អាជីវករផ្សារសុវណ្ណាសុំអន្តរាគមន៍ពីនាយករដ្ឋមន្ត្រីក្នុងការបញ្ចុះថ្លៃជួលតូប
ដោយ អ៊ុក សាវបូរី
2009-07-02
អាជីវករផ្សារសុវណ្ណាជាង១០០នាក់នាំគ្នាទៅសុំកិច្ចជួយអន្តរាគមន៍ពីនាយករដ្ឋមន្រ្តី ហ៊ុន សែន ដល់គេហដ្ឋានឯខេត្តកណ្តាល ខណៈការតវ៉ាអំពីការសុំបញ្ចុះតម្លៃជួលតូបជាមួយអ្នកគ្រប់គ្រងផ្សារមិនបានសម្រេច។
ក្រុមអាជីវករផ្សារសុវណ្ណាមានអ្នកលក់ខោអាវ ស្បែកជើង កាបូប គ្រឿងអេឡិចត្រូនិក គ្រឿងក្រអូប ជាដើម បានទាមទារឲ្យមានការបញ្ចុះតម្លៃជួលតូប៣០% ប៉ុន្តែម្ចាស់ផ្សារយល់ព្រមចុះថ្លៃឲ្យតែ១៣%ប៉ុណ្ណោះ។
តំណាងអាជីវករឲ្យដឹងថា ពួកគាត់១៣៨នាក់នេះគ្រាន់តែជួលតូបក្នុងផ្សារសុវណ្ណានោះលក់របស់របរប្រើប្រាស់ មុខរបរនោះតាំងពីបើកផ្សារលក់មិនដាច់សោះ ទន្ទឹមនឹងនោះសេដ្ឋកិច្ចពិភពលោកធ្លាក់ចុះ មនុស្សកាន់តែគ្មានប្រាក់ទិញយកទៅប្រើប្រាស់ ទើបពួកគាត់តវ៉ាសុំឲ្យម្ចាស់ផ្សារបញ្ចុះតម្លៃជួលតូបដល់៣០%នោះ បើពុំដូច្នោះទេពួកគាត់មិនអាចរកប្រាក់បង់ថ្លៃជួលក្នុងមួយខែៗរួចទេ ដូច្នេះហើយបានជាគាត់នាំគ្នារត់មករក លោក ហ៊ុន សែន ឲ្យជួយដោះស្រាយ។
តំណាងអាជីវករដដែលបានឲ្យដឹងថា ៖ «អ៊ីចឹងយើងចង់ឲ្យគេជួយសម្រួលចុះ៣០%ហ្នឹង មិនមែនបានន័យថា យើងអាជីវករហ្នឹងអត់ខាតទេ យើងខាតដែរតែយើងខាតមួយចំណែកហើយឲ្យផ្សារជួយខាតយើងមួយចំណែក»។
អាជីវករម្នាក់ទៀតបន្ថែមថា ប្រាក់ជួលទីតាំងក្នុងផ្សារសុវណ្ណា ១ម៉ែត្រការ៉េ ៣០ដុល្លារ អាជីវករយល់ព្រមជួលក្នុងតម្លៃនោះពេលមិនទាន់ចូលលក់ក្នុងផ្សារ។ នៅពេលផ្សារដំណើរការមិនដល់មួយឆ្នាំសេដ្ឋកិច្ចទូទៅធ្លាក់ចុះ អ្នកទិញជាច្រើនគ្រាន់តែនាំគ្នាមកមើលផ្សារទំនើបទើបបង្កើតថ្មី ពួកគេមិនសំបូរលុយជួយទិញរបស់របរយកទៅប្រើប្រាស់ទេ នាំឲ្យអ្នកលក់ដូរលក់ចេះតែមិនដាច់ ហើយខាតប្រាក់ឈ្នួលតូបរាល់ខែហើយខាតដើមកប់របស់របរទៀត បានសុំឲ្យម្ចាស់គ្រប់គ្រងផ្សារបន្ថយតម្លៃជួល។
អាជីវករនោះបន្តថា កាលពីដើមឆ្នាំ២០០៩ ម្ចាស់ផ្សារបានចុះឲ្យ១០%សម្រាប់ឆមាសទី១។ ឥឡូវចូលដល់ឆមាសទី២ ម្ចាស់ផ្សារចុះឲ្យ១៣% ប៉ុន្តែខាងអាជីវករសុំចុះ៣០ដោយសារការលក់ដូរកាន់តែមិនដាច់ ៖ «គេគំរាមយើងថា បើសិនជាយើងអត់ព្រមទៅផ្ដិតមេដៃទទួលយក១៣%ថ្ងៃហ្នឹងទេ គឺគេឈប់ចុះឲ្យហើយ។ ជំនុំគ្នាថា យើងសុខចិត្តមិនបើកតូបតែម្ដង រហូតដល់មានដំណោះស្រាយ យើងផ្អាកធ្វើអាជីវកម្មរហូតដល់មានដំណោះស្រាយ»។
