មន្ត្រីមន្ទីរសង្គមកិច្ចខេត្តកែបរងការចោទថាកាត់ប្រាក់បំណាច់របស់អតីតយុទ្ធជន

ដោយ មុំ សុផុន

2009-09-19

ក្រុមគ្រួសារអតីតយុទ្ធជនចូលនិវត្តន៍បានមានប្រសាសន៍នៅថ្ងៃទី១៨ ខែកញ្ញា ឆ្នាំ២០០៩ ដោយចោទប្រកាន់មន្ត្រីនៃមន្ទីរសង្គមកិច្ចខេត្តកែប ថាបានកាត់ប្រាក់បំណាច់របស់ពួកគាត់ដោយមិនសមហេតុផលក្នុងគ្រាដែលពួកគាត់បានទៅបើកប្រាក់បំណាចបៀវត្សរ៍នោះ។

អ្នកស្រី គឹម លក្ខិណា អាយុ៣៥ឆ្នាំ ជាភរិយាយុទ្ធជនពលីរស់នៅក្រុងកែប បានមានប្រសាសន៍ថា តាមចំនួនទឹកប្រាក់រយៈពេល២០ខែដែលរួមមានកូន៥នាក់និងអ្នកស្រីម្នាក់ផង គឺអ្នកស្រីនឹងត្រូវទទួលបានជាង៩០ម៉ឺនរៀល ប៉ុន្តែអ្នកស្រីបើកប្រាក់នោះបានតែ៦០ម៉ឺនរៀលប៉ុណ្ណោះ។

អ្នកស្រី គឹម លក្ខិណា បានឲ្យដឹងថា ៖ «ខ្ញុំមិនចង់មានបញ្ហាទេ ប៉ុន្តែខ្ញុំមើលទៅវាមិនត្រូវដែរ គាត់ចេះតែបើកមក គ្មាននរណាតវ៉ាបាន ហើយបើកអត់មានថាឲ្យគ្នាមើល អានេះគេគិត គេបូក គេដក ខ្លួនគេ ហើយក្រដាសស្អីក៏គេមិនឲ្យយើងមើលទាំងអស់ ដឹងតែចេញលុយមកប៉ុន្មានអ៊ីចឹង គេឲ្យយើង។ វាមិនសូវខឹងទេអាឆ្លៀតដកកន្ទុយ ដកក្បាល ធ្វើដូចរាងរឡេមរឡាមដូចពិបាកមើលណាស់ ខ្ញុំដល់អ៊ីចឹងដូចរាងខឹងដែរ វាមិនប៉ុន្មានទេ ក៏ប៉ុន្តែខ្ញុំដឹងថាស៊ីលើមួយតង់ហើយ ក៏ប៉ុន្តែមកធ្វើអ៊ីចឹងទៀត»។

អ្នកស្រីបានថ្លែងបន្តទៀតថា ក្រុមអ្នកទៅបើកប្រាក់បំណាច់ទាំងនោះ អ្នកខ្លះបាននាំគ្នាតវ៉ាចំពោះការកាត់លុយពីក្រុមមន្ត្រីនៃមន្ទីរសង្គមកិច្ចនិងអតីតយុទ្ធជននោះ។ អ្នកស្រីបានបន្តថា ពេលបើកប្រាក់នោះគឺមិនមានបញ្ជីស្នាមសម្រាប់ផ្ទៀងផ្ទាត់គ្នាឡើយ។

ចំណែកបុរសម្នាក់ដែលសុំមិនបញ្ចេញឈ្មោះបានទៅបើកប្រាក់បំណាច់របស់ឪពុកជាយុទ្ធជនពិការចូលនិវត្តន៍នោះ បានថ្លែងដែរថា ក្នុងចំនួនប្រាក់ខែចូលនិវត្តន៍ដែលត្រូវទទួលបាននោះចំនួន៣លាន៦សែនរៀល ប៉ុន្តែបា្រក់ដែលបើកបាននោះមានតែ២លាន៥សែនរៀល ៖ «អត់ដឹងមូលហេតុអីហើយប្រាក់ខែមិនដឹងមួយខែប៉ុន្មាន? អត់ដឹង អានេះស្រេចតែគេថា ហើយចេញមកដូចគ្រប់គ្នាទាំងអស់ អាខ្លះណាបើកបាន២២ម៉ឺន-២៥ម៉ឺនអ៊ីចឹង ឲ្យតែ២០ម៉ឺនទេ ខ្លះ១២ម៉ឺន ឲ្យ១០ម៉ឺន អ្នកខ្លះ៦៦ម៉ឺន អ្នកដែលពលីនៅក្បែរខ្ញុំដែរ បានតែ៦០ម៉ឺន កាត់តែពាស ដល់អ៊ីចឹងវាអត់មានយុត្តិធម៌អីបន្តិចសោះ!»។

ក្រុមគ្រួសារយុទ្ធជនពលីនិងពិការទាំងនោះបានស្នើសុំឲ្យមានការត្រួតពិនិត្យលើបញ្ហាប្រាក់សម្រាប់បើកឲ្យក្រុមយុទ្ធជនពិការនិងគ្រួសារយុទ្ធជនពលីទាំងនោះ។

មន្ត្រីនៃមន្ទីរសង្គមកិច្ចនិងអតីតយុទ្ធជនខេត្តកែបមិនទាន់អាចទំនាក់ទំនងដើម្បីសុំការបំភ្លឺលើករណីដែលគ្រួសារយុទ្ធជនពិការនិងពលីចោទប្រកាន់ថាមានការកិបកេងលុយនិងដកហូតលុយរបស់ពួកគាត់នោះនៅឡើយទេ នៅថ្ងៃទី១៨ ខែកញ្ញា។ ប៉ុន្តែមន្ត្រីជាន់ខ្ពស់នៃក្រសួងសង្គមកិច្ចនិងអតីតយុទ្ធជន បានមានប្រសាសន៍ឲ្យដឹងថា ជាគោលការណ៍ក្រសួងមិនអនុញ្ញាតឲ្យមានការដកហូតប្រាក់បៀវត្សរ៍ពីគ្រួសារយុទ្ធជនពលីនិងពិការនោះទេ។

មន្ត្រីជាន់ខ្ពស់ដដែលមានប្រសាសន៍ទៀតថា ក្រសួងនឹងបញ្ជូនមន្ត្រីជំនាញដែលទទួលបន្ទុកដើម្បីទៅពិនិត្យនិងតាមដានមើលករណីមិនប្រក្រតីដែលកើតមានឡើងនេះ៕

បោះពុម្ព អ៊ីម៉េល