ពលរដ្ឋ​រស់នៅ​ខេត្ត​ជាប់​សមុទ្រ​ចង់​ឲ្យ​រដ្ឋាភិបាល​កំណត់​ព្រំដែន​ទឹក​ឲ្យ​បាន​ឆាប់

ប្រជាពលរដ្ឋ​មាន​លំនៅឋាន​តាម​ខេត្ត​ជាប់​មាត់​សមុទ្រ កំពុង​ព្រួយ​បារម្ភ​អំពី​ការ​បាត់​បង់​កោះ​ទៅ​ប្រទេស​ជិត​ខាង​កម្ពុជា បន្ទាប់​ពី​ដឹង​ថា កោះត្រល់​ជា​កោះ​របស់​ខ្មែរ​ពី​អតីតកាល ត្រូវ​កាត់​ប្រគល់​ទៅ​ឲ្យ​ប្រទេស​វៀតណាម គ្រប់គ្រង​ជំនួស​ខ្មែរ​នោះ។
ដោយ ដែន អយុធ្យា
2012-09-11
អ៊ីម៉ែល
មតិ
ចែករំលែក
បោះពុម្ព
  • បោះពុម្ព
  • ចែករំលែក
  • មតិ
  • អ៊ីម៉ែល
៨-កញ្ញា-២០១២៖ ផ្ទះ​ពលរដ្ឋ​នៅ​លើ​កោះ​រ៉ុង ក្រុង​ព្រះសីហនុ ខេត្ត​ព្រះសីហនុ។
៨-កញ្ញា-២០១២៖ ផ្ទះ​ពលរដ្ឋ​នៅ​លើ​កោះ​រ៉ុង ក្រុង​ព្រះសីហនុ ខេត្ត​ព្រះសីហនុ។
RFA/Den Ayuthea

បន្ទាប់​ពី​បាន​ស្ដាប់​ការ​បកស្រាយ​ពី​បញ្ហា​ព្រំដែន​របស់​លោក​នាយក​រដ្ឋមន្ត្រី ហ៊ុន សែន កាល​ពី​ថ្ងៃ​ទី​៩ ខែ​សីហា ប្រជាពលរដ្ឋ​រស់នៅ​តាម​ខេត្ត​ជាប់​មាត់​សមុទ្រ មាន​ខេត្ត​កែប កំពត និង​ព្រះសីហនុ ជាដើម ជំរុញ​ឲ្យ​រដ្ឋាភិបាល​ឆាប់​វាស់​កំណត់​ព្រំដែន​សមុទ្រ ជាមួយ​ប្រទេស​ជិត​ខាង​ឲ្យ​បាន​ឆាប់។

លោក ហោ ហេង ជា​ប្រជាពលរដ្ឋ​រស់នៅ​សង្កាត់​កោះរ៉ុង ក្រុង​ព្រះសីហនុ ខេត្ត​ព្រះសីហនុ មាន​មុខរបរ​ជា​អ្នក​នេសាទ​ជិត​៣០ឆ្នាំ​នៅ​លើ​ផ្ទៃ​សមុទ្រ។ លោក​បាន​ឲ្យ​ដឹង​ថា មូលហេតុ​នាំ​ឲ្យ​ពលរដ្ឋ​ចង់​ឲ្យ​រដ្ឋាភិបាល​កំណត់​ព្រំដែន​សមុទ្រ​ឲ្យ​បាន​ឆាប់ គឺ​ចង់​រក្សា​ដី​កោះ​នៅ​សេស​សល់​ឲ្យ​បាន​គង់វង្ស។

