ក្រុមហ៊ុនខេភីសឈូសឆាយដីចម្ការវិលជុំនិងតំបន់តំណមរបស់អ្នកស្រុកពេជ្រាដា

ក្រុមអ្នកភូមិ នៅភូមិឡាំមេះ ឃុំប៊ូស្រា ស្រុកពេជ្រាដា ខេត្តមណ្ឌលគិរី មិនសប្បាយចិត្តនឹងក្រុមហ៊ុនឯកជនមួយឈ្មោះ ខេភីស (KPIS)។ អ្នកភូមិអះអាងថា ក្រុមហ៊ុន ខេភីស ឈូសឆាយដីព្រៃចម្ការវិលជុំ និងឈូសតំបន់ព្រៃតំណម ដោយមិនមានការពិភាក្សាជាមួយពួកគាត់ជាម្ចាស់ស្រុក ជាមុនឡើយ។

ដោយ វណ្ណ វិចារ
2012-06-23

h062212sv.mp3

តំណាងសហគមន៍ជនជាតិដើមព្នងភូមិឡាំមេះ លោក ក្រោះ សុក នៅថ្ងៃទី២២ មិថុនា មានប្រសាសន៍ថា ក្រុមហ៊ុន ខេភីស ឈូសដីព្រៃសហគមន៍ជនជាតិដើមព្នង អស់ជាច្រើនហិកតារ តាំងពីតំបន់សែនព្រេន របស់ជនជាតិដើមព្នង រហូតដល់ដីចម្ការវិលជុំរបស់ពលរដ្ឋ។ លោកបន្តថា លោក និងតំណាងសហគមន៍ផ្សេងទៀត ធ្លាប់បានទៅសួរនាំសុំអាជ្ញាប័ណ្ណមើលដែរ តែក្រុមហ៊ុន ខេភីស មិនឲ្យមើលទេ។

លោក ក្រោះ សុក បញ្ជាក់ថា បើក្រុមហ៊ុននេះនៅតែបន្តធ្វើយ៉ាងដូចនេះទៀត ក្រុមអ្នកភូមិនឹងធ្វើការតវ៉ា៖ «កន្លែងហ្នឹង ជាកន្លែងថ្លៃថ្នូរ កន្លែងសំខាន់របស់ជនជាតិយើង ជាកន្លែងតំណម។ ឥឡូវហ្នឹង ក្រុមហ៊ុនបានឈូសឆាយជុំវិញកន្លែងហ្នឹងអស់ហើយ។ គាត់ថានឹងដោះស្រាយ តែដោះដោយវិធីណា ខ្ញុំអត់ទាន់ដឹង»។

លោកបន្តថា អ្នកភូមិសុំឲ្យអាជ្ញាធរខេត្ត ពិនិត្យមើលសកម្មភាពក្រុមហ៊ុន ខេភីស ឲ្យបានច្បាស់ ដើម្បីធានាថា អ្នកភូមិមិនត្រូវបានរំលោភបំពានពីសំណាក់ក្រុមហ៊ុន។

វិទ្យុអាស៊ីសេរី មិនអាចទាក់ទងសុំការបំភ្លឺពីអាជ្ញាធរខេត្ត និងក្រុមហ៊ុន ខេភីស បានទេ នៅថ្ងៃទី២២ មិថុនា ឆ្នាំ២០១២។

ទោះជាយ៉ាងនេះក្តី មេឃុំប៊ូស្រា លោក កើញ រដ្ឋា មានប្រសាសន៍ថា លោកមិនបានដឹងថាក្រុមហ៊ុន ខេភីស មានអាជ្ញាប័ណ្ណពីរដ្ឋាភិបាល ឬយ៉ាងណានោះឡើយ។ ប៉ុន្តែ ពេលសុំមើលច្បាប់វិនិយោគ តំណាងក្រុមហ៊ុនបង្ហាញតែផែនទីដីវិនិយោគ។

លោកបន្តថា ក្នុងនាមជាអាជ្ញាធរមូលដ្ឋាន លោកចាត់ទុកថាក្រុមហ៊ុននេះ មិនស្របច្បាប់ឡើយ៖ «មិនរវីរវល់ទេ បើគាត់ប៉ះប្រជាពលរដ្ឋ ដោះស្រាយជាមួយពលរដ្ឋទៅ ព្រោះអាជ្ញាធរមិនទទួលស្គាល់ទេ ឯកសារគេគ្រប់គ្រាន់ ឬមិនគ្រប់គ្រាន់ យើងអត់ដឹង»។

