គណបក្ស នរោត្ដម រណឫទ្ធិ រង្គោះរង្គើជាថ្មីម្ដងទៀត

រចនាសម្ព័ន្ធដឹកនាំក្នុងគណបក្ស នរោត្តម រណឫទ្ធិ ចាប់ផ្ដើមរង្គោះរង្គើជាថ្មីម្ដងទៀតហើយ នៅក្រោយពេលដែលគណបក្សនេះបរាជ័យក្នុងការចងសម្ព័ន្ធភាព ដើម្បីច្របាច់បញ្ចូលគ្នាជាមួយគណបក្ស ហ៊្វុនស៊ិនប៉ិច។

ដោយ សុ ជីវី
2012-07-21

h072112in.mp3

សម្ដេចក្រុមព្រះ នរោត្តម រណឫទ្ធិ ប្រធានគណបក្ស នរោត្តម រណឫទ្ធិ ជួបសំណេះសំណាលជាមួយសកម្មជន និងជំទប់ឃុំ ដែលជាប់ឆ្នោតថ្មី នាទីស្នាក់ការបក្សខណ្ឌទួលគោក កាលពីថ្ងៃទី២៦ ខែមិថុនា ឆ្នាំ២០១២។

RFA/Sok Serey

គណបក្សនេះបានសម្រេចតែងតាំង អគ្គលេខាធិការបក្សថ្មី នៅពេលដែលគេបានដឹងថា អគ្គលេខាធិការបក្សចាស់បានទីចុះហត្ថលេខាលើកំណត់ហេតុចរចា ស្ដីពីការបង្រួបបង្រួមជាមួយគណបក្ស ហ៊្វុនស៊ិនប៉ិច។

គណបក្ស នរោត្តម រណឫទ្ធិ បានសម្រេចតែងតាំង លោក ឈឹម សៀកឡេង អោយបំពេញតួនាទីជាអគ្គលេខាធិការគណបក្សនេះ ជំនួសអោយលោក សៅ រ៉ានី ដែលត្រូវបណ្ដេញពីតួនាទី។

ការបណ្ដេញលោក សៅ រ៉ានី ចេញពីដំណែងនេះ ដោយសារតែមានការចោទប្រកាន់ថា លោកបានជាប់ពាក់ព័ន្ធនឹងការបំពេញកិច្ចការដោយគ្មានការយល់ព្រមពីបក្ស ក្នុងការចរចាចុះកិច្ចព្រមព្រៀងច្របាច់បញ្ចូលគ្នាជាមួយគណបក្ស ហ៊្វុនស៊ិនប៉ិច។

សេចក្ដីសម្រេចចុះថ្ងៃទី២១ ខែកក្កដា ចុះព្រះហស្តលេខាដោយសម្ដេចក្រុមព្រះ ប្រធានគណបក្ស បានបញ្ជាក់ថា លោក ឈឹម សៀកឡេង ដែលកំពុងបំពេញតួនាទីជាប្រធានស្ដីទី ត្រូវតែងតាំងជាអគ្គលេខាធិការគណបក្សនេះ។

អ្នកនាំពាក្យគណបក្ស នរោត្តម រណឫទ្ធិ លោក ប៉ែន សង្ហា មានប្រសាសន៍ថា ការសម្រេចបញ្ចប់តួនាទីលោក សៅ រ៉ានី គឺជាប់ពាក់ព័ន្ធនឹងការចរចារបស់អតីតអគ្គលេខាធិការបក្សរូបនេះជាមួយគណបក្ស ហ៊្វុនស៊ិនប៉ិច ដោយពុំបានការយល់ព្រមពីប្រធានគណបក្ស គឺសម្ដេចក្រុមព្រះ នរោត្តម រណឫទ្ធិ។

លោក ប៉ែន សង្ហា៖ «គណបក្ស និងសម្ដេចក្រុមព្រះ បានហាមគាត់មិនអោយគាត់ទៅចុះហត្ថលេខា ជាពិសេសគាត់បានចុះហត្ថលេខាលើកំណត់ហេតុ ស្ដីពីការបង្រួបបង្រួមគ្នា គណបក្ស ហ៊្វុនស៊ិនប៉ិច និងគណបក្ស នរោត្តម រណឫទ្ធិ។ ហើយការចុះហត្ថលេខានោះ ឯកឧត្ដម សៅ រ៉ានី ពុំបានទទួលការប្រគល់សិទ្ធិ ឬការចាត់តាំងណាមួយពីគណបក្ស។ នេះជាអ្វីមួយ ដែលឯកឧត្ដមបានធ្វើប្រាសចាកពីផលប្រយោជន៍គណបក្ស»។

