ជាក់ស្ដែង ប៉ូលិសចាប់បានសម្ភារៈផលិតគ្រឿងញៀន រួមទាំងសារធាតុគីមីដែលសង្ស័យថា ជាសារធាតុផ្សំគ្រឿងញៀនសរុបចំនួនពីរកុងតឺន័រ (Container) និងចាប់បានជនសង្ស័យម្នាក់ទៀត បញ្ជូនខ្លួនទៅតុលាការភ្នំពេញនៅថ្ងៃទី១៧ កក្កដា ឆ្នាំ២០១២។
ប៉ូលិសប្រឆាំងគ្រឿងញៀនចាប់បានសារធាតុគីមីដែលគេសង្ស័យថា នឹងអាចផ្សំផលិតគ្រឿងញៀន បានមួយកុងតឺន័រទម្ងន់ប្រមាណជាង ៣០តោន និងមួយកុងតឺន័រទៀតផ្ទុកដោយសម្ភារៈសម្រាប់ផលិតគ្រឿងញៀន។ ការរឹបអូសនេះធ្វើឡើងនៅចុងសប្ដាហ៍កន្លងទៅនេះ នៅកំពង់ផែ ក្រុងព្រះសីហនុ និងនៅកំពង់ផែ ក្រុងភ្នំពេញ។
លោកឧត្ដមសេនីយ៍ ខៀវ សាម៉ន ប្រធានមន្ទីរប្រឆាំងគ្រឿងញៀនក្រសួងមហាផ្ទៃមានប្រសាសន៍នៅថ្ងៃទី១៧ កក្កដា ដោយបានហៅការបង្ក្រាបលើកនេះថា ជាជោគជ័យមួយធំ ចំលើអ្នកជួញដូរគ្រឿងញៀនដែលលោកហៅថា មិនមែនជាក្រុមជួញដូរគ្រឿងញៀនធម្មតា មានបណ្ដាញខ្សែរយៈធំនៅបរទេស៖ «ជោគជ័យធំដែរ គិតទៅសារធាតុគីមីទាំងអស់ហ្នឹង បើសរុបទៅ បើគិតទាំងភ្នំពេញ គិតទាំងកំពង់សោម វាជាង៣០តោន»។
លោកបញ្ជាក់ថា លទ្ធផលនៃការបង្ក្រាបនេះគឺដោយសារប៉ូលិសបានតាមស្រាវជ្រាវខ្សែរយៈជួញដូរគ្រឿងញៀន បន្ទាប់ពីប៉ូលិសបានបង្ក្រាបកន្លែងផលិតគ្រឿងញៀនមួយកន្លែងដ៏ធំ នៅស្រុកភ្នំស្រួច ក្នុងខេត្តកំពង់ស្ពឺ នៅដើមខែកក្កដា រួចមក៖ «មួយកុងតឺន័រ គឺជាសម្ភារៈមធ្យោបាយពាក់ព័ន្ធក្រុមហ្នឹងដែរ។ អាហ្នឹងសុទ្ធតែគ្រឿងម៉ាស៊ីន របៀបជាឡសម្ងួត មានខ្សែភ្លើង ម៉ាស៊ីនក្រឡុក ម៉ាស៊ីនប្រដាប់ចម្រោះ។ បើនិយាយទៅ ជាឧបករណ៍សម្ភារៈមធ្យោបាយពាក់ព័ន្ធនឹងគីមីទាំងអស់ហ្នឹង ហើយមួយកុងតឺន័រទៀតជាសារធាតុគីមី»។
លោកបន្តថា នេះគឺជាការចាប់ និងរឹបអូសសម្ភារៈផលិត និងសារធាតុគីមីដ៏ធំមួយ ដែលមិនធ្លាប់មាន ហើយបើសិនជាប៉ូលិសចាប់មិនបានទេ នៅពេលដែលក្រុមផលិតគ្រឿងញៀននេះ ដំណើរការបានសម្រេចជោគជ័យនោះ អនាគតសង្គមខ្មែរនឹងត្រូវទទួលឥទ្ធិពលនៃការវាយលុកពីការប្រើប្រាស់គ្រឿងញៀនដ៏ធំមួយនេះ បន្ថែមទៀតយ៉ាងធ្ងន់ធ្ងរជាក់ជាមិនខាន។
របាយការណ៍មន្ទីរប្រឆាំងគ្រឿងញៀនក្រសួងមហាផ្ទៃបង្ហាញថា ចំនួនបង្ក្រាបគ្រឿងញៀននៅឆ្នាំ២០១១ សរុបមានជាង ១ពាន់ករណី ប្រៀបធៀបឆ្នាំ២០១២ ក្នុងរយៈពេល៦ខែដើមឆ្នាំ មានប្រហែល២៧០ករណី។
លោកឧត្ដមសេនីយ៍ ខៀវ សាម៉ន មានប្រសាសន៍ថា ចំនួននេះថយចុះដោយសារតែប្រទេសកម្ពុជាបានធ្វើវិសោធនកម្មច្បាប់គ្រឿងញៀន ដោយដាក់ទោសទណ្ឌធ្ងន់ជាងមុន។ ជាងនេះទៅទៀត លោកថា ដោយសារក្រុមប៉ូលិសប្រឆាំងគ្រឿងញៀនមានសមត្ថភាពជំនាញធ្វើការមានប្រសិទ្ធភាពជាងមុន។
