ពលរដ្ឋ​​ទាមទារ​ការ​អនុវត្ត​គោលការណ៍​​ស្មើភាព​គ្នា​ចំពោះ​មុខ​ច្បាប់

ពលរដ្ឋ​រង​គ្រោះ​ដោយសារ​បញ្ហា​ដីធ្លី មន្ត្រី​សង្គម​ស៊ីវិល និង​អ្នក​ច្បាប់ បាន​ហៅ​ប្រព័ន្ធ​ច្បាប់​នៅ​កម្ពុជា​ថា មិន​បាន​អនុវត្ត​អោយ​ស្មើ​ភាព​គ្នា​រវាង​អ្នក​ក្រីក្រ និង​អ្នក​មាន​អំណាច​នោះ​ទេ។
ដោយ សុ ជីវី
2012-03-17
អ៊ីម៉ែល
មតិ
ចែករំលែក
បោះពុម្ព
  • បោះពុម្ព
  • ចែករំលែក
  • មតិ
  • អ៊ីម៉ែល
កម្មករ ស្វាយរៀង ៣០៥
២០-កុម្ភៈ-២០១២៖ កម្មការិនី​រោងចក្រ​កៅវ៉េ (Kaoway) ដែល​ត្រូវ​ជន​មិន​ស្គាល់​មុខ​បាញ់​ឲ្យ​របួស​ក្នុង​ពេល​តវ៉ា សម្រាក​ព្យាបាល​នៅ​មន្ទីរពេទ្យ​ខេត្ត​ស្វាយរៀង។
Adhoc Photo

ការ​លើក​ឡើង​ដូច្នេះ បន្ទាប់​ពី​មាន​ការ​បាញ់​រះ​ទៅ​លើ​ហ្វូង​កូដករ ដែល​ទាមទារ​ដំឡើង​ថ្លៃ​បាយ និង​ថ្លៃ​ធ្វើ​ដំណើរ​របស់​កម្មករ​រោងចក្រ​នានា ក្នុង​តំបន់​សេដ្ឋកិច្ច​ពិសេស​ក្រុង​បាវិត កាល​ពី​ថ្ងែ​ទី​២០ ខែ​កុម្ភៈ ឆ្នាំ​២០១២។ ករណី​នេះ​​បាន​បង្ក​អោយ​កម្មការិនី ៣​នាក់ រង​របួស ហើយ​រហូត​មកដល់​ពេល​នេះ​គេ​នៅ​មិន​ទាន់​ចាប់​ជន​ប្រព្រឹត្ត​ដែល​គេសង្ស័យ​ថា ជា​អតីត​អភិបាល​ក្រុង​បាវិត នោះ​មក​ផ្ដន្ទាទោស​នៅ​ឡើយ​ទេ។

ពលរដ្ឋ​ដែល​ធ្លាប់​ជាប់​ពន្ធនាគារ​ដោយសារ​ការ​ការ​តវ៉ា​ការពារ​ផ្ទះ​សម្បែង និង​ដី​ធ្លី បាន​លើក​ឡើង​ថា ការ​អនុវត្ត​ច្បាប់​លើ​ពលរដ្ឋ​ក្រីក្រ និង​អ្នក​មាន​អំណាច​មាន​ភាព​ផ្ទុយ​ស្រឡះ ដូចជា​ករណី​បាញ់​កម្មករ​នៅ​ក្រុង​បាវិត នោះ​ជាដើម។

ខុស​គ្នា​ត្រង់​ថា ពេល​កើត​មាន​អំពើ​ហិង្សា​ក្នុង​ហ្វូង​បាតុកម្ម​ក្ដី ឬ​កូដកម្ម​ក្ដី ពលរដ្ឋ​ក្រី​ក្រ​ត្រូវ​អាជ្ញាធរ​ចាប់​ឃុំ​ខ្លួន​ភ្លាមៗ​ទោះ​ត្រូវ​ក្ដី ឬ​ខុស​ក្ដី។ ប៉ុន្តែ​បើ​អ្នក​មាន​អំណាច​វិញ ទោះ​បី​ប្រើ​អំពើ​ហិង្សា​លើ​ពលរដ្ឋ​ដោយ​ខុស​ច្បាប់​យ៉ាង​ណា​ក្ដី គឺ​ពុំ​មាន​ការ​ចាប់​ខ្លួន​ភ្លាមៗ​ឡើយ។ ពួកគេ​ចាត់​ទុក​ទង្វើ​បែប​នេះ​ថា ជា​ភាព​អយុត្តិធម៌​ដែល​កើត​មាន​ជា​រឿយៗ​ក្នុង​សង្គម។

