ប៉ូលិស, ទាហាននិងមេការក្រុមហ៊ុនឯកជនរងការប្ដឹងពីបទប៉ុនប៉ងសម្លាប់អ្នកភូមិ
ដោយ រដ្ឋាវិសាល
2009-06-29
យ៉ាងហោចណាស់ មន្រ្តីប៉ូលិសនិងទាហានរួមទាំងមេការនៃក្រុមហ៊ុន ឌីអឹម ហ្រ្គូប ចំនួន ៧នាក់កំពុងរងការប្តឹងចោទប្រកាន់ពីបទប៉ុនប៉ងសម្លាប់អ្នកភូមិ«សយ៉ោះលើ» ឃុំកាឡែង ស្រុកលំផាត់ ខេត្តរតនគិរី។
សឿង សំពិត អាយុ ៥៥ឆ្នាំ ជនជាតិភាគតិចទំពុននិងជាតំណាងអ្នកភូមិសាយ៉ោះលើ ២៣គ្រួសារ និងជាដើមបណ្តឹង បានបញ្ជាក់ថា អ្នកភូមិទាមទារឲ្យមានការផ្តន្ទាទោសក្រុមអ្នកចូលរួមក្នុងសកម្មភាពបាញ់ប្រហារអ្នកភូមិ ទាមទារឲ្យបញ្ឈប់ទន្ទ្រានយកដីអ្នកភូមិនិងសងការខូចខាតក្នុងការធ្វើឲ្យអ្នកភូមិរងរបួស ៖ «ទាមទារយកដីហ្នឹងមកវិញ ពីព្រោះអស់ប៉ុណ្ណឹងហើយ។ បើថាដោះស្រាយឲ្យត្រឹមត្រូវមានអី»។
ចំណែកអ្នកភូមិរងរបួសឈ្មោះ សឿង ច្រាត បានទាមទារឲ្យមានការទទួលខុសត្រូវក្នុងបញ្ហានេះដូចគ្នា ៖ «ទាមទារឲ្យវាសមរម្យនឹងច្បាប់ មិនមែនច្បាប់យកកាំភ្លើងមក យកប្រដាប់ឆក់មក មកគំរាមកំហែងអ្នកចម្ការ ដេញឆក់ ដល់ប្រជាជនរត់ប្រសេចប្រសាច វាបាញ់»។
អ្នកភូមិសាយ៉ោះលើ ចំនួនពីរគ្រួសារបានដាក់ពាក្យបណ្តឹងទៅតុលាការខេត្តរតនគិរី កាលពីថ្ងៃសុក្រ កន្លងទៅនេះ បន្ទាប់ពីអ្នកភូមិម្នាក់រងរបួសបាញ់ធ្លាយភ្លៅនិងជាង ១០នាក់់ទៀត រងការបាញ់គំរាមពីក្រុមកងប្រដាប់អាវុធដែលគេដាក់សម្រាប់ការពារក្រុមហ៊ុនឈ្មោះ ឌីអ៊ឹម ហ្រ្គូប នៅគ្រាដែលក្រុមនោះ បានហាមប្រាមមិនឲ្យអ្នកភូមិធ្វើការងារកសិកម្ម ដែលក្រុមហ៊ុននោះកំពុងមានជម្លោះដីធ្លី ជាង ២០០ហិកតារជាមួយអ្នកភូមិកាលពីដើមសប្តាហ៍មុននេះ។
មនុស្ស៧នាក់ដែលត្រូវអ្នកភូមប្តឹងមានឈ្មោះ ហ្វឿវី សម្បត្តិ ជាប៉ូលិសស្នងការដ្ឋាននគរបាលខេត្តឈ្មោះ ផល្លី, រ៉ា, ក្រូច, និងកែវ ជាទាហានខេត្ត និងឈ្មោះ មាស ម៉ុន ជាមេការក្រុមហ៊ុន ឌីអឹម ហ្រ្គូប។
ស្នងការរងប៉ូលិសខេត្តរតនគិរី លោក ផែន ឌីណា មានប្រសាសន៍ថា ប៉ូលិសបានបញ្ចប់ការស៊ើបអង្កេតពីករណីបាញ់អ្នកភូមិនោះហើយ តែលោកបដិសេធមិនប្រាប់ពីលទ្ធផលនៃការស៊ើបអង្កេតនោះទេ ពីព្រោះសំណុំរឿងនឹងត្រូវបញ្ជូនទៅតុលាការនៅរសៀលថ្ងៃច័ន្ទ ទី២៩ មិថុនានេះ។
