ពលរដ្ឋ​៦០​គ្រួសារ​នៅ​ខេត្ត​ព្រះសីហនុ​ចោទ​អាជ្ញាធរ​ថា​លក់​ដី​ពួក​គាត់​ឲ្យ​ទៅ​អ្នក​ផ្សេង

ពលរដ្ឋ ៦០​គ្រួសារ នៅ​ឃុំ​អណ្ដូងថ្ម ខេត្ត​ព្រះសីហនុ ចោទ​ថា អាជ្ញាធរ​បាន​លក់​ដី​គាត់ ២៥០​ហិកតារ ទៅ​ឲ្យ​អ្នក​ផ្សេង។ ខណៈ​ក្រុម​យុវជន​ស្ម័គ្រចិត្ត​រៀបចំ​វាស់​ដី អាជ្ញាធរ​បង្ហាញ​ថា ដី​នោះ​នៅ​ក្នុង​ប្លង់​អ្នក​ផ្សេង ដោយ​បាន​ចោទ​ថា ពលរដ្ឋ​បាន​លក់​ដី​នោះ​ឲ្យ​គេ​ហើយ។
ដោយ អ៊ុក សាវបូរី
2012-11-15
អ៊ីម៉ែល
មតិ
ចែករំលែក
បោះពុម្ព
  • បោះពុម្ព
  • ចែករំលែក
  • មតិ
  • អ៊ីម៉ែល

មនុស្ស​ចំនួន ៦០​គ្រួសារ នៅ​ភូមិ​ត្រពាំងស្អុយ២ ឃុំ​អណ្ដូងថ្ម ស្រុក​ព្រៃនប់ ខេត្ត​ព្រះសីហនុ នៅ​ព្រឹក​ថ្ងៃ​ពុធ ទី​១៤ ខែ​វិច្ឆិកា នាំ​គ្នា​រារាំង​គ្រឿងចក្រ​ចូល​ឈូស​ដី​ដំណាំ​នៅ​ក្បែរ​ជើង​ភ្នំ​ឈ្មោះ​ថា​ថ្ម​អង្គុយ។

តំណាង​អ្នក​ភូមិ​ត្រពាំងស្អុយ២ ឃុំ​អណ្ដូងថ្ម លោក ហ៊ុល រ៉ា ថ្លែង​នៅ​ព្រឹក​ថ្ងៃ​ទី១៤ ខែ​វិច្ឆិកា ថា ក្រុម​យុវជន​ស្ម័គ្រចិត្ត​រៀបចំ​ចុះ​វាស់ដី​នៅ​ក្នុង​ឃុំ​នេះ ស្រាប់​តែ​នៅ​ព្រឹក​ថ្ងៃ​ពុធ មាន​គ្រឿងចក្រ​ចូល​ឈូស​ដំណាំ​ពួក​គាត់ មាន​ដំឡូងមី ស្វាយ ខ្នុរ ជាដើម។ ប្រជាពលរដ្ឋ​លើក​គ្នា​ទប់ស្កាត់​គ្រឿងចក្រ ស្រាប់​តែ​លេច​ដំណឹង​ថា ដី​ពួក​គាត់​ដាំ​ដុះ​នេះ ជា​កម្មសិទ្ធិ​របស់​លោក អ៊ុក សីហា ទៅ​វិញ៖ «អ៊ុក សីហា ហ្នឹង គាត់​ថា​ដី​គាត់ ធ្វើ​ប្លង់​ហើយៗ ប្រគល់​ដោយ​អាជ្ញាធរ​ភូមិ ហើយ​និង​ឃុំ​នេះ​លក់​ឲ្យ​គាត់ នេះ​តាម​ពួក​បើក​អាត្រាក់​កាយ​ដី​នេះ​គេ​មក​ថា អ៊ុក សីហា ហ្នឹង គេ​មក​ធ្វើ​ប្លង់​ហើយ​អស់​ហើយ។ អីចឹង ប្រជាពលរដ្ឋ ៦០​គ្រួសារ គ្មាន​សិទ្ធិ​តវ៉ា​ទេ ពីព្រោះ​ដល់​ថ្នាក់​ឯកឧត្តម​ផ្កាយ​១ ផ្កាយ​២ គេ​ទាម​ទារ​យក​ហើយ»