លោក ហោ ហេង៖ «ព្រំដែន​ទឹក​យើង​មិន​ទាន់​ដឹង​ពិត​ប្រាកដ​ថា បោះ​ទីតាំង​កន្លែង​ណា ឬ​ត្រូវ​បោះ​ពោង​យ៉ាង​ម៉េច​ទេ។ ហើយ​គណៈកម្មការ​គេ​មិន​ដឹង​ជា​ត្រូវ​ត្រួត​ពិនិត្យ​អី​យ៉ាង​ម៉េច ឬ​ត្រូវ​បោះ​ពោង​យ៉ាង​ណា​ទេ។ ខ្ញុំ​គ្រាន់​តែ​ដឹង​ថា ការ​នេសាទ​របស់​ខ្ញុំ​ទៅ​ពី​កោះ​ប៉ូឡូវ៉ៃ​ទៅ​តែ៣ ទៅ​៤ម៉ាយ គឺ​ដឹង​ថា​ត្រូវ​ចូល​ដល់​ដី​វៀតណាម ហើយ។ ចង់​ឲ្យ​បោះ​ឲ្យ​បាន​ត្រឹមត្រូវ​ដែរ ស្រណុក​យើង​រកស៊ី យើង​អាច​ដឹង​ថា​ព្រំដែន​ថៃ​ត្រឹម​ណា ព្រំដែន​យួន​ត្រឹម​ណា យើង​ងាយ​ឆ្លង​ទៅ​ឆ្លង​មក»

លោក​ថា សព្វថ្ងៃ​នេះ​ប្រជាពលរដ្ឋ​រស់នៅ​លើ​ដី​កោះ​មួយ​ចំនួន តាម​ខេត្ត​ជាប់​មាត់​សមុទ្រ​កំពុង​បារម្ភ​លើ​បញ្ហា​បាត់​បង់​ដី​កោះ​នា​ថ្ងៃ​អនាគត ខ្លាច​បាត់​បង់​កោះ​ទៅ​ឲ្យ​ប្រទេស​ជិត​ខាង​ត​ទៀត។

ប្រជាពលរដ្ឋ​ផ្សេង​ទៀត​មាន​លំនៅឋាន​តាម​ប្រជុំ​កោះ​មួយ​ចំនួន​ទៀត​មាន​ខេត្ត​កំពត កែប និង​ព្រះសីហនុ ជាដើម មាន​មុខរបរ​ជា​អ្នក​នេសាទ ក៏​ចង់​ឲ្យ​រដ្ឋាភិបាល​បោះ​កំណត់​ព្រំដែន​សមុទ្រ​ជាមួយ​ប្រទេស​ជិត​ខាង​កម្ពុជា ឲ្យ​បាន​ឆាប់​ដែរ។ ព្រោះ​ពួក​គាត់​យល់​ថា បើ​ដែន​សមុទ្រ​កម្ពុជា មាន​ព្រំ​កំណត់​ត្រឹមត្រូវ ទៅ​ថ្ងៃ​អនាគត​មិន​ព្រួយ​បារម្ភ​បាត់​បង់​ដី​កោះ​ទៅ​ឲ្យ​បរទេស​ទៀត។

ពលរដ្ឋ​ផ្សេង​ទៀត​បន្ថែម៖ «ទាំង​អស់​គ្នា​កុំ​ឲ្យ​មាន​បញ្ហា យើង​ជា​ប្រជាពលរដ្ឋ​ល្អ​ហើយ។ កុំ​ឲ្យ​មាន​បាត់​បង់​ថែម​ទៀត ចង់​ឲ្យ​ព្រំដែន​បោះ​ឲ្យ​បាន​ឆាប់ និង​ពិត​ប្រាកដ ដើម្បី​ឲ្យ​ប្រាកដ​ថា​របស់​យើង​មាន​ត្រឹម​ណា ឬ​របស់​គេ​មាន​ត្រឹម​ណា។ យើង​ចង់​ធ្វើ​ដំណើរ យើង​ចង់​នេសាទ ហើយ​ចង់​ប្រកប​អាជីវកម្ម​ នៅ​លើ​ដែន​សមុទ្រ យើង​ដឹង​របស់​យើង​ពិត​ប្រាកដ​ថា​របស់​យើង ឬ​ព្រំដែន​យើង​មាន​ពី​ត្រឹម​ណា​ដល់​ត្រឹម​ណា។ ចង់​ដឹង​ពី​បញ្ហា​ព្រំដែន​ហ្នឹង ត្រង់​កន្លែង​ណា​របស់​ជាតិ​ខ្មែរ កន្លែង​ណា​របស់​ជាតិ​យួន ចង់​ដឹង​ឲ្យ​បាន​ច្បាស់​លាស់​កុំ​ឲ្យ​រញ៉េរញ៉ៃ និង​កុំ​ឲ្យ​គេ​រំលោភ​បំពាន​មក​លើ​យើង​ទៀត»

