ពលរដ្ឋ​នៅ​ខេត្ត​រតនគិរី​អំពាវនាវ​ឲ្យ​មេ​ដឹកនាំ​បក្ស សម រង្ស៊ី អនុវត្ត​សន្យា

ប្រជាពលរដ្ឋ​ជន​ជាតិ​ដើម​ភាគ​តិច​នៅ​ឃុំ​សោមធំ ខេត្ត​រតនគិរី អះអាង​ថា អតីត​ប្រធាន​គណបក្ស សម រង្ស៊ី បាន​សន្យា​ធ្វើ​ផ្លូវ និង​ប្រព័ន្ធ​វារីអគ្គិសនី​ខ្នាត​តូច ជូន​ប្រជាពលរដ្ឋ​កាល​ពី​យុទ្ធនាការ​ឃោសនា​បោះ​ឆ្នោត​ក្រុម​ប្រឹក្សា​ឃុំ-សង្កាត់ កាល​ពី​ឆ្នាំ​២០០២ ក៏ប៉ុន្តែ ការ​សន្យា​នោះ​មិន​ឃើញ​មាន​លទ្ធផល​នោះ​ទេ។
ដោយ រដ្ឋា វីសាល
2012-11-14
អ៊ីម៉ែល
មតិ
ចែករំលែក
បោះពុម្ព
  • បោះពុម្ព
  • ចែករំលែក
  • មតិ
  • អ៊ីម៉ែល

ប្រជាពលរដ្ឋ​ជន​ជាតិ​ដើម​ភាគ​តិច​ចារ៉ាយ រស់នៅ​ឃុំ​សោមធំ ស្រុក​អូរយ៉ាដាវ ខេត្ត​រតនគិរី នៅ​ថ្ងៃ​ពុធ ទី១៤ ខែ​វិច្ឆិកា ឆ្នាំ​២០១២ អំពាវ​នាវ​ឲ្យ​មេ​ដឹកនាំ​គណបក្ស សម រង្ស៊ី អនុវត្ត​ការ​សន្យា​ក្នុង​យុទ្ធនាការ​ឃោសនា​រក​សំឡេង​ឆ្នោត​ក្រុម​ប្រឹក្សា​ឃុំ-សង្កាត់ លើក​ដំបូង​នា​ឆ្នាំ​២០០២។

ប្រជាពលរដ្ឋ​ភូមិ​សោមធំ លោក រម៉ាស់ មឿន មាន​ប្រសាសន៍​ថា អតីត​ប្រធាន​គណបក្ស សម រង្ស៊ី គឺ​លោក សម រង្ស៊ី ធ្លាប់​បាន​សន្យា​ជាមួយ​ប្រជាពលរដ្ឋ​សហគមន៍​ឃុំ​សោមធំ ថា​នឹង​ធ្វើ​ផ្លូវ​មួយ​ខ្សែ​ក្រាល​កៅស៊ូ ចម្ងាយ​ប្រមាណ​មួយ​គីឡូ​ម៉ែត្រ ភ្ជាប់​ពី​ផ្លូវ​ជាតិ​លេខ​៧៨ ចូល​ទៅ​កាន់​ភូមិ និង​រៀបចំ​ប្រព័ន្ធ​វ៉ារីអគ្គិសនី​ខ្នាត​តូច សម្រាប់​ជូន​ប្រជាពលរដ្ឋ​ប្រើប្រាស់ ប្រសិន​ប្រជាពលរដ្ឋ​បោះ​ឆ្នោត​ជ្រើស​រើស​មន្ត្រី​គណបក្ស សម រង្ស៊ី ដឹកនាំ​ជា​មេ​ឃុំ​នៅ​ឃុំ​សោម ធំ។

លោក​បន្ត​ថា ដោយ​សារ​ប្រជាពលរដ្ឋ​ចង់​បាន​ការ​អភិវឌ្ឍ​មូលដ្ឋាន ទើប​នាំ​គ្នា​បោះ​ឆ្នោត​ឲ្យ​មន្ត្រី​គណបក្ស សម រង្ស៊ី ជាប់​ឆ្នោត​ជា​មេ​ឃុំ កាល​ពី​ឆ្នាំ​២០០២ ក៏ប៉ុន្តែ រហូត​បច្ចុប្បន្ន ប្រជាពលរដ្ឋ​មិន​ទាន់​បាន​ឃើញ​លទ្ធផល​នៃ​ការ​សន្យា​នោះ​នៅ​ឡើយ៖ «កិច្ច​សន្យា​ហ្នឹង គេ​ថា​កសាង​ឲ្យ​សហគមន៍ ពីព្រោះ​សហគមន៍​ឲ្យ​តែ​អ្នក​ណា​កសាង​ល្អ សហគមន៍​គាំទ្រ​អ្នក​ហ្នឹង គេ​ថា»