លោក ស៊ឹម លាប ជា​តំណាង​ប្រជាពលរដ្ឋ​រស់​នៅ​ឃុំ​ជី​ក្រែង ស្រុក​ជី​ក្រែង ខេត្ត​សៀមរាប។ លោក​ធ្លាប់​ជាប់​ពន្ធនាគារ​អស់​រយៈ​ពេល ២​ឆ្នាំ ដោយសារ​ជម្លោះ​ដណ្តើម​ដី​ស្រែ​ប្រាំង​នៅ​ក្នុង​ឃុំ។

លោក ស៊ឹម លាប បន្ត​ថា អស់​រយៈ​ពេល ២​ឆ្នាំ​នៃ​ការ​ជាប់​ឃុំ តុលាការ​គ្រប់​ជាន់​ថ្នាក់​មិន​បាន​រក​ឃើញ​ទោស​កំហុស​ណា​មួយ​ប្រឆាំង​រូប​លោក​ឡើយ។ លោក​ថា លោក​ហួស​ចិត្ត​នឹង​និយាយ​ពី​កិច្ចការ​របស់​តុលាការ​នៅ​ស្រុក​ខ្មែរ៖ «យើង​ចង់​បាន​សេរីភាព ហើយ​អោយ​វា​សម​ស្រប​នឹង​ច្បាប់​ដែល​គេ​ហៅ​ថា ជា​អំណាច​លទ្ធិប្រជាធិបតេយ្យ។ ហើយ​ខ្ញុំ​និយាយ​ទៅ​ដូច​ជា​កាត់​កន្ទុយ​បញ្ចុក​មាត់ អាជ្ញា​សឹក​ទាំង​អស់។ វា​ដូច​ទៅ​នឹង​របប ៣​ឆ្នាំ ៨​ខែ ២០​ថ្ងៃ យើង​កំពុង​តែ​ស្អប់​របប​នេះ​ឯង​ហើយ​រាល់ៗ​រូប។ ខ្ញុំ​មិន​គួរ​នឹង​និយាយ និង​មិន​ដឹង​និយាយ​ថា​ម៉េច វា​ហួស​នឹង​និយាយ»

ចំណែក​លោក ពុត សាមាន ជា​ពលរដ្ឋ​នៅ​បុរី​កីឡា​កណ្ដាល​រាជធានី​ភ្នំពេញ ដែល​កំពុង​មាន​ជម្លោះ​ដី​ធ្លី​ជា​មួយ​ក្រុម​ហ៊ុន​ផានអ៊ីម៉ិច​នោះ បាន​លើក​ឡើង​ដែរ​ថា ជា​រឿយៗ នៅ​ពេល​អ្នក​មាន​ប្រាក់​មាន​អំណាច​ប្រព្រឹត្ត​ល្មើស អាជ្ញាធរ​ហាក់​មិនសូវ​ហ៊ាន​ចាត់​វិធានការ​តាម​ច្បាប់​ឡើយ៖ «បើ​និយាយ​ទៅ​វា​អយុត្តិធម៌​សម្រាប់​ខ្ញុំ​ណាស់ ប៉ុន្តែ​ថា យើង​ជា​រាស្រ្ត​​សាមញ្ញ មិន​ដូច​គេ​មាន​លុយ​មាន​អំណាច។ គេ​មាន​អំណាច ដូចជា​ពិបាក... និយាយ​អោយ​ត្រង់​ទៅ ប្រហែល​គេ​មិនហ៊ាន​ធ្វើ គេ​ធ្វើ​បាន​តែ​រាស្រ្ត​ក្រីក្រ​តូច​ទាប។ ចង់​អោយ​គេ​ផ្លាស់ប្តូរ​អោយ​គោរព​ច្បាប់​ទាំង​អស់​គ្នា អ្នក​តូច អ្នក​ធំធ្វើ​ខុស​ត្រូវ​មាន​ទោស​ភ្លាមៗ​ដូច​គ្នា»

