សភាជាតិកម្ពុជាអនុម័តលើកិច្ចព្រមព្រៀងបញ្ជូនពលករទៅប្រទេសកាតា
h081012ts1.mp3
ការអនុម័តនេះ បានធ្វើឡើងដោយមានសំឡេងគាំទ្រចំនួន ៩៧សំឡេង ក្នុងចំណោមសមាជិកសភាចូលរួមប្រជុំសរុប ៩៧រូប រាប់ទាំងតំណាងរាស្ត្រគណបក្ស សម រង្ស៊ី និងគណបក្ស សិទ្ធិមនុស្ស ដែរ។
ក្រសួងការងារ និងបណ្ដុះបណ្ដាលវិជ្ជាជីវៈ មានផែនការបញ្ជូនពលករខ្មែរជាលើកដំបូងទៅធ្វើការងារនៅប្រទេសកាតា នាពេលខាងមុខនេះ ក្រោយពីកិច្ចព្រមព្រៀងជាមួយប្រទេសនេះចូលជាធរមាន ដើម្បីបើកផ្លូវឲ្យកម្ពុជាបញ្ជូនពលករតាមសេចក្តីត្រូវការរបស់ប្រទេសកាតា។
ប៉ុន្តែរហូតមកដល់ពេលនេះ ក្រសួងការងារ និងបណ្ដុះបណ្ដាលវិជ្ជាជីវៈ នៅមិនទាន់អាចកំណត់បាននៅឡើយទេថា តើប្រទេសកាតា ត្រូវការពលករខ្មែរចំនួនប៉ុន្មាននាក់ក្នុងមួយឆ្នាំៗ និងមុខជំនាញអ្វីខ្លះនោះទេ។ ប៉ុន្តែមន្ត្រីជំនាញក្រសួងការងារ និងបណ្ដុះបណ្ដាលវិជ្ជាជីវៈ និងមន្ត្រីជំនាញការងារនៃប្រទេសកាតា នឹងជួបពិភាក្សាគ្នាលំអិតនៅថ្ងៃអនាគត លើបញ្ហាទាំងនេះ។
កិច្ចព្រមព្រៀងដែលត្រូវបានអនុម័តនេះ គឺក្រោយពេលរដ្ឋាភិបាលកម្ពុជា និងរដ្ឋកាតា បានចុះហត្ថលេខាលើកិច្ចព្រមព្រៀង កាលពីថ្ងៃទី៩ ខែឧសភា ឆ្នាំ២០១២ កន្លងទៅនេះ នៅទីក្រុងដូហា (Doha) ប្រទេសកាតា។
រដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈ លោក វង សូត្រ បានមានប្រសាសន៍ប្រាប់អ្នកកាសែត នៅថ្ងៃទី១០ ខែសីហា នៅសភាជាតិថា កិច្ចព្រមព្រៀងនេះ គឺមានគោលបំណងដើម្បីពង្រឹងកិច្ចសហប្រតិបត្តិការរវាងប្រទេសកម្ពុជា និងប្រទេសកាតា នៅក្នុងចំណោមកិច្ចសហប្រតិបត្តិការក្នុងវិស័យជាច្រើនទៀត។
លោក វង សូត្រ៖ «ក្នុងករណីដែលបងប្អូនយើង ដែលអត់មានជំនាញអ្វី គឺថាប្រាក់ឈ្នួលនេះអត់លើសពីយើងនៅស្រុកយើង ឬប្រទេសនៅក្បែរៗយើងទេ។ ប៉ុន្តែ ប្រាក់ឈ្នួលច្រើន គឺបងប្អូនដែលមានជំនាញច្បាស់លាស់ មានបច្ចេកទេសខ្ពស់ គឺប្រាក់ខែរាប់ពាន់ឡើង។ ទីផ្សារនៅកន្លែងហ្នឹង យើងត្រូវតែបានបណ្ដុះបណ្ដាលបងប្អូនជំនាញយើង តម្រូវទីផ្សារកន្លែងនោះ ឲ្យមានសមត្ថភាពគ្រប់គ្រាន់ ដើម្បីជៀសវាងទៅហើយបានប្រាក់ខែទាប។ ជួនកាលត្រឡប់មកវិញ គ្រាន់តែថ្លៃយន្តហោះក៏រាប់ពាន់ដុល្លារដែរ បើប្រៀបយើងទៅប្រទេសជិតខាងនេះ យើងចំណាយតិចតួច យើងទៅមកងាយស្រួល ប៉ុន្តែនៅឯណោះមិនមែនជារឿងងាយស្រួលទេ ព្រោះវាឆ្ងាយ។ នេះជាអ្វីដែលក្រសួងបានគិត»។
