គ្រួសារពលការិនីធ្វើការនៅម៉ាឡេស៊ីអំពាវនាវឲ្យអាជ្ញាធរជួយរកកូនស្រី
tn.mp3
ម្ដាយពលការិនីមួយរូបឈ្មោះ លឿយ មុំ អាយុ ៥១ឆ្នាំ ស្នើសុំនៅថ្ងៃទី២៩ ខែសីហា ឲ្យអាជ្ញាធរពាក់ព័ន្ធ និងអង្គការសង្គមស៊ីវិលជួយស៊ើបរកដំណឹងកូនស្រីរបស់គាត់ ដែលបានចេញទៅធ្វើការនៅប្រទេសម៉ាឡេស៊ី ហើយបានបាត់ដំណឹងសូន្យឈឹងរយៈពេល ៤ឆ្នាំមកហើយ។
អ្នកស្រី លឿយ មុំ រស់នៅភូមិដូនមាស ឃុំសំបូរ ស្រុកសំបូរ ខេត្តក្រចេះ រៀបរាប់ឲ្យដឹងថា កូនស្រីរបស់គាត់ឈ្មោះ សូត រីន អាយុ ២៥ឆ្នាំ បានស្ម័គ្រចិត្តទៅធ្វើការជាមេផ្ទះនៅប្រទេសម៉ាឡេស៊ី តាមរយះក្រុមហ៊ុនខ្វូតា យូមេន រីសស្ស (Quota Human Resources) កាលពីឆ្នាំ២០០៦។
អ្នកស្រីបន្តថា ក្នុងរយៈពេល ២ឆ្នាំនៃអាណត្តិដំបូង កូនស្រីរបស់គាត់បានទូរស័ព្ទមកគ្រួសារផ្ដល់ដំណឹងពីសុខទុក្ខរបស់ខ្លួន និងបានផ្ញើលុយចំនួន ៥០០ដុល្លារតាមរយៈក្រុមហ៊ុន។ ប៉ុន្តែក្រោយមក ពោលក្នុងឆ្នាំ២០០៨ ក្រុមហ៊ុននេះបានបញ្ជាក់ថា កូនស្រីរបស់គាត់បន្តអាណត្តិ ហើយក្រុមហ៊ុនបានផ្ទេរនាងទៅក្រុមហ៊ុន វីស៊ី មេន ផៅវ័រ (VC Man power) វិញ។
អ្នកស្រី លឿយ មុំ បញ្ជាក់ថា ចាប់តាំងពីទៅក្រុមហ៊ុនថ្មីកាលពីឆ្នាំ២០០៨ រហូតដល់ឆ្នាំ២០១២ នេះ គាត់ដឹងពីសុខទុក្ខកូនស្រីទាល់តែសោះ មិនដឹងស្លាប់ឬរស់ ព្រោះបាត់ដំណឹងកូនឈឹង។ លុះពេលទៅសួរនាំក្រុមហ៊ុន តំណាងក្រុមហ៊ុនប្រាប់ថា រកមិនឃើញព្រោះតែដូរថៅកែថ្មី៖ «ខ្ញុំតេទៅក្រុមហ៊ុនហើយ ក្រុមហ៊ុនថាទាក់ទងទៅៗ ខ្ញុំចេះតែចាំៗ ដល់ ៣ ឬ ៤ឆ្នាំហ្នឹងចេះបាត់ដំណឹងសូន្យទៅ។ ភ័យមិនដឹងជាកូនងាប់ ឬរស់ បាត់វាអត់តេមក ស្ងាត់ច្រៀបឈឹង»។
អ្នកស្រី លឿយ មុំ បានសម្រេចដាក់ពាក្យបណ្ដឹងទៅសមាគមអាដហុក កាលពីថ្ងៃទី២៧ ខែសីហា ប្ដឹងប្រធានក្រុមហ៊ុន វីស៊ី មេន ផៅវ័រ ពីបទមិនទទួលខុសត្រូវធ្វើឲ្យបាត់កូនស្រីរបស់គាត់ និងស្នើសុំឲ្យជួយស្រាវជ្រាវស៊ើបអង្កេតរកកូនស្រីរបស់គាត់ដែលបាត់ដំណឹងរយៈពេល ៤ឆ្នាំ ឲ្យត្រឡប់មកជួបជុំគ្រួសារវិញ។
ទាក់ទងនឹងការចោទប្រកាន់នេះ បុគ្គលិកក្រុមហ៊ុន វីស៊ី មេន ផៅវ័រ ម្នាក់សុំមិនបញ្ចេញឈ្មោះឲ្យដឹងថា ក្រុមហ៊ុនកំពុងទាក់ទងទៅតំណាងរបស់ខ្លួននៅប្រទេសម៉ាឡេស៊ី ដើម្បីជួបជាមួយពលការិនីរូបនោះ។
បុគ្គលិកដដែលបន្តថា ឈ្មោះ សូត រិន ជាពលការិនីមានសុខទុក្ខធម្មតា តែទាស់តែនាងមិនមានបំណងចង់ទាក់ទងក្រុមគ្រួសារនៅស្រុកខ្មែរប៉ុណ្ណោះ ទើបមានការឆោឡោថានាងបាត់ខ្លួនរហូតមានការប្ដឹងផ្ដល់ដល់ក្រុមហ៊ុន៖ «សុខទុក្ខគាត់អត់បញ្ហាទេបង ព្រោះមេខ្ញុំគាត់ប្រាប់មកថា អត់មានបញ្ហាអីទេ គ្រាន់តែកូនហ្នឹងឮថា គាត់ហ្នឹងមិនចង់ call (ទូរស័ព្ទ) មកផ្ទះ»។
