មូលហេតុតម្លៃភាគហ៊ុនថយចុះ
h091812as.mp3
អ្នកតាមដានទីផ្សារភាគហ៊ុនថាមូលហេតុនេះ គឺដោយសារតែក្រុមហ៊ុនដែលបោះផ្សាយលក់ហ៊ុន មានចំនួនតែមួយនៅលើផ្សារមូលបត្រ រួមទាំងសកម្មភាពផ្សព្វផ្សាយ ក៏នៅមានតិចតួចនៅឡើយ។
យោងតាមគេហទំព័ររបស់គណៈកម្មការមូលបត្រកម្ពុជា ទំហំជួញដូរភាគហ៊ុននៅថ្ងៃទី១៨ កញ្ញា ឆ្នាំ២០១២ ត្រូវបានប៉ាន់ស្មានទំហំជួញដូរជាង១ម៉ឺន១ពាន់ហ៊ុន ដែលមានតម្លៃជាង៧១លានរៀល ដែលទំហំកើនឡើងជាងថ្ងៃទី១៧ កញ្ញា មានជាង៥ពាន់ហ៊ុន និងមានតម្លៃជាង៣១លានរៀល។
យ៉ាងណាក៏ដោយ គិតចាប់ពីដើមខែកញ្ញា ឆ្នាំ២០១២ តម្លៃហ៊ុនបានថយចុះ។ តម្លៃជួញដូរមួយហ៊ុន មានតម្លៃចន្លោះពី៦.៣០០រៀល ទៅ៦.៣៥០រៀល ហើយទំហំចំនួនហ៊ុនត្រូវបានគេជួញដូរមានចន្លោះពី៣.០០០ទៅ២៤.០០០ហ៊ុនរៀងរាល់ថ្ងៃ និងមានតម្លៃជួញដូរចន្លោះពី១៨លានរៀល ទៅ១៥០លានរៀល។
មូលហេតុដែលតម្លៃហ៊ុនធ្លាក់ចុះនេះ អ្នកវិភាគនានាយល់ឃើញថា ក្រៅពីកត្តាមិនយល់ដឹងអំពីការជួញដូរហ៊ុនទាំងនោះ ក៏មានការផ្សព្វផ្សាយជួញដូរដល់សាធារណជន និងសកម្មភាព ឬផែនការអាជីវកម្មរបស់ក្រុមហ៊ុនបោះផ្សាយលក់មូលបត្រ ក៏នៅមានកម្រិតនៅឡើយ នៅក្នុងទីផ្សារ។
លោកសាស្ត្រាចារ្យ សាត ដារា មានប្រសាសន៍នៅថ្ងៃទី១៨ កញ្ញា ថា ក្រុមហ៊ុនដែលបោះផ្សាយលក់ហ៊ុននៅក្នុងទីផ្សារមូលបត្រ ត្រូវបង្ហាញអំពីសកម្មភាពឲ្យខ្លាំង ដែលកត្តានេះនឹងជះឥទ្ធិពលដល់ការជួញដូរហ៊ុន ប៉ុន្តែបច្ចុប្បន្ន តម្លៃជួញដូរបានថយចុះម្ដងបន្តិចៗ។ លោកមានប្រសាសន៍បន្ថែមថា ចំនួនក្រុមហ៊ុនលក់ហ៊ុន គឺមានតែមួយប៉ុណ្ណោះ នៅក្នុងផ្សារមូលបត្រ។
លោកសាស្ត្រាចារ្យ សាត ដារា៖ «នៅពេលដែលអត់មានរំញោចស្មារតីដល់គាត់ គាត់យល់ថាអត់មានអ្វីគួរឲ្យភ្ញាក់ផ្អើល ហើយពេលខ្លះ គាត់រវល់ការងាររបស់គាត់ផង ហើយបរិមាណសាច់ប្រាក់នៅក្នុងការបណ្ដាក់ទុននៅក្នុងទីផ្សារភាគហ៊ុនហ្នឹងវាតូច បើគិតផលប្រយោជន៍នៃការចំណេញ។ អ៊ីចឹងទៅ វាខាតពេលវេលាគាត់ក្នុងការទៅមើលទីផ្សារភាគហ៊ុន ដោយសារតែយើងមានតែភាគហ៊ុនតែមួយ គឺរដ្ឋាករទឹក។ អ៊ីចឹង គាត់អត់ដឹងថាត្រូវជួញដូរអី ព្រោះរដ្ឋាករទឹកអត់ទាន់សកម្មភាពអ្វីពីមួយថ្ងៃទៅមួយថ្ងៃ ពីមួយខែទៅមួយខែ»។
បញ្ជាក់បន្ថែមពីបញ្ហានេះ ប្រធានក្រុមក្រុមប្រឹក្សាភិបាលនៃក្រុមហ៊ុនមូលបត្រភ្នំពេញ លោក គុយ វ៉ាត មានប្រសាសន៍ថា ការធ្លាក់តម្លៃហ៊ុនកន្លងមក គឺដោយសារតែទីផ្សារមូលបត្រជាទីផ្សារមួយថ្មី ដែលធ្វើឲ្យអ្នកជួញដូរមិនមានច្រើននៅក្នុងទីផ្សារ។ លោកបញ្ជាក់ទៀតថា ក្រុមហ៊ុនមានតែមួយក៏ជាហេតុផលផងដែរ មានន័យថា នៅក្នុងផ្សារមូលបត្រ មានផលិតផលមិនសម្បូរបែបសម្រាប់អ្នកជួញដូរ។
