បក្សប្រឆាំងស្នើរដ្ឋមន្ត្រីក្រសួងមហាផ្ទៃកែប្រែសមាសភាព គ.ជ.ប

គណបក្សប្រឆាំង២នៅកម្ពុជា បានចាត់ទុកការកែទម្រង់សមាសភាពគណៈកម្មាធិការជាតិរៀបចំការបោះឆ្នោត (គ.ជ.ប) គឺជាប្រការចាំបាច់ និងបន្ទាន់ ដែលត្រូវធ្វើនៅមុនការបោះឆ្នោតដ៏សំខាន់នេះ។

ដោយ សុ ជីវី
2012-09-01

h083112in.mp3

លោក យឹម សុវណ្ណ អ្នកនាំពាក្យគណបក្ស សម រង្ស៊ី បង្ហាញរបាយការណ៍ពីការចុះឈ្មោះបោះឆ្នោតស្ទួនរបស់មន្ត្រីរាជការ នៅទីស្នាក់ការគណបក្ស នារាជធានីភ្នំពេញ នៅថ្ងៃទី២៩ ខែឧសភា ឆ្នាំ២០១២។

RFA/So Chivy

គណបក្សប្រឆាំងចំនួនពីរ គឺគណបក្ស សម រង្ស៊ី និងគណបក្សសិទ្ធិមនុស្ស ស្នើរដ្ឋមន្ត្រីក្រសួងមហាផ្ទៃកែប្រែសមាសភាព គ.ជ.ប និងគណៈកម្មការរៀបចំការបោះឆ្នោតនៅគ្រប់លំដាប់ថ្នាក់ ដើម្បីធានាអោយការបោះឆ្នោតនៅកម្ពុជា បានប្រព្រឹត្តទៅដោយសេរី ត្រឹមត្រូវ និងយុត្តិធម៌ ដែលអាចអោយគណបក្សនយោបាយ មតិអង្គការសង្គមស៊ីវិលជាតិ និងអន្តរជាតិ និងជាពិសេសប្រជាពលរដ្ឋមានទំនុកចិត្ត។

លិខិតរួមគ្នារបស់គណបក្ស សម រង្សី និងគណបក្សសិទ្ធិមនុស្ស ដែលផ្ញើជូនលោកឧបនាយករដ្ឋមន្ត្រី ស ខេង រដ្ឋមន្ត្រីក្រសួងមហាផ្ទៃ ចុះថ្ងៃទី៣០ ខែសីហា បានលើកឡើងថា សមាសភាពរបស់ គ.ជ.ប ដែលបានរៀបចំការបោះឆ្នោតនៅកម្ពុជានាពេលកន្លងមក ពុំទទួលបានការទុកចិត្តពីគណបក្សនយោបាយ សាធារណជនជាតិ និងអន្តរជាតិ ថាបានបំពេញតួនាទីដោយឯករាជ្យ អព្យាក្រឹត្យ និងយុត្តិធម៌ឡើយ។

អ្នកនាំពាក្យគណបក្ស សម រង្ស៊ី លោក យឹម សុវណ្ណ មានប្រសាសន៍បន្ថែមថា ដើម្បីអោយការបោះឆ្នោតជ្រើសរើសតំណាងរាស្ត្រអាណត្តិទី៥ ដែលធ្វើឡើងនៅថ្ងៃទី២៨ ខែកក្កដា ឆ្នាំ២០១៣ គឺជាការបោះឆ្នោតដោយសេរី ត្រឹមត្រូវ និងយុត្តិធម៌ គឺចាំបាច់ត្រូវអោយមានការកែសម្រួល គ.ជ.ប ទៅតាមរូបមន្តដែលគណបក្សប្រឆាំងទាំង២បានស្នើឡើង៖ «ដើម្បីធានាថា សមាសភាពនោះនឹងត្រូវបានជ្រើសរើសឡើង បំពេញកាតព្វកិច្ចរបស់ខ្លួនប្រកបដោយតម្លាភាព ឯករាជ្យ អព្យាក្រឹតមិនលំអៀងទៅរកគណបក្សណា។ រួចហើយបានបញ្ជូនសមាសភាពហ្នឹងទៅប្រថាប់ត្រានៅសភា»។

