អាជីវករផ្សារនៅខណ្ឌឫស្សីកែវតវ៉ាការដំឡើងថ្លៃឈ្នួលតូប
h073112sv.mp3
ក្រុមអាជីវករមានកាន់បដាគ្រប់ដៃ តវ៉ា សរសេរអក្សរថា ទង្វើរបស់ឈ្មួញដែលកេងចំណេញលើពួកគាត់។
អាជីវករម្នាក់ឈ្មោះ នាង រ៉ា មានប្រសាសន៍ថា ក្រុមអាជីវករនាំគ្នាទៅតុលាការសាលាឧទ្ធរណ៍ មានបំណងសុំឲ្យតុលាការផ្តល់យុត្តិធម៌ឲ្យពួកគាត់ ដោយផ្អាកដីការក្សាការពារលេខ០២ "ត" ចុះថ្ងៃទី១៤ ខែកុម្ភៈ ឆ្នាំ២០១២ ដែលមានភាពលំអៀងទៅឈ្មួញ។ លោកបន្តថា អាជីវករមិនឲ្យឈ្មួញអភិវឌ្ឍ ព្រោះឈ្មួញមានគម្រោងខ្លីពេក គឺធ្វើរយៈពេល៣ឆ្នាំ៖ «រឿងហ្នឹង រឿងអាជីវករទាំងអស់គ្នា កាលទៅប្រជុំនៅក្រុង អភិបាលរងក្រុងប្រាប់ថា មានតែឈ្មួញចរចាជាមួយអាជីវករទេ»។
លោក នាង រ៉ា បន្តថា ឈ្មួញឈ្មោះ អ៊ូ សេដ្ឋានូ ក៏បានដាក់ពាក្យប្ដឹងទៅតុលាការសាលាដំបូងសុំអភិវឌ្ឍដីនោះ ទើបពលរដ្ឋតវ៉ាទៅសាលាឧទ្ធរណ៍។
អាជីវករលក់មាន់នៅផ្សារទំនប់ លោក សោម អ៊ៀង មានប្រសាសន៍ថា តម្លៃតូបពីមុន និងតម្លៃដែលថៅកែ អ៊ូ សេដ្ឋានូ ដាក់ខុសគ្នាឆ្ងាយណាស់។ លោកបន្តថា ក្រុមអាជីវករមិនសុខចិត្តឡើយ ហើយស្នើឲ្យតុលាការសាលាឧទ្ធរណ៍ផ្តល់យុត្តិធម៌ជូនពួកគាត់ ដោយទាមទារជួសជុលតូប និងអភិវឌ្ឍផ្សារដោយខ្លួនឯង៖ «ពីមុនគាត់យក២ពាន់ មួយឆ្នាំ យក១០០ដុល្លារ ប៉ុន្តែដល់ពេលឥឡូវ ឈ្មួញគេគ្រោងយកមួយតូប ចាប់ពី៦០០ដុល្លារ ហើយបង់តាមខែមួយខែ ៣៥ដុល្លារទៀត ថ្លៃណាស់ អាជីវករមិនអាចទទួលយកបានទេ»។
វិទ្យុអាស៊ីសេរី មិនអាចទាក់ទងលោក អ៊ូ សេដ្ឋានូ បានទេ នៅថ្ងៃទី៣១ កក្កដា ឆ្នាំ២០១២។
ទោះជាយ៉ាងណាក្តី យោងតាមលិខិតចុះថ្ងៃទី២ ខែកក្កដា ឆ្នាំ២០១២ របស់លោករដ្ឋមន្ត្រីក្រសួងយុត្តិធម៌ ផ្ញើមកប្រធានសាលាដំបូងរាជធានីភ្នំពេញ និងព្រះរាជអាជ្ញាអមសាលាដំបូងរាជធានីភ្នំពេញ បានបញ្ជាក់ថា ឈ្មោះ អ៊ូ សេដ្ឋានូ មានទំនាស់ជាមួយអាជីវករផ្សារងិនអាន ដែលមានកម្មវត្ថុទំនាស់ គឺប្ដឹងសុំដីការក្សាការពារ អនុញ្ញាតឲ្យក្រុមហ៊ុន ញ៉ូវរ៉ាយ ខេមបូឌា (New Rich Cambodia) ចាត់ចែងជាបណ្ដោះអាសន្ន ក្នុងការជួសជុលប្រពន្ធលូ ផ្សាដំបូលធ្វើអំពីដែក និងធ្វើរបងព័ទ្ធផ្សារទាំងមូល ដើម្បីអនាម័យសុខភាព និងការពារសន្តិសុខ ដែលមានទីតាំងនៅផ្សារទំនប់ ភូមិទួលគោក សង្កាត់ទួលសង្កែ ខណ្ឌឫស្សីកែវ ហើយត្រូវបានតុលាការចេញដីកាសម្រេចរក្សាការពារ តាមបណ្ដឹងរបស់ឈ្មោះ អ៊ូ សេដ្ឋានូ។
អាជីវករផ្សារទំនប់ បញ្ជាក់ថា សាលាឧទ្ធរណ៍នឹងប្រកាសពីសេចក្តីសម្រេចលើសំណើរបស់អាជីវករសុំផ្អាកការអនុវត្តដីការក្សាការពារ របស់សាលាដំបូងរាជធានីភ្នំពេញ នៅថ្ងៃទី១៥ ខែសីហា ឆ្នាំ២០១២។
អាជីវករនៅផ្សារទំនប់ កាលពីដំបូងបង់ប្រាក់ឲ្យម្ចាស់ដីផ្សារទំនប់ ឈ្មោះ ងិន អាន មួយថ្ងៃ ៥០០រៀល រួមទាំង១ឆ្នាំ ១០០ដុល្លារ ដោយសង់តូបខ្លួនឯង។ បន្ទាប់មក លោក ងិន អាន លក់ដីឲ្យក្រុមហ៊ុនកូរ៉េ ដោយឈ្មួញឈ្មោះ អ៊ូ សេដ្ឋានូ ជួលបន្តពីជនជាតិកូរ៉េ។
កាលពីខែតុលា ឆ្នាំ២០១១ ថៅកែផ្សារ អ៊ូ សេដ្ឋានូ មានគម្រោងជួសជុលផ្សារ ហើយនិងដំឡើងថ្លៃឈ្នួលខ្ពស់ ធ្វើឲ្យអាជីវករតវ៉ា ហើយថៅកែនោះក៏ដាក់ពាក្យប្ដឹងឡើងតុលាការតែម្តង៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
-
ស្ដាប់ផ្ទាល់
(ព្រឹក ៥:៣០-៦:៣០ ល្ងាច ៧:៣០-៨:៣០) - សំឡេង
ភាសា