វិទ្យុអាស៊ីសេរីបានទៅដល់ផ្សារនិងសុំការបំភ្លឺពីអគ្គនាយកផ្សារសុវណ្ណានោះ ប៉ុន្តែក្រុមសន្តិសុខក្នុងផ្សារបានឲ្យដឹងថា លោកអគ្គនាយកនិងនាយករងជាប់រវល់មិនអាចជួបបាន។
តាមការសង្កេតក្នុងផ្សារសុវណ្ណានោះក៏នៅមានតូបលក់ខោអាវ កាបូប មួយចំនួន នៅបន្តបើកលក់ និងកន្លែងលក់ដូរផ្សេងៗរបស់ក្រុមហ៊ុននានាកំពុងលក់ដូរផងដែរ ក្រោមការជួយការពារពីមន្រ្តីនគរបាល អាវុធហត្ថ រួមទាំងសន្តិសុខផ្សារជាច្រើននាក់ នៅខាងក្នុងនិងជុំវិញផ្សារសុវណ្ណានោះ។
បន្ទាប់ពីក្រុមអាជីវករធ្វើការតវ៉ានៅគេហដ្ឋានលោកនាយករដ្ឋមន្រ្តីនោះ ពួកគាត់បានឲ្យដឹងថា ខុទ្ទកាល័យនាយករដ្ឋមន្រ្តីបានទទួលយកលិខិតស្នើសុំឲ្យជួយអន្តរាគមន៍ដើម្បីបញ្ចុះតម្លៃជួលតូបផ្សារសុវណ្ណានោះហើយ ប៉ុន្តែការជួយបានឬអត់យ៉ាងណានោះ ពួកគាត់នឹងនាំគ្នាទៅខុទ្ទកាល័យលោកនាយករដ្ឋមន្រ្តីនៅថ្ងៃសុក្រ ទី៣ កក្កដាទៀត៕
អត្ថបទដែលទាក់ទង
អ្នករត់តាក់ស៊ីនៅបន្ទាយមានជ័យប្ដឹងក្រុមហ៊ុនពីបទធ្វើឲ្យខូចខាតរថយន្ត
ពលរដ្ឋនៅកំពង់ឆ្នាំងត្រេកអរចំពោះការបង្រ្កាបវង់ល្បែង
បដិមាព្រះវិស្ណុនិងព្រះនាងលក្សី្មត្រូវគេប្រទះឃើញនៅកំពង់ចាម
កម្មការិនីម្នាក់ត្រូវគេសង្ស័យថាស្លាប់ដោយសារខំធ្វើការខ្លាំងពេក
អំពើហិង្សានិងការរំលោភផ្លូវភេទកើនឡើងក្នុងឆ្នាំ២០០៩
អ្នកភូមិនៅស្រុកកណ្ដាលស្ទឹងរង់ចាំលទ្ធផលពីការចរចាតម្លៃអគ្គិសនី
អាជ្ញាធរខែត្រកណ្ដាលរារាំងការតវ៉ាពីបញ្ហាភ្លើងឡើងថ្លៃ
ប៉ូលិសប៉ុស្តិ៍នៅអន្លង់វែងរងការចោទថាអនុវត្តច្បាប់មិនសមរម្យ
អ្នកភូមិស្នើសុំធ្វើស្រែលើដីដែលអាជ្ញាធរហាមឃាត់ឡើងវិញ
ស្រ្ដីម្នាក់អះអាងថាជាម្ដាយបង្កើតរបស់កុមារីដែលត្រូវម្ដាយចិញ្ចឹមធ្វើបាប
មតិ
បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួលនិងអាចចុះផ្សាយបានយោងតាមលក្ខខណ្ឌនៃការប្រើប្រាស់របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរីមិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។
មើលមតិទាំងអស់.