ប្រជាពលរដ្ឋ​ឲ្យ​ដឹង​ថា ពួក​គាត់​កាន់​កាប់​ដី​នេះ​តាំង​ពី​នៅ​ក្នុង​របប​ខ្មែរ​ក្រហម ហើយ​ចេះ​តែ​បន្ត​កាន់​កាប់​រហូត​មក។ ពួក​គាត់​អះអាង​ថា ដី​ក្នុង ៦០​គ្រួសារ​ដែល​ពាក់ព័ន្ធ​ប្លង់​លោក អ៊ុក សីហា គឺ​មាន​ទំហំ ២៥០​ហិកតារ។

លោកស្រី នាក់ រិន អះអាង​ថា បាន​រស់នៅ​ក្នុង​ភូមិ​ត្រពាំស្អុយ២ ទាំង​ពី​ក្នុង​សម័យ​សង្គ្រាម​ស៊ីវិល​ជាមួយ​ខ្មែរ​ក្រហម។ ពួក​គាត់​កាន់​កាប់​ដី​ទំហំ ៤​ហិកតារ​មួយ​គ្រួសារ ដើម្បី​ដាំ​ដំណាំ។ ដំណាំ​ដាំ​បាន​លក់​១ឆ្នាំៗ​បាន​ប្រាក់ ៣​ទៅ ៤​លាន​រៀល ស្រាប់​តែ​នៅ​ថ្ងៃ​ពុធ គ្រឿងចក្រ លោក អ៊ុក សីហា មក​ឈូស​ដើម​អាកាស្យា​គាត់​ចោល និង​ដំណាំ​ហូប​ផ្លែ​ផ្សេង​ទៀត ដោយ​អះអាង​ថា គេ​មាន​ប្លង់​កម្មសិទ្ធិ៖ «ដាំ​បាន​ចេក បាន​ដំឡូង​អី​គ្រប់​សព្វ​ដែរ។ លក់​ឆ្នាំ​ហ្នឹង​បាន ៣​ទៅ​៤​លាន​រៀល​ដែរ»

បុរស​ម្នាក់​ទៀត​ឈ្មោះ ហែម ចាន់ណា ថ្លែង​ដូច​គ្នា​ថា ពួក​គាត់​មិន​យល់​ទេ ដី​កំពុង​កាន់​កាប់​សុខៗ នៅ​តែ​ក្រុម​យុវជន​ស្ម័គ្រចិត្ត​ចូល​វាស់​ដី​ឲ្យ​ពួក​គាត់​ដើម្បី​បាន​ទទួល​កម្មសិទ្ធិ​ដី​ស្រប​ច្បាប់ បែរ​ជា​មាន​អ្នក​ផ្សេង​មក​អះអាង​ថា​ជា​ដី​គេ​មាន​ប្លង់​ទៅ​វិញ៖ «មិន​ដឹង​គេ​វាស់​វែង​ថ្ងៃ​ណា ប៉ុន្តែ អ៊ុក សីហា គេ​ថា​គេ​ធ្វើ​ប្លង់​ហើយ។ ម្ចាស់​អាត្រាក់​គេ​ថា បើ​ឃាត់​ឃាំង​ត្រូវ​ទៅ​សាលា​ស្រុក ហើយ​ទៅ​សាលា​ស្រុក ខាង​ស្រុក​គេ​ថា​ឲ្យ​សម្រួល បើ​សម្រួល​អីចឹង ដី​ប្រជាពលរដ្ឋ​ហ្នឹង គេ​កាយ​តាម​ចិត្ត។ អីចឹង ប្រជាពលរដ្ឋ ៦០​គ្រួសារ​នេះ គ្រាន់​ជា ដើម្បី​សម្រាប់​គេ​ប្លង់​ជាន់​ដី​ទៅ​អនាគត​ទេ​ឬ​អី»