រូបមន្តដែលបានស្នើឡើងនោះ រួមមានសមាសភាព គ.ជ.ប មាន៩រូប ត្រូវជ្រើសរើសដោយគណៈកម្មការមួយ ដែលមកពីគ្រប់គណបក្សនយោបាយ ដែលមានអាសនៈក្នុងសភា ចំណែកសមាសភាពរបស់គណៈកម្មការរាជធានី-ខេត្តរៀបចំការបោះឆ្នោត គណៈកម្មការឃុំ-សង្កាត់រៀបចំការបោះឆ្នោត និងគណៈកម្មការការិយាល័យរៀបចំការបោះឆ្នោត ត្រូវមានចំនួន៧រូប មកពីគ្រប់គណបក្សដែលមានអាសនៈក្នុងសភា។

អ្នកនាំពាក្យក្រសួងមហាផ្ទៃ លោក ខៀវ សុភ័គ មានប្រសាសន៍ថា គណបក្សប្រឆាំងមានសិទ្ធិក្នុងការស្នើឡើងនូវគំនិតរបស់ពួកគេ ប៉ុន្តែចំពោះការអនុវត្ត គឺត្រូវធ្វើតាមច្បាប់ជាធរមាន៖ «ជាសិទ្ធិរបស់គាត់ដែលបញ្ចេញមតិនៅក្នុងប្រទេសប្រជាធិបតេយ្យសេរី លោកអាចបញ្ចេញមតិបានទាំងអស់»។

ក្នុងមាត្រា១៣ នៃច្បាប់ស្ដីពីការបោះឆ្នោតជ្រើសរើសតំណាងរាស្ត្រ បានចែងថា ក្រសួងមហាផ្ទៃមានកាតព្វកិច្ចដាក់ជូនគណៈរដ្ឋមន្ត្រីនូវសេចក្ដីព្រាងសមាសភាព គ.ជ.ប យ៉ាងតិច១១ខែ មុនថ្ងៃបោះឆ្នោត។

បើទោះជាយ៉ាងណា នៅក្នុងការអនុវត្តជាក់ស្ដែងក៏មានការអះអាងថា គេតែងអោយមានការពិភាក្សាក្នុងចំណោមគណបក្សដែលមានអាសនៈក្នុងសភា ពីវិធីសាស្ត្រក្នុងការជ្រើសរើសសមាសភាព គ.ជ.ប ដែរ។

នាយកប្រតិបត្តិគណៈកម្មាធិការ ដើម្បីការបោះឆ្នោតដោយសេរី និងយុត្តិធម៌នៅកម្ពុជា ខុមហ្វ្រែល លោក គល់ បញ្ញា មានប្រសាសន៍ថា ការស្នើឡើងនូវវិធីសាស្ត្រនៃការជ្រើសរើសសមាសភាព គ.ជ.ប គឺជាការរួមចំណែករបស់គ្រប់ភាគីទាំងអស់។ លោក គល់ បញ្ញា បន្តថា ការពិភាក្សាក្នុងចំណោមគណបក្សដែលមានអាសនៈក្នុងសភា គួរតែបន្តធ្វើសម្រាប់ការជ្រើសរើសគណៈកម្មការរៀបចំការបោះឆ្នោតនៅគ្រប់លំដាប់ថ្នាក់។

លោក គល់ បញ្ញា៖ «ប៉ុន្តែទោះបីជាយ៉ាងណាក៏ដោយ ក្នុងឆ្នាំ២០០៦ កន្លងមក មានរបៀបជជែកគ្នាក្នុងចំណោមគណបក្ស។ ប៉ុន្តែបញ្ហាគឺការជជែកគ្នាលើកមុនហ្នឹង ភាគច្រើនគេឃើញថ្នាក់ជាតិ។ តែឥឡូវហ្នឹង គេត្រូវជជែកទៅដល់ថ្នាក់PEC (គណៈកម្មការរាជធានី-ខេត្តរៀបចំការបោះឆ្នោត គណៈកម្មការឃុំ-សង្កាត់រៀបចំការបោះឆ្នោត) ថ្នាក់CEC (គណៈកម្មការឃុំ-សង្កាត់រៀបចំការបោះឆ្នោត) អ៊ីចឹងទៅ ថាតើធ្វើម៉េចធានាអោយសមាសភាពហ្នឹងគេអាចទុកចិត្តបាន»។

