ពលរដ្ឋ​នៅ​ព្រៃវែង​សប្បាយ​ចិត្ត​បាន​មេ​ឃុំ​ថ្មី

ប្រជាពលរដ្ឋ​នៅ​ឃុំ​កំពង់​ប្រាសាទ ស្រុក​ពាមជរ ខេត្តព្រៃវែង បាន​ឲ្យ​ដឹង​ថា ពួក​គាត់​មាន​ការ​រំភើប​ត្រេក​អរ នៅ​ពេល​ដែល​បាន​ទទួល​មេ​ឃុំ​ថ្មី មក​ពី​គណបក្ស​ថ្មី ស្រប​ទៅ​តាម​ក្តី​ប្រាថ្នា​របស់​ពួក​គាត់។
ដោយ ហ៊ុំ ចំរើន
2012-06-09
អ៊ីម៉ែល
មតិ
ចែករំលែក
បោះពុម្ព
  • បោះពុម្ព
  • ចែករំលែក
  • មតិ
  • អ៊ីម៉ែល

ប្រជាពលរដ្ឋ​ឈ្មោះ លោក រ៉ាន រ៉ា រស់​នៅ​ភូមិ​តា​ប៉ើ ឃុំ​កំពង់​ប្រាសាទ ស្រុក​ពាមជរ ខេត្ត​ព្រៃវែង មាន​ប្រសាសន៍​នៅ​ថ្ងៃ​ទី​៨ មិថុនា នេះ​ថា រូប​គាត់​ផ្ទាល់ និង​អ្នក​ភូមិ​ជា​ច្រើន​នាក់​ទៀត ដែល​រស់​នៅ​ក្នុង​ឃុំ​នេះ ម្នាក់ៗ​តែង​មាន​ការ​រំភើប​រីករាយ​នៅ​ពេល​ដឹង​ថា មេ​ឃុំ​មក​ពី​គណបក្ស​ថ្មី មក​ដឹក​នាំ​ឃុំ​របស់​គាត់។ លោក រ៉ា បន្ថែម​ថា សប្បាយ​ចិត្ត​នឹង​មេ​ឃុំ​ថ្មី​នេះ ដោយ​សារ​តែ​មេ​ឃុំ​ចាស់​មិន​បាន​បំពេញ​បំណង​របស់​ប្រជាពលរដ្ឋ ដែល​សុំ​ឲ្យ​ដោះស្រាយ​បញ្ហា​ផ្សេងៗ មាន​ការ​ពិបាក​ក្នុង​ការ​ទំនាក់​ទំនង​ការងារ​ម្ដងៗ និង​ការ​អភិវឌ្ឍ​មាន​ការ​យឺត​យ៉ាវ​ជា​ដើម។ ម្យ៉ាង​វិញ​ទៀត ពួក​គាត់​មាន​ការ​ធុញ​ទ្រាន់​ក្នុង​ការ​ដឹក​នាំ​ដដែលៗ របស់​មេ​ឃុំ​ចាស់​នោះ។

លោក រ៉ាន រ៉ា៖ «មេ​ឃុំ​ចាស់ គាត់​មិន​សូវ​បាន​បំរើ​ការ​ឲ្យ​ប្រជាពលរដ្ឋ​ប៉ុន្មាន​ទេ ព្រោះ​គាត់​ប្រឹង​ប្រែង​រក​ស៊ី​តែ​ខ្លួន​គាត់ ម្យ៉ាង​ដូច​ជា​មិន​សូវ​ជា​រីក​ចំរើន​អី​សោះ ដូច​ជា​ផ្លូវ​ថ្នល់​តាម​មូលដ្ឋាន​អី អញ្ចឹង​វា​មិន​សូវ​បាន​ល្អ​ត្រង់​ថា គេ​ផ្ដល់​លុយ​ផ្ដល់​កាក់​អី មក​អញ្ចឹង​គាត់​ច្រើន​តែ​យក​ទៅ​ចែក​គ្នា​គាត់​ចាយ ហើយ​ឥឡូវ​មក​ជាប់​មេ​ឃុំ​ថ្មី​ហ្នឹង ដឹង​ម៉េច​ដែរ​បង តែ​គាត់​មិន​ទាន់​បាន​ចេញ​ធ្វើ​ការ តែ​គ្រាន់​តែ​ថា បាន​ជាប់​គាត់​ថ្មី​ហ្នឹង ប្រជាពលរដ្ឋ​ក្នុង​ភូមិ ក្នុង​ឃុំ គេ​សប្បាយ​ចិត្ត​ណាស់ សប្បាយ​ចិត្ត គេ​អរ រំភើប​ណាស់។ ព្រោះ​ថា បាន​ជាប់​ថ្មី​អញ្ចឹង ក្រែង​លោ​ការងារ​គាត់​ទៅ​រីក​ចំរើន​ជាង​មុខ»

