កំលាំង​សមត្ថកិច្ច​ព័ទ្ធ​ផ្ទះ​ឪពុក​លោក ប៊ុន រដ្ឋា ​នៅ​កំពង់ចាម

កង​កំលាំង​សមត្ថកិច្ច ប្រមាណ​ជា ៣០នាក់ បាន​ព័ទ្ធ​ផ្ទះ លោក ប៊ុន ឆន ដែល​ត្រូវ​ជា​ឳពុក​របស់ លោក ប៊ុន រដ្ឋា នៅ​ភូមិ​ឈើខ្លឹម ឃុំ​រំចេក ស្រុក​មេមត់ ខេត្ត​កំពង់ចាម។
ដោយ វិជ័យ អានន្ទ
2012-05-22
អ៊ីម៉ែល
មតិ
ចែករំលែក
បោះពុម្ព
  • បោះពុម្ព
  • ចែករំលែក
  • មតិ
  • អ៊ីម៉ែល
ជម្លោះ​ដី ក្រចេះ ៣០៥
កម្លាំង​សមត្ថកិច្ច​ចាប់​ឃាត់​ពលរដ្ឋ​នៅ​ភូមិ​ប្រម៉ា ស្រុក​ឆ្លូង ខេត្ត​ក្រចេះ ក្នុង​យុទ្ធនាការ​បង្ក្រាប​ពលរដ្ឋ​ដែល​មាន​ជម្លោះ​ដី កាល​ពី​ថ្ងៃ​ទី​១៦ ខែ​ឧសភា ឆ្នាំ​២០១២។
Provided Photo

បង​ស្រី​បង្កើត​របស់ លោក ប៊ុន រដ្ឋា គឺ​អ្នក​ស្រី ប៊ុន ធឿន ឲ្យ​ដឹង​នៅ​ថ្ងៃ​ទី​២២ ឧសភា ថា កង​កំលាំង​សមត្ថកិច្ច​បាន​ចូល​ផ្ទះ​ឪពុក​របស់​អ្នក​ស្រី​ទាំង​យប់ ហើយ​បាន​ធ្វើ​ឲ្យ​បង​ប្អូន និង​ម្ដាយ​របស់​អ្នក​ស្រី​ភ័យ​ខ្លាច ចំពោះ​សកម្មភាព​របស់​កង​កំលាំង​សមត្ថកិច្ច​នោះ។ អ្នក​ស្រី​ឲ្យ​ដឹង​បន្ត​ថា កង​កំលាំង​នគរបាល​ប្រមាណ​ជា ៣០​នាក់ ធ្វើ​សកម្មភាព​នៅ​វេលា​ម៉ោង បី​ទៀប​ភ្លឺ ដោយ​បញ្ចាំង​ភ្លើង​ពិល​ពេញ​លើ​ផ្ទះ និង​រុញ​ទ្វារ​លឺ​សូរ​សំឡេង​ក្ដុង​ក្ដាំង​ទាំង​យប់ ធ្វើ​ឲ្យ​ពួក​គាត់​ភ្ញាក់​ពី​ដំណេក។

លើស​ពី​នេះ កង​កំលាំង​នគរបាល​បាន​ទាម​ទារ​ចង់​ចូល ក្នុង​ផ្ទះ​ទាំង​យប់ ពួក​គាត់​មិន​បើក​ទ្វារ​ឲ្យ​ចូល។ ភ្លឺ​ឡើង នៅ​ថ្ងៃ​ទី​២២ ឧសភា នគរបាល​ប៉ុស្តិ៍ ឃុំ​ឈើ​ខ្លឹម និង​នគរបាល ស្រុក​មេមត់ ដឹក​នាំ​ដោយ​អធិការ​ស្រុក​មេមត់ លោក ឯម កុសល ទាម​ទារ​ចូល​ក្នុង​ផ្ទះ​ដើម្បី​ឆែក​ឆេរ។ ប៉ុន្តែ​អ្នក​ស្រី និង​ម្ដាយ​របស់​អ្នក​ស្រី សុំ​មើល​ដីកា​ឆែក​ឆេរ។ ខណៈ​នោះ កង​កំលាំង​ពុំ​បាន​នាំ​ដីកា​មក​ជា​មួយ​ទេ រហូត​ដល់​ម៉ោង ១០​កន្លះ ទើប​ព្រះរាជអាជ្ញា​រង​ខេត្ត​កំពង់ចាម លោក រៀល សុភិន យក​ដីកា​ឆែក​ឆេរ​មក​ដល់ ប៉ុន្តែ​ព្រះរាជអាជ្ញា​នោះ មិន​បាន​ឲ្យ​មើល​ក្រដាស​ដីកា​ឆែក​ឆេរ​នោះ​ទេ គ្រាន់​តែ​អាន​ឲ្យ​ស្ដាប់។ ម្យ៉ាង​ទៀត កង​កំលាំង​សមត្ថកិច្ច​នៅ​បាន​ហាម​ឃាត់​អ្នក​ផ្ទះ​ទាំង​អស់ មិន​ឲ្យ​ទូរស័ព្ទ​ទាក់​ទង​អង្គការ​សង្គម​ស៊ីវិល ឬ​អ្នក​យក​ព័ត៌មាន​ឡើយ។

