មន្ត្រីប្រកាសទទួលពាក្យស្នើសុំចូលគោរពព្រះបរមសព
tn.mp3
គណៈកម្មាធិការជាតិរៀបចំព្រះរាជពិធីបុណ្យព្រះបរមសព ព្រះបាទ នរោត្តម សីហនុ ចាប់ផ្ដើមបើកទូលាយឲ្យប្រជាពលរដ្ឋចូលគោរពព្រះបរមសពក្នុងព្រះរាជវាំងដោយផ្ទាល់ ចាប់ពីថ្ងៃទី២៤ ខែតុលា នេះតទៅ ក្នុងអំឡុងពេលដែលព្រះបរមសពត្រូវតម្កល់ក្នុងព្រះរាជវាំង ៣ខែ។
លោក ញឹក ប៊ុនឆៃ ឧបនាយករដ្ឋមន្រ្តី និងជាអនុប្រធាននៃគណៈកម្មាធិការជាតិរៀបចំព្រះរាជពិធីបុណ្យព្រះបរមសពឲ្យដឹងថា ចាប់ពីថ្ងៃទី២៤ ខែតុលា នេះតទៅ ពោលគឺ ១ថ្ងៃក្រោយពេលបញ្ចប់ពិធីបុណ្យកាន់ទុក្ខជាផ្លូវការ ៧ថ្ងៃចប់សព្វគ្រប់ ខាងគណៈកម្មាធិការរៀបចំព្រះរាជពិធីបុណ្យព្រះបរមសព នឹងផ្ដល់ឱកាសឲ្យប្រជាពលរដ្ឋដាក់ពាក្យស្នើសុំចូលគោរពព្រះបរមសពរបស់ព្រះបាទ នរោត្តម សីហនុ ផ្ទាល់ក្នុងព្រះបរមរាជវាំង។
លោក ញឹក ប៊ុនឆៃ បន្តថា ដោយសារតែចំនួនប្រជាពលរដ្ឋមានច្រើន ដូច្នេះការស្នើសុំគោរពព្រះបរមសព មិនអាចធ្វើដោយឯកជនបានទេ។ ប៉ុន្តែពួកគេអាចបង្កើតជាក្រុមក្នុងតំបន់រស់នៅរបស់ខ្លួនក្នុងការដាក់លិខិតស្នើសុំដើម្បីខាងគណៈកម្មាធិការងាយស្រួលចាត់ចែងពេលវេលាឲ្យចូលគោរពព្រះបរមសព និងអាចរក្សាសណ្ដាប់ធ្នាប់របៀបរៀបរយ និងសន្តិសុខបានល្អ។
លោក ញឹក ប៊ុនឆៃ៖ «កាលណាយើងបើកទូលាយដោយសេរី ដោយមិនមានរៀបចំឲ្យមានរបៀបអីអ៊ីចឹងទៅ វាពិបាកមានបញ្ហាមនុស្សច្រើន បានត្រូវឲ្យមានការដាក់ពាក្យសុំទៅដើម្បីចាត់តាមលំដាប់លំដោយ។ ដាក់ម្នាក់ៗមិនងាយ មិនងាយចាត់ចែងនរណាបានទេ តាមមើលនោះ ទាល់តែដាក់ក្រុមមក ប៉ុន្មាននាក់អ៊ីចឹង ពីស្រុកណា ពីភូមិណា ពីខេត្តណាអីអ៊ីចឹង ហើយខាងខ្ញុំចាត់ចែងនរណាដាក់មុនបានមុន នរណាដាក់បន្តបន្ទាប់ទៅ»។
លោក ញឹក ប៊ុនឆៃ បន្ថែមថា ចំពោះមន្ត្រីរាជការនៅតាមស្ថាប័នក្រសួងនានា ដែលមិនទាន់គោរពព្រះបរមសពព្រះអង្គ ក៏ត្រូវអនុវត្តដូចគ្នាចំពោះលក្ខន្តិកនេះ ដោយត្រូវស្នើសុំពាក្យនៅការិយាល័យនៃគណៈកម្មាធិការរៀបចំព្រះបរមសពនៅជិតព្រះបរមរាជវាំង។
ទោះជាយ៉ាងណា នៅថ្ងៃទី២៤ ខែតុលា មិនទាន់ឃើញមានប្រជាពលរដ្ឋណាបានចូលគោរពព្រះបរមសពព្រះបាទ នរោត្តម សីហនុ នៅឡើយទេ ដោយពួកគេខ្វះព័ត៌មាននៃការស្នើសុំពាក្យចូលគោរពព្រះបរមសព។ តែគេឃើញមានប្រជាពលរដ្ឋមួយចំនួននៅតែបន្តទៅគោរពព្រះបរមសពព្រះអង្គនៅខាងក្រៅព្រះបរមរាជវាំងដដែល បើទោះបីជាថ្ងៃបុណ្យកាន់ទុក្ខព្រះបរមសពជាផ្លូវការ ៧ថ្ងៃ បានបញ្ចប់ទៅហើយនោះ។
ក្នុងពិធីបុណ្យកាន់ទុក្ខព្រះបរមសពថ្ងៃចុងក្រោយ មានព្រះអង្គ ១ម៉ឺនអង្គ និងប្រជាពលរដ្ឋច្រើនម៉ឺននាក់ទៀត បានសូត្រធម៌ បង្សុកូលថ្វាយដល់ព្រះបរមសពព្រះអង្គនៅមុខព្រះបរមរាជវាំង។
មន្ត្រីគណៈកម្មាធិការជាតិរៀបចំព្រះរាជពិធីបុណ្យព្រះបរមសពបញ្ជាក់ថា កាលបរិច្ឆេទច្បាស់លាស់នៃការបូជាព្រះបរមសពព្រះបាទ នរោត្តម សីហនុ នៅមិនទាន់ប្រជុំកំណត់ឲ្យច្បាស់នៅឡើយទេ។
ព្រះបាទសម្ដេចព្រះ នរោត្តម សីហនុ អតីតព្រះមហាក្សត្រ បានសោយទិវង្គតកាលពីថ្ងៃទី១៥ ខែតុលា នៅទីក្រុងប៉េកាំង ប្រទេសចិន ដោយរោគគាំងបេះដូង ក្នុងព្រះជន្ម ៩០ព្រះវស្សា៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
-
ស្ដាប់ផ្ទាល់
(ព្រឹក ៥:៣០-៦:៣០ ល្ងាច ៧:៣០-៨:៣០) - សំឡេង
ភាសា
