មន្ទីរទេសចរណ៍សៀមរាប ប្រកាសពីច្បាប់គ្រប់គ្រងផ្នែកមគ្គុទ្ទេសក៍ទេសចរណ៍
h080312hs.mp3
កាលពីពេលថ្មីៗ មន្ទីរទេសចរណ៍ខេត្តសៀមរាប បានចេញសេចក្តីជូនដំណឹង ដោយប្រាប់ឱ្យដឹងពីតម្លៃដែលត្រូវបង់ពន្ធជូនរដ្ឋ លើមុខរបររកកម្រៃពីសេវាកម្មទេសចរណ៍នីមួយៗ ដូចជាការសុំអាជ្ញាប័ណ្ណប្រកបអាជីវកម្មទេសចរណ៍ ការបើកស្នាក់ការទីភ្នាក់ងារទេសចរណ៍ ការបើកសណ្ឋាគារ និងផ្ទះសំណាក់ទទួលអ្នកទេសចរឱ្យស្នាក់នៅជាដើម តើត្រូវបង់ពន្ធជូនរដ្ឋចំនួនប៉ុន្មានរៀល។
ការជូនដំណឹងដែលរួមទាំងការផ្សព្វផ្សាយអនុក្រឹត្យ ស្ដីពីការគ្រប់គ្រងមគ្គុទ្ទេសក៍ទេសចរណ៍ និងការប្រកាសសារាចរណែនាំគ្រប់គ្រងអាជីវកម្ម សេវាកម្មទេសចរណ៍របស់ក្រសួងទេសចរណ៍ ផងនោះ ត្រូវបានមន្ត្រីរដ្ឋាភិបាលចាត់ទុកថា គឺជាការលើកកម្ពស់ការគ្រប់គ្រងវិស័យទេសចរណ៍ឱ្យមានប្រសិទ្ធភាព ដើម្បីឱ្យមានការគាំទ្រ និងជឿទុកចិត្តថែមទៀត ពីផ្នែកឯកជននានា ដែលកំពុងប្រកបមុខរបររកកម្រៃពីទេសចរណ៍។
លោក ង៉ូវ សេងកាក់ ជាប្រធានមន្ទីរទេសចរណ៍ខេត្តសៀមរាប លោកបានមានប្រសាសន៍ថា មន្ទីរទេសចរណ៍បានចាប់ផ្ដើមធ្វើការទប់ស្កាត់នូវរាល់ភាពមិនប្រក្រតីនានា នៅក្នុងវិស័យទេសចរណ៍ នៃខេត្តនេះ ដើម្បីធ្វើឱ្យកាន់តែមានការទុកចិត្តឡើងពីអ្នកដែលប្រកបអាជីវកម្មទេសចរណ៍។
មន្ត្រីដដែលបានមានប្រសាសន៍ថា មន្ទីរទេសចរណ៍ ក៏បានចាប់ផ្ដើមអនុវត្តន៍វិធានការប្រឆាំងអំពើពុករលួយ ទៅលើមន្ត្រីនៃមន្ទីរទេសចរណ៍ណាដែលតែងតែដើរប្រព្រឹត្តអំពើខុសច្បាប់មួយចំនួន ដែលនាំឱ្យប៉ះពាល់ដល់វិស័យទេសចរណ៍ជាតិនោះ។
លោក ង៉ូវ សេងកាក់៖ «ថ្ងៃនេះយើងកុំឱ្យអាជីវករទាំងអស់នៅតែមានមន្ទិលសង្ស័យថា ការបង់ពន្ធវាមិនប្រក្រតីអី គឺយើងធ្វើការផ្សព្វផ្សាយទូលំទូលាយ រួចហើយយើងខ្ញុំមានវេបសាយ (Website) ឱ្យគាត់បានយល់។ អ្វីដែលសំខាន់ គឺយើងចូលរួមនៅក្នុងយុទ្ធនាការទប់ស្កាត់អ្វីដែលមិនប្រក្រតី។ ក្នុងករណីមានមន្ត្រីខ្ញុំណាមួយ ទៅធ្វើអ្វីដែលមិនប្រក្រតី គឺសូមប្រាប់ខ្ញុំ ខ្ញុំនឹងដោះស្រាយបន្ទាន់នៅនឹងកន្លែង ឬក៏រាយការណ៍ជូនទៅថ្នាក់ដឹកនាំ ឬក៏ ដែលមានអាជ្ញាធរខេត្ត មានឯកឧត្តមរដ្ឋមន្ត្រី ដើម្បីចាត់ចែងការងារនេះឱ្យបានបន្ទាន់ ដើម្បីធ្វើយ៉ាងម៉េចឱ្យអាជីវកម្មប្រតិបត្តិការ មានភាពកក់ក្តៅ»។
