មន្ត្រីបក្សជំទាស់ចោទមន្ត្រីបក្សប្រជាជនថាប្រើតួនាទីពីរក្នុងពេលតែមួយ

គណបក្សប្រជាជនកម្ពុជា ដែលកំពុងកាន់កាប់អំណាចក្នុងជួររាជរដ្ឋាភិបាល បានអនុញ្ញាតឲ្យមន្ត្រីនៅក្រោមការគ្រប់គ្រងរបស់ខ្លួន មានមុខតំណែងពីរនៅក្នុងថ្នាក់ដឹកនាំរដ្ឋបាលក្រុង និងសង្កាត់ ក្នុងខេត្តបន្ទាយមានជ័យ។

ដោយ សួន សុផលមុន្នី
2012-07-22

mn.mp3

មន្ត្រីគណបក្ស សម រង្ស៊ី បានប្រតិកម្មចំពោះមន្ត្រីគណបក្សប្រជាជនកម្ពុជា ពីររូប ដែលពួកគេកំពុងប្រើប្រាស់តួនាទីចំនួនពីរតួនាទី គឺទីមួយជាសមាជិកក្រុមប្រឹក្សាក្រុងប៉ោយប៉ែត និងតួនាទីទី២ ជាសមាជិកក្រុមប្រឹក្សាសង្កាត់ប៉ោយប៉ែត ខេត្តបន្ទាយមានជ័យ។ តួនាទីនេះមន្ត្រីគណបក្សប្រឆាំងចាត់ទុកថា គណបក្សប្រជាជនកម្ពុជា កំពុងអនុញ្ញាតឲ្យមន្ត្រីរបស់ខ្លួនរំលោភច្បាប់បោះឆ្នោតជ្រើសរើសក្រុមប្រឹក្សា ក្រុង ស្រុក ខណ្ឌ ខេត្ត រាជធានី។

ចៅសង្កាត់រងទី២ មកពីគណបក្ស សម រង្ស៊ី លោក ចៅ វាសនា បានថ្លែងនៅថ្ងៃទី២១ ខែកក្កដា ថា មន្ត្រីគណបក្សប្រជាជនកម្ពុជា ទាំងពីររូប មានឈ្មោះ ផេង សុជាត និងឈ្មោះ អាំង គីហេង។ មន្ត្រីទាំងពីរមានតួនាទីជាសមាជិកក្រុមប្រឹក្សាក្រុងប៉ោយប៉ែតផង និងមានតួនាទីមួយទៀតជាសមាជិកក្រុមប្រឹក្សាសង្កាត់ប៉ោយប៉ែត។

លោក ចៅ វាសនា៖ «ខ្ញុំក៏ដឹងថា គាត់ជាក្រុមប្រឹក្សាក្រុង ហើយខ្ញុំក៏ដឹងច្បាស់ថា គាត់ជាក្រុមប្រឹក្សាសង្កាត់ តែគាត់ប្រជុំទាំងពីរកន្លែង គាត់អត់ទាន់មានលាឈប់ពីកន្លែងណាសោះឡើយ។ ពេលដែលខ្ញុំសួរគាត់ គាត់ថា ខ្ញុំនេះជាអ្នកផ្ចាញ់ផ្ចាលទៅវិញ។ ខ្ញុំសួរថា លោកឈរទាំងពីរ ក្រុងផង សង្កាត់ផង តើលោកមានតួនាទីពីរ ឬយ៉ាងណា? ព្រោះខ្ញុំសុំព័ត៌មានពីគាត់ថា ឲ្យគាត់លាលែងពីខាងណាមួយតែគាត់អត់បានផ្ដល់ឲ្យទេ»។

មន្ត្រីគណបក្ស សម រង្ស៊ី បានអះអាងថា ចាប់តាំងពីថ្ងៃប្រកាសសុពលភាពក្រុមប្រឹក្សាឃុំសង្កាត់រួចមក មន្ត្រីទាំងពីរបានចល័តការចូលរួមប្រជុំរបស់ពួកគេនៅក្នុងសង្កាត់ប៉ោយប៉ែត ផង និងចូលរួមការប្រជុំនៅក្រុងប៉ោយប៉ែត ដូចគ្នា។