លោក សុរិយា ស៊ូប៊ែឌី (Surya P. Sobedy) អ្នករាយការណ៍ពិសេសរបស់អង្គការសហប្រជាជាតិទទួលបន្ទុកផ្នែកសិទ្ធិមនុស្សនៅកម្ពុជា ក៏បានចាត់ទុកការកែទម្រង់ គ.ជ.ប គឺជាចំណុចសំខាន់នៅក្នុងរបាយការណ៍របស់លោក ដែលគ្រោងនឹងដាក់ជូនមហាសន្និបាតអង្គការសហប្រជាជាតិ។

បច្ចុប្បន្ន គ.ជ.ប មានសមាសភាព៩រូប គឺប្រធាន១រូប អនុប្រធាន១រូប និងសមាជិកចំនួន៧រូប ហើយគណៈកម្មាធិការនេះនឹងត្រូវតែងតាំងជាថ្មី ដោយព្រះរាជក្រឹត្យនៅក្នុងរយៈពេលយ៉ាងតិច៩ខែ មុនថ្ងៃបោះឆ្នោត៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។

អត្ថបទដែលទាក់ទង

មតិ (5)

ចុចត្រង់នេះដើម្បីបន្ថែមយោបល់របស់អ្នក

អ្នកអានអនាមិក

ពី សៀមរាប

បើមិនដូរសមាសភាពគ.ជ.ប ទេ បោះឆ្នោត ១០០ដង គឺគណបក្សcpp ឈ្នះទាំង១០០ដង។

Sep 02, 2012 05:47 AM

DARA

ពី STOCKTON

Mr. Makara, you are discouraging the United Nation not to step in to create an incoming independence Khmer national election that will be held on July 28, 2013. UN must do their work if needed by opposition parties and their people. The most important is first...

Sep 01, 2012 10:35 AM

សីហា

ពី បាត់ដំបង

អយុត្តិធម៌ ពិតជាមាន ប៉ុន្តែមិនដឹងថាបក្សមួយណាទទួលនូវភាពអយុត្តិធម៌នេះ។ ពេលនេះមានតែអ្នកប្រព្រឹតប៉ុណ្ណេាះដែលដឹងច្បាស់!!!

Sep 01, 2012 10:03 AM

មករា

ពី ភ្នំពេញ

តើអង្គការសហប្រជាជាតិមានអំណាចអ្វី??????
បញ្ហារាប់លានជំពូក អង្គការសហប្រជាជាតិ ដោះស្រាយ
មិនចេញផង គេមានពេលទំនេរណាស់ទៅរឺអី????????

Sep 01, 2012 08:32 AM

CheyVorman007

ពី AngKor Wat

តាមស្តាប់ទៅយល់ថាលោក ស ខេង មានតួរនាទីជាអ្នក
សំរេចរាល់កិច្ចការក្នុងក្រសួងនហាផ្ទៃ ដូចនេះយើងអាចដឹង
ថាគាត់ធំជាងគេនៅសន្ថាបណ្ណ័នោះលើលោកផ្កាយពីរទៅទៀត តែខ្មុំបារម្មណ៏ខ្លាចមានលោកខែបក្សអង្ការបាំងពពកចាំលត់គាត់ទៀតហ្ន?រួចចេះតែឆ្លើយថាច្បាប់ៗបន្លប់វិញ(ខ្មុំដឹងហើយថា
ក្នុងក្រសួងនិមួយៗគេធ្វើការតាមមុខសញ្ញា តែទុកចិត្តមិនបាន
ទេស្មែរ យ៉ាងម៉េចដែលហៅថានយោបាយឈ្នះឈ្នះ?)

Sep 01, 2012 07:35 AM

មើលមតិទាំងអស់.