លោក គាត ឈន់ រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ និងជាប្រធានគណៈកម្មការមូលបត្រកម្ពុជា ក្នុងពិធីប្រកាសបើកជាផ្លូវការ "ការជួញដូរមូលបត្រនៅក្នុងក្រុមហ៊ុនផ្សារមូលបត្រកម្ពុជា" រាជធានីភ្នំពេញ ថ្ងៃទី១៨ ខែមេសា ឆ្នាំ២០១២ កន្លងទៅ ដោយសង្ឃឹមថា ការអភិវឌ្ឍវិស័យមូលបត្រ គឺជាកម្លាំងចលករមួយយ៉ាងសំខាន់ សម្រាប់ការអភិវឌ្ឍសេដ្ឋកិច្ចជាតិ ដោយសារតែវិស័យនេះផ្ដល់ជម្រើសសម្រាប់ក្រុមហ៊ុន រដ្ឋ និងឯកជន ក្នុងការបង្កើនទុនវិនិយោគ ដើម្បីពង្រីកសមត្ថភាពផលិតកម្ម និងពង្រឹងសមត្ថភាពប្រកួតប្រជែងនៅក្នុងទីផ្សារជាតិ និងអន្តរជាតិ។
ការវិនិយោគលើវិស័យមូលប័ត្រ ជាប្រភពចំណូលមួយសម្រាប់វិនិយោគិនផងដែរ ពោលគឺវិនិយោគិនទទួលបានការបែងចែកផ្លែផ្កា តាមរយៈការទទួលបានភាគលាភ ដែលជាចំណែកប្រាក់ចំណេញរបស់ក្រុមហ៊ុនបោះផ្សាយលក់មូលបត្រ។ ម្យ៉ាងវិញទៀត ទីផ្សារមូលបត្រ ជាច្រកចូលមួយយ៉ាងសំខាន់ សម្រាប់វិនិយោគិនបរទេស ដែលនឹងចូលរួមចំណែកនៅក្នុងសកម្មភាពសេដ្ឋកិច្ចកម្ពុជា ដោយទិញភាគហ៊ុនរបស់ក្រុមហ៊ុនបោះផ្សាយលក់មូលបត្រទាំងនោះ។
ប៉ុន្តែបញ្ហានេះ អ្នកវិភាគនានាយល់ឃើញថា អ្នកដែលពាក់ព័ន្ធត្រូវចុះបញ្ជីក្រុមហ៊ុនបោះផ្សាយឲ្យបានច្រើនទៀត ដើម្បីសម្រេចបានគោលដៅខាងលើ និងការរីកចម្រើនសេដ្ឋកិច្ច។
ទោះជាយ៉ាងណាក៏ដោយ ក្រុមហ៊ុនផ្សារមូលបត្រ នឹងបោះផ្សាយជួញដូរហ៊ុនរបស់សហគ្រាសរដ្ឋចំនួនពីរបន្ថែមទៀត គឺទូរគមនាគមន៍កម្ពុជា និងកំពង់ផែស្វយ័តក្រុងព្រះសីហនុ នៅពេលដ៏ខ្លីខាងមុខ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
Lee Theang chek
ពី Phnom Penhតើឯណាទៅតម្លាភាពខាងរបាយការណ៍ហិរញ្ញវត្ថុ។ តើស្ថានភាពហិរញ្ញវត្ថុរបស់រដ្ឋករទឹកបានបង្ហាញជូនអតិថិជនទេស្វែងយល់ទេ? បើចំណេញ ១០០ដុល្លា ថាចំណេញ ២០ដុល្លាទៅវិញ។ តើមានរបាយការណ៍សវនកម្មទៅប្រតិបត្តិការរបស់រដ្ឋការទឹកប៉ុន្មានដងហើយ? ហ៊ុនឡើងចុះវាស្ថិតនៅលើស្ថានភាពហិរញ្ញវត្ថុ និងរបាយការណ៍ប្រាក់ចំណេញខាតរបស់ក្រុមហ៊ុន គឺវាអាចឆ្លុះបញ្ចាំងនូវភាគលាភរបស់ហ៊ុនអាទិភាព និងរបស់ហ៊ុនធម្មតា បើប្រាក់ចំណេញកើននោះតម្លៃភាគហ៊ុនអាចមានខ្ពស់នៅលើទីផ្សារហ៊ុន។
Sep 19, 2012 11:42 PM
ខ្មែរត្រូវតែជួយខ្មែរ!
I think because of the political factor, Government Family Business.
Sep 19, 2012 09:37 AM
-
ស្ដាប់ផ្ទាល់
(ព្រឹក ៥:៣០-៦:៣០ ល្ងាច ៧:៣០-៨:៣០) - សំឡេង
ភាសា
