លោក ចាន់ សុវ៉េត អនុប្រធានក្រុមអង្កេតរបស់សមាគមការពារសិទ្ធិមនុស្សអាដហុក (Adhoc) ដែលកំពុងបំពេញការងារនៅក្រៅប្រទេស និងជាជនម្នាក់ដែលតុលាការកោះហៅដែរនោះ និយាយនៅថ្ងៃទី២ ខែតុលា ថា ចំនួនរយៈពេលផ្ដន្ទាទោសនេះ ច្រើនហួសការស្មាន និងធ្វើឲ្យប្រជាពលរដ្ឋទូទៅមានការញញើតក្នុងការបញ្ចេញមតិ។
លោក ចាន់ សុវ៉េត និយាយថា ការកាត់ទោសនេះបង្ហាញថា តុលាការមិនឯករាជ្យ និងជាគំរូមិនល្អក្នុងការប្រើស្ថាប័នតុលាការ ដើម្បីផ្ដន្ទាទោសសកម្មជនការពារសិទ្ធិមនុស្ស។
លោក អ៊ូ វីរៈ ប្រធានមជ្ឈមណ្ឌលការពារសិទ្ធិមនុស្សកម្ពុជា មានយោបល់ថា ការកាត់ទោសនេះជាការគំរាមកំហែងមួយទាក់ទងជាមួយការការពារសិទ្ធិមនុស្ស និងការដោះស្រាយបញ្ហាដីធ្លីនៅកម្ពុជា។
ប្រធានមជ្ឈមណ្ឌលការពារសិទ្ធិមនុស្សកម្ពុជា យល់ថា ការកាត់ទោសនេះធ្វើឲ្យប៉ះពាល់កិត្តិយស និងកេរ្តិ៍ឈ្មោះរបស់ប្រទេសកម្ពុជា លើឆាកអន្តរជាតិ ធ្វើឲ្យគេមើលឃើញថា មិនល្អទៅវិញទេ។
ចំណែកលោក អំ សំអាត ជាអ្នកអង្កេតជាន់ខ្ពស់របស់អង្គការការពារសិទ្ធិមនុស្សលីកាដូ (Licadho) មានយោបល់ថា ការកាត់ទោសលោក ម៉ម សូណង់ដូ នេះ វាជាសំឡេងជួងមួយឲ្យសកម្មជនការពារសិទ្ធិមនុស្ស និងអ្នកសារព័ត៌មាន ឲ្យមានការប្រុងប្រយ័ត្នក្នុងការបំពេញការងារ។
លោក អំ សំអាត បន្ថែមថា ការកាត់ទោសលោក ម៉ម សូណង់ដូ នេះ ប្រហែលជាមិនបានធ្វើឲ្យគណបក្សកាន់អំណាចចំណេញសន្លឹកឆ្នោតក្នុងការបោះឆ្នោតរើសសមាជិកសភា ក្នុងឆ្នាំ២០១៣ ខាងមុខនេះឡើយ។
ចំណែកលោក នី ចរិយា ប្រធានក្រុមអង្កេតរបស់សមាគមការពារសិទ្ធិមនុស្សអាដហុក មានយោបល់ថា ការកាត់ទោសនេះធ្វើឲ្យសកម្មជនការពារសិទ្ធិមនុស្សមានភាពញញើតក្នុងការបំពេញការងារជួយប្រជាពលរដ្ឋ។
លោក ប៊ុន ឆន ដែលមានឈ្មោះត្រូវចៅក្រមតុលាការរាជធានីភ្នំពេញ ផ្ដន្ទាទោសឲ្យជាប់ពន្ធនាគារចំនួន ៨ឆ្នាំ និងពិន័យជាប្រាក់ចំនួន ៨លានរៀលដែរនោះ ធ្លាប់បាននិយាយប្រាប់វិទ្យុអាស៊ីសេរីថា ការចោទប្រកាន់ថា ក្រុមលោកបង្កើតតំបន់អបគមន៍នៅភូមិប្រម៉ា ឃុំកំពង់ដំរី នោះ ជាការមិនពិត។
ឆ្លើយតបចំពោះការលើកឡើងថា ការចាប់ខ្លួន រួចកាត់ទោសលោក ម៉ម សូណង់ដូ ឲ្យជាប់ពន្ធនាគារចំនួន ២០ឆ្នាំនេះ ជាសញ្ញាមិនល្អដល់បញ្ហាសិទ្ធិមនុស្សនោះ លោក កែវ រ៉េមី អនុប្រធានអង្គភាពព័ត៌មាន និងប្រតិកម្មរហ័សរបស់ទីស្ដីការគណៈរដ្ឋមន្ត្រី ក្នុងសន្និសីទកាសែតនៅថ្ងៃទី២ តុលា មានប្រសាសន៍ថា វាជារឿងធម្មតា មិនមែនជាការគំរាមកំហែងអីដល់បញ្ហាសិទ្ធិមនុស្សនោះទេ។
ចៅក្រមតុលាការរាជធានីភ្នំពេញ បានចោទលោក ម៉ម សូណង់ដូ ៤ចំណុច។ បទចោទទាំងនោះរួមមាន ទី១ បទផ្ដួចផ្ដើមគំនិតប្រឆាំងអ្នករាជការសាធារណៈ ទី២ ធ្វើកុបកម្មជ្រៀតជ្រែកខុសច្បាប់នៅក្នុងការបំពេញមុខងារសាធារណៈ ទី៣ ញុះញង់ឲ្យប្រជាពលរដ្ឋកាន់កាប់អាវុធខុសច្បាប់ និងទី៤ ប្រឆាំងនឹងអាជ្ញាធរស្របច្បាប់ដែលមានចែងក្នុងមាត្រាមួយចំនួននៃក្រមព្រហ្មទណ្ឌ។
លោក ជា បំរុង អនុប្រធានសមាគមអ្នកប្រជាធិបតេយ្យ មានប្រសាសន៍ថា ការកាត់លោក ម៉ម សូណង់ដូ ឲ្យជាប់ពន្ធនាគារនេះ នឹងធ្វើឲ្យសមាគមអ្នកប្រជាធិបតេយ្យជួបឧបសគ្គជាមិនខាន ពីព្រោះលោក ម៉ម សូណង់ដូ ជាប្រធាន និងជាប្រភពផ្ដល់ថាមពលឲ្យសមាគមនេះមានសកម្មភាព៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។