ពលរដ្ឋនៅខេត្តស្ទឹងត្រែង តវ៉ារឿងប្រើប្រាស់ថាមពលអគ្គិសនី
អាជ្ញាធរស្រុកសៀមប៉ាង ខេត្តស្ទឹងត្រែង បានជួបប្រជុំដោះស្រាយវិបត្តិប្រើប្រាស់ថាមពលអគ្គិសនី ដែលបានកើតមានរវាងប្រជាពលរដ្ឋ និងម្ចាស់សេវាកម្មឯកជនចែកចាយថាមពលអគ្គិសនី ក៏ប៉ុន្តែ មិនបានលទ្ធផលទេ។
កាលពីថ្ងៃទី ២០ ខែតុលាកន្លងទៅ ប្រជាពលរដ្ឋអ្នកប្រើប្រាស់ថាមពលអគ្គិសនី នៅស្រុកសៀមប៉ាង ប្រមាណ ៤០ នាក់ បានជួបប្រជុំជាមួយអាជ្ញាធរមូលដ្ឋានតំណាងម្ចាស់សេវាកម្មផ្គត់ផ្គង់អគ្គិសនីស្រុក និងមន្ត្រីតំណាងមន្ទីរឧស្សាហកម្ម រ៉ែ និងថាមពលរដ្ឋខេត្តស្ទឹងត្រែង នៅក្នុងបរិវេណវត្តសៀមប៉ាង។
ប្រជាពលរដ្ឋ អ្នកប្រើប្រាស់ថាមពលអគ្គិសនីស្រុកសៀមប៉ាង អ្នកស្រី ផាន់ សុធា មានប្រសាសន៍បញ្ជាក់ថា ក្រុមអាជ្ញាធរពាក់ព័ន្ធហាក់មានការលំអៀងទៅលើម្ចាស់សេវាកម្មផ្គត់ផ្គង់ថាមពលអគ្គិសនីច្រើនជាងស្វែងរកយុត្តិធម៌ជូនប្រជាពលរដ្ឋហេតុនេះ ប្រជាពលរដ្ឋសំណូមពរឲ្យអាជ្ញាធរអគ្គិសនីជួយដោះស្រាយបញ្ហានេះឡើងវិញ។ អ្នកស្រីបន្តថា ប្រជាពលរដ្ឋភាគច្រើនបានដើរចេញពីកិច្ចប្រជុំដោយសារមិនមានជំនឿលើដំណោះស្រាយនេះ។
អ្នកស្រី ផាន់ សុធា៖ «គ្មានព្រមព្រៀងស្អីទេ។ គាត់មកគាត់មិននិយាយចំចំណុចខ្ញុំឈឺ ខ្ញុំរមាស់ស្អីផង។ ខ្ញុំទាមទារសុំឲ្យគាត់ជួយសម្រួលមើលបញ្ហាគីឡូខ្ញុំរត់ឡើងរហូត។ ខ្ញុំប្រើតាំងពីជាង ១០ ម៉ឺនរត់ឡើងរហូតដល់ ៣០ ម៉ឺន ៤០ ម៉ឺន ៥០ ម៉ឺន ៦០ ម៉ឺនទៅ ខ្ញុំមានលទ្ធភាពឯណាប្រើ»។
ចំណែកប្រជាពលរដ្ឋស្រុកសៀមប៉ាងមួយរូបទៀត គឺអ្នកស្រី កែវ ប៊ុនឡៃ មានប្រសាសន៍បញ្ជាក់ដែរថា ម្ចាស់អាជីវកម្មចែកចាយថាមពលអគ្គិសនីស្រុក បានដំឡើងថ្លៃប្រើប្រាស់អគ្គិសនីរហូតដល់ ៣.៥០០ រៀលក្នុងមួយគីឡូវ៉ាត់ម៉ោង តាំងពីខែកុម្ភៈ ឆ្នាំ ២០១២ ខណៈដែលអាជ្ញាធរអគ្គិសនី បានកំណត់តម្លៃប្រើប្រាស់ត្រឹមតែ ៣.០០០ រៀល ក្នុងមួយគីឡូវ៉ាត់ម៉ោង។
អ្នកស្រីបន្តថា ប្រជាពលរដ្ឋយល់ព្រមលើគោលការណ៍កំណត់តម្លៃប្រើប្រាស់ ៣.២០០ រៀលក្នុងមួយគីឡូវ៉ាត់ម៉ោង ចាប់ពីខែតុលានេះបន្ទាប់ពីអាជ្ញាធរអគ្គិសនី បានប្ដូរតម្លៃថ្មី កាលពីខែកក្កដា។ ក៏ប៉ុន្តែ ប្រជាពលរដ្ឋទាមទារសុំប្ដូរនាឡិកាភ្លើងថ្មី ដែលត្រួតពិនិត្យដោយស្ថាប័នជំនាញអគ្គិសនីត្រឹមត្រូវ។
អ្នកស្រី កែវ ប៊ុនឡៃ៖ «គីឡូហ្នឹងឡើងដល់ ២០០ ដល់គេតវ៉ា ចុះមកដល់ ៤០ គីឡូ។ហើយគីឡូហ្នឹងប្រើក៏អស់មិនប្រើក៏អស់។ គេសុំដាក់គីឡូនៅផ្ទះគេមួយដាក់គីឡូនៅក្រុមហ៊ុនមួយគេអត់ព្រម»។