មេបញ្ជាជាការយោធាខេត្តលោក ម៉ុង ថែន បដិសេធថា ទាហានលោកមិនជាប់ទាក់ទិនការបាញ់ប្រហារនោះទេ ៖ «បើគាត់ទៅវិញជាសិទ្ធិរបស់គាត់ ខាងខ្ញុំដឹងតែប៉ូលិសអ្នកបាញ់»។
ដូចគ្នានេះដែរ តំណាងក្រុមហ៊ុន ឌីអ៊ឹម ហ្រ្គូប លោក សាយ ចំរើន ធ្លាប់បានបដិសេធដូចគ្នា ហើយចោទអ្នកភូមិវិញថា ជាអ្នកដេញកាប់ពួកគេ ទើបមានការផ្ទុះអាវុធការពារខ្លួន។
មន្ត្រីសមាគមអាដហុកខេត្តរតនគិរី លោក ប៉ែន ប៊ុណ្ណារ៍ មានប្រសាសន៍ពីករណីនេះយ៉ាងដូច្នេះ ៖ «ការប្រើអំពើហិង្សា វាជាការទទួលខុសត្រូវរបស់ថ្នាក់ដឹកនាំរបស់អង្គភាពទាំងអស់នោះ»។
ព្រះរាជអាជ្ញារងអមតុលាការខេត្តលោក រស់ សារ៉ាំ មានប្រសាសន៍ថា លោកទទួលបានពាក្យបណ្តឹងអ្នកភូមិក្នុងរឿងនេះហើយ ចំណែករបាយការណ៍អង្កេតរបស់ប៉ូលិសលោកមិនទាន់ដឹងនៅឡើយ។
គួរបញ្ជាក់ដែរថា ក្រុមហ៊ុន ឌីអឹម ហ្រ្គូប ក៏កំពុងមានជម្លោះដីធ្លីជាង ៣០០ហិកតារជាមួយអ្នកភូមិប៉ាតាង ហើយក្រុមហ៊ុននេះបានប្តឹងចាប់អ្នកភូមិ ៣នាក់ ដាក់ពន្ធនាគារ និង ៦នាក់ទៀត បានរត់លាក់ខ្លួនក្នុងព្រៃនៅឡើយដើម្បីគេចពីការតាមចាប់ខ្លួនតាមដីកាតុលាការ៕
អត្ថបទដែលទាក់ទង
អ.ស.ប.អំពាវនាវឲ្យអាជ្ញាធររតនគិរីបញ្ឈប់ការយាយីដល់សកម្មជនសិទ្ធិមនុស្សនិងអ្នកសារព័ត៌មាន
ក្រុមសិទ្ធិមនុស្សស្នើឲ្យស៊ើបអង្កេតអំពើមិនត្រឹមត្រូវនៃអនុប្រធានតុលាការរតនគិរី
អ្នកភូមិនៅរតនគិរីនាំគ្នាផ្ដិតមេដៃស្នើសុំការវិលត្រឡប់នៃសកម្មជនសិទ្ធិមនុស្ស
សាលាឧទ្ធរណ៍បង្គាប់ឲ្យមានការស៊ើបអង្កេតបន្ថែមជុំវិញករណី ប៊ន សំណាង និងសុខ សំអឿន
អ្នកភូមិនៅរតនគិរីអះអាងថាមេភូមិមេឃុំបង្ខំពួកគេឲ្យទម្លាក់កំហុសលើអាដហុក
សមាគមអាដហុកសោកស្ដាយចំពោះការរំខានដល់ការងាររបស់ប៉ែន ប៊ុណ្ណារិ៍
មជ្ឈមណ្ឌលសិទ្ធិមនុស្សកម្ពុជាបារម្ភអំពីករណីផ្លាស់មន្ត្រីអាដហុកចេញពីរតនគិរី
មេធាវីទាមទារឲ្យលើកលែងការចោទប្រកាន់ចំពោះប៊ន សំណាង និងសុខ សំអឿន
អាដហុកផ្លាស់មន្ត្រីចេញពីរតនគិរីដើម្បីបញ្ចប់រឿងក្ដីតុលាការ
មតិ
អ្នកអាចបញ្ចេញមតិដោយបំពេញទម្រង់ខាងក្រោមនេះក្នុងទម្រង់ជាអក្សរសុទ្ធ។. មតិត្រូវតែអនុញ្ញាតដោយអ្នកសម្របសម្រួលនិងមិនបង្ហាញភ្លាមៗនៅលើទំព័រនេះទេ។ សូមអញ្ជើញត្រឡប់មកបើកទំព័រនេះម្ដងទៀតដើម្បីមើលថាតើមតិរបស់អ្នកត្រូវបានចុះផ្សាយឬអត់។
មើលមតិទាំងអស់.