មេ​ភូមិ​ត្រពាំងស្អុយ២ លោក ណុប ម៉េង ថ្លែង​ថា ពិត​ជា​មាន​ជម្លោះ​ដី​នៅ​ក្បែរ​ភ្នំ​កើត​ឡើង​មែន។ ប៉ុន្តែ​ជម្លោះ​នៅ​ចំនៀរ​ភ្នំ​នោះ ជា​ដី​បរិស្ថាន​គ្រប់គ្រង​ចំនួន ៣​ភូមិ មិន​មែន​ដី​លោក អ៊ុក សីហា មាន​ប្លង់​នោះ​ទេ។ លោក​បញ្ជាក់​ថា ដី​លោក អ៊ុក សីហា មាន​ប្លង់​នេះ គឺ​មិន​បាន​រំលោភ​យក​ពី​អ្នក​ណា​ទេ គឺ​បាន​ទិញ​ពី​ប្រជាពលរដ្ឋ​ក្នុង​ភូមិ​នេះ តាំង​ពី​អំឡុង​ឆ្នាំ​១៩៩៦ មក​នោះ៖ «ប្រជាជន​លក់​ដោយ​ស្វ័យប្រវត្តិ​ទេ លក់​ឲ្យ​ឯកឧត្តម សួស កាណាន ពី​ដំបូង ហើយ​ឯកឧត្តម សួស កាណាន គាត់​ចែក​ឲ្យ​លោក អ៊ុក សីហា មួយ​ចំហៀង។ យើង​លក់​ត្រឹមត្រូវ ប្រជាជន​មាន​ទាំង ដោយ​ទាំង​ខ្ញុំ កាល​មុន​លក់​ដែរ»

មេ​ឃុំ​អណ្ដូងថ្ម លោក វាន់ ណូ ថ្លែង​ថា ដី​នៅ​ក្នុង​ភ្នំ​ថ្ម​អង្គុយ ផ្នែក​វាល​រាប​នោះ ពលរដ្ឋ​បាន​លក់​ឲ្យ​គេ​រួច​ហើយ ម្ចាស់​ដី​បាន​ការពារ​សិទ្ធ​កាន់​កាប់ បាន​ធ្វើ​ប្លង់​ដី​ត្រឹមត្រូវ ឥឡូវ​គេ​មក​វាត​យក​ព្រំ​ដី​គេ ដើម្បី​ឲ្យ​យុវជន​ស្ម័គ្រចិត្ត​ជួយ​វាស់​ដី​ឲ្យ មិន​គួរ​ប្រជាពលរដ្ឋ​មក​តវ៉ា​សុំ​យក​ដី​វិញ ហើយ​ទាម​ទារ​ឲ្យ​យុវជន​ស្ម័គ្រចិត្ត​ចូល​វាស់​ដី​ឲ្យ​អ្នក​ទាំង​នោះ​វិញ​ទេ។ លោក វាន់ ណូ បញ្ជាក់​ថា ដី​ដែល​ពលរដ្ឋ​កំពុង​តែ​តវ៉ា​នេះ បាន​ប្ដឹង​ត​ទល់​រវាង​ពលរដ្ឋ និង​លោក អ៊ុក សីហា នៅ​សាលា​ស្រុក​ព្រៃនប់ កាត់​ក្តី​តាំង​ពី​ឆ្នាំ​២០០៨ មក មាន​ការ​កាត់​សេចក្តី​ច្បាស់​លាស់​អស់​ហើយ មិន​គួរ​ពលរដ្ឋ​មក​ទាម​ទារ​ឡើយ។

វិទ្យុ​អាស៊ី​សេរី មិន​អាច​ទាក់​ទង លោក អ៊ុក សីហា ជំរាប​សួរ​ព័ត៌មាន​តប​ទៅ​នឹង​ការ​ចោទ​របស់​ប្រជាពលរដ្ឋ​ភូមិ​ត្រពាំងស្អុយ២ បាន​ទេ នៅ​ថ្ងៃ​ទី​១៤ ខែ​វិច្ឆិកា ឆ្នាំ​២០១២ នេះ៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

មតិ (0)
  • បោះពុម្ព
  • ចែករំលែក
  • អ៊ីម៉ែល