម្មចំពោះបទបរិហារកេរ្តិ៍, និយមន័យនៃខ្លឹមសារជាច្រើនមាត្រាមានភាពមិនច្បាស់លាស់ និងមានភាពទំលំទូលាយ ដែលអាចនាំឲ្យមានការបកស្រាយខុសនិងអនុវត្តច្បាប់នេះដោយបំពាន ហើយអ្វីដែលជាការព្រួយបារម្ភមួយទៀតគឺកម្រិតទោសទណ្ឌធ្ងន់ហួសហេតុ និងការដាក់ទម្ងន់ទោសដូចគ្នាចំពោះអ្នកដែលប៉ុនប៉ងប្រព្រឹត្តបទឧក្រិដ្ឋនិងអ្នកដែលប្រព្រឹត្តបទឧក្រិដ្ឋបានសម្រេច។
អាស្រ័យដូចបានបញ្ជាក់ខាងលើនេះ មជ្ឈមណ្ឌលសិទ្ធិមនុស្សកម្ពុជាស្នើសុំឲ្យរាជរដ្ឋាភិបាលខ្មែរដកចេញនូវបទល្មើសទាក់ទងនឹងបទបរិហារកេរ្តិ៍ពីក្រមព្រហ្មទណ្ឌដើម្បីធ្វើឲ្យច្បាប់ជាតិមានលំនាំស្របតាមច្បាប់អន្តរជាតិ។
មជ្ឈមណ្ឌលសិទ្ធិមនុស្សកម្ពុជាមានជំនឿថា ការដែលច្បាប់នេះមាននិយមន័យមិនច្បាស់លាស់និងទំលំទូលាយនេះ នោះគឺជាការបើកឱកាសឲ្យតុលាការខ្មែរបកស្រាយខុសនិងរំលោភបំពានលើច្បាប់។ បន្ថែមពីនេះមជ្ឈមណ្ឌលសិទ្ធិមនុស្សកម្ពុជាសូមអំពាវនាវសុំឲ្យរាជរដ្ឋាភិបាលខ្មែរពិចារណាឡើងវិញអំពីសិទ្ធិមនុស្សនិងសិទ្ធិសេរីភាពនៃការបញ្ចេញមតិដែលជាគោលដៅចម្បងនៃលទ្ធិប្រជាធិបតេយ្យ៕