សម រង្ស៊ីមិនបារម្ភចំពោះការប្ដឹងរបស់អាជ្ញាធរខេត្តស្វាយរៀង
ដោយ ម៉ៅ សុធានី
2009-11-03
ប្រធានបក្សប្រឆាំងលោក សម រង្ស៊ី មានប្រសាសន៍ថា លោកមិនភ័យព្រួយចំពោះការប្តឹងរបស់អាជ្ញាធរស្រុកចន្ទ្រា ខេត្តស្វាយរៀង ពីបទចោទប្រកាន់លោកថាបានប្រព្រឹត្តបទព្រហ្មទណ្ឌបំផ្លាញទ្រព្យសម្បត្តិសាធារណៈកាលពីថ្ងៃ២៥ តុលានោះទេ។
ប្រធានគណបក្សសមរង្ស៊ី លោក សម រង្ស៊ី។
លោក សម រង្ស៊ី ប្រធានគណបក្សសមរង្ស៊ី ដែលកំពុងស្ថិតនៅក្នុងប្រទេសបារាំង ក្រោយដែលលោកបានអញ្ជើញទៅចូលរួមក្នុងសន្និសីទរបស់អង្គការអន្តរជាតិនៃគណបក្សសេរីនិយម នៅក្នុងប្រទេសអេហ្សីបមក បានមានប្រសាសន៍ប្រាប់វិទ្យុអាស៊ីសេរីតាមទូរស័ព្ទថា លោកមិនមានការតក់ស្លុតចំពោះការប្តឹងរបស់អាជ្ញាធរស្រុកចន្ទ្រា ខេត្តស្វាយរៀង ដែលបានចោទលោកថា បានប្រព្រឹត្តបទព្រហ្មទណ្ឌ បំផ្លាញសម្បត្តិទ្រព្យសាធារណៈ បន្ទាប់ពីមានការដកបង្គោលឈើ៦ដើមចេញពីក្នុងស្រែរបស់ប្រជាពលរដ្ឋ កាលពីថ្ងៃទី២៥ ខែតុលា ខណៈដែលគណបក្សសមរង្ស៊ី បានដង្ហែបុណ្យកឋិនទានមួយចូលទៅវត្តអង្គរំដេញ ស្ថិតនៅចម្ងាយប្រមាណពី២០០ ទៅ៣០០ម៉ែត្រពីព្រំដែនប្រទេសវៀតណាមនោះទេ។
លោក សម រង្ស៊ី បានមានប្រសាសន៍បញ្ជាក់ប្រាប់ថា ចំពោះការចោទប្រកាន់មកលើរូបលោកនេះ លោកចង់ឲ្យតុលាការអន្តរជាតិជួយដោះស្រាយបញ្ហាប្រជាកសិករខ្មែរបាត់បង់ដីស្រែចម្ការ ហើយដែលបានចោទថា វៀតណាមបានបោះបង្គោលរំលោភយកដីរបស់ពួកគាត់។
លោក សម រង្ស៊ី មានប្រសាសន៍ដូច្នេះ ៖ «ខ្ញុំអត់ខ្លាចទេ បើរដ្ឋាភិបាលប្រទេសវៀតណាមប្ដឹងខ្ញុំ ប្ដឹងទៅ បើរដ្ឋាភិបាលបច្ចុប្បន្ននៅទីក្រុងភ្នំពេញប្ដឹងខ្ញុំ ក៏ប្ដឹងទៅ តែខ្ញុំសុំប្ដឹងអន្តរជាតិ ដើម្បីឲ្យអន្តរជាតិជួយការពារទឹកដីខ្មែរផង។ ខ្ញុំសូមឲ្យមានការកោះប្រជុំសន្និសីទអន្តរជាតិស្ដីពីកម្ពុជា សូមឲ្យប្រទេសដែលជាហត្ថលេខី មានប្រទេស១៨ដែលមានចុះហត្ថលេខាលើកិច្ចព្រមព្រៀងទីក្រុងប៉ារីស កាលពីឆ្នាំ១៩៩១ សូមឲ្យជួបជុំគ្នាបើកប្រជុំវិញថា ឥឡូវនេះបូរណភាពទឹកដីប្រទេសកម្ពុជាត្រូវគេរំលោភ។ កិច្ចព្រមព្រៀងទីក្រុងប៉ារីស បានធានាថា ប្រទេសហត្ថលេខីទាំងអស់នឹងជួយប្រទេសកម្ពុជា ពេលណាដែលប្រទេសកម្ពុជា ត្រូវគេរំលោភបូរណភាពទឹកដី។ ឥឡូវបូរណភាពទឹកដីកម្ពុជា ត្រូវគេរំលោភហើយ ពីព្រោះយើងមានភស្តុតាងគ្រប់គ្រាន់ហើយ»។
