តុលាការបញ្ជាចាប់ខ្លួនប៉ូលិសម្នាក់សង្ស័យពាក់ព័ន្ធរឿងពុករលួយ

ព្រះរាជអាជ្ញារងអមតុលាការខេត្តមណ្ឌលគិរី បានបញ្ជាឲ្យឃាត់ខ្លួនមន្ត្រីប៉ូលិសសេដ្ឋកិច្ចក្រសួងមហាផ្ទៃ ម្នាក់ ក្នុងរឿងស្ទាក់ឃាត់រថយន្តដឹកឈើប្រណិតមួយគ្រឿងហើយជំរិតទារប្រាក់។

ដោយ រដ្ឋា វីសាល
2012-09-04

sr.mp3

សេចក្ដីរាយការណ៍របស់សមត្ថកិច្ចប៉ូលិសស្រុកកែវសីមា ឲ្យដឹងថា ការឃាត់ខ្លួនមន្ត្រីប៉ូលិសនេះ គឺមានជាប់ពាក់ព័ន្ធនឹងសេចក្ដីរាយការណ៍របស់ម្ចាស់ឈើក្នុងរថយន្តដែលប៉ូលិសស្ទាក់ឃាត់នោះ អះអាងថា ជាឈើកម្មសិទ្ធិរបស់ព្រះរាជអាជ្ញារងរូបនោះ ហេតុនេះទើបព្រះរាជអាជ្ញារងនោះចុះឃាត់ខ្លួនមន្ត្រីប៉ូលិសសេដ្ឋកិច្ច។

មន្ត្រីប៉ូលិសស្រុកកែវសីមា ខេត្តមណ្ឌលគិរី នៅថ្ងៃអង្គារ ទី៤ ខែកញ្ញា ឆ្នាំ២០១២ ឲ្យដឹងថា មន្ត្រីប៉ូលិសសេដ្ឋកិច្ចក្រសួងមហាផ្ទៃ មួយរូប ដែលមានលិខិតបំពេញបេសកកម្មបង្ក្រាបបទល្មើសសេដ្ឋកិច្ចនៅខេត្តមណ្ឌលគិរី និងខេត្តរតនគិរី ត្រូវបានមន្ត្រីស្ថាប័នអយ្យការបញ្ជាឲ្យឃាត់ខ្លួននាំមកសាកសួរនៅអធិការដ្ឋានប៉ូលិសស្រុក ក៏ប៉ុន្តែក្រោយការឃាត់ខ្លួនតែប៉ុន្មានម៉ោងប៉ុណ្ណោះ មន្ត្រីស្ថាប័នអយ្យការដដែលនោះ បានសម្របសម្រួលឲ្យដោះលែងមន្ត្រីប៉ូលិសនោះវិញ។

មន្ត្រីប៉ូលិសដែលត្រូវឃាត់ខ្លួនមានឈ្មោះ ជុំ ដារ៉ាវុធ មានឋានៈអនុសេនីយ៍ឯកនៃនាយកដ្ឋាននគរបាលសេដ្ឋកិច្ចក្រសួងមហាផ្ទៃ ត្រូវឃាត់ខ្លួនកាលពីរាត្រីថ្ងៃទី៣ ខែកញ្ញា កន្លងទៅនេះ តាមបញ្ជារបស់ព្រះរាជអាជ្ញារងខេត្តមណ្ឌលគិរី គឺលោក សោ វុទ្ធី។

អធិការប៉ូលិសស្រុកកែវសីមា លោក ស៊ុន ប៊ុនធឿន រៀបរាប់ថា លោក ជុំ ដារ៉ាវុធ បានស្ទាក់ឃាត់រថយន្តដឹកជញ្ជូនឈើតាមបណ្ដោយផ្លូវជាតិលេខ ៧៦អា ចំណុចមុខស្ថានីយប្រេងឥន្ធនៈ ឃិន ម៉េងស្រេង នៅចម្ងាយប្រមាណជាងមួយគីឡូម៉ែត្រពីផ្សារស្រុកកែវសីមា និងបានជំរិតទារប្រាក់ពីការដឹកជញ្ជូនឈើខុសច្បាប់នោះ ក៏ប៉ុន្តែម្ចាស់រថយន្តដឹកឈើបានអះអាងថា ឈើក្នុងរថយន្តនោះជារបស់ព្រះរាជអាជ្ញារង ហើយបន្ទាប់មកគេឃើញព្រះរាជអាជ្ញារង លោក សោ វុទ្ធី ដឹកនាំសមត្ថកិច្ចកងរាជអាវុធហត្ថមកដល់ទីកើតហេតុហើយឃាត់ខ្លួនលោក ជុំ ដារ៉ាវុធ មកសាកសួរនៅអធិការដ្ឋានប៉ូលិសស្រុក។

