សម រង្ស៊ី បង្ហាញសកម្មជនដែលត្រូវបានគំរាមឲ្យចូលបក្សប្រជាជន
ដោយ សុខ សេរី
2008-05-12
គណបក្សប្រឆាំងដឹកនាំដោយលោក សម រង្ស៊ី នៅថៃ្ងច័ន្ទនេះ បានលាតត្រដាងនិងបង្ហាញមុខសកម្មជនសំខាន់ៗរបស់ខ្លួន ១៥នាក់ ដែលគណបក្សនេះបានអះអាងថា ពួកគេបានរងការគំរាម អូសទាញ ទិញទឹកចិត្ត ដើម្បីឲ្យចុះចូលជាមួយគណបក្សប្រជាជនកម្ពុជា កំពុងកាន់អំណាចនៅគ្រាដែលការបោះឆ្នោតជាតិថៃ្ងទី២៧ ខែកក្កដា កំពុងតែឈានជិតមកដល់នាពេលខាងមុខនេះ ។
ប្រធានគណបក្សសមរង្ស៊ី លោក សម រង្ស៊ី ។
សកម្មជនទាំងនោះមកពីខេត្តកណ្តាល បន្ទាយមានជ័យ ស្វាយរៀង កំពង់ធំ កំពត កំពង់ស្ពឺ ព្រៃវែង និងក្រុងភ្នំពេញ ដែលពួកគេមានតួនាទីជាក្រុមប្រឹក្សាឃុំសង្កាត់ប្រចាំនៅមូលដ្ឋាន ។
លោក សម រង្ស៊ី មេដឹកនាំគណបក្សសមរង្ស៊ី នៅថៃ្ងច័ន្ទនេះ បានមានប្រសាសន៍នៅក្នុងសន្និសីទកាសែតនៅក្នុងទីស្នាក់ការធំរបស់លោកនៅក្នុងទីក្រុងភ្នំពេញថា មន្រ្តីមូលដ្ឋានរបស់គណបក្សប្រជាជនកម្ពុជា បានសន្យាផ្តល់មុខតំណែងសំខាន់ៗ និងលុយកាក់សម្រាប់អូសទាញឲ្យចុះចូលនោះ ។
លោក សម រង្ស៊ី ថ្លែងដូច្នេះថា ៖ «មានវិធីសម្លុត មានវិធីទិញ ប្រមាថគេ ។ សកម្មជនគណបក្សសមង្ស៊ី ដែលមានចំនួនច្រើនលើសលប់ គេសម្លុតអត់ខ្លាច និយាយអត់បាន ។ អ្នកលក់ខ្លួនឲ្យគេមួយដំបស្វា បញ្ចេញទូរទស្សន៍ គណបក្សប្រជាជនយកទៅបង្ហាញទូរទស្សន៍ ឆ្ការដៃ ឆ្ការជើង» ។
លោកស្រី ពៅ ហេង ជំទប់ទី២ ឃុំបែកចាន ស្រុកអង្គស្នួល ខេត្តកណ្តាល ខាងគណបក្សសម រង្ស៊ី បានមានប្រសាសន៍ថា មានមន្រ្តីមូលដ្ឋានរបស់គណបក្សប្រជាជនកម្ពុជា បានទូរស័ព្ទមកអូសទាញលោកស្រីចំនួន ៤ដងជាប់ៗគ្នាស្នើសុំឲ្យលោកស្រីចុះចូល ប៉ុន្តែ លោកស្រីបានបដិសេធ ៖ «លោកស្រីមកខ្ញុំមក ខ្ញុំឲ្យលោកស្រីគុណ ។ គុណយ៉ាងម៉េចទៅ ? ខ្ញុំថាអ៊ីចឹង ។ ថា មួយខែ ៨ម៉ឺន គុណនឹង៥ឆ្នាំ ។ ថាកុំនៅគណបក្សចាញ់ហ្នឹង មកគណបក្សឈ្នះទៅ....» ។
រីឯលោក សម រ៉ូប៊ីន ចៅសង្កាត់រងផ្សារធំថ្មីទី២ ក្នុងទីក្រុងភ្នំពេញបានថ្លែងថា លោកបានរងការគំរាមពីមន្រ្តីគណបក្សប្រជាជនកម្ពុជានៅគ្រាដែលលោកបានបដិសេធមិនព្រមចុះចូលតាមការអូសទាញនោះ ៖ «គេបានឲ្យក្រដាសខ្ញុំមួយសន្លឹកអានតាមគេ ពេលនោះខ្ញុំ... ហើយក៏ខ្ញុំឃើញទង្វើទាំងអស់នេះ អ្នកដែលទៅហ្នឹងគឺសុទ្ធតែអ្នកចាញ់បោកគេ ។ ខ្ញុំដាក់ពាក្យលាលែងវិញ គំរាមកំហែងថា ខ្ញុំទោះជាធ្វើការកន្លែងណា ក្រុមហ៊ុនណាមិនអាចធ្វើបាន រកស៊ីអីមិនបាន ដីខ្ញុំមានកន្លែងណាគេយកទាំងអស់» ។