អង្គការ​សង្គម​ស៊ីវិល​ក្នុង​ស្រុក និង​អន្តរជាតិ បាន​ចេញ​សេចក្ដី​ថ្លែង​ការណ៍​កាល​ពី​ថ្ងៃ​ទី​១៥ ខែ​មីនា ឆ្នាំ​២០១២ ដោយ​ជំរុញ​អោយ​អាជ្ញាធរ​ផ្ដន្ទា​ទោស​ជន​ល្មើស​ដែល​បាញ់​រះ​លើ​កម្មករ។ ពួកគេ​ទាមទារ​អោយ​អាជ្ញាធរ​អនុវត្ត​គោលការណ៍​ស្មើភាព​គ្នា​ចំពោះ​មុខ​ច្បាប់​ដូច​ដែល​ធានា​ក្នុង​រដ្ឋ​ធម្មនុញ្ញ ដែល​ជា​ច្បាប់​កំពូល​របស់​រដ្ឋ។

អ្នកស្រី ធីតា ឃិះ នាយក​ប្រតិបត្តិ​អង្គការ​សីលការ មាន​ប្រសាសន៍​ថា ជន​ល្មើស​គួរ​ត្រូវ​ចាប់​ខ្លួន បើ​ពុំ​នោះ​សោត នឹង​ក្លាយ​ជា​គំរូ​អាក្រក់​សម្រាប់​សង្គម​ខ្មែរ​នា​ពេល​បច្ចុប្បន្ន៖ «បើ​សិន​ណា​គេ​មិន​អនុវត្ត​ច្បាប់​ភ្លា​ទេ ការ​គោរព​របស់​ពលរដ្ឋ​ចំពោះ​ស្ថាប័នរដ្ឋ​អាច​មាន​បញ្ហា ធ្វើ​អោយ​ប៉ះពាល់​ដល់​ស្ថាប័ន​មាន​សមត្ថកិច្ច»

លោក ឈូក បណ្ឌិត អតីត​អភិបាល​ក្រុង​បាវិត បាន​ចូល​ទៅ​​បំភ្លឺ​ដោយ​ស្ងាត់ៗ នៅ​តុលាការ​​​​ខេត្ត​ស្វាយរៀង គឺ​នៅ​មួយ​ថ្ងៃ​មុន​​ការ​កំណត់។ ប៉ុន្តែ​​​​តែ​​តុលាការ​​មិន​​​​បាន​ឃុំ​ខ្លួន​មន្ត្រី​មាន​អំណាច​រូប​នោះ​ឡើយ។ ករណី​នេះ​បាន​បង្កើត​អោយ​មាន​ចម្ងល់​ជា​ច្រើន​ក្នុង​រង្វង់​សាធារណជន និង​អ្នក​ឃ្លាំ​មើល​​ការ​អនុវត្ត​ច្បាប់​នៅ​កម្ពុជា។

ព្រះរាជអាជ្ញា​តុលាការ​ខេត្ត​ស្វាយ​រៀង លោក ហ៊ឹង ប៊ុនជា មិន​អធិប្បាយ​​ឆ្លើយ​តប​នឹង​ចម្ងល់​នេះ​ទេ ដោយ​គ្រាន់​តែ​បញ្ជាក់​យ៉ាង​ខ្លី​ថា លោក​បាន​ធ្វើ​តាម​នីតិ​វិធី។ លោក​ក៏​បាន​បដិសេធ​ព័ត៌មាន​ដែល​ថា លោក ឈូក បណ្ឌិត បាន​សារភាព​ថា បាន​បាញ់​រះ​លើ​ក្រុម​កម្មករ។

បើ​ទោះ​ជា​បែប​ណា លោក ហ៊ីង ប៊ុន​ជា អះអាង​ថា លោក​នៅ​មិន​ទាន់​កំណត់​បទ​ចោទ​ទៅ​លើ​ជន​សង្ស័យ គឺ​លោក ឈូក បណ្ឌិត ឡើយ ដោយ​ត្រូវ​រង់ចាំ​ការ​ស៊ើបសួរ​បន្ថែម​ទៀត៖ «ដោយសារ​ការងារ​ស៊ើប​អង្កេត​ហ្នឹង​វា​នៅ​ស្មុគស្មាញ​មួយ​ចំនួន​ទាក់ទិន​នឹង​ការ​បញ្ជាក់​របស់​ជន​រងគ្រោះ ហើយ​សាក្សី​មួយ​ចំនួន​ទៀត ដែល​នេះ​ខ្ញុំ​សុំ​មិន​និយាយ ចង់​ចាំ​បន្តិច​ទៀត»