យ៉ាងណាក៏ដោយ សង្គមស៊ីវិលដែលអង្កេតការងារដីធ្លី នៅខេត្តមណ្ឌលគិរី ជំរុញឲ្យអាជ្ញាធរចាត់វិធានការតាមផ្លូវច្បាប់ជាបន្ទាន់ ដើម្បីការពារសិទ្ធិកាន់កាប់ដីធ្លីរបស់ជនជាតិដើមភាគតិច។

មន្ត្រីសម្របសម្រួលសមាគមការពារសិទ្ធិមនុស្ស អាដហុក ខេត្តមណ្ឌលគិរី លោក គល់ មីឌី មានប្រសាសន៍ថា ធម្មតាបើក្រុមហ៊ុនមួយមានអាជ្ញាប័ណ្ណសម្បទានដីធ្លី ត្រូវតែមានការសិក្សាច្បាស់លាស់ជាមួយអាជ្ញាធរមូលដ្ឋាន។ លោកបន្តថា ករណីក្រុមហ៊ុន ខេភីស នៅប៊ូស្រា ជាករណីគួរឲ្យសង្ស័យមួយ ដែលអាជ្ញាធរមានសមត្ថកិច្ចត្រូវតែត្រួតពិនិត្យ។

លោក គល់ មីឌី៖ «បើសិនក្រុមហ៊ុនហ្នឹង មិនទទួលសម្បទានពីរដ្ឋទេ ហើយគាត់ទៅឈូសឆាយដីសហគមន៍ជនជាតិដើមភាគតិច ជាដីសាធារណៈរបស់រដ្ឋ អីចឹងគ្មានបុគ្គលណាមួយ មានសិទ្ធិទៅឈូសឆាយដីសាធារណៈរបស់រដ្ឋទេ អាជ្ញាធរមូលដ្ឋានគួរតែមានវិធានការដាក់ពាក្យបណ្ដឹង»។

លោកបន្តថា អាជ្ញាធរមិនត្រូវសម្ងំ ដោយបណ្តោយឲ្យក្រុមហ៊ុនឯកជនប្រព្រឹត្តិផ្ទុយពីច្បាប់រដ្ឋនោះឡើយ។

ទាក់ទងនឹងទ្រព្យសម្បត្តិសាធារណៈរបស់រដ្ឋ ច្បាប់ភូមិបាលមាត្រា២៥៩ ចែងថា ការប៉ះពាល់កម្មសិទ្ធិនៃទ្រព្យសម្បត្តិសាធារណៈត្រូវផ្ដន្ទាទោសពិន័យជាប្រាក់ពី ៥លានរៀល ដល់៥០លានរៀល ឬនឹងផ្ដន្ទាទោសដាក់ពន្ធនាគារពី ១ឆ្នាំដល់៥ឆ្នាំ។

ច្បាប់ភូមិបាលមាត្រា២៦៥ ក៏បានចែងដែរថា រាល់ការប៉ះពាល់ធ្វើឡើងប្រឆាំងនឹងសិទ្ធិលើដីរបស់រដ្ឋ សហគមន៍ជនជាតិដើមភាគតិចដោយអាជ្ញាធរ ដែលទទួលខុសត្រូវគ្រប់គ្រងតំបន់ដែលអចលនវត្ថុនោះតាំងនៅ ត្រូវផ្ដន្ទាទោសពិន័យជាប្រាក់ពី ១លាន៥សែនរៀល ដល់៩លានរៀល ឬនឹងផ្ដន្ទាទោសដាក់ពន្ធនាគារពី ២ឆ្នាំដល់៥ឆ្នាំ និងត្រូវទទួលទោសរដ្ឋបាលថែមទៀត៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។

អត្ថបទដែលទាក់ទង

មតិ (1)

ចុចត្រង់នេះដើម្បីបន្ថែមយោបល់របស់អ្នក

phoanno

ពី auckland

In NZ the land like this untouchable. The government protect it as a great treasure. I think Cambodian government would protect it as a Cambodian treasure,too. destroy your own culture, destroy yourself... I'm so sorry to hear these cases, I'm worried the next fifty years, my children could not find my homeland. I don't know how to help ... poor my country.

Jun 23, 2012 07:35 PM