លោកបន្តថា ព្រះរាជអាជ្ញាបានបដិសេធថា ឈើនោះមិនមែនជាឈើរបស់លោកនោះទេ ក៏ប៉ុន្តែបន្ទាប់មកមន្ត្រីទាំងពីរបានសម្របសម្រួលគ្នាបញ្ចប់បញ្ហា ហើយបានប្រគល់ភារកិច្ចឲ្យប៉ូលិសរឹបអូសឈើនោះប្រគល់ជូនមន្ត្រីសង្កាត់រដ្ឋបាលព្រៃឈើ។

លោក ស៊ុន ប៊ុនធឿន៖ «គាត់ដឹកនាំផ្ទាល់តែម្ដង យកកំលាំងប៉េអិមមកបីនាក់។ កំលាំងខ្ញុំនៅហ្នុងដែរហ្នឹង ដល់ពាក់ព័ន្ធលុយកាក់អ៊ីចឹង កំលាំងខ្ញុំមិននិយាយទេ។ ខាងសេដ្ឋកិច្ចក្រសួងក៏មិនបានស្អីដែរ មិនបានលុយឯណា។ ហ្នឹងហើយទារគ្នាទៅ គេថាឲ្យ ២០០ (ដុល្លារ) ម្ដងថា ៣០០អ៊ីចឹងទៅ លុយហ្នឹងក៏គ្មានបានដែរ យើងនិយាយរកចំណុចកណ្ដាលអ៊ីចឹងទៅណា! អាហ្នឹងខ្ញុំថា តែប៉ុណ្ណឹងទេអារឿងគេនៅលើខ្ញុំមិនចង់និយាយច្រើន។ ប៉ុន្តែម្ចាស់រថយន្តគាត់ដោះរបស់គាត់អ៊ីចឹងទៅ យើងថាគេសម្របសម្រួលគ្នាអ៊ីចឹងទៅណា ! ឮថាព្រះរាជអាជ្ញា អ៊ីចឹងសម្របសម្រួល យើងយល់ហើយ»។

វិទ្យុអាស៊ីសេរី នៅថ្ងៃអង្គារ ទី៤ ខែកញ្ញា នេះ មិនអាចទាក់ទងសុំការបំភ្លឺពីលោក ជុំ ដារ៉ាវុធ ពីការចោទប្រកាន់ និងឃាត់ខ្លួនលោកបានទេ។ ចំណែកព្រះរាជអាជ្ញារង លោក សោ វុទ្ធី មិនទទួលទូរស័ព្ទវិទ្យុអាស៊ីសេរី ហៅចូលជាច្រើនលើកនៅរសៀលថ្ងៃអង្គារ នេះដែរ។

នាយខណ្ឌរដ្ឋបាលព្រៃឈើ ខេត្តមណ្ឌលគិរី លោក កែប តក់ មានប្រសាសន៍បញ្ជាក់ថា លោកមិនទាន់បានទទួលរបាយការណ៍ពីមន្ត្រីផ្នែកព្រៃឈើស្រុកកែវសីមា នៅឡើយ ទាក់ទិនការបង្ក្រាបបទល្មើសព្រៃឈើនេះ៖ «អត់ដឹងផង អត់ទាន់ឃើញរបាយការណ៍មកដល់ផង។ ចាំមើលផ្នែកគេធ្វើរបាយការណ៍មកខ្ញុំសិនណា! ព្រោះមានផ្នែកមានសង្កាត់អ៊ីចឹងទៅ កាលណាគេធ្វើសំណុំរឿងហើយ ផ្នែកគេរុញមកខ្ញុំ»។

យ៉ាងនេះក្តី អធិការប៉ូលិសស្រុកកែវសីមា លោក ស៊ុន ប៊ុនធឿន បានបញ្ជាក់ថា ឈើដែលគេដឹកជញ្ជូនខុសច្បាប់នោះ មានឈើប្រណិតកែច្នៃជាថូផ្កាមិនទាន់សម្រេចចំនួនពីរ និងឈើប្រណិតអារជាឈើជ្រុងចំនួន ១១ដុំ ហើយឈើទាំងអស់នោះលោកបានធ្វើកំណត់ហេតុប្រគល់ឲ្យមន្ត្រីព្រៃឈើនៅតំបន់នោះរួចហើយ៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។