តំណាងបក្សពីររិះគន់ប្រព័ន្ធផ្សព្វផ្សាយខេត្តរតនគិរីថាបម្រើតែបក្សកាន់អំណាច

ដោយ រដ្ឋា វិសាល

2008-07-24

តំណាងគណបក្សនយោបាយចំនួនពីរនៅខេត្តរតនគិរី ប្រតិកម្មនៅថ្ងៃពុធ ទី២៣ កក្កដា ឆ្នាំ២០០៨ ថា គណៈកម្មការខេត្តរៀបចំការបោះឆ្នោតខេត្តរតនគិរី ពុំបានប្រើប្រាស់ប្រព័ន្ធផ្សព្វផ្សាយរបស់រដ្ឋក្នុងមូលដ្ឋានសម្រាប់បម្រើការងារនិងការអប់រំសម្រាប់ការបោះឆ្នោត ដែលនឹងប្រព្រឹត្តទៅនៅថ្ងៃទី២៧ កក្កដា ខាងមុខនេះទេ ហើយស្ថានីយទូរទស្សន៍ ត្រូវបានគេប្រើប្រាស់សម្រាប់ឃោសនារកសំឡេងឆ្នោតឲ្យគណបក្សប្រជាជនកាន់អំណាចតែមួយប៉ុណ្ណោះ ។

ប្រធានក្រុមការងារគណបក្សនរោត្តម រណឫទ្ធិ និងជាបេក្ខជនតំណាងរាស្រ្តខេត្តរតនគិរី លោក ឯក សឿន កត់សម្គាល់ថា ប្រជាពលរដ្ឋភាគច្រើនពុំមានលទ្ធភាពទទួលបានព័ត៌មានស្តីពីការងារនិងការអប់រំបោះឆ្នោតនេះទេ ដូច្នេះវិទ្យុនិងទូរទស្សន៍រដ្ឋដែលកំពុងដំណើរការផ្សាយក្នុងខេត្តគួរប្រើប្រាស់សម្រាប់បញ្ហានេះ ។

លោក ឯក សឿន មានប្រសាសន៍ដូច្នេះថា ៖ «ផ្សាយតែពាណិជ្ជកម្ម ផ្សាយតែពីរឿងឯណា ឯណី ។ ប្រជាពលរដ្ឋមានវិទ្យុស្ដាប់ គាត់ចង់ឲ្យផ្សាយពីការណែនាំរបស់គ.ជ.ប.» ។

ចំណែកប្រធានក្រុមប្រឹក្សាបក្សសមរង្ស៊ី ខេត្តរតនគិរី លោក គឹម ញេង កត់សម្គាល់ដែរថា ស្ថានីយទូរទស្សន៍ខេត្តបានបម្រើឲ្យតែការឃោសនារកសំឡេងឆ្នោតនៃគណបក្សប្រជាជនកាន់អំណាចមួយតែប៉ុណ្ណោះ ៖ «ទូរទស្សន៍ជាទ្រព្យសម្បត្តិរបស់រដ្ឋទេតើ ហេតុអីគាត់បម្រើឲ្យគណបក្សនយោបាយតែមួយអ៊ីចឹង» ។

នៅខេត្តរតនគិរី បើតាមមន្រ្តីខេត្តឲ្យដឹងថា ប្រព័ន្ធផ្សព្វផ្សាយរដ្ឋមានស្ថានីយទូរទស្សន៍កម្លាំងផ្សាយប្រមាណ ១០គឺឡូម៉ែត្រជុំវិញទីរួមខេត្ត និងស្ថានីយវិទ្យុមានកម្លាំងផ្សាយគ្របដណ្តប់ស្ទើរគ្រប់ស្រុកទូទាំងខេត្ត ។

