គណបក្សសង្គ្រោះជាតិទៅចុះបញ្ជីនៅក្រសួងមហាផ្ទៃថ្ងៃទី២០

មន្ត្រីបក្សប្រឆាំងបានឲ្យដឹងថា គណបក្សសង្គ្រោះជាតិ ដែលប្រសូតចេញពីការរួបរួមរវាងគណបក្ស សម រង្ស៊ី និងបក្ស សិទ្ធិមនុស្ស នឹងចុះឈ្មោះផ្លូវការនៅក្រសួងមហាផ្ទៃ នាថ្ងៃចន្ទ ទី២០ ខែសីហា ឆ្នាំ២០១២។

ដោយ ដែន អយុធ្យា
2012-08-17

h081712ay.mp3

រូបសញ្ញាគណបក្សសមរង្ស៊ី និងគណបក្សសិទ្ធិមនុស្ស

Photo: RFA

អ្នកវិភាគនយោបាយសង្គម បានចាត់ទុកការបង្កើតគណបក្សថ្មីរួមគ្នារបស់បក្សប្រឆាំងទាំងពីរនេះ ជាពន្លឺឈានទៅរកជ័យជំនះក្នុងការបោះឆ្នោតជាតិអាណត្តិទី៥ ខាងមុខ។

គណបក្ស សម រង្ស៊ី និងគណបក្ស សិទ្ធិមនុស្ស កាលពីថ្ងៃទី១៦ ខែសីហា ឆ្នាំ២០១២ បានរៀបចំសមាសភាពមានសមាជិកចំនួន៨៥នាក់ ដើម្បីបង្កើតគណបក្សថ្មីមួយ មានឈ្មោះថា គណបក្សសង្គ្រោះជាតិ ឲ្យស្របតាមច្បាប់ស្ដីពីគណបក្សនយោបាយ។

លោក ប៉ុល ហំម មន្ត្រីនាំពាក្យគណបក្ស សិទ្ធិមនុស្ស និងជាអ្នកនាំពាក្យគណបក្សសង្គ្រោះជាតិ លោកបានឲ្យដឹងនៅថ្ងៃសុក្រ ទី១៧ ខែសីហា ថា គណបក្សទាំងពីរបានជ្រើសតាំងគណៈកម្មាធិការគណបក្សបណ្ដោះអាសន្នចំនួន៧រូប សម្រាប់គណបក្សថ្មី គឺមកពីគណបក្ស សម រង្ស៊ី ៤រូប និងបក្ស សិទ្ធិមនុស្ស ៣រូប ធ្វើជាថ្នាក់ដឹកនាំ ដើម្បីរៀបចំឯកសារចុះបញ្ជីគណបក្សនៅក្រសួងមហាផ្ទៃ។

លោក ប៉ុល ហំម ឲ្យដឹងថា លោក សម រង្ស៊ី ត្រូវបានជ្រើសរើសជាប្រធានគណៈកម្មាធិការបណ្ដោះអាសន្នក្នុងគណបក្សសង្គ្រោះជាតិ ទើបបង្កើតថ្មី ហើយរូបលោកជាអនុប្រធាន។

លោក សម រង្ស៊ី និងលោក កឹម សុខា កាលពីថ្ងៃទី១៧ ខែកក្កដា ឆ្នាំ២០១២ នៅទីក្រុងម៉ានីល ប្រទេសហ្វីលីពីន បានព្រមព្រៀងចុះហត្ថលេខាបង្កើតសម្ព័ន្ធភាពគណបក្សប្រឆាំង ក្នុងចលនាប្រជាធិបតេយ្យសង្គ្រោះជាតិ។

ការបង្កើតចលនានេះ ដើម្បីឈានទៅបង្កើតបក្សថ្មីមួយ ដើម្បីចូលរួមការបោះឆ្នោតជាតិអាណត្តិទី៥ នៅថ្ងៃទី២៨ ខែកក្កដា ឆ្នាំ២០១៣។

