សកម្មភាពកាប់បំផ្លាញព្រៃឈើនៅរតនគិរីនៅតែបន្ត
ដោយ រដ្ឋាវិសាល
2008-05-04
ប្រជាសហគមន៏ការពារព្រៃឈើស្រុកកូនមុំ ខេត្តរតនគិរី អះអាងថា ឈើមូលនៅក្នុងតំបន់ព្រៃដែលអភិរក្សដោយប្រជាសហគមន៏ឃុំត្រពាំងក្រហម ខេត្តរតនគិរី បានរងការបំពានកាប់នាំចូលទៅក្នុងក្រុមហ៊ុនសម្បទានព្រៃគុពមួយដែលមានទីតាំងនៅជាប់គ្នានោះ ។
ប្រជាសហគមន៏លោក ឡុង ឌី បញ្ជាក់ថា សកម្មភាពនេះត្រូវគេធ្វើឡើងតាំងពីខែមេសា កន្លងមក ហើយឈើមូលដែលនៅសេសសល់ក្នុងព្រៃត្រូវគេកាប់អស់គ្មានសល់នាំចូលទៅក្នុងរោងម៉ាស៊ីនអារឈើ របស់ក្រុមហ៊ុន ហើយអារច្រៀកនាំចេញដោយពុំមានអាជ្ញាធរនិងមន្រ្តីជំនាញខណ្ឌរដ្ឋបាលព្រៃឈើត្រួតពិនិត្យឡើយ ។
លោក ឡុង ឌី ថ្លែងដូច្នេះថា ៖ «ក្រុមហ៊ុនចុះទៅកាប់ខ្លួនឯង ប្រជាពលរដ្ឋ...ក៏មិនអើពើ ។ ប្រជាពលរដ្ឋអស់សង្ឃឹមហើយឥឡូវ ពឹង DPA DPA ធ្វើព្រងើយ ។ ខ្ញុំឃើញច្បាស់ហើយ តាមផ្លូវឃើញកាប់អស់រលីងហើយ» ។
តាមប្រជាសហគមន៏ការពារព្រៃឈើបញ្ជាក់ថា ព្រៃឈើដែលអ្នកភូមិអភិរក្សមានទំហំ ២០០ហិកតានៅតំបន់ភ្នំស្រួច មានព្រំប្រទល់ពីអូរខ្វះទៅទិសខាងជើងជាប់នឹងតំបន់ព្រៃគុពសម្បទានមួយ ដែលអ្នកភូមិដឹងថា ជាកម្មសិទ្ធិរបស់លោកឧកញ៉ា ឌី ចូច ឬ ហ៊ុន ចូច ។
នៅថ្ងៃអាទិត្យ ទី៤ ឧសភា ឆ្នាំ២០០៨នេះ វិទ្យុអាស៊ីសេរី មិនអាចទាក់ទងភាគីក្រុមហ៊ុនសម្បទានព្រៃគុព ឬ មន្រ្តីខណ្ឌរដ្ឋបាលព្រៃឈើណាម្នាក់ដើម្បីសុំការអធិប្បាយជុំវិញសេចក្តីចោទប្រកាន់ខាងលើនោះ បានទេ ក៏ប៉ុន្តែបើតាមមេឃុំត្រពាំងក្រហម លោក សេង សុន បញ្ជាក់ថា ពិតជាមានសកម្មភាពកាប់បំពានកាប់ឈើនោះមែន ហើយលោកបានចោទប្រកាន់ទៅលើអ្នកភូមិថា ជាអ្នកនាំមុខកាប់ឈើលក់ទៅឲ្យក្រុមហ៊ុន ។
លោក សេង សុន មានប្រសាសន៍ថា ៖ «ធ្វើអស់ពាក់កណ្ដាលជាង យកអនុផលព្រៃឈើហ្នឹង មានជ័រយកទៅដុតលក់រាល់ឆ្នាំហ្នឹង តែឥឡូវគាត់លក់ជ័រហ្នឹងទៅទៀតទៅ ។ រាល់ថ្ងៃក្រុមចម្រុះនៅស្រុកហ្នឹងកំពុងចុះរាល់ថ្ងៃ ប៉ុន្តែជួនកាលពេលយើងមកវិញបាត់មក គេដាក់អំពូលម៉ែត្រកាប់ទៅ» ។