ស្តីពីពាក្យបណ្តឹងរបស់អាជ្ញាធរស្រុកចន្ទ្រា ខេត្តស្វាយរៀង លោក សម រង្ស៊ី បានមានប្រសាសន៍ឲ្យដឹងបន្ថែមថា ករណីបណ្តឹងនេះ បានទៅដល់តុលាការខេត្តស្វាយរៀងហើយ។
លោក សម រង្ស៊ី មានប្រសាសន៍ឲ្យដឹងបន្ថែមដូច្នេះ ៖ «ខ្ញុំបានដឹងថា អាជ្ញាធរនៅខេត្តស្វាយរៀង ស្រុកចន្រ្ទា គេបានប្ដឹងខ្ញុំថា ខ្ញុំបានដកបង្គោលដែលជាទ្រព្យសម្បត្តិសាធារណៈ ពីព្រោះខ្ញុំបានដកបង្គោលហ្នឹងយកទៅគ្រវាត់ចោល ហើយគេបានអះអាងថា បង្គោលហ្នឹងកំណត់ព្រំដែនរវាងប្រទេសកម្ពុជានិងប្រទេសវៀតណាម។ តំណាងគណបក្សសមរង្ស៊ីនៅក្នុងក្រុមប្រឹក្សាស្រុកចន្រ្ទា បានផ្ដល់ព័ត៌មានឲ្យខ្ញុំថា ឥឡូវហ្នឹងពាក្យបណ្ដឹងរបស់អាជ្ញាធរស្រុកចន្រ្ទា បានទៅដល់តុលាការខេត្តស្វាយរៀងហើយ។ គេប្ដឹងខ្ញុំពីបទព្រហ្មទណ្ឌ គឺធ្ងន់ធ្ងរណាស់ រឿងបំផ្លិចបំផ្លាញទ្រព្យសម្បត្តិសាធារណៈ»។
ម៉ៅ សុធានី ៖ តើឯកឧត្ដមបានដកបង្គោលហ្នឹងមែន ឬក៏យ៉ាងម៉េច?
សម រង្ស៊ី ៖ ជាធម្មតាប្រជាពលរដ្ឋតែងតែនិយាយពីការខ្វះខាតជីវភាពរស់នៅយ៉ាប់យ៉ឺន ភាពក្រីក្រ ប៉ុន្តែលើកនេះនិយាយតែមួយគត់ គឺរឿងយួនយកដីខ្មែរ ដល់ខ្ញុំស្ដាប់ទៅយល់ ហេតុអីបានអ្នកទាំងអស់គ្នាអត់មាននិយាយរឿងអី និយាយតែពីបញ្ហាដែលគេមកបោះបង្គោល? គេហ្នឹងសួរថានរណា? គេហ្នឹង គឺក្រុមបច្ចេកទេសចម្រុះ ដូចថា មានយួន១០នាក់ ខ្មែរ១នាក់។ មុននឹងបោះបង្គោលហ្នឹង គេមកវាស់ វាស់ហើយគេមានប្រដាប់ឆ្លុះ ប៉ុន្តែប្រជាពលរដ្ឋលោកអត់យល់ទេ លោកថា មិនដឹងជាវាស់ស្អី លោកធ្វើស្រែនៅលើដីស្រែរបស់ពួកគាត់ហ្នឹង ដីស្រែហ្នឹងគឺជាទឹកដីខ្មែរ គាត់ធ្លាប់ធ្វើស្រែអ៊ីចឹង១០-៣០ឆ្នាំហើយ អត់ដែលមានរឿងអីទេ ស្រាប់តែមកដល់ថ្ងៃហ្នឹង ប៉ុន្មានខែកន្លងមកនេះ មានក្រុមបច្ចេកទេសចម្រុះយួន-ខ្មែរគេចុះមក។
គេចុះមកវាស់ចុះវាស់ឡើង ឆ្លុះចុះឆ្លុះឡើង ស្រាប់តែគេមកបោះបង្គោលលើដីគាត់ ចូលក្នុងទឹកដីខ្មែរជ្រៅ ហើយអ្នកខ្លះបាត់បង់ដីស្រែតែម្ដង បាត់បង់រាប់ហិកតារ ហើយអ្នកខ្លះបង្គោលដែលគេយកមកបោះហ្នឹង កាត់ដីគាត់ពាក់កណ្ដាលស្ទើរតែអស់ដូចអ្នកដទៃទៀតអ៊ីចឹងដែរ។ ពួកគាត់ខឹងក្ដៅក្រហាយហើយឈឺចាប់ ឲ្យពួកខ្ញុំជាអ្នកតំណាងរាស្រ្ដហ្នឹងឲ្យជួយគាត់ផង ព្រោះកាលមុនគាត់បានដកបង្គោលខ្លះ បង្គោលដែលគេទើបដាក់ថ្មីៗ ប៉ុន្តែអាជ្ញាធរមូលដ្ឋាននៅខេត្តស្វាយរៀងហ្នឹង បានស្ដីបន្ទោសគាត់ថា មិនត្រូវដកទេ គំរាមកំហែងពួកគាត់ថា តែដកនឹងមានទោស។ ដល់ឃើញខ្ញុំពួកតំណាងរាស្រ្ដសមរង្ស៊ីមកដល់គាត់ថា សូមពឹងផង ឲ្យផ្ដាំផ្ញើផង ពីព្រោះអាជ្ញាធរនៅមូលដ្ឋានសម្លុតពួកគាត់ណាស់ អ៊ីចឹងខ្ញុំឃើញពួកគាត់ឈឺចាប់ ហើយឈឺចាប់មែន ទទេៗមកយកដីគាត់ត្រង់ៗអ៊ីចឹង។ ខ្ញុំថា ឥឡូវនេះបង្គោលហ្នឹងខ្ញុំអ្នកទទួលខុសត្រូវទៅចុះ យើងត្រូវតែដកចេញហើយ ដើម្បីបើកផ្លូវឲ្យពួកគាត់យកដីស្រែគាត់វិញ ឲ្យគាត់បង្កបង្កើនផលចិញ្ចឹមជីវិតជាធម្មតាទៅ។
ម៉ៅ សុធានី ៖ តើប្រជាពលរដ្ឋដែលបាត់បង់ដីទាំងមូលហ្នឹង មានបានប្ដឹងទៅអាជ្ញាធរទេ មានបានប្ដឹងទៅដល់ថ្នាក់លើបន្តៗទៀតទេ ថាតើរឿងហ្នឹងគេដោះស្រាយយ៉ាងម៉េច ឬក៏អត់បានប្ដឹងទេ?
សម រង្ស៊ី ៖ គាត់អត់មានឱកាសឬលទ្ធភាព អត់មានទំនាក់ទំនងទេ ពួកគាត់នៅភូមិដាច់ស្រយាលអ៊ីចឹង គាត់បានតែប្ដឹងមេភូមិឡើងទៅដល់សាលាឃុំ បានមកប្ដឹងកងកម្លាំងប្រដាប់អាវុធដែលយាមព្រំដែន នគរបាលព្រំដែនហ្នឹង ប៉ុន្តែសូម្បីតែនគរបាលព្រំដែន មន្រ្តីរាជការយើង គឺដូចខ្លាចគេណាស់ អ៊ីចឹងកសិករខ្មែរយើងមិនដឹងជាពឹងនរណា អ៊ីចឹងហើយបានជាគាត់ឆ្លៀតឱកាសដែលអង្គកឋិន ដែលគណបក្សសមរង្ស៊ីរៀបចំ ថា ឥឡូវមានអ្នកភ្នំពេញមក ក្រែងមានអ្នកធំខ្លះអាចជួយពួកយើងបាន។
សូមរំឭកជូនផងដែរថា កាលពីថ្ងៃសុក្រ ទី៣០ ខែតុលា កន្លងមកនេះ ក្រសួងការបរទេសវៀតណាម បានចេញសេចក្តីថ្លែងការណ៍មួយ ថ្កោលទោសទង្វើរបស់លោក សម រង្ស៊ី ថាជាទង្វើមិនត្រឹមត្រូវ ធ្វើតាមតែទំនើងចិត្ត រំលោភច្បាប់របស់កម្ពុជានិងវៀតណាម និងជាទង្វើរំលោភលើសន្ធិសញ្ញា ព្រមទាំងកិច្ចព្រមព្រៀងនានា ដែលកម្ពុជានិងវៀតណាមបានព្រមព្រៀងចុះហត្ថលេខាជាមួយគ្នាពីមុនមក។
សូមជម្រាបជូនផងដែរថា វិទ្យុអាស៊ីសេរីនៅមិនទាន់អាចសុំប្រតិកម្មឆ្លើយតបពីអាជ្ញាធរខេត្តស្វាយរៀង ចំពោះការថ្លែងរបស់លោក សម រង្ស៊ី ខាងលើបាននៅឡើយទេ នៅព្រឹកថ្ងៃអង្គា ទី៣ វិច្ឆិកានេះ៕
ឧបករណ៍រឿង
|
អ៊ីម៉េល |
|
ព្រឹត្តិបត្រព័ត៌មាន |
|
បោះពុម្ព |
|
ចែករំលែករឿងនេះ |
