ពលរដ្ឋចោទអាជ្ញាធរថាបំភិតបំភ័យមិនឲ្យផ្ដិតមេដៃគាំទ្រ ម៉ម សូណង់ដូ

សមាជិកសមាគមអ្នកប្រជាធិបតេយ្យនៅក្នុងខេត្ត-ក្រុងចំនួន១១ បានចាប់ផ្ដើមយុទ្ធនាការប្រមូលស្នាមមេដៃប្រជាពលរដ្ឋនៅតាមភូមិ-ឃុំ មូលដ្ឋាន ដើម្បីការគាំទ្រសំណើអោយមានការដោះលែងប្រធានសមាគមនេះ គឺលោក ម៉ម សូណង់ដូ ពីពន្ធនាគារ។

ដោយ សុ ជីវី
2012-07-27

h072612in.mp3

លោក ម៉ម សូណង់ដូ ប្រធានសមាគមអ្នកប្រជាធិបតេយ្យ ផ្តល់បទសម្ភាសន៍ដល់អ្នកកាសែត នាអាកាសយានដ្ឋានអន្តរជាតិភ្នំពេញ កាលពីថ្ងៃទី១២ ខែកក្កដា ឆ្នាំ២០១២។

RFA/Vichey Anandh

មកដល់ពេលនេះ មានសេចក្ដីរាយការណ៍ពីខេត្តកំពង់ចាម មកថា អាជ្ញាធរស្រុកស្រីសន្ធរ បានសាកសួរ និងហាមប្រាមមិនអោយពលរដ្ឋនៅតាមបណ្ដាឃុំមួយចំនួនផ្ដិតមេដៃ ព្រមទាំងបានបង្ខំអោយពលរដ្ឋមួយចំនួនផ្ដិតមេដៃទទួលខុសត្រូវចំពោះការផ្ដល់ស្នាមមេដៃទៅអោយសមាគមអ្នកប្រជាធិបតេយ្យ។

ពលរដ្ឋនៅតាមឃុំមួយចំនួនក្នុងស្រុកស្រីសន្ធរ ខេត្តកំពង់ចាម ចោទប្រកាន់អាជ្ញាធរមូលដ្ឋានថាបានបំភិតបំភ័យ និងហាមប្រាមពួកគាត់ក្នុងការចូលរួមផ្ដិតមេដៃលើញត្តិគាំទ្រ ដើម្បីអោយមានការដោះលែងប្រធានសមាគមអ្នកប្រជាធិបតេយ្យ ដែលកំពុងជាប់ឃុំនៅពន្ធនាគារព្រៃស។

ប្រធានសមាគមអ្នកប្រជាធិបតេយ្យប្រចាំនៅស្រុកស្រីសន្ធរ ខេត្តកំពង់ចាម លោក ពៅ ស៊ឺន មានប្រសាសន៍តាមទូរស័ព្ទថា អ្នកភូមិជាច្រើននាក់ក្នុងឃុំចំនួន១៤ នៅក្នុងស្រុកនេះ ដែលស្រឡាញ់អ្នកប្រជាធិបតេយ្យ បាននាំគ្នាផ្ដិតមេដៃគាំទ្រអោយមានការដោះលែង លោក ម៉ម សូណង់ដូ។ ប៉ុន្តែនៅថ្ងៃទី២៦ ខែកក្កដា តំណាងសមាគមនៅតាមឃុំមួយចំនួនក្នុងស្រុកនេះ បានផ្ដល់ដំណឹងថា អាជ្ញាធរនៅតាមមូលដ្ឋានបានហាមប្រាមមិនអោយពួកគាត់បន្តសកម្មភាពប្រមូលស្នាមមេដៃនោះបន្តទៀតឡើយ។