ប្រធានមន្ទីរព័ត៌មានខេត្តរតនគិរី លោក អឿង សារិះ មានប្រសាសន៍បញ្ជាក់ថា នេះដោយសារតែពុំមានសេចក្តីស្នើសុំឬការផ្តល់អត្ថបទនិងស្ប៉តរូបភាពទាក់ទិននឹងការបោះឆ្នោតឬការឃោសនាពីគណៈកម្មការខេត្តរៀបចំបោះឆ្នោតនិងគណបក្សនយោបាយ ។

លោកថា មានតែគណបក្សប្រជាជនមួយទេ ដែលបានស្នើសុំ ៖ «ខ្ញុំចាំតែផ្សាយឲ្យទេតើ គាត់អត់បានអញ្ជើញខាងទូរទស្សន៍ថា ខ្ញុំសូមអញ្ជើញលោកឯងទៅថតខ្ញុំហែផង ខ្ញុំនឹងទៅ ខ្ញុំបានសួរគោលការណ៍រួចអស់ហើយ» ។

ប្រធានគណៈកម្មការរៀបចំការបោះឆ្នោតខេត្ត លោក ប៉ែន ឈុនឌី មានប្រសាសន៍ដែរថា បច្ចុប្បន្ននេះ លោកកំពុងធ្វើការផ្សព្វផ្សាយតាមឧគ្ឃោសនសព្ទចល័ត ហើយជាបន្តនិងស្នើសុំប្រព័ន្ធផ្សព្វផ្សាយរដ្ឋ ។

លោកថា ការផ្សព្វផ្សាយឃោសនារបស់គណបក្សនយោបាយគឺផ្អែកលើគោលការណ៍ស្នើសុំ ៖ «កំពុងទំនាក់ទំនងផ្សាយបន្តទៀត ឥឡូវយើងផ្សព្វផ្សាយតាមមេក្រូទៅសិន ។ ត្រូវមានការផ្សព្វផ្សាយស្មើភាពគ្នា ប៉ុន្តែទាល់តែមានការស្នើសុំ មានខ្សែអាត់» ។

មន្ត្រីអង្គការឃ្លាំមើលការបោះឆ្នោតដោយសេរីនិងយុត្តិធម៌នៅកម្ពុជា (ខុមហ្រ្វែល) ខេត្តរតនគិរី លោក ប៉ែន បុណ្ណារ៍ កត់សម្គាល់យ៉ាងដូច្នេះ ៖ «គណៈកម្មការរៀបចំការបោះឆ្នោតថ្នាក់ខេត្ត ហាក់ដូចជាមិនយកចិត្តទុកដាក់ក្នុងការធ្វើឲ្យមានវេទិកាសមភាព ដូចដែលមានក្នុងទូរទស្សន៍ជាតិកម្ពុជាឡើយ» ។

ច្បាប់ស្តីពីការជ្រើសតាំងតំណាងរាស្រ្ត មាត្រា ៧៤ និង ៧៥ ចែងថា គ្រប់ប្រព័ន្ធផ្សព្វផ្សាយរួមមានសារព័ត៌មានវិទ្យុនិងទូរទស្សន៍រដ្ឋត្រូវផ្សព្វផ្សាយគ្រប់ព័ត៌មានដែលស្នើឡើងដោយគណៈកម្មាធិការជាតិរៀបចំការបោះឆ្នោតដោយមិនយកកម្រៃដើម្បីផ្សព្វផ្សាយពីការងារបោះឆ្នោតនិងអប់រំដល់អ្នកបោះឆ្នោត ។

គណៈកម្មាធិការជាតិរៀបចំការបោះឆ្នោត ត្រូវចាត់វិធានការដើម្បីផ្សព្វផ្សាយអត្ថបទឃោសនាតាមសំណើគណបក្សនយោបាយដែលបានចុះបញ្ជីឈរឈ្មោះបោះឆ្នោតផ្អែកតាមគោលការណ៍ស្មើភាពនិងតាមលំដាប់មុនក្រោយ ៕

បោះពុម្ព អ៊ីម៉េល