លោកនាយករដ្ឋមន្ត្រី ហ៊ុន សែន បានថ្លែងថា បញ្ហាអំពើឃាតកម្ម និងអំពើប្លន់នៅតែមានចរិតលក្ខណៈធ្វើឲ្យប្រជាពលរដ្ឋភ័យបារម្ភនៅឡើយ។ បទល្មើសទាំងនោះហាក់មានការកើនឡើងនៅទីក្រុងភ្នំពេញ និងទីប្រជុំជននានា នៅឆ្នាំ២០១០ និងឆ្នាំ២០១១ កន្លងទៅនេះ។
លោក ហ៊ុន សែន៖ «មុខសញ្ញានៃបទល្មើសបានរត់គេចខ្លួននៅមិនទាន់ចាប់យកមកផ្ដន្ទាទោសនៅឡើយ រីឯសកម្មភាពរំលោភ សម្លាប់ រំលោភសេពសន្ថវៈ នៅតែមានការកើនឡើងជារៀងរាល់ឆ្នាំ»។
លោកថ្លែងបែបនេះនៅក្នុងពិធីបិទសន្និបាតបូកសរុបរបាយការណ៍ប្រចាំឆ្នាំ២០១១ នៅក្រសួងមហាផ្ទៃ កាលពីថ្ងៃព្រហស្បតិ៍ ទី២៣ ឆ្នាំ២០១២។
លោក ចាន់ សុវ៉េត អនុប្រធានផ្នែកស៊ើបអង្កេតនៃអង្គការសិទ្ធិមនុស្សអាដហុក (ADHOC) មានប្រសាសន៍ថា កងនគរបាលហាក់ស្ថិតក្នុងសភាពអសកម្ម និងពុំសូវមានឆន្ទៈក្នុងការបំពេញការងារនោះប៉ុន្មានទេ៖ «បើនិយាយពីសម្ភារៈសម្រាប់បំពេញការងារខ្វះខាតស្ទើរតែទាំងស្រុង។ ទីពីរឆន្ទៈរបស់ប៉ូលិសយើងមិនសូវបំពេញតាមគោលការណ៍ច្បាប់ប៉ុន្មានទេ បើអនុវត្តតាមច្បាប់ច្បាស់ជាប្រពន្ធហ្នឹងស៊ីសៀងហើយ»។
លោកបន្តថា ដើម្បីបញ្ចៀសបញ្ហានេះ រដ្ឋាភិបាលគួរតែគិតគូរពីបញ្ហាសម្ភារៈបរិក្ខារសម្រាប់ឲ្យមន្ត្រីនគរបាលបំពេញការងារបានពេញលេញតាមវិជ្ជាជីវៈ ព្រមទាំងផ្ដល់នូវប្រាក់បៀវត្សសមរម្យដើម្បីឲ្យពួកគាត់មានការរស់នៅដោយសេចក្ដីថ្លៃថ្នូរ។
លោកនាយករដ្ឋមន្ត្រីបានថ្លែងដែរថា ចំនួនពលរដ្ឋស្លាប់ និងរងរបួសដោយសារគ្រោះថ្នាក់ក្នុងសង្គមកាន់តែមានទំហំកាន់តែកើនឡើងជារៀងរាល់ឆ្នាំ។
របាយការណ៍ពីក្រសួងមហាផ្ទៃបានបង្ហាញថា ក្នុងឆ្នាំ២០១១ គ្រោះថ្នាក់នានាក្នុងសង្គមបានបណ្តាលឲ្យមនុស្សស្លាប់ជិត ៤ពាន់នាក់ និងរងរបួសជាងមួយម៉ឺននាក់។ គ្រោះថ្នាក់ដែលជាបញ្ហាស្មុគស្មាញជាងគេនោះ គឺគ្រោះអគ្គិភ័យ ចរាចរណ៍ និងអាវុធជាតិផ្ទុះ។
ក្នុងឆ្នាំ២០១១ គ្រោះថ្នាក់ចរាចរណ៍បានបណ្ដាលឲ្យមនុស្សស្លាប់ជិត ២០០នាក់ គឺកើនឡើងប្រមាណ ១៥% ធៀបនឹងឆ្នាំ២០១០។ ដើម្បីដោះស្រាយបញ្ហានេះ លោកនាយករដ្ឋមន្ត្រីបានទាមទារឲ្យគណៈដឹកនាំការងារចរាចរណ៍ផ្លូវគោក ត្រូវពិនិត្យឡើងវិញឲ្យបានម៉ត់ចត់ និងស៊ីជម្រៅ។
លោក ហ៊ុន សែន៖ «ដើម្បីរកឲ្យឃើញបញ្ហាប្រឈមសំដៅរួមគ្នារៀបចំយុទ្ធសាស្ត្រជាតិ និងផែនការសកម្មភាពក្នុងរយៈពេលចំពោះមុខដើម្បីកាត់បន្ថយគ្រោះថ្នាក់ចរាចរណ៍ឲ្យបានជាអតិបរមា»។
លោក មាស ចាន់ឌី ជាអ្នកសម្របសម្រួលគម្រោងសុវត្ថិភាពចរាចរណ៍នៃអង្គការជនពិការអន្តរជាតិប៊ែលហ្សិក។ លោកបានឲ្យដឹងថា បញ្ហាគ្រោះថ្នាក់ចរាចរណ៍ជារៀងរាល់ឆ្នាំ គឺមិនទាន់មានការថយចុះនៅឡើយទេ។
បញ្ហានេះលោកបញ្ជាក់ថា ចំនួន ៩០ភាគរយ គឺបណ្ដាលមកពីកត្តាមនុស្ស៖ «ដូច្នេះវិធានការចាំបាច់ត្រូវអប់រំពលរដ្ឋឲ្យយល់ និងចូលរួមការពារសុវត្ថិភាពចរាចរណ៍ទាំងអស់គ្នា»។
ក្រៅពីនេះ រដ្ឋាភិបាល ជាពិសេសអ្នកអនុវត្តច្បាប់ ត្រូវតែរឹតបន្តឹងលើការអនុវត្តច្បាប់ឲ្យបានរឹងមាំជាងពេលនេះបន្ថែមទៀត៕
កំណត់ចំណាំ៖ ចំពោះអ្នកបញ្ចូលមតិនៅក្នុងអត្ថបទនេះ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណាដែលមិនជេរប្រមាថដល់អ្នកដទៃតែប៉ុណ្ណោះ។