ប្រធានសមាគមអ្នកប្រជាធិបតេយ្យប្រចាំនៅស្រុកស្រីសន្ធរ លោក ពៅ ស៊ឺន បន្តថា នៅតាមឃុំមួយចំនួន ដូចជាឃុំស្វាយពោធិ៍ ឃុំបារាយណ៍ ឃុំព្រែកដំបូក និងជីបាល ជាដើម នគរបាលប៉ុស្តិ៍រដ្ឋបាលឃុំបានគំរាមកំហែងអ្នកភូមិ ដោយការហៅពួកគេទៅសាកសួរពីការផ្ដិតមេដៃនោះ និងបានបង្ខំអោយពួកគាត់ផ្ដិតមេដៃលើឯកសាររបស់ប៉ុស្តិ៍នគរបាលនោះ ដោយយល់ព្រមថា ពួកគេបានផ្ដិតមេដៃអោយសមាគមអ្នកប្រជាធិបតេយ្យដោយការស្ម័គ្រចិត្ត គឺពុំមានការបង្ខិតបង្ខំឡើយ។

ស្ត្រីអ្នកភូមិម្នាក់បាននិយាយដោយមិនបញ្ចេញឈ្មោះថា មេប៉ុស្តិ៍រដ្ឋបាលឃុំបានហៅគាត់ និងអ្នកភូមិជាច្រើននាក់ផ្សេងទៀត អោយទៅផ្ដិតមេដៃអះអាងថា បានស្ម័គ្រចិត្តផ្ដិតមេដៃអោយសមាគមអ្នកប្រជាធិបតេយ្យ ដើម្បីអំពាវនាវអោយមានការដោះលែង លោក ម៉ម សូណង់ដូ។

អ្នកស្រីបន្តថា ដោយការភ័យខ្លាច តំណាងសមាគមអ្នកប្រជាធិបតេយ្យនៅក្នុងឃុំរបស់អ្នកស្រី បានសម្រេចដុតញត្តិដែលមានស្នាមមេដៃប្រជាពលរដ្ឋនោះចោល។ អ្នកស្រីបានចោទសួរថា តើពួកគាត់មានកំហុសអ្វីនៅក្នុងការផ្ដិតមេដៃ ដែលជាការស្នើសុំដោយសន្តិវិធីនោះ?

ក្រុមអ្នកភូមិបានអះអាងថា ការហាមប្រាម ឬការហៅប្រជាពលរដ្ឋទៅសាកសួរនោះ ត្រូវនគរបាលប៉ុស្តិ៍រដ្ឋបាលឃុំប្រាប់ថា គឺជាបញ្ជារបស់អធិការនគរបាលស្រុកស្រីសន្ធរ។

អធិការនគរបាលស្រុកស្រីសន្ធរ លោក ខេង ស្រេង មានប្រសាសន៍ថា លោកពិតជាបានណែនាំអោយមន្ត្រីនៅតាមមូលដ្ឋានសាកសួរពីរឿងផ្ដិតមេដៃនោះមែន ក៏ប៉ុន្តែពុំមែនជាការហាមប្រាមឡើយ។ លោកបន្តថា លោកនឹងមានវិធានការចំពោះករណីដែលមានការលើកឡើងថា អាជ្ញាធរមូលដ្ឋានបង្ខំអោយពលរដ្ឋផ្ដិតមេដៃនោះ។

ប្រធានសមាគមអ្នកប្រជាធិបតេយ្យប្រចាំស្រុកស្រីសន្ធរ បានអោយដឹងថា បើទោះជាមានភាពប្រទាំងប្រទើសខ្លះៗបែបនេះក៏ដោយ ក៏ពួកគេនៅតែបន្តការប្រមូលស្នាមមេដៃពីពលរដ្ឋដែលស្ម័គ្រចិត្តគាំទ្រយុទ្ធនាការទាមទារយុត្តិធម៌ អោយប្រធានសមាគមអ្នកប្រជាធិបតេយ្យ លោក ម៉ម សូណង់ដូ។

