អភិបាលរងស្រុកស្វាយលើ លោក សំ សៅ បានមានប្រសាសន៍កាលពីព្រឹកថ្ងៃសៅរ៍ ទី០១ ខែសីហាថា ព្រៃធម្មជាតិជាច្រើនហិកតារដែលជាតំបន់រក្សាទុកសម្រាប់ឧទ្យាននៅភាគខាងជើងឈៀងខាងលិចចម្ងាយប្រហែល ១គីឡូម៉ែត្រពីប្រាសាទបុរាណបឹងមាលា កំពុងទទួលរងការលួចកាប់ឈើពីប្រជាពលរដ្ឋខ្លះនិងពីក្រុមឈ្មួញខ្លះដើម្បីយកដីជាកម្មសិទ្ធិ។
លោក សំ សៅ ថ្លែងដូច្នេះថា ៖ «ខ្ញុំចុះទៅឃើញខូចខាតរួចបាត់ទៅហើយ ប៉ះពាល់ដល់តំបន់គ្រោងទុករបស់អាជ្ញាធរអប្សរា...»។
មន្ត្រីស្រុកដដែល បានឲ្យដឹងថា មានអ្នកស៊ីឈ្នួលកាប់ព្រៃជាច្រើនត្រូវបានគេជួលមកកាប់ព្រៃសម្រាប់ឧទ្យានប្រាសាទបុរាណនោះ ហើយអាជ្ញាធរស្រុកនឹងចាត់វិធានការផ្លូវច្បាប់ប្រឆាំងការកាប់ព្រៃនោះនៅពេលឆាប់ៗ។
ប្រជាពលរដ្ឋមួយចំនួនបានឲ្យដឹងបន្ថែមថា នៅតំបន់ជិតអូរថ្មដាប់សម្រាប់យកទៅជួសជុលប្រាសាទដែលជាតំបន់រក្សាទុកនិងផ្លូវចូលទៅភ្នំបី គឺដើមស្រឡៅធំៗត្រូវបានគេកាប់រំលំដុតព្រៃដើម្បីយកដីរាប់សិបហិកតារ។
ប៉ុន្តែនាយសង្កាត់រដ្ឋបាលព្រៃឈើស្វាយលើ លោក យ៉ាន់ ធីវ៉ាត បានមានប្រសាសន៍ថា លោកពុំបានដឹងអំពីការកាប់ព្រៃនៅតាមតំបន់នោះឡើយ ពីព្រោះជាតំបន់ការពាររបស់អាជ្ញាធរអប្សរា ហើយលោកមិនដែលបានទទួលរបាយការណ៍ណាមួយពីអាជ្ញាធរអប្សរាដើម្បីស្នើសុំជួយអន្តរាគមន៍បញ្ហានោះទេ។
លោក យ៉ាន់ ធីវ៉ាត ថ្លែងដូច្នេះថា ៖ «បើមានការអី គាត់ធ្វើរបាយការណ៍មកខាងខ្ញុំ ខ្ញុំជួយអន្តរាគមន៍ហើយ ប៉ុន្តែអត់ទាន់ឃើញ»។
ចំណែកអគ្គនាយករងអាជ្ញាធរអប្សរា លោក សឺន គង់ បានមានប្រសាសន៍ថា ពិតជាមានការលួចកាប់បំផ្លាញព្រៃដែលរក្សាទុកជាឧទ្យានប្រាសាទបុរាណមែន។
លោក សឺន គង់ បានឲ្យដឹងថា មានដីខ្លះ មុនពេលដែលអាជ្ញាធរអប្សរាទៅកំណត់រក្សាទុកព្រៃធម្មជាតិនោះ គឺនៅតាមចន្លោះព្រៃខ្លះៗមានស្រែ ប៉ុន្តែក្រោយៗមក អ្នកភូមិខ្លះចេះតែបន្លំកាប់ពង្រីកដើម្បីយកដី ហើយអាជ្ញាធរអប្សរាមិនទាន់មានចំណាត់ការក្តៅប្រឆាំងនឹងការកាប់បំផ្លាញព្រៃនោះទេ ដោយគ្រាន់តែហៅអ្នកភូមិខ្លះមកផ្តិតមេដៃបញ្ឈប់ការកាប់រុករានព្រៃប៉ុណ្ណោះ តែបើមិនអាចរារាំងបានទៀត នឹងចាត់វិធានការផ្លូវច្បាប់។
លោក សឺន គង់ មានប្រសាសន៍យ៉ាងដូច្នេះ ៖ «យើងបានទៅហាមឃាត់ យើងឲ្យគាត់ធ្វើកិច្ចសន្យាជាហូរហែដែរ ហ្នឹងជាជំហានទី១។ តែបើជំហានទី២ គាត់មិនស្ដាប់ទៀត យើងនឹងធ្វើតាមផ្លូវច្បាប់»។
មន្ត្រីអាជ្ញាធរអប្សរាបានឲ្យដឹងថា តំបន់ព្រៃជុំវិញប្រាសាទបុរាណបឹងមាលា គឺមានព្រះរាជក្រឹត្យកាលពីអំឡុងឆ្នាំ២០០០ ឲ្យកំណត់រក្សាទុកសម្រាប់ឧទ្យានប្រាសាទបុរាណដែលមិនឲ្យមានការកាប់ព្រៃទេ ហើយតំបន់អូរថ្មដាប់ដែលនៅជាប់នឹងប្រាសាទបឹងមាលានោះ ត្រូវបានចេញអនុក្រឹត្យការពារទុកសម្រាប់យកថ្មទៅជួសជុលប្រាសាទបុរាណនានា ដោយមិនអនុញ្ញាតឲ្យចូលដាប់យកថ្មនិងកាប់ព្រៃទីនោះជាប្រយោជន៍ឯកជនបានឡើយ៕