ទាក់ទិនបញ្ហានេះ ម្ចាស់សេវាកម្មផ្គត់ផ្គង់អគ្គិសនីស្រុកសៀមប៉ាង លោក ម៉ាត់ សំណាង មានប្រសាសន៍បញ្ជាក់ថា ចាប់តាំងពីខែកញ្ញារហូតមក អាជ្ញាធរអគ្គិសនី បានកំណត់តម្លៃប្រើប្រាស់ថាមពលអគ្គិសនីនៅស្រុកសៀមប៉ាង គឺ ៣.២០០ រៀល ក្នុង ១ គីឡូវ៉ាត់ម៉ោង ដោយសារតែប្រេងឥន្ធនៈបានឡើងថ្លៃ។
លោកបន្តថា សំណើប្ដូរនាឡិកាភ្លើងរបស់ប្រជាពលរដ្ឋ លោកមិនជំទាស់ទេ។ ក៏ប៉ុន្តែ ក្រុមហ៊ុនត្រូវតែត្រួតពិនិត្យនាឡិកាភ្លើងមុននឹងដាក់ជូនប្រជាពលរដ្ឋប្រើប្រាស់បាន។
លោក ម៉ាត់ សំណាង៖ «ខាងមន្ទីរគាត់ចុះមក គាត់ថាទិញកុងទ័រអ្នកណាទិញទៅ។ ប៉ុន្តែ កុងទ័រហ្នឹងឲ្យវាចំក្រុមហ៊ុន។ ឧបមាថា សៀមប៉ាង ប្រើកុងទ័រអក្សរហ៊្សី គឺឲ្យវាមានហ៊្សីទាំងអស់។ឲ្យគាត់ទៅទិញហ៊្សីមកទាំងអស់ ខ្ញុំចាប់ឲ្យគាត់តើ»។
អភិបាលរងស្រុកសៀមប៉ាង លោក ស សុផល អះអាងថា អាជ្ញាធរបានព្យាយាមស្វែងដំណោះស្រាយជូនប្រជាពលរដ្ឋដោយយុត្តិធម៌ និងផ្អែកទៅលើគោលការណ៍កំណត់របស់អាជ្ញាធរអគ្គិសនី។លោកបន្តថា មន្ត្រីមន្ទីរឧស្សាហកម្ម រ៉ែ និងថាមពលរដ្ឋខេត្ត នឹងចាត់វិធានការស្វែងរកដំណោះស្រាយបន្តក្នុងបញ្ហានេះ។
លោក ស សុផល៖ «គាត់ឈរជាអាជ្ញាកណ្ដាលមិនលំអៀងខាងណាទេ។ ធ្វើម៉េចឲ្យបានត្រឹមត្រូវ។គាត់មកបំពេញការងារនៅស្រុកនេះ ដើម្បីគាត់ជួយពិនិត្យមើល។ គាត់កំពុងធ្វើការជាមួយក្រុមប្រឹក្សាស្រុក»។
វិទ្យុអាស៊ីសេរីមិនអាចទាក់ទងប្រធានមន្ទីរឧស្សាហកម្ម រ៉ែ និងថាមពល ខេត្តស្ទឹងត្រែង ដើម្បីសុំអធិប្បាយលើបញ្ហានេះបានទេ នៅថ្ងៃអាទិត្យទី២១ ខែតុលា។ ក៏ប៉ុន្តែ ប្រជាពលរដ្ឋអ្នកប្រើប្រាស់ថាមពលអគ្គិសនី នៅស្រុកសៀមប៉ាង អះអាងថា ពួកគាត់នឹងនាំគ្នាឈប់ប្រើប្រាស់ថាមពលអគ្គិសនី ប្រសិនបើអាជ្ញាធរអគ្គិសនី មិនជួយដោះស្រាយបញ្ចប់បញ្ហានេះទេ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អ្នកអានអនាមិក
Can the government provide intervention to this request? Can the government order all companies including Sokimex, Tela... to drop down the selling price of the gas? Can the government order to private transportation companies to drop down the price that they charge to all passengers. If you (gov.) can do, this will be a great respect to our His Majesty King Father. I hope you will!
Oct 21, 2012 01:33 PM
-
ស្ដាប់ផ្ទាល់
(ព្រឹក ៥:៣០-៦:៣០ ល្ងាច ៧:៣០-៨:៣០) - សំឡេង
ភាសា