វិទ្យុអាស៊ីសេរីនៅពុំទាន់អាចទាក់ទងលោក ផេង សុជាត និងលោក អាំង គីហេង ដើម្បីសុំសេចក្ដី បញ្ជាក់ជុំវិញការចោទប្រកាន់របស់មន្ត្រីគណបក្សប្រឆាំងនេះបានទេ។ ប៉ុន្តែលោក សុខ ភឿន ប្រធានក្រុមប្រឹក្សាក្រុងប៉ោយប៉ែត បានទទួលស្គាល់ថា មន្ត្រីទាំងពីររូប គឺលោក ផេង សុជាត និងលោក អាំង គីហេង ពិតជាមានតួនាទីពីរដូចការចោទប្រកាន់មែន។

លោក សុខ ភឿន បានបញ្ជាក់ថា មន្ត្រីរបស់គណបក្សប្រជាជនកម្ពុជា ទាំងពីររូប បានដាក់ពាក្យលាឈប់ពីតំណែងសមាជិកក្រុងប៉ោយប៉ែត ទៅសាលាខេត្តបន្ទាយមានជ័យ រួចរាល់ហើយ ប៉ុន្តែពួកគេនៅពុំទាន់ទទួលបានសេចក្ដីប្រកាសទេ៖ «លោក ផេង សុជាតិ នេះ គាត់ដាក់ពាក្យលាលែងពីសង្កាត់ហើយ អ៊ីចឹងចៅហ្វាយក្រុងគាត់បានស៊ីញេ បញ្ជូនឯកសារនេះឡើងទៅខេត្តហើយ។ លោក អាំង គីហេង នេះ គាត់បានដាក់ពាក្យស្នើសុំឈប់ពីក្រុមប្រឹក្សាក្រុង ព្រោះប្រកាសចេញពីមហាផ្ទៃ កាលឈរឈ្មោះជាបេក្ខភាពលុះត្រាមានការសម្រេចចេញពីមហាផ្ទៃមកទើបអាចធ្វើបាន»។

សមាជិកក្រុមប្រឹក្សាក្រុងប៉ោយប៉ែត មកពីគណបក្ស សម រង្ស៊ី លោក មាន សារិទ្ធ បានប្រតិកម្មចំពោះការអះអាងរបស់ប្រធានក្រុមប្រឹក្សាក្រុងប៉ោយប៉ែត ថាជារឿងមួយដែលមិនសមស្រប ព្រោះលោក ផេង សុជាត និងលោក អាំង គីហេង មានតួនាទីជាសមាជិកក្រុមប្រឹក្សាក្រុងប៉ោយប៉ែត មិនគួរណាលាឈប់ពីតួនាទីនេះ មកធ្វើជាសមាជិកក្រុមប្រឹក្សាសង្កាត់ប៉ោយប៉ែត ដូច្នេះទេ។

លោក មាន សារិទ្ធ៖ «គាត់ជាក្រុមប្រឹក្សាមានតួនាទីពីរ តួនាទី១ ជាក្រុមប្រឹក្សាសាលាក្រុងស៊ីប្រាក់ខែសាលាក្រុង ៥០ម៉ឺន (រៀល) ហើយមកច្បាមយកតួនាទីមួយទៀត គឺតួនាទីក្រុមប្រឹក្សាសង្កាត់ប៉ោយប៉ែត ដែលទើបតែជាប់ឆ្នោតថ្មី។ គាត់ចូលប្រជុំនៅសាលាក្រុងផង គាត់ប្រជុំនៅសង្កាត់ប៉ោយប៉ែតផង»។

មន្ត្រីគណបក្ស សម រង្ស៊ី បានលើកឡើងថា ការប្រើប្រាស់តួនាទីពីររបស់មន្ត្រីគណបក្សប្រជាជនកម្ពុជានេះ គឺផ្ទុយពីស្មារតីច្បាប់បោះឆ្នោតជ្រើសរើសក្រុមប្រឹក្សា ក្រុង ស្រុក ខណ្ឌ ខេត្ត រាជធានី។ មន្ត្រីគណបក្សប្រឆាំងបានស្នើសុំឲ្យក្រសួងមហាផ្ទៃ ពិនិត្យបញ្ហានេះឡើងវិញ៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។