ផ្សារមូលបត្រកម្ពុជា ដែលបានរៀបចំតាំងពីឆ្នាំ២០០៦ បានចាប់ផ្តើមសកម្មភាពលក់ដូរភាគហ៊ុនជាផ្លូវការហើយ ហើយក្រុមហ៊ុនដំបូងដែលចុះបញ្ជីនៅក្នុងការលក់ដូរភាគហ៊ុនបានប្រកាសលក់ភាគហ៊ុនចំនួន ១៣លានភាគហ៊ុន ដោយក្នុងមួយភាគហ៊ុនមានតម្លៃចាប់ផ្តើមចំនួន ៦.៣០០រៀល។
លោក គាត ឈន់ ជាឧបនាយករដ្ឋមន្ត្រី និងជារដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ បានចូលរួមក្នុងពិធីចាប់ផ្ដើមលក់ដូរភាគហ៊ុនដំបូងរបស់ទីផ្សារភាគហ៊ុនកម្ពុជា។ លោក គាត ឈន់ បានមានប្រសាសន៍ថា ការប្រកាសចាប់ផ្តើមទីផ្សារភាគហ៊ុនកម្ពុជានេះ គឺជាជំហានធំមួយរបស់ប្រទេសកម្ពុជា លើវិស័យហិរញ្ញវត្ថុ និងជាការកើតមានផ្សារភាគហ៊ុនជាលើកដំបូងលើទឹកដីកម្ពុជា។
លោក គាត់ ឈន់ បានសង្កត់ធ្ងន់ថា ការមានផ្សារហ៊ុន ឬហៅថា ផ្សារមូលបត្រ គឺជាកំលាំងចលនាករណ៍មួយយ៉ាងសំខាន់សម្រាប់អភិវឌ្ឍសេដ្ឋកិច្ចជាតិ និងជានិមិត្តរូបនៃសេដ្ឋកិច្ចជាតិទាំងមូលផងដែរ ព្រោះវាផ្តល់ជម្រើសសម្រាប់ក្រុមហ៊ុនរដ្ឋ និងឯកជននានា ក្នុងការបង្កើនទុនវិនិយោគដើម្បីពង្រីកសមត្ថភាពផលិតកម្ម និងពង្រឹងសមត្ថភាពប្រកួតប្រជែងនៅក្នុងទីផ្សារជាតិ និងអន្តរជាតិ។
លោកបណ្ឌិត ហ៊ាន សាហ៊ីប ប្រធានក្រុមប្រឹក្សាភិបាលនៃក្រុមហ៊ុនផ្សារមូលបត្រកម្ពុជា ដែលបានចូលរួមក្នុងឱកាសប្រកាសដំណើរការផ្សារហ៊ុនកម្ពុជា បានឲ្យដឹងថា មូលបត្រ ឬ ភាគហ៊ុនដែលជាកម្មវត្ថុនៃការជួញដូរចាប់ពីពេលនេះតទៅ គឺជាភាគហ៊ុនរបស់រដ្ឋាករទឹកស្វយ័តក្រុងភ្នំពេញ ដែលជាក្រុមហ៊ុនដំបូងគេបានចុះបញ្ជីដាក់លក់ភាគហ៊ុននៅផ្សារហ៊ុនកម្ពុជា។ ភាគហ៊ុនលក់ដំបូងមានចំនួនប្រហែល ១៣លានភាគហ៊ុន ឬ ១៥% នៃមូលធនសរុបរបស់រដ្ឋាករទឹកស្វយ័តក្រុងភ្នំពេញ។ តម្លៃក្នុង ១ភាគហ៊ុន គឺ ៦.៣០០រៀល។
ក្រោយពេលមានការដាក់លក់បន្តិចមក អតិថិជនបានហ៊ានឲ្យតម្លៃភាគហ៊ុននោះ ក្នុង ១ហ៊ុនមានតម្លៃ ៩.៤០០រៀល ហើយបរិមាណជួញដូរសរុបមានចំនួន ៣៩២.៣១៣ភាគហ៊ុននៃភាគហ៊ុនសរុបរបស់រដ្ឋាករទឹកស្វយ័តក្រុងភ្នំពេញ។
លោក ឯក សុនចាន់ អគ្គនាយករដ្ឋាករទឹកស្វយ័តក្រុងភ្នំពេញ បានមានប្រសាសន៍ក្នុងពេលប្រកាសលក់ភាគហ៊ុននោះថា ការលក់ភាគហ៊ុនមួយចំនួនរបស់រដ្ឋាករទឹកស្វយ័តក្រុងភ្នំពេញនេះ ជាទង្វើមួយជួយជំរុញឲ្យផ្សារហ៊ុនកម្ពុជា អាចចាប់ផ្ដើមដំណើរការជាផ្លូវការបាន។
លោកឧកញ៉ា ស៊ន សុខណា ជាអគ្គនាយកក្រុមហ៊ុនសូណាត្រាស៊ី ឃ្យួរីធី ភីអិលស៊ី (SONATRA SECURITY PLC.) ឬក្រុមហ៊ុនមូលបត្រសូណាត្រា បានមានប្រសាសន៍ក្នុងពិធីប្រកាសចាប់ផ្ដើមជូញដូរភាគហ៊ុនថា លោកមានការរីករាយដោយសារការរង់ចាំផ្សារភាគហ៊ុននេះដំណើរការជាយូរមកហើយ។
នៅក្នុងឱកាសប្រកាសដំណើរការជួញដូរផ្សារហ៊ុននេះ លោកនាយករដ្ឋមន្ត្រី ហ៊ុន សែន បានផ្ញើសារជូនពរការចាប់ផ្តើមសកម្មភាពផ្សារហ៊ុននេះដែរ។
លោក គាត ឈន់ បានអំពាវនាវក្នុងពិធីបើកផ្សារហ៊ុននោះឲ្យក្រុមហ៊ុនដទៃទៀត ជាពិសេសសហគ្រាសសាធារណៈ ២ទៀតរបស់រដ្ឋ រៀបចំចូលខ្លួនចុះបញ្ជីក្នុងផ្សារមូលបត្រ ដើម្បីលក់ភាគហ៊ុនឲ្យបានឆាប់។
ផ្សារមូលបត្រកម្ពុជា ឬហៅជាភាសាសាមញ្ញថា ផ្សារហ៊ុនកម្ពុជា អាចដំណើរការបាន ដោយសារមានការជួយបង្ហាត់បង្រៀន និងកិច្ចសហការពីក្រុមហ៊ុនផ្សារមូលបត្ររបស់ប្រទេសកូរ៉េខាងត្បូង៕
កំណត់ចំណាំ៖ ចំពោះអ្នកបញ្ចូលមតិនៅក្នុងអត្ថបទនេះ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណាដែលមិនជេរប្រមាថដល់អ្នកដទៃតែប៉ុណ្ណោះ។