ប៉ុន្តែ ចលនានេះត្រូវបានលោកនាយករដ្ឋមន្ត្រី ហ៊ុន សែន ថ្លែងចំអក និងប្រដូចសម្ព័ន្ធភាពគណបក្សប្រឆាំងទៅនឹងព្យុះក្នុងក្អម ហើយថាគណបក្សប្រជាជនកម្ពុជា មិនព្រួយបារម្ភ ឬព្រឺព្រួចចំពោះចលនាសង្គ្រោះជាតិនេះបន្តិចណាទេ។

លោក ហ៊ុន សែន គ្មានជំនឿថា សម្ព័ន្ធភាពរវាងគណបក្ស សម រង្ស៊ី និងបក្ស សិទ្ធិមនុស្ស អាចមានអាយុកាលវែងទេ ព្រោះនឹងមានជម្លោះបែកបាក់ដណ្ដើមតួនាទីផ្តល់ជូនសមាជិកបក្សតែរៀងៗខ្លួន។

ទោះលោក ហ៊ុន សែន បានចំអកបែបនេះក្តី ប៉ុន្តែមន្ត្រីគណបក្សប្រឆាំង និងអ្នកវិភាគស្ថានការណ៍នយោបាយឯករាជ្យយល់ថា ប្រមុខដឹកនាំកំពុងភ័យបារម្ភចំពោះសម្ព័ន្ធភាពរវាងគណបក្សប្រឆាំងទាំងពីរ។

ត្រង់ចំណុចនេះ លោក ប៉ុល ហំម ថ្លែងថា ទោះលោក ហ៊ុន សែន ប្រកាសក្ដែងៗថាមិនភ័យខ្លាចសម្ព័ន្ធភាព ឬចលនាសង្គ្រោះជាតិរបស់គណបក្សប្រឆាំងក្តី តែក្នុងដួងចិត្តលោកព្រួយបារម្ភពេកក្រៃ។

បញ្ហានេះដែរ អ្នកវិភាគនយោបាយសង្គមមិនបង្ហាញអត្តសញ្ញាណម្នាក់ បានថ្លែងថា បើចលនាសង្គ្រោះជាតិ របស់គណបក្សប្រឆាំងអាចបង្កើតគណបក្សថ្មីមួយចូលរួមការបោះឆ្នោតជាតិអាណត្តិទី៥មែននោះ បក្សថ្មីនោះនឹងមានសំឡេងគាំទ្រប្រដំប្រសងគ្នាជាមួយបក្សកាន់អំណាច ឬអាចឈ្នះការបោះឆ្នោតជាតិថែមទៀត បើការបោះឆ្នោតគ្មានការគំរាមកំហែង មានឯករាជ្យ និងមានយុត្តិធម៌នោះ។

លោកស្រី មូរ សុខហួរ មន្ត្រីជាន់ខ្ពស់គណបក្ស សម រង្ស៊ី ក៏បានឲ្យដឹងថា គណបក្សថ្មីប្រសូតពីកិច្ចព្រមព្រៀងរវាងគណបក្ស សម រង្ស៊ី និងបក្ស សិទ្ធិមនុស្ស បានលេចចេញជារូបរាងហើយ មានឈ្មោះថា គណបក្សសង្គ្រោះជាតិ។ គណបក្សសង្គ្រោះជាតិ នឹងត្រៀមទៅចុះបញ្ជីផ្លូវការនៅក្រសួងមហាផ្ទៃឲ្យស្របតាមច្បាប់ស្ដីពីគណបក្សនយោបាយ នៅថ្ងៃចន្ទ ដើមសប្ដាហ៍ខាងមុខ។

លោកបណ្ឌិត ហង្ស ពុទ្ធា ជានាយកប្រតិបត្តិអង្គការឃ្លាំមើលការបោះឆ្នោត និចហ្វិក (Nicfec) លោកមិនវិភាគចំពោះលទ្ធផលបោះឆ្នោតរវាងគណបក្សកាន់អំណាច ឬបក្សប្រឆាំងមួយណាមានប្រៀបជាងបក្សណាទេសម្រាប់ការបោះឆ្នោតជាតិអាណត្តិទី៥ ឆ្នាំ២០១៣។ ប៉ុន្តែលោកថា បើការបោះឆ្នោតមានភាពយុត្តិធម៌ គ្មានការគំរាមកំហែង និងមានឯករាជ្យ គណបក្សថ្មីដែលកើតពីសម្ព័ន្ធភាពបក្សប្រឆាំងអាចមានសំឡេងគាំទ្រច្រើន។