បើតាមមន្រ្តីព្រៃឈើខេត្តរតនគិរី មួយរូបសុំមិនឲ្យបញ្ចេញឈ្មោះបញ្ជាក់ថា ក្រសួងកសិកម្មបានចេញអាជ្ញាប័ណ្ណកាលពីឆ្នាំ២០០៧ អនុញ្ញាតឲ្យមានតំបន់ព្រៃគុពលើផ្ទៃដី ៦០០០ហិកតា នៅខេត្តរតនគិរី ដើម្បីធ្វើអាជីវកម្មផ្គត់ផ្គង់ឈើអារប្រើប្រាស់ក្នុងស្រុកដោយធ្វើការដេញថ្លៃរយៈពេលមួយឆ្នាំម្តង ។ ហើយបើតាមមន្ត្រីឃ្លាំមើលបញ្ហាព្រៃឈើនៃសមាគម អាដហុក ខេត្តរតនគិរី ឲ្យដឹងដែរថា ដោយសារការបង្កើតតំបន់ព្រៃគុពនោះ ធ្វើឲ្យមានការឃុបឃិតកាប់ឈើមូលនិងឈើប្រណីតមានតម្លៃចេញពីតំបន់ព្រៃឈើផ្សេងទៀតនៅក្នុងខេត្តលក់ចូលក្រុមហ៊ុនដើម្បីអារច្រៀកនាំចេញទៅទីផ្សារ ។
មន្រ្តីស៊ើបអង្កេតសមាគមន៏អាដហុកខេត្តរតនគិរី លោក ប៉ែន ប៊ុណ្ណារ៏ មានប្រសាសន៏ថា ករណីបំពានច្បាប់និងបំផ្លាញព្រៃឈើនេះ គឺជាការទទួលខុសត្រូវរបស់មន្ត្រីជំនាញនៃខណ្ឌរដ្ឋបាលព្រៃឈើនិងសមត្ថកិច្ចមូលដ្ឋានដែលទទួលលាភសក្ការៈពីក្រុមហ៊ុន ហើយបណ្តែតបណ្តោយក្នុងករណីនេះ ៖ «កំហុសរបស់ទាំងរដ្ឋបាលព្រៃឈើ ទាំងអាជ្ញាធរដែនដី ដែលជាមន្រ្តីនគរបាលយុត្តិធម៌ ព្រោះអានេះជាបទល្មើសជាក់ស្ដែង ហើយគាត់មិនទប់ស្កាត់» ។
នៅខេត្តរតនគិរី ព្រៃឈើនិងឈើប្រណីតនៅតែមានសកម្មភាពកាប់ធ្វើអាជីវកម្ម រំលោភបទបញ្ជាលោកនាយករដ្ឋមន្រ្តី ហើយកាលពីសប្តាប៏មុននេះ ប្រជាសហគមន៍ជនជាតិដើមភាគតិចប្រមាណ ១៥ក្រុម បានអះអាងថា នឹងស្នើសុំធ្វើបាតុកម្មអហិង្សាមួយ នៅចុងខែឧសភានេះ ដើម្បីជំរុញឲ្យមានការអនុវត្តទប់ស្កាត់កាប់បំផ្លាញព្រៃឈើដូចបទបញ្ជាប្រមុខរាជរដ្ឋាភិបាល លោក ហ៊ុន សែន ៕
ឧបករណ៍រឿង
|
ស្តាប់សំឡេង |
|
ថតសំឡេង |
|
អ៊ីម៉េល |
|
ព្រឹត្តិបត្រព័ត៌មាន |
|
បោះពុម្ព |
អត្ថបទដែលទាក់ទង
ការដឹកជញ្ជូនឈើកើតមាននៅរតនគិរី ខណៈដែលការឃោសនាបោះឆ្នោតកំពុងប្រព្រឹត្ត
សកម្មភាពកាប់ឈើធ្វើអាជីវកម្មនៅខែត្រសៀមរាបកើនឡើង
ប្រជាសហគមន៍នៅរតនគិរីអំពាវនាវឲ្យស៊ើបអង្កេតករណីកាប់ឈើ
ជនជាតិវៀតណាមឆ្លងដែនមកលួចកាប់ឈើនៅរតនគិរី?
កម្មករស៊ីឈ្មួលកាប់រានព្រៃឈើ២០នាក់ត្រូវបានចាប់ខ្លួន
ឈើប្រណីតនៅតំបន់ឧទ្យានជាតិភ្នំគូលែនរងការកាប់ធ្វើអាជីវកម្ម
សហគមន៍នៅក្រចេះប្ដឹងឲ្យអាជ្ញាធរយកជនល្មើសកាប់ព្រៃឈើទៅអប់រំ
នាយករដ្ឋមន្ត្រីព្រមានក្រុមហ៊ុនព្រៃសម្បទាន
