លោក ភូ ផូយ ប្រធានសមាគមរោងម៉ាស៊ីនកិនស្រូវកម្ពុជា បានថ្លែងត្រូវកាសែតភ្នំពេញប៉ុស្តិ៍ស្រង់ប្រសាសន៍ផ្សាយបន្តក្នុងសប្តាហ៍នេះ ឲ្យដឹងថា សមាគមមិនមានលទ្ធភាពផលិតអង្ករចំនួន៤០០តោនសម្រាប់នាំចេញទៅប្រគល់ជូនអតិថិជននៅទីក្រុងហុងកុង ដែលបានបញ្ជាទិញសម្រាប់ខែកញ្ញានិងតុលានោះទេ។
ប្រធានសមាគមរោងម៉ាស៊ីនកិនស្រូវកម្ពុជារូបនេះបានបញ្ជាក់ថា មូលហេតុដែលសមាគមមិនអាចបំពេញបានតាមកិច្ចសន្យានោះ ពីព្រោះតែបញ្ហាខ្វះខាតឧបករណ៍និងគ្រឿងចក្រម៉ាស៊ីនកិនស្រូវ។
លោកថា ម៉ាស៊ីនកិនស្រូវថ្មីមួយដែលមានតម្លៃ៧លាន៨សែនដុល្លារអាមេរិកនឹងត្រូវនាំចូលកម្ពុជាក្នុងខែតុលានេះ ហើយលោករំពឹងថា នឹងអាចចាប់ផ្តើមដំណើរការនាំអង្ករចេញនៅក្នុងខែធ្នូខាងមុខ។ ម៉ាស៊ីនកិនស្រូវដែលមានតម្លៃខ្ពស់នោះគ្រោងនឹងដាក់ឲ្យដំណើរការនៅក្នុងខែត្របាត់ដំបង។
យោងតាមប្រធានសមាគមម៉ាស៊ីនកិនស្រូវកម្ពុជា កាលពីខែកក្កដាកន្លងទៅ សមាគមបានប្រកាសកិច្ចសន្យាជាមួយអតិថិជននៅក្នុងទីក្រុងហុងកុង ថានឹងនាំអង្ករទៅលក់នៅទីនោះក្នុងតម្លៃ១តោន ៦៩០ដុល្លារអាមេរិក៕