ចំនួនភ្ញៀវទេសចរណ៍ទៅប្រាសាទព្រះវិហារឆ្នាំ ២០១១ ថយចុះ
ការធ្លាក់ចុះនៃចំនួនអ្នកទេសចរណ៍ ទៅទស្សនាប្រាសាទព្រះវិហារនេះ ដោយសារមូលហេតុកាលពីខែកុម្ភៈកន្លងទៅ មានការប្រយុទ្ធគ្នារវាងទាហានខ្មែរ-ថៃ ក្នុងរឿងជម្លោះព្រំដែននៅតំបន់នោះ បណ្ដាលឱ្យអ្នកទេសចរណ៍អាក់ខានទៅទស្សនាមួយរយៈ។
មន្ត្រីមន្ទីរទេសចរណ៍ខេត្តព្រះវិហារ បានអះអាងថា គ្រោះធម្មជាតិទឹកជំនន់បានជះឥទ្ធិពលមួយផ្នែកធំថែមទៀត ធ្វើឱ្យប៉ះពាល់ទៅដល់ដំណើរកម្សាន្តរបស់អ្នកទេសចរណ៍នៅកាន់រមណីយដ្ឋាននានារបស់ខេត្តនេះ។
នៅក្នុងអំឡុងរដូវភ្ជុំបិណ្ឌកន្លងទៅ ចំនួនភ្ញៀវទេសចរណ៍ ដែលទៅទស្សនាប្រាសាទព្រះវិហារមានចំនួនប្រមាណជាង ៦០០ នាក់។
លោក គង់ វិបុល ជាប្រធានមន្ទីរទេសចរណ៍ខេត្តព្រះវិហារ។ លោកមានប្រសាសន៍នៅរសៀលថ្ងៃអាទិត្យទី២ ខែតុលាថា ចំនួនភ្ញៀវទេសចរណ៍ជាតិ និងអន្តរជាតិ ដែលឡើងភ្នំទៅទស្សនាប្រាសាទព្រះវិហារក្នុងរយៈពេល ៩ ខែ ឆ្នាំ ២០១១ នេះ បានថយចុះប្រមាណ ២៦%។
លោក គង់ វិបុល៖ «នៅច្រកប្រាសាទព្រះវិហារហ្នឹង យើងដឹងហើយគឺឆ្នាំនេះ យើងឃើញថា មានបញ្ហាកើតឡើងនៅតំបន់ប្រាសាទព្រះវិហារ។ អីចឹងធ្វើឱ្យភ្ញៀវហ្នឹងវាទាញតួលេខធ្លាក់ចុះពី ២០១០ ព្រោះ ២០១០ គឺ ៩ ខែដូចគ្នា។ ប៉ុន្តែ វាអត់មានបញ្ហាអីទេ។ ពីខែមករាដល់ខែកញ្ញាហ្នឹង គឺភ្ញៀវមានលក្ខណៈថេរឡើង»។
តួលេខអ្នកទេសចរណ៍ ដែលឡើងទៅទស្សនាប្រាសាទព្រះវិហារក្នុងរយៈពេល ៩ ខែឆ្នាំ ២០១១ គឺភ្ញៀវជាតិ មានចំនួនប្រមាណជិត ៤ ម៉ឺននាក់ និងភ្ញៀវអន្តរជាតិប្រមាណជិត ២.០០០នាក់។
កាលពីឆ្នាំ ២០១០ កន្លងទៅ ក្នុងរយៈពេល ៩ ខែ មានភ្ញៀវទេសចរណ៍ជាតិចំនួនជាង ៥៣.៨០០ នាក់ និងភ្ញៀវអន្តរជាតិចំនួនជាង ១.០០០ នាក់ បានទៅទស្សនាប្រាសាទព្រះវិហារ។
មន្ត្រីមន្ទីរទេសចរណ៍ខេត្តព្រះវិហារបានឱ្យដឹងថា ថ្វីបើតួលេខអ្នកទេសចរណ៍ទៅកាន់ប្រាសាទព្រះវិហារថយចុះ។ ក៏ប៉ុន្តែ បើបូកសរុបទាំងចំនួនអ្នកទេសចរណ៍ ដែលទៅទស្សនាទីរួមខេត្តព្រះវិហារផង ក្នុងរយៈពេល ៩ ខែ ឆ្នាំ ២០១១ គឺមានការកើនឡើង ០.២១% ជាងរយៈពេល ៩ ខែកាលពីឆ្នាំមុន។
មន្ត្រីប៉ូលិសបេតិកភណ្ឌ ដែលកំពុងប្រចាំការពារប្រាសាទព្រះវិហារមួយរូប មានប្រសាសន៍ថា ចំនួនភ្ញៀវទេសចរណ៍ជាតិ និងអន្តរជាតិ ដែលទៅទស្សនាប្រាសាទព្រះវិហារ បានថយចុះ កាលពីរដូវភ្ជុំបិណ្ឌកន្លងទៅថ្មីៗ និងនៅគ្រាដែលខេត្តជាច្រើនទទួលរងការគំរាមកំហែងដោយទឹកជំនន់។
សំឡេង៖ «បរទេសមានមកខ្លះៗ ដែរ។ ប៉ុន្តែ វាភាគតិច ហើយខ្មែរយើងមានតែអ្នកស្រុកនៅជិតៗ និងជុំវិញប្រាសាទហ្នឹង ដូចជានៅត្រពាំងប្រាសាទ ស្រអែមអី មិនសូវមានអ្នកចម្ងាយទេ។ មានតិចតួចណាស់អ្នកចម្ងាយ។ ថយចុះជាងមុនឆ្ងាយជាងមុន»។
គ្រោះធម្មជាតិទឹកជំនន់កាលពីពេលថ្មីៗ ក្រៅតែពីធ្វើឱ្យមានការប៉ះពាល់ដល់អ្នកទេសចរណ៍មិនបានឡើងភ្នំទៅទស្សនាប្រាសាទព្រះវិហារ គឺបានធ្វើឱ្យប៉ះពាល់ដល់តំបន់រមណីយដ្ឋានទេសចរណ៍របស់ខេត្តព្រះវិហារចំនួន ៣ ផ្សេងៗ ទៀត គឺនៅប្រាសាទកោះកែរប្រាសាទព្រះខ័ន និងតំបន់ទឹកធ្លាក់ក្នុងស្រុកឆែប ក៏មិនមានភ្ញៀវទេសចរណ៍ដែរ ដោយសារទឹកជំនន់បានផ្ដាច់ផ្លូវរបស់អ្នកទេសចរណ៍ជាច្រើនកន្លែង៕
អ្នកអានអនាមិក
Mr Chief of tourism in Preah Vihear
It is not reasonable to blame a drop in number of visitors due to the flood. The flood just happened in the last two weeks. It Just slightly influences on the figure. In my opinion the conflict of the two countries was a reason. A need of human resource working on marketing field should be proposed for attracting more tourists. If high position people in ministry of tourism and Preah Vihear Authority still do not have a clear tourism management plan sooner or later Thai partner will get the most benefits of tourism in Preah Vihear. Be aware of that.
Oct 03, 2011 04:33 PM
-
ស្ដាប់ផ្ទាល់
(ព្រឹក ៥:៣០-៦:៣០ ល្ងាច ៧:៣០-៨:៣០) - សំឡេង
ភាសា