ទាក់​ទិន​នឹង​ករណី​នេះ​ដែរ ស្នង​ការ​ខេត្ត​កំពង់ចាម លោក ឆាយ គឹមសុន មាន​ប្រសាសន៍​ថា តាម​នីតិវិធី​កង​កំលាំង​សមត្ថកិច្ច អាច​មាន​សិទ្ធិ​ហ៊ុម​ព័ទ្ធ​ផ្ទះ​នោះ​បាន ប៉ុន្តែ​មិន​អាច​ចូល​ឆែក​ឆេរ​ទាំង​យប់​បាន​នោះ​ទេ។ លោក​អះអាង​បន្ត​ថា កង​កំលាំង​សមត្ថកិច្ច​អនុវត្ត​តាម​នីតិវិធី​ត្រឹម​ត្រូវ​ហើយ ព្រោះ​សមត្ថកិច្ច​ពុំ​បាន​ចូល​ឆែក​ឆេរ​ទាំង​យប់​នោះ​ឡើយ។

ទោះ​យ៉ាង​ណា លោក អនុប្រធាន​ផ្នែក​ស៊ើប​អង្កេត សមាគម​ការពារ​សិទ្ធិ​មនុស្ស អាដហុក (Adhoc) លោក ចាន់ សាវេត ប្រតិកម្ម​តប​ថា កង​កំលាំង​សមត្ថកិច្ច ពុំ​ទាន់​បាន​អនុវត្ត​នីតិវិធី​ឲ្យ​បាន​ត្រឹម​ត្រូវ​ទាំង​ស្រុង​នោះ​ទេ។ លោក លើក​ឡើង​បន្ត​ថា សមត្ថកិច្ច​មាន​សិទ្ធិ​ក្នុង​ការ​ហ៊ុម​ព័ទ្ធ​ទី​កន្លែង​ដែល​ខ្លួន​សង្ស័យ ថា​មាន​ជន​សង្ស័យ​លាក់​ខ្លួន ប៉ុន្តែ​អ្វី​ដែល​ជា​ការ​ខុស​ឆ្គង​នឹង​នីតិវិធី​របស់​សមត្ថកិច្ច គឺ​ចូល​ឡើង​លើ​ផ្ទះ​គេ​ទាំង​យប់ មិន​មាន​ដីកា​ឆែក​ឆេរ និង​ប្រើ​ពាក្យ​សំដី​មិន​សមរម្យ​ចំពោះ​ម្ចាស់​ផ្ទះ។

មក​ទល់​ពេល​នេះ សមត្ថកិច្ច​បាន​ចាប់ និង​ឃាត់​ខ្លួន ប្រជាពលរដ្ឋ​ចំនួន ៨​នាក់ ហើយ​ព្រះរាជអាជ្ញា​ខេត្តក្រចេះ លោក ធុច បញ្ចសន្តិភាព បាន​សម្រេច​ដាក់​ការ​ចោទ​ប្រកាន់​អ្នក​ទាំង ៨​នាក់​នោះ​ពី​បទ​ធ្វើ​កុប្បកម្ម​ខុស​ច្បាប់។ ទោស​នេះ​អាច​ជាប់​ពន្ធនាគារ ពី ៧​ឆ្នាំ ទៅ ១៥​ឆ្នាំ យោង​តាម​ក្រម​ព្រហ្មទណ្ឌ​នៃ​ព្រះរាជាណាចក្រ​កម្ពុជា។

ទាក់​ទិន​នឹង​ករណី​ប្រជាពលរដ្ឋ រង​ការ​ចោទ​ថា​បាន​ធ្វើ​កុប្បកម្ម​ខុស​ច្បាប់​ទាំង ៨​នាក់​នោះ​ដែរ សមាគម​ការពារ​សិទ្ធិ​មនុស្ស អាដហុក កំពុង​ផ្ដល់​មេធាវី​ដើម្បី​ជួយ​ការពារ៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

មតិ (3)
  • បោះពុម្ព
  • ចែករំលែក
  • អ៊ីម៉ែល

Viryiak

ពី Phnom Penh

Cambodian Pauperization Party(CPP)Becareful with what you sow today for you will definitely reap tomorrow.Don't be misled. Remember that you can't ignore God and get away with it, you will always reap what you sow!Those who live only to satisfy their own sinful desires will harvest their consequences of decay and death.I do love you, Cambodians. I see that the way that you are leading,treating your country is heading in to destructions,death which is not in God's plan that He created you for.So please, Please, wake up and repent or you will definitely bear the consequences of PAUPERIZATIN forever and ever. Goodnews is God is await to faithfully forgive, restore and save you as you confess and truely repent. love from your loving friend

May 24, 2012 05:01 AM

អ្នក​អាន​អនាមិក

THIS IS THE HUN SEN GOVERNMENT CAN DO ONLY THIS .

May 23, 2012 05:41 AM

អ្នក​អាន​អនាមិក

មានតែចោរទេដែលចូលផ្ទះគេដោយអត់ច្បាប់។ចុះពពួកប៉ូលីសទាំងនេះជានរណា? ចោរ?????

May 22, 2012 10:24 AM