យុទ្ធនាការលុបបំបាត់ភាពមិនប្រក្រតីផ្នែកវិស័យទេសចរណ៍ នៅក្នុងខេត្តសៀមរាប នោះ ក្រុមមន្ត្រីរដ្ឋាភិបាលបានផ្សព្វផ្សាយឱ្យស្គាល់លេខទូរស័ព្ទមួយចំនួន ដើម្បីឱ្យមានការទាក់ទងផ្តល់ព័ត៌មានភ្លាមៗ នៅពេលណាមានមន្ត្រីរបស់រដ្ឋទៅធ្វើសកម្មភាពខុសប្រក្រតីណាមួយ ហើយក្រៅពីនោះ គេក៏បានរៀបចំធ្វើប្រអប់សំបុត្រសម្រាប់ទទួលមតិរិះគន់ នៅតាមទីសាធារណៈមួយចំនួនផងដែរ។
អង្គការក្រៅរដ្ឋាភិបាលមួយដែលកំពុងធ្វើការងារប្រយុទ្ធប្រឆាំងនឹងអំពើពុករលួយ បានសម្ដែងការអបអរសាទរចំពោះរដ្ឋាភិបាល ដែលចាប់ផ្ដើមចាត់វិធានការប្រឆាំងអំពើពុករលួយ នៅក្នុងវិស័យទេសចរណ៍នេះ។
លោក សន ជ័យ ជាមន្ត្រីសម្របសម្រួលបណ្ដាញរួបរួមដើម្បីគណនេយ្យភាពសង្គមអាស៊ីបូព៌ា និងប៉ាស៊ីហ្វិក ប្រចាំកម្ពុជា បានមានប្រសាសន៍ថា ការដាក់វិធានការប្រឆាំងអំពើពុករលួយក្នុងវិស័យទេសចរណ៍ គឺជាការប្រសើរមួយ ដែលអាចឱ្យរដ្ឋកាន់តែបានចំណូលច្រើនពីវិស័យនេះ ហើយវិស័យទេសចរណ៍ក៏កាន់តែកើនឡើង។
លោក សន ជ័យ៖ «យើងចង់ឱ្យការប្រយុទ្ធប្រឆាំងអំពើពុករលួយ ក្នុងវិស័យទេសចរណ៍ហ្នឹង ឱ្យមានប្រសិទ្ធភាព។ យើងអបអរសាទរនៅក្នុងយន្តការនេះ ប៉ុន្តែសុំឱ្យយន្តការនេះវាក្លាយទៅជាមធ្យោបាយមួយ ដែលមានតម្លាភាព ហើយនិងប្រព្រឹត្តទៅតាមស្ថានភាពជាក់ស្តែង។ បើកាលណាវាមានអំពើពុករលួយ វាអាចនាំឲ្យរាំងស្ទះដល់គោលនយោបាយរដ្ឋាភិបាល ក្នុងការពង្រីកវិស័យទេសចរណ៍នេះដែរ»។
ទោះយ៉ាងណា កាលពីពាក់កណ្ដាលខែមិថុនា កន្លងទៅ មានការរិះគន់ទៅលើការគ្រប់គ្រងផ្នែកមគ្គុទ្ទេសក៍ទេសចរណ៍នៅឡើយ ដោយថាមានជនបរទេសជាច្រើននាក់ ដែលពុំធ្លាប់បានទទួលការបណ្ដុះបណ្ដាលវិជ្ជាជីវៈទាល់តែសោះ បែរជាមានសិទ្ធិនាំភ្ញៀវទេសចរបរទេសដើរទស្សនារមណីយដ្ឋានបុរាណ និងធ្វើការអធិប្បាយអំពីប្រវត្តិសាស្ត្រខ្មែរ យ៉ាងអនាធិបតេយ្យ។