សព្វថ្ងៃ​នេះ ប្រជាពលរដ្ឋ​ខ្មែរ​ដែល​មិន​សូវ​មាន​ការ​យល់​ដឹង​ជ្រៅជ្រះ រស់នៅ​ខេត្ត​ជាប់​មាត់​សមុទ្រ លោក​កំពុង​មាន​កង្វល់ និង​ព្រួយ​បារម្ភ​ខ្លាំង ក្រោយ​ដឹង​ថា កោះត្រល់​ដែល​ជា​ដី​កោះ​របស់​ខ្មែរ ត្រូវ​កាត់​ប្រគល់​ទៅ​ឲ្យ​ប្រទេស​វៀតណាម គ្រប់គ្រង​ជំនួស​ខ្មែរ​នោះ។

ស្រដៀង​គ្នា​ដែរ លោក សុន ឆ័យ ប្រធាន​ក្រុម​អ្នក​តំណាង​រាស្ត្រ និង​ជា​សមាជិក​សភា​គណបក្ស សម រង្ស៊ី នៅ​ថ្ងៃ​ទី​១០ ខែ​កញ្ញា ឆ្នាំ​២០១២ បាន​ឲ្យ​ដឹង​ថា លោក​ក៏​ទន្ទឹង​ចាំ​មើល​រដ្ឋាភិបាល​បង្ហាញ​ឯកសារ​នៃ​ការ​កំណត់​ព្រំដែន​ទឹក ឬ​សមុទ្រ ជាមួយ​ប្រទេស​​​ជិត​ខាង​កម្ពុជា​នេះ​ដែរ។

លោក​ថ្លែង​ថា បក្ស​ប្រឆាំង​មិន​មែន​ចង់​លើក​យក​បញ្ហា​ព្រំដែន មក​ផ្ដួល​រំលំ​រដ្ឋាភិបាល​ទេ ប៉ុន្តែ​បើ​តាម​ការ​អះអាង​របស់​អ្នក​ឯកទេស​ព្រំដែន​មួយ​ចំនួន​បាន​ឲ្យ​ដឹង​ថា ប្រទេស​កម្ពុជា​បាន​បាត់​ដែន​សមុទ្រ​រាប់​ម៉ឺន​ម៉ែត្រ​ការ៉េ ទៅ​ឲ្យ​ប្រទេស​ជិត​ខាង។

លោក សុន ឆ័យ៖ «យើង​មិន​មែន​យក​បញ្ហា​ព្រំដែន​ដូច​លោក​នាយក​រដ្ឋមន្ត្រី​គាត់​ភ័យ​បារម្ភ ដើម្បី​យក​ទៅ​ផ្ដួល​រំលំ​គាត់​ទេ គឺ​យើង​ត្រូវ​ធ្វើ​ជា​បញ្ហា​បច្ចេកទេស​ឲ្យ​បាន​ត្រឹមត្រូវ ព្រោះ​យើង​ឃើញ​មាន​ការ​អះអាង​ពី​លក្ខណៈ​បច្ចេកទេស ពី​អ្នក​ឯកទេស​មួយ​ចំនួន​ថា វា​មាន​ការ​បាត់​បង់​ដែន​សមុទ្រ​របស់​យើង​រាប់​ម៉ឺន​គីឡូម៉ែត្រ​ការ៉េ ហើយ​រដ្ឋាភិបាល​លោក​ថា អ្វី​ដែល​ជា​សន្ធិសញ្ញា​បង្កើត ជា​តំបន់​ទឹក​ប្រវត្តិសាស្ត្រ វា​នឹង​មិន​ធ្វើ​ឲ្យ​បាត់​បង់​របស់​យើង​អី​ជាដើម»