ទោះជាយ៉ាងណា គេនៅមិនទាន់មានតួលេខពិតប្រាកដពីចំនួនអ្នកភូមិដែលបានយល់ព្រមផ្ដល់ស្នាមមេដៃដល់សមាគមអ្នកប្រជាធិបតេយ្យ នៅក្នុងស្រុកស្រីសន្ធរ នោះទេ។

ដោយឡែកនៅរាជធានីភ្នំពេញ មានសេចក្តីរាយការណ៍ថា អាជ្ញាធរបានចាប់ និងឃុំខ្លួនបុរសជាអ្នកបឹងកក់ម្នាក់ នៅពេលបុរសរូបនោះបានចុះទៅប្រមូលស្នាមមេដៃអ្នកបឹងកក់ ក្នុងបំណងគាំទ្រអោយមានការដោះលែងប្រធានសមាគមអ្នកប្រជាធិបតេយ្យ លោក ម៉ម សូណង់ដូ ដែរនោះ។

លោក ម៉ម សូណង់ដូ ត្រូវរដ្ឋាភិបាលកម្ពុជា ចាប់ដាក់ពន្ធនាគារកាលពីថ្ងៃទី១៥ ខែកក្កដា ឆ្នាំ២០១២ ក្រោយពីលោកបញ្ចប់បេសកកម្មនៅបរទេស។ រដ្ឋាភិបាល និងតុលាការកម្ពុជា បានចោទថា លោក ម៉ម សូណង់ដូ បានបង្កើតតំបន់អបគមន៍នៅខេត្តក្រចេះ ក្នុងស្រុកឆ្លូង បន្ទាប់ពីមានពលរដ្ឋមួយចំនួនបានចូលទៅចាប់ដីនៅក្នុងឃុំកំពង់ដំរី ដើម្បីរស់នៅ។

លោក ម៉ម សូណង់ដូ ធ្លាប់អះអាងមុនពេលចាប់ខ្លួនថា លោកពុំមានកំហុសក្នុងការបង្កើតតំបន់អបគមន៍ឡើយ គឺគ្រាន់តែបង្កើតសមាគមមួយដែលឲ្យពលរដ្ឋហ៊ាននិយាយអំពីការពិត ដែលបានកើតឡើងក្នុងប្រទេស និងតំបន់ដែលគេរស់នៅ៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។

អត្ថបទដែលទាក់ទង

មតិ (5)

ចុចត្រង់នេះដើម្បីបន្ថែមយោបល់របស់អ្នក

កូនខ្មែរ

ពី ហូជីមីញ

រឿងស្វាស៊ីបាយលៀបមាត់ពពែនោះ វាធម្មតាទៅហើយសម្រាប់ស្រុកខ្មែរ។ ខ្ញុំនិយាយនេះមិនបង្អាប់ ស្រុកទេសរបស់ខ្លួនទេ ប៉ុន្តែវាជាការពិត ហើយមានលក្ខណៈដូចសម័យខ្មែរក្រហមអញ្ចឹងដែរ។
ដូចករណីលោកម៉ម សូណងដូ ប្រសិនបើមានប្រជាពលរដ្ឋ ចង់គាំទ្រគាត់នោះ ហើយមន្រ្តីរបស់រដ្ឋាភិបាលទៅរារាំងពួកគាត់មិនអោយចូលរយមគាំទ្រនោះ វាហាក់បីដូចកំពុងដែលតែសារភាពអញ្ចឹង"ស្វាស៊ីបាយលាបមាត់ពពែ"

Jul 31, 2012 10:46 AM

Da

ពី Australia

It seem like what they did was followed the Pol Pot Regime and Communist Path Way. I can not see it is freedom or democracy. But I can see it disgusting and ridiculous! I hate how can people treat people like that. I feel sorry for my people. Look at other people countries they just want to create sth to make their people life more easy.

Jul 29, 2012 08:54 AM

Eagle Master

ពី Pa(USA)

I do agreed khmer's goverment decision when we look back his past records he should has psychiatrist evaluation what's in his minds or educated him how to use Beehive.What's does beehive mean,peaces sweet together.

Jul 27, 2012 09:20 PM