កាល​ពី​ថ្ងៃ​ទី​១៣ ខែ​មីនា ឆ្នាំ​២០១២ កម្មការិនី ២​នាក់ ក្នុង​ចំណោម ៣​នាក់ ដែល​របួស​ដោយសារ​ការ​បាញ់​រះ​ក្នុង​ពេល​តវ៉ា​នៅ​រោងចក្រ​កៅវ៉េ ក្នុង​ក្រុង​បាវិត ខេត្ត​ស្វាយ​រៀង បាន​ប្ដឹង​អតីត​អភិបាល​ក្រុង​បាវិត លោក ឈូក បណ្ឌិត ទៅ​តុលាការ​ខេត្ត​ស្វាយរៀង ពី​បទ​មនុស្ស​ឃាត។

លោក​មេធាវី សុក សំអឿន នាយក​ប្រតិបត្តិ​អង្គការ​ក្រុម​អ្នក​ច្បាប់​ការពារ​សិទ្ធិ​កម្ពុជា។ លោក​ថា ជា​ញឹក​ញយ​ការ​ពន្យារ​ពេល​ក្នុង​ការ​ចោទ​ប្រកាន់ គឺ​អាជ្ញាធរ​ព្យាយាម​ផ្លាស់​ប្ដូរ​បទ​ចោទ។ ក្នុង​នោះ​បទ​ចោទ​មនុស្ស​ឃាត​តែង​ត្រូវ​ប្ដូរ​ទៅ​ជា​បទ​បង្ក​របួស​ស្នាម។ បើ​ទោះ​ជា​យ៉ាង​ណា លោក​ថា ករណី​បាញ់​រះ​លើ​កម្មករ​នេះ​គួរ​តែ​ត្រូវ​ឃុំ​ខ្លួន​ជន​ល្មើស​ជា​មុន​សិន ទើប​ធ្វើការ​ស៊ើប​អង្កេត​ជា​ក្រោយ។

លោក សុក សំអឿន៖ «ធម្មតា​បើ​សិន​អត់​ឃុំ​អ៊ីចឹង​ច្រើន​តែ​ទោស​ស្រាល។ ជួន​កាល​ព្រះរាជអាជ្ញា​ច្រើន​ទាញ​ថា ជា​បទ​បង្ក​របួស​ស្នាម។ ប៉ុន្តែ​ចំណុច​មួយ​ត្រង់​អ៊ីចេះ បាញ់​ចំ​ដើម​ទ្រូង​មែន? ធ្លុះ​ទៅ​ក្រោយ​ទៀត បើ​អ៊ីចឹង​មិន​អាច​ជា​បទហិង្សា​បាន​ទេ ធ្លុះ​សួត​ហើយ​នោះ។ តាម​ពិត​បើ​បាញ់​ពី​ក្រោយ​អ៊ីចឹង ត្រូវ​ដាក់​គុក​តាំង​ពី​យូរ​ហើយ។ ដូច​ថា​មិន​ចង់​លើក​ទឹក​ចិត្ត​អោយ​ចៅក្រម​អនុវត្ត​ច្បាប់​នីតិ​វិធី​ដោយ​តឹងតែង​ទេ ក៏​ប៉ុន្តែ​ត្រូវ​ស្មើ​ភាព​គ្នា។ តែ​មិន​មែន​ស្មើភាព​ថា អ្នក​មុន​ធ្ងន់​ម៉េច​ក៏​អ្នក​ក្រោយ​ស្រាល។ បើ​សិន​ក្នុង​ច្បាប់​អាច​ដាក់​ស្រាល​បាន អូខេ យក​អាស្រាល។ តែ​អ្នក​ក្រ អ្នក​មាន ​អ្នក​ធំ​ អ្នក​តូច​ត្រូវ​ស្រាល​ដូច​គ្នា»

