គណបក្សសមរង្ស៊ីអំពាវនាវសុំឲ្យជួយគ្រួសារ ហង្ស ចក្រា

ដោយ មឿង ទុម

2009-07-02

គណបក្សសមរង្ស៊ីអំពាវនាវដល់សប្បុរសជននានាមេត្តាចូលរួមជួយសម្រាលទុក្ខដល់ក្រុមគ្រួសារអ្នកសារព័ត៌មានខ្មែរក្នុងស្រុកមួយរូប គឺលោក ហង្ស ចក្រា ដែលត្រូវតុលាការក្រុងភ្នំពេញផ្តន្ទាទោសឲ្យជាប់ពន្ធនាគារ។

RFA Photo/Zakariya

ចាងហ្វាងកាសែតខែ្មរម្ចាស់ស្រុក លោក ហង្ស ចក្រា ដើរចេញពីតុលាការក្រុងភ្នំពេញ កាលពីថ្ងៃ៣ មិថុនា ២០០៩។

លោក ហង្ស ចក្រា អាយុ៥៥ឆ្នាំ ជាចាងហ្វាងកាសែតខ្មែរម្ចាស់ស្រុក ត្រូវបានតុលាការក្រុងសម្រេចផ្តន្ទាទោសឲ្យជាប់ពន្ធនាគារ១ឆ្នាំ និងផាកពិន័យជាប្រាក់៩លានរៀល កាលពីថ្ងៃទី២៦ ខែមិថុនា ឆ្នាំ២០០៩នេះ ពីបទផ្សាយព័ត៌មានមិនពិត និងពីបទបរិហារកេរ្តិ៍មន្ត្រីយោធានៃរដ្ឋាភិបាលកម្ពុជា។

ប៉ុន្តែមជ្ឈដ្ឋានសាធារណៈ ព្រមទាំងអង្គការជាតិនិងអន្តរជាតិ ជាបន្តបន្ទាប់បានចាត់ទុកថា សេចក្តីសម្រេចរបស់តុលាការក្រុងភ្នំពេញក្នុងការកាត់ទោសដាក់ពន្ធនាគារចាងហ្វាងកាសែតរូបនោះគឺអយុត្តិធម៌ ជាការបិទសិទ្ធិសេរីភាពក្នុងការបញ្ចេញមតិ។

អង្គការលើកលែងទោសអន្តរជាតិកាលពីពេលថ្មីៗនេះដែរក៏បានចេញសេចក្តីថ្លែងការណ៍បញ្ជាក់ថា ការកាត់ទោសនេះគឺផ្ទុយនឹងបទដ្ឋាននិងច្បាប់ស្តីពីសិទ្ធិមនុស្សអន្តរជាតិ។

គណបក្សសមរង្ស៊ីបានចេញសេចក្តីអំពាវនាវចុះថ្ងៃទី២ ខែកក្កដានេះ សូមឲ្យសប្បុរសជនទាំងនៅតាមប្រទេសដទៃនានាមេត្តាចូលរួមជួយសម្រាលទុក្ខដល់ក្រុមគ្រួសាររបស់លោក ហង្ស ចក្រា ផង ក្នុងគ្រាដែលលោកជាមេគ្រួសារត្រូវជាប់ក្នុងពន្ធនាគារ។

គណបក្សសមរង្សីបានឲ្យវិទ្យុអាស៊ីសេរីដឹងថា លោក ហង្ស ចក្រា មានភរិយានិងកូន៣នាក់កំពុងរស់នៅក្នុងទីក្រុងភ្នំពេញ។ អ្នកទាំង៤កំពុងបាត់បង់វត្តមានប្តីនិងឪពុកក្នុងការជួយចិញ្ចឹមបីបាច់ថែរក្សាក្រុមគ្រួសារ៕

បោះពុម្ព អ៊ីម៉េល