ច្បាប់ស្ដីពីគណបក្សនយោបាយ ដែលបានអនុម័ត និងដាក់ឲ្យប្រើប្រាស់នៅឆ្នាំ១៩៩៧ ត្រង់ជំពូកទី២ ស្ដីពីការបង្កើតគណបក្សនយោបាយ កំណត់ថា ប្រជាពលរដ្ឋខ្មែរមានចំនួនយ៉ាងតិច៨០នាក់ មានអាយុពី១៨ឆ្នាំឡើងទៅ និងមានទីលំនៅជាអចិន្ត្រៃយ៍ក្នុងប្រទេសកម្ពុជា មានសិទ្ធិបង្កើតគណបក្សនយោបាយ ដោយគ្រាន់តែជូនដំណឹងជាលាយលក្ខអក្សរទៅក្រសួងមហាផ្ទៃ។

គណបក្សបង្កើតថ្មី ត្រូវបោះឆ្នោតជ្រើសតាំងគណៈកម្មាធិការគណបក្សបណ្ដោះអាសន្នមានសមាជិកយ៉ាងតិច៧រូប និងមានអាយុយ៉ាងតិច២៥ឆ្នាំ សម្រាប់រៀបចំបែបបទ និងបំពេញលក្ខខណ្ឌ នៃការសុំចុះបញ្ជីគណបក្សនយោបាយតាមការកំណត់ ដូចមានចែងក្នុងជំពូកទី៥ នៃច្បាប់ដើម្បីទទួលសុពលភាព។

ច្បាប់ស្ដីពីគណបក្សនយោបាយត្រង់ជំពូកទី៣ មាត្រាទី១៥ ក៏បានកំណត់ថា ប្រជាពលរដ្ឋខ្មែរម្នាក់ៗមិនអាចជាសមាជិកគណបក្សនយោបាយលើសពី១ ក្នុងពេលតែ១បានទេ។ ក្នុងករណីដែលបុគ្គលមួយរូបចូលជាសមាជិកគណបក្សដទៃ សមាជិកភាពក្នុងគណបក្សនយោបាយចុងក្រោយត្រូវចាត់ទុកជាបានការ។

ដោយឡែកការចុះបញ្ជីគណបក្សនយោបាយ ច្បាប់ស្ដីពីគណបក្សនយោបាយត្រង់ជំពូកទី៥ បញ្ជាក់ថា គណបក្សនយោបាយសុំចុះបញ្ជីគណបក្សត្រូវមានសមាជិកយ៉ាងតិច៤ពាន់នាក់ មកពីតាមបណ្ដាខេត្ត-ក្រុងនានា ក្នុងប្រទេសកម្ពុជា។ សមាជិកនោះមានអាយុចាប់ពី១៨ឆ្នាំឡើងទៅ មានអាសយដ្ឋាន ស្នាមមេដៃ មានប័ណ្ណសមាជិកគណបក្ស និងកាលបរិច្ឆេទចូលសមាជិកភាពគណបក្សនយោបាយឲ្យបានច្បាស់លាស់។

រីឯច្បាប់ស្ដីពីការបោះឆ្នោតជ្រើសតាំងតំណាងរាស្ត្រជំពូកទី៤ ត្រង់មាត្រា៣៤ថ្មី បានកំណត់ថា ពលរដ្ឋកម្ពុជាដែលគ្មានសិទ្ធិឈរឈ្មោះជាបេក្ខជនបោះឆ្នោតជ្រើសតាំងតំណាងរាស្ត្រ មានដូចជាជនត្រូវតុលាការផ្ដន្ទាទោសដាក់ពន្ធនាគារពីបទឧក្រិដ្ឋ ឬបទមជ្ឈិម និងមិនទាន់មាននីតិសម្បទាឡើងវិញ ឬជាជនត្រូវបានផ្ដន្ទាទោសដកសិទ្ធិបោះឆ្នោត។

