បទបង្ហាញនេះធ្វើឡើងក្នុងសិក្ខាសាលាបូកសរុបលទ្ធផលបញ្ចប់គម្រោងកែលម្អជីវភាពកសិករក្រីក្រជនបទ ក្រោមជំនួយថវិការបស់មូលនិធិជប៉ុន JFPR 9027-CAM កាលពីថ្ងៃព្រហស្បតិ៍ ទី១៩ ខែមិថុនា ឆ្នាំ២០០៨ ។
នាយកអង្គការសេដាក់ លោកបណ្ឌិត យ៉ង សាំងកុមារ ឲ្យដឹងថាកសិករ១៩២ភូមិ ក្នុង៥ខែត្រភាគខាងត្បូង មានខេត្តព្រៃវែង កំពង់ចាម ស្វាយរៀង កំពង់ឆ្នាំង និងតាកែវ បានប្តូរទម្លាប់ពីធ្វើស្រែតែ១មុខ ឬដាំបន្លែតែ១មុខ មកធ្វើប្រព័ន្ធកសិកម្មចម្រុះតាមបច្ចេកទេសថ្មី ។
លោកថាមន្រី្តសេដាក់និងមន្រ្តីក្រសួងកសិកម្ម ចុះអប់រំ៥ឆ្នាំនិងចងក្រងកសិករក្រីក្រខ្លាំងក្រោមប្រាក់ជំនួយពីមូលនិធិជប៉ុន ធ្វើឲ្យកសិករ១៤.២០០គ្រួសារលះបង់ភាពទំនេរងាកមកបង្កើនផលកសិកម្មខុសពីទម្លាប់មុន ដែលក្រោយការស្ទូង ដក ច្រូតកាត់ កសិករខ្លះទំនេរ ខ្លះធ្វើចំណាកស្រុកទៅស៊ីឈ្នួលក្រៅភូមិ ។
លោកបណ្ឌិត យ៉ង សាំងកុមារ បានមានប្រសាសន៍ថា ៖ «យើងឃើញប្រាក់ចំណូលមានការកើនឡើងពីចំនួន ១,៤លានរៀលក្នុងមួយគ្រួសារទៅ ២,៦លានរៀលក្នុងមួយគ្រួសារ គឺជាប្រាក់ចំណូលដែលបានមកពីការងារកសិកម្ម ។ អ៊ីចឹងជាមធ្យមគឺកំណើនប្រាក់ចំណូលមានការកើនឡើងចំនួន៨០%» ។
កសិករភូមិតាពយ ឃុំសំបូរ ស្រុកបាធាយ ខេត្តកំពង់ចាម លោក សោម សារូ ឲ្យដឹងថាគាត់ទទួលការអបរំធ្វើស្រែមិនប្រើជីគីមីនិងថ្នាំគីមីពុល និងមិនប្រើគ្រាប់ពូជស្រូវច្រើនក្នុងការដាំដុះ នាំឲ្យគាត់ចំណេញប្រាក់ច្រើនជាង១លានរៀលក្នុង១ឆ្នាំៗ ។
លោក សោម សារូ បានឲ្យដឹងថា ៖ «ពូជក្នុងដី៦០អា ធ្លាប់ប្រើពី ៨តៅ ទៅ ៩តៅអីអ៊ីចឹង ផលបានតែ ៩០ថាំងអីទេ តែដល់ខ្ញុំមកប្រើពូជ២០គីឡូ សំណាបខ្ញុំស្ទូងអត់អស់ផង ហើយផលខ្ញុំកើនទៀត» ។
ប្រធានក្រុមដាំបន្លែនៅភូមិថ្មរាប ឃុំពង្រ ស្រុករលាប្អៀរ ខេត្តកំពង់ឆ្នាំង អ្នកស្រី ទីវ ឆាត អះអាងថាគាត់ចេះដាំបន្លែ ចេះផលិតថ្នាំពុលផ្សំពីធម្មជាតិ ហើយលក់បន្លែធម្មជាតិចំណេញជាង១លានក្នុងមួយឆ្នាំ ៖ «គ្រួសារខ្ញុំផ្ទាល់តែម្ដងមួយឆ្នាំនេះបាន១លាន៥០ម៉ឺន» ។
រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ លោក អ៊ិត ណូឌី មានប្រសាសន៍ថាគម្រោង JFPR 9027-CAM មានបំណងកាត់បន្ថយភាពក្រីក្រនៅជនបទកម្ពុជា ។ គម្រោងនោះជួយកែទម្លាប់កសិករក្រីក្របំផុត ១៩២ភូមិ យកពេលទំនេរមកដាំដុះ មានជំនាញ ទាញយកផលច្រើនពីដី បង្កើនការងារនិងចំណូលក្នុងសហគមន៍ ហើយបានបន្ថយចំណាកស្រុក ។
ចំណែកតំណាងធនាគារអភិវឌ្ឍន៍អាស៊ី លោក តា ឌេអូ មានប្រសាសន៍ថា គម្រោង JFPR 9027-CAM បានអនុវត្តជោគជ័យធ្វើឲ្យថយចុះភាពក្រីក្រជនបទនៅភាគខាងត្បូងប្រទេសកម្ពុជា ។ លោកថាគម្រោងនោះជាមូលនិធិជប៉ុនបានផ្តល់មកកម្ពុជា តាមរយៈធនាគារអភិវឌ្ឍន៍អាស៊ីឲ្យក្រសួងកសិកម្ម និងអង្គការសេដាក់ យកទៅអនុវត្តពីខែមិថុនា ឆ្នាំ២០០៣មក និងអស់ទឹកប្រាក់ក្នុងខែមិថុនា ឆ្នាំ២០០៨នេះ ៕