សកម្មជនគណបក្សសមរង្ស៊ី នៅក្នុងឃុំព្រៃគ្រី បានជូនដំណឹងតាមទូរស័ព្ទថា សកម្មជនដែលត្រូវគេបានធ្វើឃាតម្នាក់នោះឈ្មោះ លន ចក់ នៅភូមិព្រៃគ្រី ៖ «គេយកពូថៅសម្លាប់ កាប់ក្បាលពីរពូថៅ និងបំពង់កមួយពូថៅ ។ ខ្ញុំទៅដល់បុគ្គលហ្នឹងស្លាប់បាត់ទៅហើយ គេនាំយកមកផ្ទះ ហើយខ្ញុំមិនដឹងថា ស្លាប់នៅម៉ោងប៉ុន្មានទេ» ។
ទោះជាយ៉ាងណាក៏ដោយ មន្ត្រីគណបក្សសមរង្ស៊ី ប្រចាំខេត្តកំពង់ឆ្នាំង លោក ឃី វណ្ណដេត បានមានប្រសាសន៍ថា លោកមិនអាចបញ្ជាក់ការពិតបន្ថែមក្នុងរឿងនោះបានទេ ដោយលោកកំពុងតែទាក់ទងដើម្បីរកព័ត៌មានជុំវិញឃាតកម្មនោះដែរ ។
មកទល់នឹងល្ងាចថ្ងៃអាទិត្យនាប្រមាណមួយម៉ោងមុននេះ សកម្មជនគណបក្សសមរង្ស៊ី ឈ្មោះ ខន សុខី បានឲ្យដឹងថា ជនសង្ស័យម្នាក់ឈ្មោះ កែម លន ត្រូវអាជ្ញាធរចាប់បាន ហើយការសន្និដ្ឋានជំហានដំបូងខ្លះ បានសង្ស័យថាជាការសម្លាប់ដោយសារទំនាស់ដី ៕