បក្សសមរង្ស៊ីអំពាវនាវឲ្យបក្សសិទ្ធិមនុស្សមករួបរួម
2012.06.04
សេចក្ដីអំពាវនាវនេះ គឺដើម្បីធ្វើសេចក្ដីសម្រេចកំរិតមូលដ្ឋានមួយចំនួន ដូចជាប្ដូរមេភូមិមួយចំនួនតាមឆន្ទៈប្រជាពលរដ្ឋ ដើម្បីទប់ស្កាត់ការរឹបអូសយកដីធ្លីរបស់ប្រជាពលរដ្ឋដោយខុសច្បាប់ ការលុបបំបាត់អំពើពុករលួយនៅថ្នាក់មូលដ្ឋាន ការការពារទ្រព្យសម្បត្តិសាធារណៈ និងទប់ស្កាត់អំពើអយុត្តិធម៌ ដែលអ្នកមានអំណាចមួយចំនួនកំពុងប្រព្រឹត្តលើប្រជាពលរដ្ឋជាដើម។
ប្រធានគណបក្ស សម រង្ស៊ី ស្ដីទី លោក គង់ គាំ មានប្រសាសន៍នៅក្នុងសេចក្ដីអំពាវនាវនោះថា ការសាមគ្គីគ្នា រួបរួមគ្នារវាងក្រុមប្រឹក្សាឃុំសង្កាត់នៃគណបក្សទំាងពីរ នឹងធ្វើឲ្យមានការផ្លាស់ប្ដូរជាវិជ្ជមាននៅថ្នាក់មូលដ្ឋាន និងការពារប្រយោជន៍ប្រជាពលរដ្ឋបានដោយប្រសិទ្ធភាព។
ការអំពាវនាវរបស់លោក គង់ គាំ នេះ នៅខណៈដែលគណៈកម្មាធិការជាតិរៀបចំការបោះឆ្នោតកំពុងបូកសរុបលទ្ធផលការបោះឆ្នោតជ្រើសរើសឃុំសង្កាត់ កាលពីថ្ងៃទី៣ ខែមិថុនា ដែលលទ្ធផលបណ្ដោះអាសន្នគណបក្ស សម រង្ស៊ី បាត់បង់អ្នកគាំទ្រជាងឆ្នាំ២០០៧ ហើយមន្រ្តីជាន់ខ្ពស់គណបក្ស សម រង្ស៊ី បានប្រកាសមិនទទួលលទ្ធផលបោះឆ្នោតនេះ។
ភ្ជាប់ទៅនឹងបញ្ហានេះ លោក កឹម សុខា ប្រធានគណបក្សសិទ្ធិមនុស្ស ថ្លែងនៅក្នុងសន្និសីទកាសែតនាទីស្នាក់ការគណបក្ស កាលពីព្រឹកថ្ងៃទី៤ ខែមិថុនា ឆ្នាំ២០១២ ថា រូបលោកនឹងផ្តើមចរចាទៅគណបក្ស សម រង្ស៊ី ដើម្បីបើកច្រកឲ្យបក្សប្រជាធិបតេយ្យទាំងពីរ គឺគណបក្សសិទ្ធិមនុស្ស និងគណបក្ស សម រង្ស៊ី រួបរួមទៅជាបក្សតែមួយ ដើម្បីឈ្នះការបោះឆ្នោតជ្រើសរើសតំណាងរាស្ត្រអាណត្តិទី៥ នៅឆ្នាំ២០១៣ ខាងមុខ។
ទាក់ទងនឹងបញ្ហានេះ សារណជននឹងរង់ចាំមើលថា តើគណបក្សទាំងពីរនឹងរួបរួមគ្នា ឬយ៉ាងណា ពីព្រោះថា គណបក្សទាំងពីរធ្លាប់បានបរាជ័យលើការចរចារួបរួមគ្នានេះជាច្រើនលើកមកហើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។