តុលាការខេត្តស្ទឹងត្រែងសម្រេចឃុំខ្លួនក្មេងប្រុសអាយុ១៥ឆ្នាំម្នាក់ពីបទប្រើអំពើហិង្សា
h102212sr.mp3
មន្ត្រីឃ្លាំមើលសិទ្ធិមនុស្សនៃសមាគមអាដហុក (ADHOC) នៅថ្ងៃច័ន្ទ ទី២២ ខែតុលា ឆ្នាំ២០១២ អំពាវនាវសុំឲ្យចៅក្រមតុលាការខេត្តស្ទឹងត្រែង ចាត់វិធានការអប់រំ ប្រសើរជាងប្រើវិធានការច្បាប់ឃុំខ្លួនក្មេងប្រុសអាយុ ១៥ឆ្នាំ ដែលបានប្រព្រឹត្តអំពើហិង្សាតូចតាចមួយ។
មន្ត្រីជាន់ខ្ពស់ផ្នែកអង្កេតនៃសមាគមអាដហុក លោក ប៉ែន ប៊ុណ្ណារ៍ មានប្រសាសន៍បញ្ជាក់ថា មានផលប៉ះពាល់ដល់សតិអារម្មណ៍ និងសិទ្ធិរបស់កុមារ ប្រសិនកុមារបានប្រព្រឹត្តកំហុសមិនមែនថ្នាក់ឧក្រិដ្ឋ ហើយត្រូវបានឃុំខ្លួននៅពន្ធនាគារ។ លោកគត់សម្គាល់ថា មានក្មេងទំនើងជាច្រើន ដែលមិនបានប្រព្រឹត្តកំហុសធ្ងន់ធ្ងរ ត្រូវបានអាជ្ញាធរធ្វើការអប់រំជាបន្តបន្ទាប់ ឬធ្វើកិច្ចសន្យាជាមួយឪពុកម្ដាយ ដើម្បីអប់រំកូនឲ្យបានប្រសើរឡើងវិញ៖ «បើសិនរឿងហ្នឹងកើតដំបូងផង ដូច្នេះតាំងនាមយើងជាអាជ្ញាធរមូលដ្ឋាន យើងគួរតែប្រើប្រាស់វិធីអប់រំ ហៅឪពុកម្តាយមកណែនាំ។ រឿងនេះយើងឃើញច្រើនទូទាំងប្រទេស រឿងនេះមិនធ្ងន់ធ្ងរទេបាទ!»។
ប្រជាពលរដ្ឋរស់នៅភូមិផាបាំង ឃុំថ្មកែវ ស្រុកសៀមប៉ាង ខេត្តស្ទឹងត្រែង លោក មឿន សូធិ មានប្រសាសន៍បញ្ជាក់ថា កាលពីថ្ងៃទី១៥ ខែតុលា កន្លងទៅ កូនប្រុសលោកឈ្មោះ សូធិ ខាំវាន់ មានជម្លោះវាយគ្នាជាមួយកូនអ្នកភូមិជាមួយគ្នា ក្នុងពិធីរាំលេងនៅវត្តផាបាំង ប៉ុន្តែមិនមានអ្នកណាម្នាក់មានរបួសស្នាមធំដុំនោះទេ។ លោកបន្តថា ក្រុមសមត្ថកិច្ចបានចាប់ខ្លួនកូនប្រុសគាត់បញ្ជូនទៅតុលាការ ហើយចៅក្រមបានសម្រេចឃុំខ្លួនកូនប្រុសលោកនៅពន្ធនាគារ បើទោះបីលោកសុំធានាកូនឲ្យនៅក្រៅឃុំបណ្ដោះអាសន្នយ៉ាងណា ក៏ចៅក្រមមិនយល់ព្រមឡើយ៖ «ជនរងគ្រោះ អត់មានរបួសស្នាមអ្វីទេ តែចាប់កូនខ្ញុំទៅដាក់ពន្ធនាគារ។ វាយគ្នានៅពេលរាំវង់ណា ធម្មតាវាជាន់គ្នាវាប៉ះទង្គិចគ្នាតិចតួច»។
អធិការរងប៉ូលិសស្រុកសៀមប៉ាង លោក សុខ សុខុន មានប្រសាសន៍បញ្ជាក់ថា ប៉ូលិសម្នាក់បានរងរបួសដោយសារក្មេងប្រុសវាយត្រូវមួយដៃ ខណៈពេលមន្ត្រីប៉ូលិសចូលឃាត់ក្រុមក្មេង កុំឲ្យវាយគ្នា៖ «ក្មេងហ្នឹង វាវាយគ្នា ដល់ប៉ូលិសទៅឃាត់ វាវាយទាំងប៉ូលិសបែកភ្នែក»។
ចៅក្រមស៊ើបសួរនៃតុលាការខេត្តស្ទឹងត្រែង លោក អៀង គឹមថុល មានប្រសាសន៍បញ្ជាក់ថា ក្មេងប្រុសនោះត្រូវបានចោទប្រកាន់ពីបទប្រើអំពើហិង្សាដោយចេតនា។ លោកបន្តថា ដោយសារទង្វើរបស់ក្មេងនេះប៉ះពាល់ដល់គោលនយោបាយភូមិ-ឃុំមានសុវត្ថិភាព ទើបលោកមិនអនុញ្ញាតឲ្យឪពុកធានានៅក្រៅឃុំ៖ «បើយើងនិយាយពីផ្លូវច្បាប់ វាផ្សេង។ គាត់មានសិទ្ធិសុំឲ្យនៅក្រៅអ៊ីចឹងហើយ តែនិយាយពីគោលនយោបាយភូមិ-ឃុំមានសុវត្ថិភាព វាផ្សេង ត្រូវធ្វើការជំនុំជម្រះ ហើយទុកឲ្យចៅក្រមជំនុំជម្រះសម្រេចទោសគាត់ទៅ»។
យ៉ាងនេះក្តី មន្ត្រីសិទ្ធិមនុស្សដដែលមានប្រសាសន៍បញ្ជាក់ថា ក្រមនីតិព្រហ្មទណ្ឌថ្មី គឺឪពុក ឬមេធាវីក្មេងជាប់ចោទ អាចដាក់ពាក្យសុំធានាជនជាប់ចោទឲ្យនៅក្រៅឃុំ នៅតុលាការសាលាឧទ្ធរណ៍ជាបន្តទៀតបាន៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
-
ស្ដាប់ផ្ទាល់
(ព្រឹក ៥:៣០-៦:៣០ ល្ងាច ៧:៣០-៨:៣០) - សំឡេង
ភាសា