រីឯជនដែលត្រូវដកហូតសិទ្ធិបោះឆ្នោត ឬជនត្រូវលុបឈ្មោះពីបញ្ជីបោះឆ្នោតបណ្ដោះអាសន្ន ផ្ដើមដោយគណៈកម្មាធិការជាតិរៀបចំការបោះឆ្នោត (គ.ជ.ប) ក៏គ្មានសិទ្ធិឈរឈ្មោះជាបេក្ខជនបោះឆ្នោតជ្រើសតាំងតំណាងរាស្ត្របានដែរ។

កាលបរិច្ឆេទនៃការចុះឈ្មោះតំណាងគណបក្សនយោបាយ ចូលរួមបោះឆ្នោតជ្រើសរើសតំណាងរាស្ត្រអាណត្តិទី៥ ចាប់ផ្ដើមនៅថ្ងៃទី២៣ ខែសីហា ដល់ថ្ងៃទី២២ ខែធ្នូ ឆ្នាំ២០១២។ ចំណែកកាលបរិច្ឆេទនៃការបោះឆ្នោតនឹងចាប់ផ្ដើមនៅថ្ងៃអាទិត្យ ទី២៨ ខែកក្កដា ឆ្នាំ២០១៣៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។

អត្ថបទដែលទាក់ទង

មតិ (5)

ចុចត្រង់នេះដើម្បីបន្ថែមយោបល់របស់អ្នក

khemara

ពី Seoul

In the name of all workers in Korea, we need change in cambodia.

Aug 18, 2012 10:57 PM

អ្នកអានអនាមិក

Cheer our New Party!!!!!!!!!!!!!!!! Our democracy is born strongly. And I hopefully think that this new party gonna win the next election coz people gain more acknowledgement about the bad ruling of the recent government. Human right abuses, land exploitation, corruption, freedom of speech, and nepotism are the failure for Phnom Penh government to win election.. Moreover, the land concession to neighboring countries for a long time, 99 years is a cool land losing to foreign countries, Vietnam because 99 years can be equal to two generations so the next kid won't be able know exactly how big our country is... and some land is located near the borders too, so it is easy for them to control dramatically.

Aug 17, 2012 08:40 PM

អ្នកអានអនាមិក

lol ! គណបក្សសង្រ្គោះជាតិ !!!

Aug 17, 2012 05:11 PM

អ្នកអានអនាមិក

ភាពអត់ការងារ ការអប់រំ បន្តាញផ្សព្វផ្សាយងករាជ្យ សុខមភាព ច្បាប់ការងារ ការប្រកាន់ពូជសាសន៏ ផ្លូវគ្មានគុណភាព សីលធម៏ក្នុងការធ្វើនយោបាយ សេវាកម្មរដ្ធ
ការផ្លាសប្តូរគំនិតអន់ថយរបស់ប្រជាជន អបិយជំនឿ សន្តិសុខ ការសូកប៉ាន់ ការបង់ពន្ធចូលរដ្ឆ...។តើអស់លោកមានវិធានការណ៏យ៉ាងណា? សូមពន្យល់ជាលក្ខណះបច្ចេកទេសនយោបាយ។

Aug 17, 2012 04:37 PM

Vuth Lee

Undeniable, it's clearly that Hun Sen must in the state of nervousness by acknowledges that the new party-the National Salvation Party is born. If play by the fair election rule, this new party is 100% going to win the 2013 coming election. Sam Raingsy and Kim Sokha had a very strong support by Khmer patriot inside Cambodia and abroad as well. Sam Raingsy and Kim Sokha also earned a firmly support from Europe and Americas politically and economically if get elected. Cambodia will see the real prosperity in all aspects after this new party in action. Long live the National Salvation Party!!!

Aug 17, 2012 04:09 PM

មើលមតិទាំងអស់.