ទោះ​ជា​បែប​នេះ​ក្ដី លោក វ៉ា គឹមហុង ប្រធាន​គណៈកម្មាធិការ​កិច្ចការ​ព្រំដែន​កម្ពុជា បាន​បដិសេធន៍​ មិន​ធ្វើ​អត្ថាធិប្បាយ​ជុំវិញ​កង្វល់ ឬ​ក្ដី​បារម្ភ​របស់​ប្រជាពលរដ្ឋ និង​មន្ត្រី​បក្ស​ប្រឆាំង លើ​បញ្ហា​ការ​បោះ​កំណត់​ព្រំដែន​សមុទ្រ​នេះ​ទេ ព្រោះ​លោក​យល់​ថា បញ្ហា​នេះ​ប្រមុខ​ដឹកនាំ​បាន​បកស្រាយ​អស់​ហើយ​កាល​ពី​ថ្ងៃ​ទី​៩ ខែ​សីហា៖ «ខ្ញុំ​មិន​និយាយ និង​មិន​ធ្វើ​អត្ថាធិប្បាយ​អី​ទេ។ ព្រោះ​អ្វី​ដែល​សម្ដេច​តេជោ​មាន​ប្រសាសន៍ គឺ​គ្រប់គ្រាន់​អស់​ហើយ»

លោក ហ៊ុន សែន នាយក​រដ្ឋមន្ត្រី​កម្ពុជា កាល​ពី​ថ្ងៃ​ទី​៤ ខែ​កញ្ញា ក្នុង​ពិធី​ចែក​សញ្ញាប័ត្រ​ជូន​និស្សិត​ ជាង​៦ពាន់​នាក់​មក​ពី​សាកលវិទ្យាល័យ​ឯកទេស​នៃ​កម្ពុជា លោក​បាន​រិះគន់​ចំពោះ​ការ​ទិតៀន​របស់​មន្ត្រី​បក្ស​ប្រឆាំង និង​សង្គម​ស៊ីវិល​ខ្លះ លើ​បញ្ហា​បោះ​កំណត់​ព្រំដែន​ទឹក​ជាមួយ​ប្រទេស​ជិត​ខាង​ដែល​ចោទ​ថា នាំ​ឲ្យ​កម្ពុជា​បាត់​ដែន​សមុទ្រ​រាប់​ម៉ឺន​ម៉ែត្រ​ការ៉េ​នោះ៖ «មួយ​ថ្ងៃៗ​នៅ​តែ​វៀតណាម ឈ្លាន​ពាន នៅ​តែ​រឿង​កាត់​ដី​ឲ្យ​វៀតណាម។ ដូច​សមុទ្រ​បាត់​អស់​ហើយ​សមុទ្រ​១ម៉ឺន​ម៉ែត្រការ៉េ​បាត់​ផ្ទៃ​ទឹក។ ខ្ញុំ​មិន​ប្រើ​ពាក្យ​ការ៉េ​ទេ ខ្ញុំ​ថា​ទឹក​មួយ​តំណក់​ក៏​វា​មិន​ទាន់​បាត់​ដែរ ព្រោះ​មិន​ទាន់​វាស់​ផង​បាត់​អីៗ។ អា​នេះ​បើ​វា​ភ្លឺៗ ភូត​ឲ្យ​ចេះ​ទំនង​ផង តែ​ភូត​វា​អាក្រក់អាក្រី​ពេក»