កាល​ពី​អាណត្តិ​បោះ​ឆ្នោត​ជ្រើស​រើស​ក្រុម​ប្រឹក្សា​ឃុំ​សោមធំ អាណត្តិ​ទីពីរ និង​អាណត្តិ​ទីបី គណបក្ស សម រង្ស៊ី មិន​បាន​ឈ្នះ​ឆ្នោត​ក្នុង​តំណែង​មេ​ឃុំ​ដូច​លទ្ធផល​បោះ​ឆ្នោត​ឆ្នាំ​២០០២ នោះ​ទេ។

អតីត​មេ​ឃុំ​សោមធំ នៃ​គណបក្ស សម រង្ស៊ី លោក ពូយ ឡយ បច្ចុប្បន្ន​ជា​ជំទប់​ទី២ បាន​ទទួល​ស្គាល់​ថា មន្ត្រី​ជាន់​ខ្ពស់​គណបក្ស​លោក​ពិត​ជា​បាន​សន្យា​ដូច​ប្រជាពលរដ្ឋ​បាន​អះអាង​មែន។ លោក​បដិសេធ​ថា មិន​បាន​ដឹង​ពី​មូលហេតុ​នៃ​ការ​ខកខាន​អនុវត្ត​កិច្ច​សន្យា​នោះ​ទេ។

យ៉ាង​នេះ​ក្តី ប្រធាន​ក្រុម​ប្រឹក្សា​ប្រចាំ​ខេត្ត​រតនគិរី នៃ​គណបក្ស សម រង្ស៊ី លោក រិន កញ្ញា មាន​ប្រសាសន៍​បញ្ជាក់​ថា គោល​នយោបាយ​គណបក្ស សម រង្ស៊ី គឺ​មិន​យក​ប្រភព​ថវិកា​បាន​ពី​អំពើ​ពុក​រលួយ​ជា​មូលដ្ឋាន​អភិវឌ្ឍ​ប្រទេស​នោះ​ទេ។ លោក​បន្ត​ថា គណបក្ស សម រង្ស៊ី មាន​គោលការណ៍​អភិវឌ្ឍន៍​ជូន​ប្រជាពលរដ្ឋ​នៅ​មូលដ្ឋាន​តាម​កិច្ច​សន្យា ប្រសិន​ប្រជាពលរដ្ឋ​បោះ​ឆ្នោត​ឲ្យ​គណបក្ស សម រង្ស៊ី ដឹក​នាំ​ប្រទេស៖ «យើង​ប្រើ​គម្រោង​ថវិកា​ជាតិ​ដើម្បី​កសាង​ប្រទេស មិន​មែន​យក​ថវិកា​ផ្ទាល់​ខ្លួន​បាន​មក​ពី​អំពើ​ពុក​រលួយ ទៅ​ធ្វើ​ផ្លូវ ឬ​អភិវឌ្ឍ​ប្រទេស​នោះ​ទេ»

លេខា​គណៈកម្មការ​សង្កេតការណ៍​ដើម្បី​ការ​បោះ​ឆ្នោត​ដោយ​សេរី និង​យុត្តិធម៌ នៅ​កម្ពុជា ខុមហ្វែ្រល (COMFREL) ខេត្ត​រតនគិរី លោក ជួន ភីនដារ៉ា មាន​ប្រសាសន៍​ថា នៅ​ខេត្ត​រតនគិរី ខុមហ្វ្រែល​រក​ឃើញ​ថា គ្រប់​មន្ត្រី​គណបក្ស​នយោបាយ បាន​សន្យា​មុន​ពេល​បោះ​ឆ្នោត ហើយ​ការ​អនុវត្ត​កិច្ច​សន្យា​នោះ គឺ​គណបក្ស​នីមួយៗ​ធ្វើ​បាន​តិច​តួច​នៅ​ក្នុង​អាណត្តិ​ជាប់​ឆ្នោត​របស់​ខ្លួន។ លោក​កត់​សម្គាល់​ថា ប្រជាពលរដ្ឋ​បច្ចុប្បន្ន​មាន​ការ​យល់​ដឹង​ច្រើន ហេតុ​នេះ​ប្រជាពលរដ្ឋ​បាន​ផ្លាស់​ប្ដូរ​ការ​សម្រេច​ចិត្ត​ជ្រើស​រើស​បេក្ខភាព​មន្ត្រី​ដឹកនាំ​នៅ​មូលដ្ឋាន ដែល​មិន​បាន​បម្រើ​ប្រជាពលរដ្ឋ​ពិត​ប្រាកដ៖ «ខាង​គណបក្ស​នយោបាយ ត្រូវ​តែ​ធ្វើ​តាម​កិច្ច​សន្យា។ ប្រសិន​អាណត្តិ​នេះ​គាត់​សន្យា​ថា​គាត់​នឹង​ធ្វើ ហើយ​គាត់​អត់​បាន​ធ្វើ​វិញ អាណត្តិ​ក្រោយ​ប្រជាពលរដ្ឋ​មាន​ការ​សម្រេច​ផ្សេង​វិញ»

