លោក សុន ឆ័យ មន្ត្រីជាន់ខ្ពស់គណបក្សសមរង្ស៊ី បានឲ្យដឹងថា ពិធីបុណ្យនេះជាខួបលើកទី ១៥ឆ្នាំ ហើយ ដែលគណបក្សសមរង្ស៊ីបានប្រារព្ធពិធីបុណ្យឧទ្ទិសកុសលដល់វិញ្ញាណក្ខន្ធអ្នកស្លាប់ដោយអំពើភេរវកម្ម នៃការវាយប្រហារដោយគ្រាប់បែក មកលើហ្វូងបាតុករអហិង្សា កាលពីថ្ងៃទី៣០ ខែមិនា ឆ្នាំ១៩៩៧។
លោកឲ្យដឹងថា ពិធីនោះ លោក សម រង្ស៊ី ដែលជាប្រធានគណបក្សក៏នឹងថ្លែងបន្តផ្ទាល់តាមប្រព័ន្ធអេឡិចត្រូនិក ឬវីដែអូខនហ្វើរិន ពីក្រៅប្រទេស ដល់អ្នកចូលរួមនាឱកាសនោះដែរ។
លិខិតចុះថ្ងៃទី២៣ ខែមិនា ឆ្នាំ២០១២ របស់គណបក្សសមរង្ស៊ី ផ្ញើជូនលោក កែប ជុតិមា អភិបាលរាជធានីភ្នំពេញ បានបញ្ជាក់ថា ពិធីនេះ ចាប់ផ្ដើមពីម៉ោង ៨ព្រឹក ដល់ម៉ោង ១១ព្រឹក ដោយមានរាប់បាត្រព្រះសង្ឃចំនួន ៥០អង្គ និងមានពុទ្ធបរិស័ទចូលរួមប្រមាណ ៣០០នាក់។
ព្រឹត្តិការណ៍វាយប្រហារដោយគ្រាប់បែក កាលពីថ្ងៃទី៣០ ខែមិនា ឆ្នាំ១៩៩៧ បានបណ្ដាលឲ្យមានមនុស្សស្លាប់ចំនួន ១៦នាក់ និងរបួសជាង ១០០នាក់។ មកដល់ពេលនេះ សមត្ថកិច្ចមិនទាន់ចាប់បានជនល្មើសមកផ្ដន្ទាទោសនោះទេ៕
កំណត់ចំណាំ៖ ចំពោះអ្នកបញ្ចូលមតិនៅក្នុងអត្ថបទនេះ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណាដែលមិនជេរប្រមាថដល់អ្នកដទៃតែប៉ុណ្ណោះ។