តំណាងរបស់ប្រជាពលរដ្ឋ ដែលបានជួបចរចាជាមួយនឹងតំណាងសាលាក្រុងភ្នំពេញ នៅថ្ងៃទី៣ កញ្ញា នៅឯសាលាខណ្ឌដូនពេញ គឺអ្នកស្រី បេ ផារ៉ុម បានឲ្យដឹងថា សាលាក្រុងភ្នំពេញមិនបានទទួលយកសំណើពីប្រជាពលរដ្ឋដែលសុំឲ្យក្រុមហ៊ុន ស៊ូកាគូ អ៊ីន ដែលបណ្ដេញពួកគាត់ចេញពីលំនៅ បង់សំណងជាទឹកប្រាក់ចំនួន ១.៥០០ដុល្លារសហរដ្ឋអាមេរិកសម្រាប់ដីក្នុងមួយម៉ែត្រការ៉េឡើយ ហើយថា អាជ្ញាធរក្រុងបានកំណត់ថ្លៃសំណងជាទឹកប្រាក់ ចំនួន ៨.៥០០ដុល្លារសហរដ្ឋអាមេរិកក្នុងមួយគ្រួសារ។
អ្នកស្រី បេ ផារ៉ុម មានប្រសាសន៍ដូច្នេះថា ៖ «ខ្ញុំអត់អស់ចិត្តទេ ព្រោះខ្ញុំអត់មានភាពកក់ក្ដៅទៅលើសាលាក្រុងទេ បើគាត់និយាយតែអ៊ីចឹង។ ភាសានេះ ជាភាសាទូត គេដោះស្រាយឲ្យតែរួចៗទៅ អ៊ីចឹងចុះឲ្យវេទនាអ៊ីចឹងដដែល។ ខ្ញុំថា សុំឲ្យសាលាក្រុងដោះស្រាយប្រជាពលរដ្ឋឲ្យសមស្រប កុំឲ្យប្រជាពលរដ្ឋទឹកភ្នែករហេមរហាម មុននឹងចេញពីបឹងកក់នេះទៅ ខ្ញុំសុំថា ធ្វើម៉េចដោះស្រាយឲ្យសមស្របផង កុំឲ្យប្រជាជនគ្នាពិបាក ហើយគ្នាពិបាករហូត។ អស់លោក បើសិនជា ៨ពាន់[ដុល្លារ] អស់លោកយកឬអត់ ខ្ញុំសួរសិន»។
តំណាងប្រជាពលរដ្ឋ អ្នកស្រី បេ ផារ៉ុម បានឲ្យដឹងទៀតថា តំណាងសាលាក្រុងភ្នំពេញ បានស្នើសុំឲ្យប្រជាពលរដ្ឋដែលតវ៉ា មិនទទួលយកសំណងជាទឹកប្រាក់ចំនួន ៨.៥០០ដុល្លារឲ្យទៅជួបជាមួយនឹងការិយាល័យតំណាងរបស់ក្រុមហ៊ុន ស៊ូកាគូ អ៊ីន ដែលមានទីតាំងក្នុងរាជាយស្ម័យយាន ក្នុងទីក្រុងភ្នំពេញ ហើយថា នឹងនាំសេចក្ដីស្នើសុំរបស់ប្រជាពលរដ្ឋជូនទៅឲ្យចៅហ្វាយក្រុងភ្នំពេញ លោក កែប ជុតិមា ដើម្បីពិចារណា។
មិនអាចទាក់ទងសុំការបំភ្លឺពីតំណាងសាលាក្រុងភ្នំពេញនោះបាននៅឡើយទេ នៅរសៀលថ្ងៃទី៣ កញ្ញានេះ។ ចំណែកឯក្រុមប្រជាពលរដ្ឋនឹងនាំគ្នាទៅចរចាជាមួយនឹងក្រុមហ៊ុនដោយផ្ទាល់ នៅឯការិយាល័យតំណាងរបស់ក្រុមហ៊ុន នាថ្ងៃសុក្រ សប្ដាហ៍នេះ។
គួរជម្រាបថា នេះជាលើកទីពីរហើយ ដែលប្រជាពលរដ្ឋអ្នកតវ៉ានៅក្នុងតំបន់បឹងកក់បាននាំគ្នាមកចរចាជាមួយនឹងអាជ្ញាធរក្រុងភ្នំពេញ ទាមទារឲ្យក្រុមហ៊ុន ស៊ូកាគូ អ៊ីន បង់សំណងដល់ពួកគាត់តាមតម្លៃទីផ្សារ។
មេធាវីការពារក្ដីឲ្យប្រជាពលរដ្ឋ គឺលោក ជូង ជូងី ក៏បានមានប្រសាសន៍ឲ្យដឹងថា នៅព្រឹកថ្ងៃទី៣ កញ្ញានេះ លោកបានដាក់ពាក្យបណ្ដឹងទៅតុលាការក្រុងភ្នំពេញដើម្បីជំទាស់នឹងកិច្ចសន្យាអភិវឌ្ឍន៍បឹងកក់នេះ។
ប៉ុន្តែលោកបានឲ្យដឹងថា ខាងតុលាការក្រុងបានតម្រូវឲ្យប្រជាពលរដ្ឋដែលជាភាគីដើមបណ្ដឹង បង់ប្រាក់តម្កល់ចំនួន ៥០ភាគរយនៃទឹកប្រាក់ ដែលក្រុមហ៊ុនបានជួលដីបឹងកក់នោះ គឺស្មើនឹង ៣៩,៥លានដុល្លារសហរដ្ឋអាមេរិក។
គួរជម្រាបថា រដ្ឋាភិបាលបានអនុញ្ញាតឲ្យក្រុមហ៊ុន ស៊ូកាគូ អ៊ីន ធ្វើការអភិវឌ្ឍបឹងកក់សម្រាប់រយៈពេល ៩៩ឆ្នាំ លើផ្ទៃដីចំនួនជិត ១៣៣ហិកតារ ក្នុងទឹកប្រាក់ប្រមាណ ៧៩លានដុល្លារសហរដ្ឋអាមេរិក ដែលការអនុញ្ញាតនេះ ត្រូវបានក្រុមសិទ្ធិមនុស្សរិះគន់ថា បានរំលោភលើច្បាប់ភូមិបាលឆ្នាំ២០០១ ដែលថា ការប្រគល់បឹងដែលជាកម្មសិទ្ធិរដ្ឋ ទៅឲ្យឯកជនគឺមិនត្រូវហួសពី ១៥ឆ្នាំឡើយ។ ក្រុមសិទ្ធិមនុស្សបានឲ្យដឹងថា ការអភិវឌ្ឍនេះ នឹងប៉ះពាល់យ៉ាងធ្ងន់ធ្ងរចំពោះបរិស្ថាននិងប្រជាពលរដ្ឋប្រមាណពី ៣.០០០ ទៅ ៤.២០០គ្រួសារដែលរស់នៅជុំវិញបឹងកក់នោះ៕