ពលរដ្ឋស្នើឲ្យអាជ្ញាធរទប់ស្កាត់រថយន្តដឹកទំនិញធុនធ្ងន់បើកចូលក្រុង
h080912ay.mp3
ពលរដ្ឋអះអាងថា រថយន្តធុនធ្ងន់តែងបង្កគ្រោះថ្នាក់ដល់ជីវិតប្រជាពលរដ្ឋ សិស្សានុសិស្ស និងកម្មករកាត់ដេរស្ទើររៀងរាល់ថ្ងៃ ប៉ុន្តែអាជ្ញាធរមិនបានទប់ស្កាត់ឲ្យមានប្រសិទ្ធភាព។
អាណាព្យាបាលសិស្សរស់នៅរាជធានីភ្នំពេញ បានស្នើឲ្យអាជ្ញាធរពាក់ព័ន្ធជួយទប់ស្កាត់រថយន្តដឹកទំនិញធុនធ្ងន់ កំពុងបើកបរចូលក្រុងបង្កឲ្យមានគ្រោះថ្នាក់ចរាចរណ៍ដល់អាយុជីវិតមនុស្សធ្ងន់ធ្ងរ។ ស្ត្រីជាអាណាព្យាបាលម្នាក់ក្នុងចំណោមពលរដ្ឋច្រើនទៀត មានលំនៅឋានជាប់តាមផ្លូវជាតិលេខ៥ ស្ថិតក្នុងខណ្ឌឫស្សីកែវ ព្រួយបារម្ភពីសុវត្ថិធ្វើដំណើរតាមម៉ូតូរបស់កូនទៅសាលារៀន ព្រោះថា គ្រោះថ្នាក់ចរាចរណ៍បង្កដោយរថយន្តដឹកទំនិញកើតមានស្ទើររាល់ថ្ងៃ។
លោកស្រីអះអាងថា ជារៀងរាល់ខែ គ្រោះថ្នាក់ចរាចរណ៍បង្កដោយរថយន្តដឹកទំនិញតាមផ្លូវជាតិលេខ៥ កើតមានមិនតិចជាង១០ករណីទេ ហើយភាគច្រើននៃជនរងគ្រោះបានស្លាប់បាត់បង់ជីវិត។ កង្វល់នេះ លោកស្រីស្នើឲ្យសមត្ថកិច្ចជំនាញជួយទប់ស្កាត់រថយន្តដឹកទំនិញ បញ្ឈប់មិនឲ្យបើកដឹកទំនិញចូលក្រុងពេលថ្ងៃតទៅទៀត៖ «ដាក់ពិន័យកុំឲ្យចូលក្រុង ឲ្យបើកវាង ព្រោះរថយន្តដឹកទំនិញបើកចូលក្រុង បើកអត់មើលអ្នកជិះម៉ូតូទេ។ បើកដល់កៀកម៉ូតូ រួចស៊ីផ្លេ បើមិនជៀសបុកងាប់។ ភាគច្រើន បើកប៉ះផ្លូវជាតិលេខ៥ ច្រើនតែជនរងគ្រោះស្លាប់។ កុំឲ្យឡានធំបើកចូលក្រុងពេលសិស្សសាលាទៅរៀន ឬចេញពីរៀន គឺមានគ្រោះថ្នាក់ទាំងកូនគេកូនខ្ញុំជាដើម។ បើកបុកគេហើយ បើករត់ទៀត។ ឡានដឹកខ្សាច់ ឡានដឹកដែក និងឡានកុងតឺន័រ»។
សព្វថ្ងៃនេះ គេសង្កេតឃើញថា គ្រោះថ្នាក់ចរាចរណ៍បង្កដោយរថយន្តដឹកទំនិញ បើកចូលក្រុងកើតមានរាប់សិបករណី នៅតាមសង្កាត់មួយចំនួនក្នុងរាជធានីភ្នំពេញ មានដូចជា ខណ្ឌដង្កោ ខណ្ឌចំការមន ខណ្ឌពោធិ៍សែនជ័យ ពិសេសខណ្ឌឫស្សីកែវ និងខណ្ឌមានជ័យ ជាដើម។
ទាក់ទិនបញ្ហានេះ មន្ត្រីរាជការរស់នៅខណ្ឌមានជ័យ ក្រុងភ្នំពេញ បានទទួលស្គាល់ថា គ្រោះថ្នាក់ចរាចរណ៍បង្កដោយរថយន្តដឹកទំនិញ ពិតជាបានកើតមានស្ទើររាល់ថ្ងៃ និងបង្កឲ្យមានមនុស្សស្លាប់។ លោកថា ប្រមុខដឹកនាំរដ្ឋាភិបាល និងមន្ត្រីក្រសួងមហាផ្ទៃ គួរពិនិត្យពីគ្រោះថ្នាក់ចរាចរណ៍បង្កដោយរថយន្តដឹកទំនិញបើកចូលក្រុង និងមានវិធានការទប់ស្កាត់។
