បក្សប្រឆាំងនឹងធ្វើពហិការមិនចូលរួមប្រជុំរដ្ឋសភាដើម្បីអនុម័តសមាសភាពគ.ជ.ប
h100412tn.mp3
តាមរបៀបវារៈនៃកិច្ចប្រជុំនោះ រដ្ឋសភាគ្រោងអនុម័តលើសមាសភាព គ.ជ.ប ដែលមានលោក អ៊ឹម សួស្តី នៅតែជាប្រធាន គ.ជ.ប ដដែល ហើយអ្នកស្រី ស៊ីន ជុំបូ ជាអនុប្រធាន។
តើកិច្ចប្រជុំនោះ សមាជិករដ្ឋសភារបស់គណបក្សប្រឆាំង នឹងចូលរួមប្រថាប់ត្រាទទួលស្គាល់សមាសភាពសមាជិក គ.ជ.ប ថ្មីឬទេ?
គណបក្សប្រឆាំងព្រមាននៅថ្ងៃទី៤ ខែតុលា ថា សមាជិករដ្ឋសភាចំនួន ២៩រូប មកពីគណបក្ស សម រង្ស៊ី និងគណបក្ស សិទ្ធិមនុស្ស នឹងធ្វើពហិការមិនចូលរួមប្រជុំរដ្ឋសភា ដើម្បីអនុម័តលើសមាសភាពគ.ជ.ប ក្នុងអាណត្តិថ្មីនោះទេ បើសិនសមាសភាព គ.ជ.ប នៅតែដដែល គ្មានការផ្លាស់ប្ដូរ។ នេះបើតាមការឲ្យដឹងពីលោក គង់ គាំ ប្រធានស្ដីពីគណបក្ស សម រង្ស៊ី។
នៅថ្ងៃទី១១ ខែតុលា សភាកម្ពុជា នឹងពិនិត្យពិភាក្សាសម្រេចលើសមាសភាពសមាជិក គ.ជ.ប ដែលក្រសួងមហាផ្ទៃបានស្នើឡើង។ មន្ត្រី គ.ជ.ប មិនបានទម្លាយឈ្មោះបេក្ខជនសមាជិក គ.ជ.ប ថ្មី ដែលស្នើឲ្យរដ្ឋសភាពិនិត្យសម្រេចនោះទេ។ តែប្រភពព័ត៌មាននានា បានឲ្យដឹងថា លោក អ៊ឹម សួស្តី នៅតែជាបេក្ខជនប្រធាន គ.ជ.ប ហើយអ្នកស្រី ស៊ីន ជុំបូ នៅតែជាបេក្ខជនអនុប្រធានដដែល។
លោក គង់ គាំ បញ្ជាក់ថា បើគ្មានការផ្លាស់ប្ដូរសមាសភាពដឹកនាំ គ.ជ.ប សមាជិកសភាគណបក្ស សម រង្ស៊ី និងសិទ្ធិមនុស្ស នឹងមិនចូលរួមការបោះឆ្នោតប្រថាប់ត្រាលើសមាសភាពដឹកនាំ គ.ជ.ប ថ្មី សម្រាប់ត្រៀមរៀបចំការបោះឆ្នោតជាតិឆ្នាំ២០១៣ ខាងមុខ៖ «ប្រសិនបើអត់មានសមាសភាព គ.ជ.ប ដែលគណបក្សសំខាន់ គណបក្សសង្គ្រោះជាតិ ដែលមានគណបក្ស សម រង្ស៊ី គណបក្ស សិទ្ធិមនុស្ស ផ្ដួចផ្ដើមទ្រទ្រង់ហើយនឹងគាំទ្រយ៉ាងប្តូរផ្តាច់នេះ ទទួលស្គាល់សមាសភាព គ.ជ.ប ជាមុនទេ យើងអត់បានចូលរួមថ្ងៃទី១១ ខែតុលា ទេ»។