ប្រតិកម្មទៅនឹងការចោទប្រកាន់ខាងលើនេះ លោក ង៉ោ សុវណ្ណ ជាអតីតតំណាងរាស្រ្តគណបក្សសមរង្ស៊ី ហើយបច្ចុប្បន្នជាមន្រី្តទីប្រឹក្សារបស់រដ្ឋាភិបាលកម្ពុជា និងជាប្រធានក្រុមពិសេសសម្រាប់ប្រតិកម្មរហ័ស បានមានប្រសាសន៍ថា នោះជាការបិទបាំងភាពខ្សោយនៃគណបក្សសម រង្ស៊ី តែប៉ុណ្ណោះ ។
លោក ង៉ោ សុវណ្ណ មានប្រសាសន៍ថា ៖ «រឿងចោទប្រកាន់គេថា គេគំរាម គេទិញហ្នឹង គ្មានអ្នកណាគេទិញរយៈពេលខ្លីហ្នឹង បានរាប់សែននាក់ទេ ចេញដោយសារខ្លួនឯងអាក្រក់ហ្នឹងមិនគិតទេ» ។
សូមរំឭកថា រហូតមកដល់ពេលនេះ ប្រភពបានឲ្យដឹងថា មានតំណាងរាស្រ្តគណបក្សសមរង្ស៊ី ចំនួន៤នាក់បានចុះចូលជាផ្លូវការជាមួយគណបក្សប្រជាជនកម្ពុជា ហើយនិងមានសមាជិកគណៈកម្មការនាយកចំនួន២០នាក់ក្នុងចំណោមសមាជិកសរុបចំនួន ១១៦នាក់ បានចុះចូលជាមួយគណបក្សប្រជាជនកម្ពុជា ។
ប្រទេសកម្ពុជាមានគម្រោងរៀបចំការបោះឆ្នោតជាតិនៅថៃ្ងទី២៧ ខែកក្កដា នាពេលខាងមុខនេះ ៕
ឧបករណ៍រឿង
|
ស្តាប់សំឡេង |
|
ថតសំឡេង |
|
អ៊ីម៉េល |
|
ព្រឹត្តិបត្រព័ត៌មាន |
|
បោះពុម្ព |
អត្ថបទដែលទាក់ទង
គណបក្សនយោបាយ១០ចូលរួមវេទិកាស្ដីពីច្បាប់ប្រឆាំងអំពើពុករលួយ
បក្សប្រឆាំងប្រតិកម្មនឹងលទ្ធផលសវនាការរបស់គណៈកម្មការរៀបចំការបោះឆ្នោតខេត្តកំពត
រូបសញ្ញាបក្សសិទ្ធិមនុស្សរាប់ពាន់សន្លឹកនៅស្វាយរៀងត្រូវគេលួចបក
បក្សប្រជាជននៅកំពង់ចាមរងការចោទថាបង្ខំឲ្យពលរដ្ឋគូសសន្លឹកឆ្នោតសាកល្បង
សមាជិកបក្សហ៊្វុនស៊ិនប៉ិចនៅកំពង់ឆ្នាំងប្រតិកម្មចំពោះបក្សសិទ្ធិមនុស្ស
ក្មេងជំទង់ម្នាក់ត្រូវចាប់ខ្លួនដាក់ពន្ធនាគារដោយសារបំផ្លាញស្លាកបក្សប្រជាជន
ស្លាកសញ្ញាបក្ស"រណឫទ្ធិ"នៅស្រុកកងមាស ខែត្រកំពង់ចាម ត្រូវគេលួច
បក្សសង្គមយុត្តិធម៌និងបក្សខ្មែរឈប់ក្រចងសម្ព័ន្ធភាពនឹងគ្នា
មន្ត្រីបក្សប្រជាជននៅស្រុកកងមាស ខែត្រកំពង់ចាម ហែកស្លាកសញ្ញាបក្សសមរង្ស៊ី
ការឃោសនាបោះឆ្នោតនៅសៀមរាប មានភាពល្អប្រសើរ បើទោះជាមានបញ្ហាខ្លះក៏ដោយ