នៅ​ក្នុង​ក្រម​ព្រហ្មទណ្ឌ​ថ្មី បទ​មនុស្ស​ឃាត ឬ​បទ​ឃាតកម្ម​ស្មើ​មនុស្ស​ឃាត​ដោយ​ចេតនា ជន​ល្មើស​អាច​ជាប់​ពន្ធនាគារ​ពី ១០ ទៅ ១៥​ឆ្នាំ ចំណែក​ឯ​បទ​ចោទ​ពី​អំពើ​ហិង្សា គឺ​ការ​បង្ក​របួស​ស្នាម​អាច​​មាន​ទោស​ពី ១​ឆ្នាំ ទៅ ៣​ឆ្នាំ។

ប្រភព​ដែល​ស្និទ្ធ​នឹង​លោក ឈូក បណ្ឌិត និយាយ​ដោយ​មិន​បញ្ចេញ​ឈ្មោះ អោយ​​ដឹង​​​​​ថា អតីត​អភិបាល​ក្រុង​បាវិត រូប​នេះ ជា​អ្នក​ដែល​ស្និទ្ធ​​នឹង​​មន្ត្រី​ជាន់​ខ្ពស់​រដ្ឋាភិបាល​កម្ពុជា មាន​ឋានៈ​ជា​ឧបនាយក​​រដ្ឋមន្ត្រី​​ម្នាក់៕

កំណត់​ចំណាំ៖ ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ ដើម្បី​រក្សា​សេចក្ដី​​ថ្លៃថ្នូរ យើង​​ខ្ញុំ​នឹង​ផ្សាយ​តែ​មតិ​ណា​ដែល​មិន​​ជេរ​​ប្រមាថ​​ដល់​​អ្នក​​ដទៃ​តែ​ប៉ុណ្ណោះ។

មតិ (20)
  • បោះពុម្ព
  • ចែករំលែក
  • អ៊ីម៉ែល

អ្នក​អាន​អនាមិក

ចម្រៀងអាពត​មើលនុះកម្ពុជាប្រជាធិបតិយ្យសង្គមយើងថ្មីសែនយុត្តិធម៌ គ្មានការជិះជជាន់គ្មានមានគ្មានក្រកម្មករកសិករម្ចាស់ប្រទេសជាតិ។ធ្វើបដិវត្តដើម្បីរំដោះអ្នកក្រតែឥឡូវអ្នកក្រខ្លាយជា​ទាស្សកររបស់អ្នកបដិវត្តទៅវិញ។

Mar 19, 2012 07:06 AM

អ្នក​អាន​អនាមិក

I still having crazy idea for myself. Why everyone still cursing and insulting Hun Sen if they know that he is a crook and criminal. My dea Cambodian people please use your rights of votes. To kick him out of his bloody seat on your votes. As we all Cambodian people have enoogh painfull from these bloody leaders. Do not listent to the propaganda of political parties but see what they are doing they are doing just opposit what they say. They are saying that everything they is people. But they kill people, arrest innocent people, confiscate land from people and many other things ect...Do not hope that those factory girls who were shot will get justice. It is hopeless.

Mar 19, 2012 03:56 AM

អ្នក​អាន​អនាមិក

I still having crazy idea for myself. Why everyone still cursing and insulting Hun Sen if they know that he is a crook and criminal. My dea Cambodian people please use your rights of votes. To kick him out of his bloody seat on your votes. As we all Cambodian people have enoogh painfull from these bloody leaders. Do not listent to the propaganda of political parties but see what they are doing they are doing just opposit what they say. They are saying that everything they is people. But they kill people, arrest innocent people, confiscate land from people and many other things ect...

Mar 19, 2012 03:54 AM

អ្នក​អាន​អនាមិក

មោទនៈភាពជាតិខ្មែរ

Mar 18, 2012 10:24 AM

អ្នក​អាន​អនាមិក

ខ្ញុំសូមគាំទ្រអត្ថបទនោះទាំងស្រុង ដូចសព្វថែ្ងនេះនាយកសាលាសាកលវិទ្យាល័យភ្នំពេញអន្តរជាតិត្រូវបានគេចោទប្រកាន់ចាប់ដាក់គុកដោយគ្មានភស្តុតាងគ្រប់គ្រាន់។ សូមអន្តរជាតិ​ និងអង្គការសិទ្ធមនុស្សជួយគាត់ផងគឺលោកស្រីទេព កូលាប។

Mar 18, 2012 03:09 AM

មើល​មតិ​ទាំង​អស់.