កាលពីថ្ងៃទី១៧ ខែកក្កដា លោក សៅ រ៉ានី បានសរសេរលិខិតមួយថ្វាយសម្ដេចក្រុមព្រះ នរោត្តម រណឫទ្ធិ ពីកំណត់ហេតុនៃការចរចារវាងរូបលោក និងគណបក្ស ហ៊្វុនស៊ិនប៉ិច ពីគម្រោងការច្របាច់បញ្ចូលគ្នារវាងគណបក្សទាំងពីរ។ ស្របគ្នានេះ លោក សៅ រ៉ានី បានបញ្ជាក់ថា ប្រសិនបើគណបក្ស នរោត្តម រណឫទ្ធិ ចង់អោយមានការរួបរួមគ្នាពិតប្រាកដ លុះត្រាតែសម្ដេចក្រុមព្រះ គង់នៅអោយឆ្ងាយពីគណបក្សនេះមួយរយៈ។ ប៉ុន្តែភ្លាមៗ នៅក្រោយការលើកឡើងនេះ គណបក្សនេះក៏បានសម្រេចបញ្ឈប់តួនាទីរបស់ លោក សៅ រ៉ានី រួមនឹងអគ្គលេខាធិការរង និងសមាជិកគណៈកម្មាធិការអចិន្ត្រៃយ៍ នៃគណបក្សនេះចំនួន៤រូបទៀត។

លិខិតចុះថ្ងៃទី២០ ខែកក្កដា ដែលបញ្ចប់តួនាទីរបស់ លោក សៅ រ៉ានី នោះគឺមានចុះព្រះហស្តលេខាដោយសម្ដេចក្រុមព្រះ នៅខណៈដែលព្រះអង្គកំពុងមានវត្តមានគង់នៅប្រទេសបារាំង នៅឡើយ។

អគ្គលេខាធិការបក្ស ដែលត្រូវបណ្ដេញពីតំណែង លោក សៅ រ៉ានី បានប្រតិកម្មតបនឹងការបញ្ឈប់តួនាទីរបស់លោកនេះថា ជាទង្វើដែលខុសពីក្បួនច្បាប់របស់បក្ស និងអះអាងថា លោកពុំបានធ្វើខុសដូចការចោទប្រកាន់ឡើយ។ លោកបន្តថា រាល់លិខិតដែលមានចុះហត្ថលេខា ដោយសម្ដេចក្រុមព្រះ នរោត្តម រណឫទ្ធិ គឺជាលិខិតក្លែងបន្លំ ត្បិតសម្ដេចក្រុមព្រះ ព្រះអង្គមិនបានគង់នៅភ្នំពេញឡើយ ហើយលោកនឹងដាក់ពាក្យប្ដឹង អ្នកដែលក្លែងលិខិតទាំងនោះ។

លោក សៅ រ៉ានី៖ «ប្ដឹងទៅសមត្ថកិច្ច អោយគេរកថា លិខិតហ្នឹងវាក្លែងក្លាយ។ លោក (សម្ដេចក្រុមព្រះ) នៅស្រុកបារាំង ហើយលោកដាក់ថា នៅភ្នំពេញយ៉ាងម៉េច។ បើប្រគល់សិទ្ធិអោយគេហើយ លោកមានសិទ្ធិអីទៅស៊ីញេទៀត? រឿងដកខ្ញុំ តើលោកមានបានពិភាក្សាក្រុមប្រឹក្សាវិន័យទេ? អត់មានទេ។ ព្រះអង្គបានឆ្លើយមកខ្ញុំថ្ងៃ១៨ លោកថា កុំយកឈ្មោះលោក និងគណបក្សលោកទៅសម្របសម្រួល។ ខ្ញុំអត់រវល់ថា លោកទទួល ឬមិនទទួលទេ។ ទិសដៅដែលខ្ញុំធ្វើ គឺខ្ញុំត្រូវការបង្រួបបង្រួមគណបក្សទាំង២ហ្នឹង។ ហើយបើលោកចង់ទៅដឹកនាំ ហ៊្វុនស៊ិនប៉ិច ប្រាកដមែនដោយសុច្ឆន្ទៈមែនទែនហ្នឹង លោកទទួលទៅ បើមិនទទួល ជាសិទ្ធិរបស់លោក»។

បើទោះជាយ៉ាងណា លោក សៅ រ៉ានី នៅតែបញ្ជាក់ថា ប្រសិនបើសម្ដេចក្រុមព្រះ ចង់អោយមានការបង្រួមបង្រួមរវាងគណបក្សទាំងពីរនេះពិតប្រាកដមែន គួរតែព្រះអង្គគង់នៅអោយឆ្ងាយពីការចរចា ដែលមានន័យថា ព្រះអង្គរង់ចាំតែពេលវេលាសម្រាប់មកដឹកនាំសម្ព័ន្ធភាព នោះប៉ុណ្ណោះ។

ចលនាច្របាច់បញ្ចូលគ្នាទៅជាបក្សតែមួយ រវាងគណបក្ស ហ៊្វុនស៊ិនប៉ិច និងបក្ស នរោត្តម រណប្ញទ្ធិ បានលេចជារូបរាងឡើងវិញ ដោយការចុះហត្ថលេខាលើកិច្ចព្រមព្រៀងរួមគ្នានៅព្រឹកថ្ងៃទី២៤ ខែឧសភា ឆ្នាំ២០១២ នាវិមានសន្តិភាព ដោយមានលោកនាយករដ្ឋមន្ត្រី ហ៊ុន សែន ធ្វើជាអ្នកសម្របសម្រួល ប៉ុន្តែគម្រោងនេះបានជាប់គាំងជាថ្មីទៀត គឺនៅរយៈពេលមិនដល់២ខែផង បន្ទាប់ពីមានការព្រមព្រៀងនោះ៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។