កាលពីល្ងាចថ្ងៃទី៨ ខែសីហា និស្សិតស្រីជាពេទ្យទាហានម្នាក់ មានអាយុ២០ឆ្នាំ ត្រូវរថយន្តដឹកខ្សាច់បើកបុកពីក្រោយ ពេលកំពុងជិះម៉ូតូតាមផ្លូវមុនីរ៉េត បណ្ដាលឲ្យស្លាប់ភ្លាមៗក្នុងសង្កាត់ស្ទឹងមានជ័យ។
ផ្ដើមពីបញ្ហានេះ លោក វ៉ន ពៅ ជាប្រធានសមាគមប្រជាធិបតេយ្យឯករាជ្យសេដ្ឋកិច្ចក្រៅប្រព័ន្ធ លោកថ្លែងថា សមត្ថកិច្ចមិនគួរអនុញ្ញាតិឲ្យរថយន្តដឹកទំនិញធុនធ្ងន់ បើកចូលក្រុងពេលថ្ងៃទៀតទេ ព្រោះថា ប្រភេទរថយន្តទាំងនេះ តែងបង្កឲ្យមានគ្រោះថ្នាក់ចរាចរណ៍ដល់អាយុជីវិតអ្នកធ្វើដំណើរតាមផ្លូវ៖ «យើងបានឃើញរថយន្តដឹកទំនិញធុនធ្ងន់ បើកកិននិស្សិតទាហានម្នាក់ យើងរន្ធត់តក់ស្លុត។ ចំណុចនេះ គឺភាពអសកម្មបណ្ដាលមកពីអាជ្ញាធរមានសមត្ថកិច្ច លោកមិនមានវិធានការទប់ស្កាត់សម្រាប់រថយន្តធំៗ ដែលបង្កគ្រោះថ្នាក់ចរាចរណ៍ ដោយបណ្តោយឲ្យរថយន្តបង្កល្មើសទាំងនោះបើកយ៉ាងអនាធិបតេយ្យនៅក្នុងទីប្រជុំជន ជាពិសេសនៅក្នុងរាជធានីភ្នំពេញ»។
របាយការណ៍ស្នងការនគរបាលរាជធានីភ្នំពេញ បានបង្ហាញថា ចំនួនគ្រោះថ្នាក់ចរាចរណ៍៦ខែ ដើមឆ្នាំ២០១២ មានជាង២០០ករណី បានថយចុះតិចតួច បើធៀបឆ្នាំ២០១១។ ប៉ុន្តែចំនួនមនុស្សស្លាប់កើនឡើង ដោយក្នុងចំណោមមនុស្សស្លាប់ជាង១០០នាក់ កើនប្រមាណ២០នាក់ ធៀប៦ខែឆ្នាំ២០១១។
លោកវរសេនីយ៍ត្រី ចេវ ហាក់ នាយរងការិយាល័យនគរបាលចរាចរណ៍ផ្លូវគោករាជធានីភ្នំពេញ បានឲ្យដឹងថា គ្រោះថ្នាក់ភាគច្រើនបណ្ដាលមកពីកត្តាមនុស្ស គឺអ្នកបើកបរមានជាតិស្រវឹង និងបើកជែងគ្នាលើដងផ្លូវជាដើម។
ប្រជាពលរដ្ឋឲ្យដឹងថា សព្វថ្ងៃនេះ ទោះបីសមត្ថកិច្ចពាក់ព័ន្ធបន្តរឹតបន្តឹងការអនុវត្តច្បាប់ចរាចរណ៍ផ្លូវគោក តម្រូវឲ្យពលរដ្ឋពាក់មួកសុវត្ថិភាព ពាក់ខ្សែក្រវាត់ការពារ គោរពស្លាកសញ្ញា និងភ្លើងសញ្ញាជាដើមក្តី ប៉ុន្តែសមត្ថកិច្ចមិនទាន់មានវិធានការក្តៅ ឬទប់ស្កាត់សកម្មភាពរបស់រថយន្តដឹកទំនិញធុនធ្ងន់ បើកបរចូលក្រុងនោះទេ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
-
ស្ដាប់ផ្ទាល់
(ព្រឹក ៥:៣០-៦:៣០ ល្ងាច ៧:៣០-៨:៣០) - សំឡេង
ភាសា
