តំណាងកម្មករ លោក ញឹម ចំរើន បានថ្លែងថា ពួកគេរង់ចាំការសម្រេចរបស់តុលាការសម្រាប់ការដោះស្រាយការទាមទារនោះ ៖ «អត់ទាន់បានដោះស្រាយបានចំណុចណាផង ឥឡូវគេបោះបង់ពួកខ្ញុំចោល តែពួកខ្ញុំនៅធ្វើកូដកម្មទាមទារឲ្យក្រុមហ៊ុនហ្នឹងបង់ប្រាក់បំណាច់ផ្សេងៗដែលពួកខ្ញុំធ្វើបានរយៈពេល ខ្លះ៥ឆ្នាំ ខ្លះ៧ឆ្នាំអ៊ីចឹង។ គេអត់ទាន់ដោះស្រាយ គេប្រាប់ថា រង់ចាំតុលាការកាត់ក្ដីថ្ងៃ៣០»។
គួរជម្រាបជូនថា កម្មករនៅក្នុងរោងចក្រ ស្កាយហាយហ៍ មានចំនួនសរុបប្រហែល៣.០០០នាក់។
ប្រភពពីកម្មករបានអះអាងថា ពួកគេចំនួន១.៥០០នាក់ក្នុងចំណោមកម្មករសរុបបានធ្វើកូដកម្មតវ៉ាទាមទារអស់រយៈពេលជាងមួយខែមកហើយ ប្រយោជន៍ឲ្យរោងចក្រគោរពច្បាប់ការងារទទួលខុសត្រូវក្នុងការដោះដូរតំណែងកម្មករ បង្កើតកន្លែងមើលក្មេង ធានាសុវត្ថិភាពយានយន្តរបស់កម្មករពេលមកធ្វើការជាដើម។
ការទាមទារទាំងនោះត្រូវបានភាគីថៅកែច្រានចោល។ ប្រភពពីភាគីរោងចក្រដែលយើងធ្លាប់បានសម្ភាសន៍បាននិយាយថា ទំនាស់នៅក្នុងរោងចក្រ ស្កាយហ៍ហាយហ៍ កើតឡើងដោយសារតែសហជីពពីរក្នុងរោងចក្រមិនត្រូវគ្នា ហើយបានញុះញង់កម្មករឲ្យមានបាតុកម្ម។
តំណាងខាងរោងចក្រដដែលបញ្ជាក់ថា កម្មករដែលបានចូលរួមធ្វើបាតុកម្មមានភាគតិចក្នុងចំណោមកម្មករទាំងអស់។ អ្នកទាំងនោះបានលះបង់ការងារចោល បើទោះបីជាតុលាការបានបញ្ជាឲ្យចូលធ្វើការវិញក៏ដោយ។
ប្រធានបក្សសមរង្ស៊ីនឹងបន្តជំរុញឲ្យមានដំណោះស្រាយសម្រាប់កម្មកររោងចក្រតាក់ហ្វាត
ទាក់ទងទៅនឹងកូដកម្មរបស់កម្មករនៃរោងចក្រកាត់ដេរមួយទៀតឈ្មោះថា តាក់ហ្វាត មេដឹកនាំបក្សប្រឆាំង លោក សម រង្ស៊ី បានថ្លែងនៅថ្ងៃសុក្រ ទី១៦ តុលានេះ ថា លោកនឹងបន្តឃ្លាំមើលនិងជំរុញឲ្យមានការដោះស្រាយសម្រាប់កម្មករ។
លោក សម រង្ស៊ី បានបញ្ជាក់ថា ៖ «រោងចក្រតាក់ហ្វាតហ្នឹងប៉ុន្មានឆ្នាំមកមិនសូវគោរពច្បាប់ការងារទេ ដោយសារថាមានវិបត្តិសេដ្ឋកិច្ចថែមទៀតនោះ ឥឡូវហ្នឹងគេមានចាត់វិធានការបណ្ដេញកម្មករ ព្យួរកម្មករ ធ្វើអ្វីដែលមិនត្រឹមត្រូវ មិនគោរពច្បាប់ការងារ មិនគោរពសិទ្ធិកម្មករ។ យើងនឹងតាមដានដើម្បីជំរុញឲ្យអាជ្ញាធរមានសមត្ថកិច្ច ពិសេសក្រសួងការងារ ឲ្យបង្ខំឲ្យថៅកែរោងចក្រហ្នឹងគោរពច្បាប់ការងារឲ្យបានត្រឹមត្រូវ គោរពសិទ្ធិកម្មករឲ្យបានត្រឹមត្រូវ ឲ្យបានពេញលេញ»។
លោកថ្លែងដូច្នេះនៅក្រោយពេលដែលលោកទើបនឹងវិលត្រឡប់មកពីប្រទេសបារាំងវិញកាលពីពេលថ្មីៗនេះ ហើយនិងមានបំណងចូលរួមនៅក្នុងការតវ៉ារបស់កម្មករផងដែរ។
ប្រភពពីសហជីពសេរីកម្មករបានអះអាងថា កម្មកររោងចក្រកាត់ដេរតាក់ហ្វាតជិត២ពាន់នាក់បានធ្វើបាតុកម្មប្រហែលមួយសប្តាហ៍មកនេះ ក្រោយពីរោងចក្របានប្រកាសបិទទ្វារដោយសារតែគ្មានការបញ្ជាទិញ។ កម្មករទាំងនោះបានទាមទារឲ្យមានការបើកប្រាក់បៀវត្សរ៍ចំនួន៥០%នៃប្រាក់ខែរបស់ខ្លួនចំពោះការបិទទ្វាររោងចក្រនេះ។
នៅថ្ងៃដដែលនេះវិទ្យុអាស៊ីសេរីមិនអាចទាក់ទងដើម្បីសុំការបំភ្លឺពីភាគីរោងចក្របាននៅឡើយទេ៕