ទាក់​ទង​បញ្ហា​នេះ មេ​ឃុំ​កំពង់​ប្រាសាទ ដែល​បាន​ចាញ់​ឆ្នោត គឺ​លោក ទុំ សារ៉េត ឲ្យ​ដឹង​ថា អ្វី​ដែល​ប្រជាពលរដ្ឋ​លើក​ទ្បើង​នោះ គ្រាន់​ជា​ការ​និយាយ​បញ្ជាក់​ក្រោយ​ពេល​ដែល​លោក​បាន​ចាញ់​ឆ្នោត​ទៅ​ហើយ។ គាត់​បន្ថែម​ថា លោក​បាន​ជាប់​មេ​ឃុំ ២​អាណត្តិ​មក​ហើយ ក្រោម​កា​រ​ដឹក​នាំ​របស់​លោក មិន​បាន​រើស​អើង​ដូច​ការ​ចោទ​ប្រកាន់​របស់​ប្រជាពលរដ្ឋ​នោះ​ទេ។

លោក ទុំ សារ៉េត៖ «បាទ! សូម​ជម្រាប​ផង​ដែរ​ថា ចំពោះ​ប្រជាពលរដ្ឋ គាត់​ចេះ​តែ​មាន​ទស្សនៈ​អញ្ចឹង​ហើយ នេះ​ក្រោយ​ពី​មាន​គណបក្ស​ដទៃ​ឈ្នះ។ បញ្ហា​ទី​១ ការ​ដែល​គាត់​ថា មក​ធ្វើ​សំបុត្រ​ស្នាម​ពិបាក​ទាក់​ទង​មេ​ឃុំ មិន​មែន​ដូច្នេះ​ទេ។ តាម​ពិត​ទៅ ខ្ញុំ​មិន​មែន​រើស​អើង​អី​ទេ ក្នុង​នាម​ជា​មេ​ឃុំ ក្នុង​នាម​ជា​អាជ្ញាធរ​របស់​ប្រជាពលរដ្ឋ បំរើ​ផល​ប្រយោជន៍​ជូន​ប្រជាពលរដ្ឋ ទន្ទឹម​នឹង​នេះ ប្រជាពលរដ្ឋ​គាត់​បាន​ថា ទទួល​គាំទ្រ​បក្ស​ដទៃ ហើយ​បក្ស​ដទៃ​ដែល​គាំទ្រ​ទទួល​បាន​ជោគ​ជ័យ អាហ្នឹង​វា​ជា​រឿង​សិទ្ធិ​របស់​គាត់​ទៅ​ហើយ ខ្ញុំ​ក្នុង​នាម​ជា​មេ​ឃុំ​អាណត្តិ​ទី​១ ទី​២​មក​នេះ ប្រសិន​ថា គណបក្ស​នយោបាយ​ដទៃ ដែល​គេ​អាច​ជាប់​ឆ្នោត​មក​នេះ អាហ្នឹង​ឲ្យ​គេ​ធ្វើ​ទៅ ខ្ញុំ​មិន​មាន​បញ្ហា​អី​ទេ»

ប្រជាពលរដ្ឋ​ម្នាក់​ទៀត គឺ​លោក​ស្រី ជួន ផាំ អាយុ ៥១​ឆ្នាំ រស់​នៅ​ភូមិ​ទឹក​វិល ឃុំ​កំពង់​ប្រាសាទ ស្រុក​ពាមជរ ដែរ​នោះ បាន​ឲ្យ​ដឹង​ថា គាត់​ចង់​ឲ្យ​មាន​ការ​ផ្លាស់​ប្ដូរ​មេ​ឃុំ​ចាស់​ចេញ​យូរ​យារ​ណាស់​មក​ហើយ តែ​ពុំ​បាន​សម្រេច។ ពេល​នេះ​បាន​មេ​ឃុំ​ថ្មី​មក​ពី​គណបក្ស​សិទ្ធិ​មនុស្ស ធ្វើ​ឲ្យ​លោក​ស្រី​មាន​ការ​សប្បាយ​ចិត្ត​រក​អ្វី​ប្រៀប​ផ្ទឹម​មិន​បាន។ លោក​ស្រី​មាន​ក្តី​សង្ឃឹម​ចំពោះ​មេ​ឃុំ​ថ្មី​នេះ អាច​នឹង​ធ្វើ​ឲ្យ​ប្រជាពលរដ្ឋ​ក្នុង​ឃុំ​របស់​គាត់ មាន​ជីវភាព​ធូរធារ​ជាង​មុន​ជា​ពុំ​ខាន។