ទាក់ទងនឹងបញ្ហានេះ អ្នកស្រី ធីម ណារិន អ្នកសម្របសម្រួលអង្គការអាដហុក ប្រចាំខេត្តក្រចេះ ឲ្យដឹងថា ក្រោយពេលទទួលពាក្យសុំឲ្យជួយអន្តរាគមន៍របស់គ្រួសារពលការិនីដែលបាត់ដំណឹងនេះ អង្គការអាដហុក បានទាក់ទងជាមួយក្រុមហ៊ុនហើយ ក្រុមហ៊ុនបានបញ្ជាក់ថា នាងមានសុវត្ថិភាព និងកំពុងបំពេញការងារនៅប្រទេសម៉ាឡេស៊ី។
អ្នកស្រីបន្តថា ក្រុមហ៊ុនក៏បានប្រាប់ថា ពលការិនីរូបនោះនឹងបញ្ចប់អាណត្តិរួចវិលមកស្រុកខ្មែរវិញនៅអំឡុងខែមករា ឆ្នាំ២០១៣ ខាងមុខ។ តែទោះជាយ៉ាងណា អ្នកស្រីមិនទាន់ជឿលើការអះអាងរបស់ក្រុមហ៊ុននោះទេ ហើយនឹងស្នើសុំឲ្យក្រុមហ៊ុនបង្កើតឲ្យមានកិច្ចសន្ទនាមួយរវាងគ្រួសារពលការិនី និងពលការិនីដោយផ្ទាល់តាម វីដេអូ ខនហ្វឺរិន (Video Conference)។
អ្នកស្រី ធីម ណារិន៖ «មកដល់ពេលនេះមិនទាន់បានជួបសំដីផ្ទាល់ជាមួយពលការិនីរូបនេះ ហើយក៏ដូចជាមិនទាន់បានឃើញមុខដែរ អ៊ីចឹងនៅតែមានការព្រួយបារម្ភពីសុវត្ថិភាពរបស់ សូត រិន នេះឯង»។
អ្នកស្រី ធីម ណារិន ឲ្យដឹងថា ក្នុងរយៈពេល ៧ខែ ឆ្នាំ២០១២ អ្នកស្រីទទួលពាក្យបណ្ដឹងពីរឿងពលករធ្វើការនៅប្រទេសម៉ាឡេស៊ី ចំនួន ២៧ករណី។ ចំនួននេះមានការកើនឡើងខ្ពស់ក្នុងរយៈពេលដូចគ្នាកាលពីឆ្នាំមុន ដែលមានតែ ៤ករណីប៉ុណ្ណោះ។ ការកើនឡើងនៃចំនួនពាក្យបណ្ដឹងនេះ ដោយសារតែមានពលករខ្លះកំពុងប្រឈមនឹងការធ្វើទារុណកម្មធ្ងន់ធ្ងរ ខ្លះទៀតបាត់ខ្លួនដោយរត់គេចពីការបង្ខំឲ្យបន្តកុងត្រាថ្មី ដោយសារតែថៅកែមិនព្រមឲ្យត្រឡប់មកផ្ទះវិញពេលចប់អាណត្តិចាស់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
CheyVorman007
ពី AngKor Watហ៊ឺ ប្រទេសយើងជាប្រទេសធូរលុងផ្នែកច្បាប់មនុស្សជាតិ
លោក«ក្រុមរកស៊ីជមួយហ៊ុនហ្នឹង»ដឹងតែពីបញ្ជូនតែត្រង់ថា
អ្នកណាទៅដល់ឫទើនៅទីណាអត់ដឹងខ្យល់អីសោះ?
មិនដែលឮម៉ែអាណា(និយាយតាមសម្តីសម្តេចបណ្ឌិត)
ធ្វើការចឹង? បើរកស៊ីបែបភ្លើៗចឹងទេតើអោយនៅបើករអី
ទៀត?អត់មានធើ្វការទទួលខុសត្រូវអីសោះ ?គ្មានភ្នាក់
ងារទៅតាមរកឈឹបៗអោយគេទេហ្អេ?និយាយស្មានៗចឹង?
គិតទៅស្រុកខ្មែរទាំងមូល លិតផលកាងារចេញមកដូច
គ្នានឹងលិតផលការងាររដ្ឆាភិបាល ស្លឹកឈើជ្រុះមិនឆ្ងាយ
ពីគល់
Aug 29, 2012 12:07 PM
-
ស្ដាប់ផ្ទាល់
(ព្រឹក ៥:៣០-៦:៣០ ល្ងាច ៧:៣០-៨:៣០) - សំឡេង
ភាសា