ចាប់​តាំង​ពី​ខែ​មិនា ឆ្នាំ​២០១១ ដល់​ខែ​មិនា ឆ្នាំ​២០១២ អង្គការ​ខុមហ្រ្វែល បាន​បង្កើត​វេទិកា​សំឡេង​ម្ចាស់​ឆ្នោត​ចំនួន ១០០​វេទិកា ក្នុង​ខេត្ត​ចំនួន​១៨ ដើម្បី​ផ្តល់​ឱកាស​ជូន​ប្រជាពលរដ្ឋ និង​មន្ត្រី​គណបក្ស​នយោបាយ​នានា ពិភាក្សា​គ្នា​ត្រួត​ពិនិត្យ និង​ជំរុញ​ការ​អនុវត្ត​កិច្ច​សន្យា​ជូន​ប្រជាពលរដ្ឋ​ជា​ម្ចាស់​ឆ្នោត៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

មតិ (4)
  • បោះពុម្ព
  • ចែករំលែក
  • អ៊ីម៉ែល

ព្រះអាទិត្យ

ពី Phnom Penh

អ្នកដឹកនាំប្រកាន់ខ្ចាប់នូវពាក្យសន្យា គឺជាគំរូវិរះភាពមួយដែលប្រជាជនចង់បាន ជាមួយនឹងការលើកដំកើនដែលរស់ក្នុងក្តីស្រមែ និង ក្តីសង្ឃឹម ។​ ប៉ុន្តែពួកគេមិនបានយល់ចិត្តប្រជាជនឡើយ គេយល់ចិត្តខ្លួនឯងយ៉ាងច្បាស់ នេះមិនមែនជាក្តីសង្ឃឹមដែលប្រជាជនចង់បានសូម្បីតែគិតមួយវិនាទី (អ្នកត្រូវរៀនគោរពខ្លួនឯងអោយស្ទាត់ ជាមុនសិន​មុននិងគោរពអ្នកដ៏ទែ )វាមិនសាមញ្ញពេកនោះទេ ។

Nov 23, 2012 03:10 AM

ក្រុងព្រះសីហនុ

ពី ក្រុងព្រះសីហនុ

វិទ្យុអាស៊ីសេរី គួរតែស្វែងរកការបំភ្លឺពីតំណាងបក្សប្រឆាំង!

Nov 15, 2012 02:16 AM

ភាពភ្នំពេញ

ពី Phnom Penh

ខ្ញុំគាំទ្រការទាមទាររបស់បងប្អូនទាំងនោះ ព្រោះក្នុងមានជាអ្នកនយោបាយមា្នក់មិនអាចនិយាយអោយ តែរួចពីមាត់ឡើយ។

Nov 14, 2012 11:00 PM

និមិត

ពី អ្នកស្រែ

វប្បធម៌ទាល់តែឈ្នះដាច់ទើបជួយកសាងនោះមិនរីកចម្រើនទេ តើជំនួយបានពីសមាជិកបក្ស និងបងប្អូនខ្មែរនៅបរទេសបានចំណាយលើអ្វីខ្លះ? សូមសរសើរចំពោះគណបក្សសិទ្ធិមនុស្ស ដែលបានទិញឡានពេទ្យដល់ឃុំសម្រាប់លើកម្ពស់សុខភាពប្រជាជនតាមការសន្យា សូមថ្នាក់ដឹកនាំនយោបាយទាំងអស់ គួរពិចារណាឡើងវិញ​នូវអ្វីដែលខ្លួនអះអាងថាខ្លួនឯងជាតំណាងរាស្ត្រ

Nov 14, 2012 09:58 PM