លោក​ស្រី ជួន ផាំ៖ «មីង​រំភើប​នោះ​រំភើប មែន​ទែន​សូម្បី​តែ​ថា រើស​ប្រាក់​បាន ១០​ម៉ឺន ក៏​មិន​ស្មើ​ផង មីង​អរ​សប្បាយ​ណាស់​ក្នុង​ចិត្ត​រាល់​ថ្ងៃ តាំង​តែ​បាន​ជាប់​សម្លេង​មេ​ឃុំ​លេខ​១ នៅ​ក្នុង​ភូមិ​កំពង់​ប្រាសាទ ចា»

រី​ឯ​បេក្ខជន​ជា​មេ​ឃុំ កំពុង​ប្រាសាទ ដែល​ទើប​នឹង​ជាប់​ឆ្នោត​ថ្មីៗ តាម​លទ្ធផល​ឆ្នោត​បណ្ដោះ​អាសន្ន​នោះ គឺ​លោក លន់ កុល មាន​ប្រសាសន៍​ថា លោក​សន្យា​ថា​គ្រប់​ការងារ​ទាំង​អស់ អាច​ទាក់​ទង​មក​លោក​បាន​ដោយ​មិន​រើស​អើង​បក្ស​ពួក​និយម និង​ដើម្បី​បម្រើ​ផល​ប្រយោជន៍​ប្រជាពលរដ្ឋ​ឲ្យ​បាន​គ្រប់​គណបក្ស​នយោបាយ។

លោក លន់ កុល៖ «ទុក​ចិត្ត​សម្រាប់​ឲ្យ​បោះ​ឆ្នោត ខ្ញុំ​បាទ​ជា​មេ​ឃុំ​សិទ្ធិ​មនុស្ស​នេះ ចាប់​ពី​ថ្ងៃ​នេះ​ទៅ គឺ​ជា​មេ​ឃុំ​សម្រាប់​ប្រជាពលរដ្ឋ​ទាំង​មូល​ហើយ ខ្ញុំ​ក៏​ត្រេក​អរ​ជាមួយ​ប្រជាពលរដ្ឋ និង​លើក​ទឹក​ចិត្ត​ប្រជាពលរដ្ឋ​ដែល​បាន​គាំទ្រ​ខ្ញុំ​បាទ​ហ្នឹង។ ហើយ​អនាគត​ទៅ ខ្ញុំ​នឹង​បម្រើ​ប្រជាពលរដ្ឋ​ដោយ​អត់​រើស​អើង​ជា​មួយ​ប្រជាពលរដ្ឋ​ណា​មួយ​ឡើយ​បាទ»

ទោះ​ជា​យ៉ាង​នេះ​ក្ដី ប្រជាពលរដ្ឋ​លោក​ស្នើ​សុំ​ឲ្យ​មេ​ឃុំ ដែល​ជាប់​ឆ្នោត​ថ្មី​ដឹក​នាំ​ឃុំ​របស់​គាត់​ឲ្យ​បាន​រីក​ចម្រើន និង​មាន​ភាព​យុត្តិធម៌ ក្នុង​សង្គម ដោះស្រាយ​បញ្ហា​ប្រឡាយ​ទឹក​ជូន​ប្រជាពលរដ្ឋ និង​ជួយ​រក​ទីផ្សារ ដើម្បី​លក់​ផលិត​ផល​ស្រូវ​របស់​គាត់​ជា​ដើម៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

មតិ (3)
  • បោះពុម្ព
  • ចែករំលែក
  • អ៊ីម៉ែល

អ្នកតាមដាន

ពី ភ្នំពេញ

មេឃុំថ្មីនេះប្រហែលធ្វើអ្វីមិនបានច្រើនទេ តែយើងជឿថាគាត់នឹងធ្វើបានច្រើនជាង ល្អជាងមេឃុំចាស់។ វិទ្យុអាស៊ីសេរីសូមជួយតាមដានផង។

Jun 24, 2012 12:57 AM

អ្នក​អាន​អនាមិក

I think he can not do his works smooth coz around him CPP members. At first OK but the next can not!! Do he can face with cask buying for change party??.

Jun 10, 2012 11:12 PM

កសិករខ្មែរ

ខ្ញុំចាំតែមើលទេថា មេឃុំថ្មីធ្វើអ្វីបានខ្លះ។ អាស៊ីសេរី ជួយសំភាសន៌ អ្នកទាំងអស់នេះម្តងទៀតផង ក្រោយពី ២-៣ ឆ្នាំ៕ អរគុណទុកជាមុន

Jun 09, 2012 10:00 PM