ចំពោះការព្រមានមិនចូលរួមកិច្ចប្រជុំរបស់សមាជិករដ្ឋសភាគណបក្សប្រឆាំងនេះ វិទ្យុអាស៊ីសេរី មិនអាចសុំការបំភ្លឺពីលោក ងួន ញ៉ិល អនុប្រធានទី១ រដ្ឋសភាបានទេ នៅថ្ងៃទី៤ ខែតុលា ដើម្បីសាកសួរថាតើការធ្វើពហិការរបស់គណបក្សប្រឆាំង អាចធ្វើឲ្យប៉ះពាល់ដល់ដំណើរការកិច្ចប្រជុំសភាឬទេ? ដោយលោកបញ្ជាក់ថា កំពុងជាប់ប្រជុំ។
ទាក់ទងការទាមទារឲ្យមានការផ្លាស់ប្ដូរសមាសភាពសមាជិក គ.ជ.ប នាយកប្រតិបត្តិគណៈកម្មាធិការដើម្បីការបោះឆ្នោតដោយសេរី និងយុត្តិធម៌ នៅកម្ពុជា ខុមហ្វ្រែល (Comfrel) ធ្លាប់ប្រាប់ថា ការចាញ់ឈ្នះនៅក្នុងការបោះឆ្នោត វាជារឿងធម្មតា ប៉ុន្តែការជឿទុកចិត្តទៅលើអ្នករៀបចំការបោះឆ្នោត វាជារឿងសំខាន់។ លោកបន្តថា ការប្រកួតដែលមានអាជ្ញាកណ្ដាលត្រឹមត្រូវ វាធ្វើឲ្យអ្នកចាញ់ទទួលយកដោយមិនមានការតវ៉ា៖ «ពេលគេចាញ់ក៏អស់ចិត្ត ពេលឈ្នះក៏មានកិត្តិយស។ អានេះជាចំណុចសំខាន់។ វាមិនសំខាន់ថាដូរ គ.ជ.ប ទៅវាប៉ះពាល់អីនោះទេ។ ប៉ុន្តែ បើគេមិនសុខចិត្ត វាមានបញ្ហាដដែល។ គេគិតថា លទ្ធផលនោះវាប៉ះពាល់។ រឿងសំខាន់ គឺរឿងមើលអាប៊ីត និងការចូលរួមរបស់គណបក្សដែលប្រកួតប្រជែងនោះតែម្តង»។
ការទាមទារឲ្យមានការផ្លាស់ប្តូរសមាសភាពសមាជិក គ.ជ.ប ក៏មានលើកឡើងនៅក្នុងរបាយការណ៍ កាលពីពេលថ្មីៗនេះរបស់លោក សុរិយា ស៊ូប៊ែរឌី (Surya P. Subedi) អ្នករាយការណ៍ពិសេសរបស់អង្គការសហប្រជាជាតិ ទទួលបន្ទុកសិទ្ធិមនុស្សប្រចាំប្រទេសកម្ពុជា។
ទាំងគណបក្សប្រឆាំង ទាំងលោក សុរិយា ស៊ូប៊ែរឌី ចង់ឲ្យសមាសភាព គ.ជ.ប ប្ដូរចេញ និងឲ្យមានសមាសភាព គ.ជ.ប ថ្មី ដែលចេញមកពីចៅក្រមចូលនិវត្តន៍មានកិត្តិយស មេធាវីចូលនិវត្តន៍មានកិត្តិយស សាស្ត្រាចារ្យច្បាប់ជាន់ខ្ពស់ចូលនិវត្តន៍មានកិត្តិយស ដើម្បីធានាការបោះឆ្នោតនៅកម្ពុជា មានសេរីភាព និងយុត្តិធម៌ ដែលអាចទទួលយកបាន៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
-
ស្ដាប់ផ្ទាល់
(ព្រឹក ៥:៣០-៦:៣០ ល្ងាច ៧:៣០-៨:៣០) - សំឡេង
ភាសា
