លោក អំ សំអាត ប្រធានក្រុមស៊ើបអង្កេតនៃអង្គការការពារសិទ្ធិមនុស្សលីកាដូនៅក្នុងចំណោមអង្គការនិងសមាគមចំនួន២១ជាសមាជិកនៃគណៈកម្មការខាងលើនេះ បានមានប្រសាសន៍ប្រាប់វិទ្យុអាស៊ីសេរីថា ៖ «ការរំលោភដីធ្លីនេះវាក្លាយទៅជាជំងឺរ៉ាំរ៉ៃហើយ ហើយរហូតមកទល់នឹងពេលនេះមានរឿងច្រើនណាស់ដែលទាក់ទងនឹងការរំលោភដីធ្លីមិនទាន់បានដោះស្រាយនៅឡើយ ហើយបញ្ហាថ្មីក៏កំពុងតែកើតឡើងទៅទៀត ហើយអ្នករងគ្រោះគឺប្រជាពលរដ្ឋ»។
មន្រ្តីជាន់ខ្ពស់ម្នាក់នៃក្រសួងរៀបចំដែនដី នគរូបនីយកម្មនិងសំណង់ ដែលសុំមិនឲ្យបញ្ចេញឈ្មោះ បានមានប្រសាសន៍ថា ក្រសួងកំពុងតែអនុវត្តកម្មវិធីវាស់វែងប្លង់ដីជាកម្មសិទ្ធិ ដីធ្លីជាប្រព័ន្ធ ជូនប្រជាពលរដ្ឋដើម្បីកាត់បន្ថយជម្លោះដីធ្លីដែលបានកើតមានទ្បើងកន្លងមក។
មន្ត្រីដដែលបានបញ្ជាក់ថា ៖ «តាមធម្មតា ការធ្វើច្បាប់ទម្លាប់អ៊ីចឹងគឺដើម្បីសម្របសម្រួលកុំឲ្យមានទំនាស់រឿងដីធ្លី រឿងព្រំដីហ្នឹងហើយ... គោលនយោបាយរបស់រាជរដ្ឋាភិបាលគឺដើម្បីឲ្យបងប្អូនប្រជាពលរដ្ឋរបស់យើង លោកមានសំបុត្រស្នាមគ្រប់គ្រាន់ជាផ្លូវការដើម្បីការពារកម្មសិទ្ធិដីធ្លីរបស់គាត់នោះ។ ពេលណាដែលយើងមិនមានឯកសារច្បាស់លាស់ ជួនកាលវាមានក្លែងក្លាយ ជាន់លើគ្នា វាមានព្រំប្រទល់ខុសត្រូវបន្តិចបន្តួច បងប្អូនយើងមិនសូវចេះយោគយល់គ្នាក៏មានបញ្ហាដែរ»។
របាយការណ៍នោះបានលើកជាសំណើចំនួន៤ដើម្បីសុំឲ្យរដ្ឋាភិបាលកម្ពុជាពិចារណាដោះស្រាយស្ថានការណ៍របស់ប្រជាពលរដ្ឋដែលកំពុងតែជួបប្រទះការបាត់បង់ដីធ្លីនិងការបាត់បង់មុខរបរចិញ្ចឹមជីវិត មានដូចជាធ្វើឲ្យប្រជាពលរដ្ឋមានការទុកចិត្តលើប្រព័ន្ធតុលាការដែលជាស្ថាប័នស្វែងរកយុត្តិធម៌, ទី២ ត្រូវជំរុញឲ្យមានការអនុវត្តច្បាប់ភូមិបាលឲ្យបានម៉ឺងម៉ាត់, ទី៣ តុលាការនិងអាជ្ញាធរ ព្រមទាំងនគរបាល បម្រើនិងការពារប្រជាពលរដ្ឋនៅក្នុងតួនាទីរបស់ខ្លួន និងទី៤ ប្រជាពលរដ្ឋកម្ពុជាត្រូវតែបានទទួលឱកាសក្នុងការចូលរួមនិងមានលទ្ធភាពក្នុងការទទួលផលអំពីការអភិវឌ្ឍប្រទេសជាតិ។
ប្រភពនិងរបាយការណ៍ជាពិស្តារនោះបានលើកទ្បើងអំពីប្រជាពលរដ្ឋជាច្រើនគ្រួសារបានរងគ្រោះបាត់បង់ដីធ្លី មានដូចជាក្នុងខេត្តបាត់ដំបង ខេត្តកោះកុង ខេត្តព្រះសីហនុ ខេត្តពោធិ៍សាត់ ខេត្តកំពង់ឆ្នាំង រាជធានីភ្នំពេញ ខេត្តក្រចេះ ខេត្តសៀមរាប ខេត្តបាត់ដំបង ខេត្តបន្ទាយមានជ័យ ខេត្តព្រះវិហារ ខេត្តរតនគិរី ខេត្តកំពង់ចាម ជាដើម ព្រមទាំងខេត្តមួយចំនួនទៀត។
គេបានកត់សម្គាល់ឃើញថា វិបត្តិជម្លោះដីធ្លីនៅក្នុងប្រទេសកម្ពុជាបានចាប់ផ្តើមរីករាលដាលនិងកាន់តែអាក្រក់ទៅចាប់តាំងពីឆ្នាំ២០០៣មក ដោយសារមូលហេតុនានាមានដូចជា ការផ្តល់ដីសម្បទានសេដ្ឋកិច្ច ការវិនិយោគដីធ្លី កំណើនប្រជាពលរដ្ឋ និងការមិនទាន់មានការចុះបញ្ជីដីធ្លីច្បាស់លាស់ នៅស្របពេលនោះដែរ យន្តការដោះស្រាយវិបត្តិដីធ្លីត្រូវគេមើលឃើញថា មិនសូវមានប្រសិទ្ធភាពឬមានការអូសបន្លាយយូរពេក៕