លិខិតអនាមិក១ច្បាប់ ដែលគេបានដាក់ជូនទៅអង្គភាពប្រឆាំងអំពើពុករលួយ ដែលក្រុមអង្គការសិទ្ធិមនុស្សក្រៅរដ្ឋាភិបាលទើបតែទទួលបានថ្មីៗ បានរិះគន់មន្ត្រីមន្ទីរទេសចរណ៍ខេត្តសៀមរាប ថា បានបណ្តោយឱ្យជនបរទេសមួយចំនួន ដែលក្នុងនោះមានជនជាតិកូរ៉េ រុស្ស៊ី វៀតណាម បារាំង អ៊ីតាលី និងអាល្លឺម៉ង់ ដែលមានចំនួនប្រមាណពី ២០០ទៅ៣០០នាក់ កំពុងដើរតួជាមគ្គុទ្ទេសក៍ទេសចរណ៍នាំភ្ញៀវដើរកំសាន្តក្នុងរមណីយដ្ឋានអង្គរ ស្ទើរតែរៀងរាល់ថ្ងៃ ដោយអ្នកទាំងនោះអធិប្បាយប្រវត្តិសាស្ត្រខ្មែរ ក្រោមលេសថា ជាអ្នកបកប្រែភាសា។
លិខិតបានរិះគន់ទៀតថា តាមការអង្កេត គឺជនបរទេសទាំងនោះបានបង់ប្រាក់សំណូកទៅឱ្យមន្ត្រីមន្ទីរទេសចរណ៍ប្រមាណ១២០ដុល្លារអាមេរិកក្នុងរយៈពេល៦ខែ ហើយប្រាក់ទាំងនោះ គឺមិនបានចូលទៅក្នុងថវិការដ្ឋឡើយ។
លោក យឹម សុវណ្ណ ជាសមាជិកសភាមកពីគណបក្សប្រឆាំងក្នុងប្រទេសកម្ពុជា បានមានប្រសាសន៍ថា លោកបានមើលឃើញភ្ញៀវទេសចរបរទេស ដែលចូលមកទស្សនាកម្ពុជា កំពុងមានការកើនឡើងមែន ហើយផ្នែកឯកជនដែលកំពុងប្រកបអាជីវកម្មទេសចរណ៍ គេមិនអល់អែកក្នុងការបំពេញកាតព្វកិច្ចបង់ពន្ធជូនរដ្ឋនោះទេ។ ក៏ប៉ុន្តែ លោកមើលឃើញថា ប្រាក់ចំណូលដែលបានពីវិស័យទេសចរណ៍នៅកម្ពុជា បានបាត់បង់ជាច្រើន ដោយសារតែអំពើពុករលួយ។
លោក យឹម សុវណ្ណ៖ «ខ្ញុំលើកតែលក់សំបុត្រចូលអង្គរវត្ត ១ឆ្នាំៗភ្ញៀវទេសចរបរទេសចូលទស្សនាអង្គរវត្ត គឺមិនតិចជាង២លាននាក់ទេ ហើយប្រសិនជាម្នាក់ៗបង់១ថ្ងៃស្មើ២០ដុល្លារ ២ថ្ងៃស្មើ៤០ ឬក៏៣-៤ថ្ងៃ បង់លើសពីហ្នឹង គឺក្នុង១ឆ្នាំៗរដ្ឋប្រមូលយ៉ាងតិចបានពី ៦០ទៅ៧០លានដុល្លារ។ ក៏ប៉ុន្តែ បច្ចុប្បន្ននេះគឺរដ្ឋប្រមូលបានតិចតួចណាស់។ បើប្រៀបធៀបនឹងការប្រមូល គឺមិនបាន ៥ទៅ១០% នៃចំណូលជាក់ស្តែង ដែលមានសក្ដានុពលគាត់អាចទទួលបាន ហើយ៩០%បាត់បង់ចូលទៅក្នុងហោប៉ៅឯកជន»។
ក្នុងរយៈពេល៦ខែ ដើមឆ្នាំ២០១២ មានភ្ញៀវទេសចរបរទេសប្រមាណជាង២លាន១សែននាក់ បានមកទស្សនាកម្ពុជា ហើយចំនួននេះគឺកើនឡើង៣៥% បើប្រៀបធៀបទៅនឹងរយៈពេល៦ខែ ដូចគ្នា កាលពីឆ្នាំ២០១១ ដែលមានចំនួនជាង១លាន៥សែននាក់នោះ។
មន្ត្រីក្រសួងទេសចរណ៍ បានឱ្យដឹងថា កាលពីឆ្នាំ២០១១ កម្ពុជាបានទទួលភ្ញៀវទេសចរណ៍បរទេសចំនួនជាង២លាន៨សែននាក់ ដោយបានទទួលចំណូលមកក្នុងសេដ្ឋកិច្ចកម្ពុជាប្រមាណជាង១ពាន់៩រយលានដុល្លារអាមេរិក៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
-
ស្ដាប់ផ្ទាល់
(ព្រឹក ៥:៣០-៦:៣០ ល្ងាច ៧:៣០-៨:៣០) - សំឡេង
ភាសា