ទាក់​ទិន​បញ្ហា​នេះ លោក ហ៊ុន សែន កាល​ពី​ថ្ងៃ​ទី​៩ ខែ​សីហា បាន​មក​ឆ្លើយ​បំភ្លឺ​លើ​បញ្ហា​បោះ​បង្គោល​ព្រំដែន និង​ការ​ដោះដូរ​ភូមិ​មួយ​ចំនួន​នៅ​តាម​ព្រំដែន​រវាង​ប្រទេស​កម្ពុជា និង​វៀតណាម ដែល​ត្រូវ​អនុវត្ត​ក្នុង​ពេល​ខាង​មុខ។

បញ្ហា​នេះ លោក ហ៊ុន សែន បាន​ចំណាយ​ពេល​៥ម៉ោង និង​២០នាទី ក្នុង​សភា​ជាតិ ដោយ​មាន​បញ្ចាំង​បង្ហាញ​រូបភាព​ផែនទី​ដែន​ទឹក និង​ដែន​គោក​រវាង​កម្ពុជា និង​វៀតណាម ដែល​បន្សល់​ទុក​តាំង​ពី​សម័យ​អាណានិគម និង​របប​របស់​លោក​សេនា​ប្រមុខ លន់ នល់។

យ៉ាង​នេះ​ក្ដី មន្ត្រី​គណៈកម្មាធិការ​កិច្ចការ​ព្រំដែន​កម្ពុជា បាន​អះអាង​ថា សកម្មភាព​បោះ​បង្គោល​កំណត់​ព្រំដែន​គោក​ជាមួយ​ប្រទេស​វៀតណាម នឹង​បោះ​បញ្ចប់​នៅ​ត្រឹម​ឆ្នាំ​២០១២។ បន្ទាប់​ពី​នោះ រដ្ឋាភិបាល​នឹង​មាន​ផែនការ​ពិនិត្យ​លើ​ការ​កំណត់​ព្រំដែន​ទឹក ឬ​ព្រំដែន​គោក​ជាមួយ​ប្រទេស​ថៃ ជា​បន្ត​បន្ទាប់៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (2)
  • បោះពុម្ព
  • ចែករំលែក
  • អ៊ីម៉ែល

អ្នក​អាន​អនាមិក

បាន​ធ្វេីនាយករដ្ឋមន្ត្រីដៀលជេ​រគេកប់ៗមាត់សុទ្ធតែចោរ
លួចភ្លីភ្លឺអាល្ងង់ទូរចុសមានឆ្លុសកពា្ចក់មើលខ្លួនអែងទេ???

Sep 11, 2012 05:56 AM

CheyVorman007

ពី AngKor Wat

លោកបណ្ឌិតមានមហិច្ចតាខាងអំណាចនឹងលុយនិយម
ព្រោះលោកចេញពីក្រុមគ្រួសារអ្នកក្សត់ធ្លាប់មានការឈឺ
ចិត្តនិងនាយទន់មិនយកចិត្តទុកដាក់លើខ្លួនទើបខំតស៊ូរ
ព្រមធើ្វគ្រប់យ៉ាងដើម្បីសម្រេចការយល់សប្តិរបស់លោក។ឥឡូវលោកបានក្លាយខ្លួនជានាយទន់វិញម្តងព្រមទាំងបាន
ប្រព្រឹត្តអំពើរខុសឆ្គងគួរខ្អើម នៅក្នុងប្រទេសទំាងមូលមាន
ពលរដ្ឆរស់នៅហើយក្តីក៏លោកព្រមទាំងបក្សពួកមិនញញើត
នឹងជួញដូរដែរចុះទម្រាំដីព្រៃឫលើផ្ទៃទឹកមិនមានមនុស្សរស់
នៅ???

Sep 11, 2012 03:05 AM

គេហទំព័រ​ទាំងមូល