អត្ថបទដែលទាក់ទង
ពាណិជ្ជករថៃធំៗបារម្ភពីបញ្ហាទំនាស់រវាងរដ្ឋាភិបាលខ្មែរនិងថៃ
ចំនួនពលរដ្ឋខ្មែរដែលថៃចាប់បញ្ជូនមកកម្ពុជាវិញមានការកើនឡើង
កម្ពុជាបកស្រាយរឿងចាប់ខ្លួននិងហាមថៃមិនឲ្យបញ្ជាចរាចរណ៍ជើងអាកាស
មន្ត្រីការបរទេសថៃឲ្យកម្ពុជាគោរពតាមកិច្ចព្រមព្រៀងពាណិជ្ជកម្ម
កម្ពុជាហាមបុគ្គលិកថៃមិនឲ្យចូលធ្វើការក្នុងក្រុមហ៊ុនត្រួតពិនិត្យជើងយន្តហោះ
កម្ពុជាមិនទាន់ទទួលលិខិតផ្លូវការស្នើសុំដោះលែងចារកម្មថៃនៅឡើយ
តុលាការរាជធានីភ្នំពេញគ្រោងបើកសវនាការករណីមឿងសុនម្ដងទៀត
មន្រ្តីរដ្ឋាភិបាលបំភ្លឺពីបញ្ហាព្រំដែននិងការលើកអភ័យឯកសិទ្ធិសមរង្ស៊ី
ទស្សនៈនានាជុំវិញការលើកអភ័យឯកសិទ្ធិសមរង្ស៊ី
អ្នកកាសែតជាប់ឃុំម្នាក់បន្តប្ដឹងឧទ្ធរណ៍ក្នុងរឿងក្ដីជាមួយសយសុភាព
មតិ
អ្នកអាចបញ្ចេញមតិដោយបំពេញទម្រង់ខាងក្រោមនេះក្នុងទម្រង់ជាអក្សរសុទ្ធ។. មតិត្រូវតែអនុញ្ញាតដោយអ្នកសម្របសម្រួលនិងមិនបង្ហាញភ្លាមៗនៅលើទំព័រនេះទេ។ សូមអញ្ជើញត្រឡប់មកបើកទំព័រនេះម្ដងទៀតដើម្បីមើលថាតើមតិរបស់អ្នកត្រូវបានចុះផ្សាយឬអត់។
i love my contry but i can not help more...
2009-11-06 03:59
to sey kampong cham <br>you say like you are a kide. you only know vn help us but you didn't know insight more about vn. we nearly go to the end of the road.
2009-11-06 03:57
What Sam Reing Sy has done is just shaking the grass to wake up snakes.
2009-11-05 22:25
Mr samransy good, he did correctly i am support him
2009-11-05 20:00
I myself think that it is right for SR; <br>but all the country which wrote for helping us is available 'cos they d't want <br>our country develop and peaceful. Priminister Hun Sen try his best too; but can't 'cos Vietnam used to help him. <br>I expert that all knowledge people who are abroad should come to Cambodia to develop the country with P. Hun Sen to get out of Vietnam and other controlor. <br>Thanks,
2009-11-05 02:35
មើលមតិទាំងអស់.