សង្គមស៊ីវិលស្នើឲ្យសមាសភាពដឹកនាំ គ.ជ.ប អាណត្តិថ្មីជាមនុស្សស្អាតស្អំ
h070912ay.mp3
លោក កឹម សុខា ប្រធានគណបក្ស សិទ្ធិមនុស្ស និងជាអ្នកតំណាងរាស្ត្រមណ្ឌលកំពង់ចាម លោកបានឲ្យដឹងនៅថ្ងៃទី៩ ខែកក្កដា ថា រដ្ឋាភិបាល និងក្រសួងមហាផ្ទៃ ត្រូវជ្រើសរើសសមាសភាពដឹកនាំស្ថាប័ន គ.ជ.ប អាណត្តិថ្មី ជាមនុស្សមិនស្ថិតក្រោមគណបក្សនយោបាយណាមួយ។
លោកបន្តថា សមាសភាពស្ថាប័ន គ.ជ.ប អាណត្តិថ្មី គួរជ្រើសចេញពីអតីតមន្ត្រីសង្គមស៊ីវិល ឬមន្ត្រីរដ្ឋាភិបាល ដែលចូលនិវត្តន៍យ៉ាងតិច១០ មកជំនួស ទើបអាចឲ្យស្ថាប័ននេះមានឯករាជ្យ។
លោកចាត់ទុកសមាសភាពដឹកនាំស្ថាប័ន គ.ជ.ប តែងតាំងចេញពីគណបក្សនយោបាយ ប្រសិទ្ធភាពធ្វើការងាររបស់មន្ត្រីទាំងនោះមិនឯករាជ្យនោះទេ។
ដូចគ្នាដែរ លោកបណ្ឌិត ហង្ស ពុទ្ធា នាយកប្រតិបត្តិអង្គការ និចហ្វិក ក៏បានទទូចឲ្យរដ្ឋាភិបាល ឬស្ថាប័នពាក់ព័ន្ធធ្វើការផ្លាស់ប្ដូរសមាសភាពដឹកនាំស្ថាប័ន គ.ជ.ប អាណត្តិចាស់ និងដាក់ជំនួសសមាសភាពដឹកនាំថ្មី ដែលមានឆន្ទៈស្មោះត្រង់ពិតប្រាកដ។
លោកបន្តថា សមាសភាពដឹកនាំស្ថាប័ន គ.ជ.ប គួរត្រូវកែទម្រង់ឲ្យបានប្រសើរជាងសព្វថ្ងៃ ព្រោះថាសព្វថ្ងៃនេះ ស្ថាប័ន គ.ជ.ប ត្រូវគេមើលឃើញថា បានគាំទ្រ និងបម្រើឲ្យគណបក្សប្រជាជនកម្ពុជា កំពុងកាន់អំណាច។
ចំណែក លោក គល់ បញ្ញា ជានាយកប្រតិបត្តិអង្គការ ខុមហ្វ្រែល (Camfrel) មានប្រសាសន៍ថា គណបក្សនយោបាយមានអាសនៈក្នុងរដ្ឋសភា ជាអ្នកមានតួនាទីសំខាន់ក្នុងការពិនិត្យចំពោះការតែងតាំងសមាសភាពដឹកនាំរបស់ស្ថាប័ន គ.ជ.ប ដើម្បីឲ្យស្ថាប័ននេះមានឯករាជ្យ។
លោកថ្លែងថា ស្ថាប័ន គ.ជ.ប សព្វថ្ងៃនេះធ្វើសកម្មភាពមិនទាន់មានឯករាជ្យ ដែលអាចឲ្យគ្រប់គណបក្សនយោបាយចូលរួមការបោះឆ្នោត អាចទទួលយកបានទេ។
ដោយឡែក លោក ធន សារ៉ាយ ប្រធានសមាគម អាដហុក (Adhoc) ក៏បានស្នើឲ្យរដ្ឋាភិបាល និងក្រសួងមហាផ្ទៃ ត្រូវជ្រើសរើសសមាសភាពដឹកនាំស្ថាប័ន គ.ជ.ប សម្រាប់អាណត្តិថ្មី ជាមនុស្សមានឆន្ទៈធ្វើការងារឲ្យមានឯករាជ្យ។
លោកបន្តថា ចំពោះការតែងតាំងសមាសភាពដឹកនាំស្ថាប័ន គ.ជ.ប ចេញពីបក្សនយោបាយមិនអាចធ្វើការមានឯករាជ្យបានទេ។
យ៉ាងណាក៏ដោយ លោក អ៊ឹម សួស្តី ប្រធាន គ.ជ.ប មានប្រសាសន៍ថា លោកមិនជំទាស់នឹងការស្នើផ្លាស់ប្ដូរសមាសភាពស្ថាប័ន គ.ជ.ប នោះទេ។ ប៉ុន្តែលោកថា ដរាបណាមិនទាន់មានសមាសភាពថ្មីស្នើឡើងទេ សមាសភាពដឹកនាំ គ.ជ.ប អាណត្តិចាស់នៅបន្តការងារជាធម្មតា។
ស្ថាប័ន គ.ជ.ប បានបង្កើតឡើងក្រោយការបោះឆ្នោតសម័យអ៊ុនតាក់ (UNTAC) ឆ្នាំ១៩៩៣។ ស្ថាប័ននេះត្រូវធ្វើការផ្លាស់ប្ដូរសមាសភាពដឹកនាំ ក្នុងរយៈពេល ៥ឆ្នាំម្តង។ ហើយថា ការផ្លាស់ប្ដូរសមាសភាព គ.ជ.ប ថ្មី ត្រូវធ្វើមុន ៧ខែ នៃកាលបរិច្ឆេទបោះឆ្នោតជ្រើសតាំងតំណាងរាស្ត្រ ក្នុងអាណត្តិនិមួយៗ។ កាលបរិច្ឆេទ នៃការបោះឆ្នោតជ្រើសតាំងតំណាងរាស្ត្រអាណត្តិទី៥ ចាប់ផ្ដើមនៅថ្ងៃអាទិត្យ ទី២៨ ខែកក្កដា ឆ្នាំ២០១៣។
ដូច្នេះ សមាសភាពដឹកនាំរបស់ស្ថាប័ន គ.ជ.ប ថ្មី អាចនឹងត្រូវស្នើតែងតាំងថ្មី នៅចុងឆ្នាំ២០១២ ឬដើមឆ្នាំ២០១៣ ខាងមុខ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
-
ស្ដាប់ផ្ទាល់
(ព្រឹក ៥:៣០-៦:៣០ ល្ងាច ៧:៣០-៨:៣០) - សំឡេង
ភាសា