តំណាងរាស្ត្រគណបក្ស សម រង្ស៊ី លោក សុន ឆ័យ បានមានប្រសាសន៍នៅមុនពេលអនុម័តថា លោកចង់ឲ្យមានការធានាថា ពលករខ្មែរទទួលបានប្រាក់ខែខ្ពស់ និងការងារល្អប្រើជំនាញ និងបច្ចេកទេស ជាជាងការប្រើកម្លាំងបាយ។ លោកមិនចង់ឃើញថៅកែបរទេសប្រើពលករខ្មែរដូចសត្វធាតុ ឬជាទាសករនោះទេ៖ «កម្មករដែលទៅប្រទេសម៉ាឡេស៊ី ក្នុងមួយឆ្នាំអត់បានទទួលប្រាក់មួយរៀលទេ។ ក្រុមហ៊ុនកាត់យកអស់ហើយ ឆ្នាំទី២នោះ ក្រែងបានអ្វីខ្លះមក។ ក្រសួងការងារមិនមែនទៅបង្កើតក្រុមហ៊ុន ដើម្បីយកមនុស្សចេញទេ គឺខ្លួនត្រូវមានតួនាទីការពារកម្មករខ្មែរនោះ ធ្វើម៉េចឲ្យទទួលបាននូវការការពារ និងផលប្រយោជន៍ និងកម្រៃត្រឹមត្រូវ ដើម្បីគាត់អាចយកលុយកាក់នោះ មកថែទាំ មកទ្រទ្រង់ជីវភាពប្រចាំថ្ងៃរបស់គាត់»។
កិច្ចព្រមព្រៀងដែលគ្រោងបញ្ជូនពលករខ្មែរទៅប្រទេសកាតា នោះ គឺមានសុពលភាពរយៈពេល៣ឆ្នាំ និងអាចពន្យារពេលបាន៣ឆ្នាំទៀត។ បើភាគីរដ្ឋណាមួយចង់លុបចោលកិច្ចព្រមព្រៀងនេះ គឺរដ្ឋនោះត្រូវតែផ្តល់ដំណឹងឲ្យបានមុន ក្នុងរយៈពេល៦ខែ។
របាយការណ៍បានឲ្យដឹងថា រហូតមកដល់ពេលនេះ មានពលករខ្មែរសរុបចំនួនរវាង ៣០ម៉ឺននាក់ទៅ៤០ម៉ឺននាក់ បានចេញទៅធ្វើការងារនៅក្រៅប្រទេសកម្ពុជា ក្នុងនោះមានប្រទេសម៉ាឡេស៊ី ចំនួន៣ម៉ឺននាក់ ប្រទេសកូរ៉េខាងត្បូង ចំនួនជាង២ម៉ឺននាក់ ប្រទេសថៃ ចំនួនជាង២សែននាក់ កោះតៃវ៉ាន់ ចំនួនជាង៥ពាន់នាក់ និងប្រទេសជប៉ុន មួយចំនួនទៀត។
រដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈ លោក វង សូត្រ បានប៉ាន់ស្មានថា ប្រាក់ចំណូលប្រចាំឆ្នាំ គឺចំនួនជាង២០០លានដុល្លារអាមេរិក ក្នុងមួយឆ្នាំ ពីការងារនៅក្រៅប្រទេសនេះ។
លោកបានមានប្រសាសន៍ថា មន្ត្រីស្ថានទូតខ្មែរនៅបរទេស ពិបាកជួយសង្គ្រោះពលករខ្មែរកន្លងមក ដែលរងការចាប់ខ្លួនកន្លងមក ដោយសារតែគាត់បានទៅធ្វើការងារខុសច្បាប់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
កម្មករចំណាកស្រុក
ពី សេអូលការបញ្ជូនពលករទៅកូរ៉េធ្វើឡើងរវាងរដ្ឋនិងរដ្ឋមិនអនុញ្ញាតិឲ្យ ក្រុមហ៊ុនឯកជនជ្រើសរើសទេ។ បាទចំនុចនេះល្អខ្លាំងណាស់ខ្ញុំពេញចិត្តមែនទែន តែមិនពេញចិត្តត្រង់ថាហេតុអ្វីការដាក់ពាក្យនៅស្ថានប័នរដ្ឋខ្មែរថ្លៃម្លេះ? ចង់មិនចង់ក៏ត្រូវខ្ចីលុយគេមុនហើយដើម្បីដាក់ទៅធ្វើការនៅកូរ៉េបាទ!!!សូមមើលផងលោករដ្ឋមន្ត្រី!!!
Aug 11, 2012 10:20 PM
-
ស្ដាប់ផ្ទាល់
(ព្រឹក ៥:៣០-៦:៣០ ល្ងាច ៧:៣០-៨:៣០) - សំឡេង
ភាសា