តែទោះយ៉ាងណា គេសង្កេតឃើញ មានការរិះគន់ពីសំណាក់មន្ត្រីបក្សប្រឆាំង និងមន្ត្រីអង្គការមិនមែនរដ្ឋាភិបាលខ្លះថា ប៉ូលិសមិនដែលចាប់បានជនល្មើសគ្រឿងញៀនដែលជាមេខ្លោងធំៗទេ។
លោកឧត្ដមសេនីយ៍ ខៀវ សាម៉ន បន្ថែមថា នៅក្នុងការបង្ក្រាបលើកនេះ ប៉ូលិសចាប់បានបុរសជនសង្ស័យម្នាក់ ដែលលោកសុំមិនប្រាប់ឈ្មោះពេញ គ្រាន់តែបង្ហើបប្រាប់ត្រកូលថាឈ្មោះ កង ហើយប្រាប់ឈ្មោះហៅក្រៅថាឈ្មោះ បូ កើតឆ្នាំ១៩៦៦ មានទីលំនៅរាជធានីភ្នំពេញ។
ទាក់ទងឈ្មោះជនសង្ស័យនេះ សារព័ត៌មានក្នុងស្រុកខ្លះបានចុះផ្សាយដោយមិនប្រាប់ឈ្មោះប្រភពថា ជនសង្ស័យដែលប៉ូលិសប្រឆាំងគ្រឿងញៀនចាប់បញ្ជូនខ្លួនទៅតុលាការភ្នំពេញនៅថ្ងៃទី១៧ កក្កដា នេះ មានឈ្មោះថា កង សុវណ្ណាតារ៉ា ហៅ បូ។
យ៉ាងណាក៏ដោយ លោក ខៀវ សាម៉ន មិនហ៊ានអះអាងថា សារធាតុគីមីដែលប៉ូលិសរឹបអូសបាននៅពេលនេះ ថាជាសារធាតុគីមីដែលអាចយកទៅផ្សំផលិតបានគ្រឿងញៀនបាន ដូចជាគ្រឿងញៀន មេតំហ្វេតាមីន (Methamphetamine) ឬថ្នាំញៀន អំហ្វេតាមីន (Amphetamine) បានប្រាកដ ឬយ៉ាងណាទេ។ លោកថា មន្ទីរប៉ូលិសប្រឆាំងគ្រឿងញៀន បានសម្រេចយកសំណាកសារធាតុគីមីដែលសង្ស័យនេះចំនួន១២សំណាកទៅមន្ទីរពិសោធន៍ ដើម្បីវិភាគមើលថា តើសារធាតុទាំងនោះពិតជាអាចយកទៅផ្សំគ្រឿងញៀនបានមែន ឬយ៉ាងណា។
ចំណែកលទ្ធផលនៃការវិភាគនេះ នៅមិនទាន់ដឹងនៅឡើយទេមកទល់ថ្ងៃទី១៧ កក្កដា នេះ។
លោក មាន វីរឹទ្ធ ប្រធានមន្ទីរពិសោធន៍គ្រឿងញៀនក្រសួងមហាផ្ទៃមានប្រសាសន៍ថា មន្ត្រីជំនាញពិសោធគ្រឿងញៀនរបស់លោក ទើបធ្វើការវិភាគសារធាតុបានចំនួន៥មុខប៉ុណ្ណោះ ក្នុងចំណោមសំណាកសារធាតុចំនួន១២មុខ ហើយលទ្ធផលវិភាគខ្លះបង្ហាញថា ជាសារធាតុខ្លះអាចយកទៅផលិតគ្រឿងញៀនបាន ដែលច្បាប់អង្គការសហប្រជាជាតិ និងច្បាប់ប្រទេសកម្ពុជាហាមឃាត់។
លោក មាន វីរឹទ្ធ៖ «មិនទាន់អាចឆ្លើយបានទេ យើងនៅធ្វើវិភាគបន្តទៅទៀត។ ប៉ុន្តែ ៩០% យើងអាចសន្និដ្ឋានជាដំបូងបានខ្លះ។ យើងបានដឹងថា សារធាតុនោះមានមួយចំនួនស្ថិតនៅក្នុងតារាង នៃការត្រួតពិនិត្យរបស់អង្គការសហប្រជាជាតិ និងស្ថិតនៅក្នុងតារាងត្រួតពិនិត្យរបស់ច្បាប់ត្រួតពិនិត្យគ្រឿងញៀនប្រទេសកម្ពុជា»។
លោក មាន វីរឹទ្ធ បន្ថែមថា មន្ត្រីមន្ទីរពិសោធត្រូវការពេលវិភាគយ៉ាងហោចណាស់ ពីរ ឬបីថ្ងៃទៀត ទើបដឹងលទ្ធផលជាក់លាក់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។