អាជ្ញាធរខេត្តសៀមរាបស៊ើបអង្កេតករណីទាហានបាញ់បោះអនាធិបតេយ្យ

អាជ្ញាធរស្រុកក្រឡាញ់ បានឱ្យដឹងថា គេបានស្នើសុំទៅមេបញ្ជាការកងយោធពលខេមរៈភូមិន្ទ ប្រចាំខេត្តសៀមរាប ឱ្យជួយណែនាំដល់មេបញ្ជាការយោធាស្រុកម្នាក់ ដែលបានយកអាវុធទៅបាញ់អនាធិបតេយ្យ និងធ្វើឱ្យប្រជាពលរដ្ឋមួយចំនួនមានការភ័យខ្លាចនោះ។

ដោយ ហង្ស សាវយុត
2012-10-07

hs.mp3

លោក អ៊ាន ឃុន ជាអភិបាលស្រុកក្រឡាញ់។ លោកបានមានប្រសាសន៍ថា កាលពីព្រឹកថ្ងៃសៅរ៍ ទី៦ ខែតុលា លោកបានកោះប្រជុំគណៈបញ្ជាការឯកភាពស្រុក ដើម្បីសួរដេញដោលទៅលើមេបញ្ជាការយោធាម្នាក់ប្រចាំស្រុកនោះ ជុំវិញករណីយកអាវុធទៅបាញ់បោះខុសច្បាប់។

លោកអភិបាលស្រុកដដែល បានមានប្រសាសន៍ថា គណៈបញ្ជាការឯកភាពស្រុក បានរកឃើញថា មេបញ្ជាការយោធាស្រុកឈ្មោះ គង់ ហ៊ត់ ពិតជាបានយកអាវុធទៅបាញ់អនាធិបតេយ្យមែន ហើយករណីនេះ គឺអាជ្ញាធរស្រុកបានជម្រាបជូនទៅមេបញ្ជាការយោធាខេត្តសៀមរាប ដើម្បីឱ្យធ្វើការណែនាំ៖ «បានបាញ់ ក៏ប៉ុន្តែមិនមានការឈ្លោះប្រកែកជាមួយអ្នកណាទេ ដោយសារគាត់ស្រវឹងស្រាខ្លាំង។ គាត់ពិសាស្រាអស់ ២កែវដៃ សាមីខ្លួនមិនបានដឹងខ្លួនផង ចេះតែបើកឡានទៅ។ យើងខ្ញុំបានរាយការណ៍ជូនទៅលោកមេបញ្ជាការតំបន់ប្រតិបត្តិការសឹកខេត្តរួចហើយ»។

ប្រភពពីប្រជាពលរដ្ឋបានឱ្យដឹងថា កាលពីថ្ងៃទី៣ ខែតុលា កន្លងទៅ គឺមានប្រជាពលរដ្ឋជាច្រើនភូមិនៅក្នុងឃុំសំបួរ បានលើកគ្នាទៅកាប់បំផ្លាញចោលឧបករណ៍នេសាទខុសច្បាប់របស់ក្រុមឈ្មួញនៅក្នុងបឹងទន្លេសាប ហើយនៅវេលាល្ងាចគេបានឃើញអភិបាលរងស្រុកក្រឡាញ់ ម្នាក់ និងមេបញ្ជាការយោធាស្រុក គឺលោក គង់ ហ៊ត់ បានទៅប្រមូលប្រជាពលរដ្ឋប្រជុំ និងសាកសួរពីការលើកគ្នាទៅកាប់បំផ្លាញឧបករណ៍នេសាទខុសច្បាប់របស់ពួកឈ្មួញទាំងនោះ។

លុះដល់រំលងអធ្រាត្រថ្ងៃដដែលគេដឹងថា មេបញ្ជាការយោធាស្រុក គឺលោក គង់ ហ៊ត់ បានផឹកស្រាស្រវឹងហើយបានយកអាវុធទៅបាញ់នៅក្នុងភូមិគោកក្រូច។

លោកឧត្ដមសេនីយ៍ ឃឹម ប៊ុនសុង ជាមេបញ្ជាការកងយោធពលខេមរៈភូមិន្ទនៃតំបន់ប្រតិបត្តិការសឹកខេត្តសៀមរាប បានមានប្រសាសន៍ថា លោកទើបតែបានទទួលព័ត៌មាននេះ ដោយសារតែលោកទើបត្រឡប់មកពីបរទេស។ មេបញ្ជាការដដែលបានបញ្ជាក់ថា លោកបានបញ្ជូនមេបញ្ជាការរងម្នាក់ និងនាយកសេនាធិការយោធាម្នាក់ទៅកាន់ស្រុកក្រឡាញ់ហើយ ដើម្បីស្រាវជ្រាវជុំវិញករណីនោះ ហើយប្រសិនបើរកឃើញថា មេបញ្ជាការយោធាស្រុកក្រឡាញ់ បានប្រើអាវុធបាញ់បោះសេរីមែន នឹងត្រូវប្រឈមមុខជាមួយវិន័យកងទ័ព។

លោក ឃឹម ប៊ុនសុង៖ «បើថាមានបាញ់ គំរាមកំហែង សម្លុតប្រជាពលរដ្ឋអី អាហ្នឹងមានរបៀបវាផ្សេងមួយទៀត ហើយការបាញ់លេង ត្រូវវិន័យរបៀបម៉េចទៀត អាហ្នឹងមានបន្តៗគ្នាអ៊ីចឹង។ ទី១ព្រមានហើយធ្វើជាលាយលក្ខណ៍អក្សរ ដើម្បីធ្វើលិខិតប្ដេជ្ញាត្រឹមត្រូវចំពោះមុខមេបញ្ជាការ ហើយក្នុងសៀវភៅសិក្ខាគារិករបស់កងទ័ព គេសរសេរលើកទី១ ទី២ អ៊ីចឹងដែរ។ អាហ្នឹងចំណាំដែរ កិត្តិយសអ្នកឯងធ្វើយូរហើយក៏ដោយ តែអ្នកឯងមានកំហុស គេវាយក្រហមទុកមួយអ៊ីចឹងដែរ»។

មេបញ្ជាការយោធានៃតំបន់ប្រតិបត្តិការសឹកខេត្តសៀមរាប បានឱ្យដឹងថា នេះជាករណីលើកដំបូងដែលមានមន្ត្រីយោធាស្រុក បានយកអាវុធទៅបាញ់អនាធិបតេយ្យ ដោយជាច្រើនឆ្នាំមកហើយមិនដែលមានករណីបែបនេះទេ៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។